Ena Sega ni Rawa ni Yaco vei Au

Peresitedi James E. Faust

iKarua ni Daunivakasala ni Mataveiliutaki Taumada

Na nomu veisiga ni mataka ena rairai sega toka ni vakairogorogo se vutuniyau, ia ena rawa ni vakaibalebale ka veivakacegui. Nanuma ni veika e da cakava ena bula qo ena laki voqa ena bula tawamudu.

O i kemuni na noqu itokani ni matabete ni Kalou, na itavi ni vosa vei kemuni e na bogi nikua sa bau veivakauqeti sara ga. Au sa masulaka na veiuqeti kei na veivakasalataki kau nuitaka ni ko ni na kila na veika kau na tukuna.

E dua na vakabauta sega na kena dina, o ya sa ikoya ni nanuma ni tamata ni ra sa rui kaukaua. E lewe levu sara era nanuma ni ra kaukaumamea, ka ra kaukauwa me ra vorata rawa kina na veivakatovolei cava ga. Era vakalialiai ira ga vakaira ni ra vakasamataka, “ E na sega ni rawa ni yaco vei au.” E vakaoqo na vakasama nei Bertrand Russell, “E da vaka taucoko na taki ka a yadra mai na Siga ni Soli Vakavinavinaka ka namaka tiko na vakasigalevu me vaka ga na kena ivakarau. E na rawa ni yaco vei keda taucoko sara e na veigauna.” 1 Kemuni na Taciqu, “E levu sara na ka eda dau yaco vei keda e na bula qo e dau vakatau mai na veika e dau vakatikina ga na noda raica.

E dau talanoataka o Peresitedi Charles W. Penrose e dua na italanoa me baleta e dua na vakailesilesi mai na Titanic ka dau tukuna ni ra sa sega ni rerevaka na “ E dua na Kalou, tamata se tevoro,” baleta ni Titanic e sa kaukauwa sara ga na kena buli ka na rawa kina ni vorata na coqa kei na so na waqa, se veitaratara kei na so tale na idre e so, ka oka kina na waicevata. Na Titanic e rauta ni tolunadrau na mita na kena balavu, 12 na itaba e cake, ka tara mai na sitila vivinaka duadua. E na bogi ni leqa o ya ni Epereli 14, 1912, o ira na veiwaqa tale e so e ra sa veivakasalataki mai me baleta na waicevata ka tu mai liu. Ia na Titanic e tosoya tikoga na kena totolo, soko vaka ki na Wasawasa vaka Atalanitika. E na gauna era qai raica kina na waicevata na yadra sa bera. Sa sega ni rawa ni veisautaka na nona kosi, ka basuraka yani na waicevata na muailiu ni waqa, ka vakavuna e levu sara na qara. E lutudromu ki na boto ni sauloa na waqa vou oqo na Titanic e na loma ni rua na auwa 40 na miniti. E sivia ni 1500 na tamata era luvu.

E dau vakawasoma ni 1/8 ni waicevata e dau tiko e na dela ni wai e cake. Na waicevata e na vanua ni batabata e dau kaukauwa ka dau maroroya tu ga na 7/8 ni waicevata e na loma ni wai. E mataqali vata ga vei keda, na nona a sotava na Titanic na waicevata. E dau wasoma e rawa walega ni da raica na tiki ga ni leqa ka tu mai liu.

Na italanoa makawa e sinai e na ivakaraitaki ni turaga ka tu vei ira na isolisoli kei na kila ia e na dua ga na gauna ni malumalumu, era biuta laivi saraga na nodra bula yalataki. Na Tui o Tevita e dua na kena ivakaraitaki. E na nona bula ni cauravou e musu donu, yaloqaqa, ka sinai e na vakabauta. E vakamateya na tuwawa vakarerevaki, o Kolaiaci. E mai yaco me tui. E taukena na veika e vinakata e dua na turaga. Ia e na gauna e raici Pacisepa kina, e sa vinakati koya sara, e dina ga ni watina tale e dua na turaga. E vakauti Uraia na Itaiti kina tikina ki liu ka dau sa katakata tiko kina na ivalu me rawa ni vakamatei kina. A mate o Uraia e na ivalu ka qai vakamautaki Pacisepa o Tevita. Me isau ni ivalavala ca o ya, e vakayalia kina o Tevita na veika a dodonu me taukena vakayalo. Mai na veika vivinaka a rawata o Tevita, e levu sara na ka e a vakayalia baleta ni vakatara me rawai koya e dua na nona malumalumu vakatamata.

Au a rogoca e dua na tama ni tukuna vua na luvena tagane, “Au rawa ni draiva voleka sara ki na ibili mai vei iko baleta ni sa dede na noqu draiva mai vei iko.” E nanuma o koya ni sa tiko vua na lewa ia e tikoga vua na vakalecalecava. Na leqa ni kena vakayagataki na veika e sotavi me idusidusi baleta ni iotioti ni vakatovotovo e dau vakawasoma ni dau liu mai ka qai muri mai na lesoni. E so na tamata era nanuma ni nodra yabaki kei na veika era sotava mai e solia vei ira na veivakarautaki me ra vorata kina na veivakatovolei. Qo sa dua na ka lasutaki.

Au nanuma lesu niu a rogoci Peresitedi J. Reuben Clark Jr. a talanoataka e dua na gauna ka a lako kina e dua na luvena ki na dua na veibuku. E a kerei rau me rau lesu mai e na dua na gauna yalataki. A tarogi tamana e na yalo rarawa, ka lako mai na kena tukuni tikoga kei na yalo e vakusakusa na gone, “Tamaqu, na cava na leqa, e sega beka ni o vakabauti au?

“ Na nona isau ni taro e kidacala kina o luvena ni kaya, ‘ Sega, [na luvequ], au sega ni vakabauti iko. Au sega sara mada ga ni vakabauti au.”

Io e so na ka “e sega ni rawa ni yacovi keda,” Au nuitaka ni da na vuli mai na ivakasala nei Peresitedi Spencer W. Kimball: “Tauyavutaka na nomu ivakarau me rawa kina ni, veigauna kecega, o na sega kina ni vakatulewa ka baci vakatulewa se cava o na cakava ni o sotava na veivakatovolei vata ga o ya. E dodonu mo na vakatulewataka ga vakadua e so na ka. Sa dua na veivakalougatataki levu ni da sa galala mai na mosimosi ni veigauna kecega ni dua na veivakatovolei. Ni da cakava o ya e kania na gauna ka sa rui rerevaki.”

E dua beka ena veiqatitaka e na nona vakasama, “Dua ga na vakayagataki ni waigaga e na sega ni vakaleqai au.” E na sega beka ni rogorogo bibi sara ia au kerea mo na kila na kaukauwa ni waigaga. Meu tukuna na veika ka a tukuna e dua e a dau vakayagataka. “ E sega ni na lewai na waigaga. E na lewai iko. E na imatai ni gauna, o na sega ni vakila e dua na ka.” O ya sara ga na gauna e na kidomoki iko kina.”

“Dua walega na itibi—meu vakila ga kina na kena ikanakana.” Ia mo qarauna na leqa ka na kauta mai. Na nikotini e dau manamana kaukauwa. E va walega na itibi sa na rauta me kauta e dua … me manamana tavako.

“Dua walega na tavaya bia.” E da sega ni kila na noda ivakarau me na dua e manamana bia kina ia e dua na kena gunuvi sa na rawa ni kauti iko kina dua tale. E na vinaka sara kevaka mo kua ga ni gunu e na imatai ni gauna. Ko na qai kila kina ni o na sega ni vakauti ki na so tale.

“Na voli ni dua ga na tikite ni lotari.” Qo e leqa levu mai na manamana e so. O na nanuma beka ni veimau ilavo e sega ni kauta mai na manamana baleta ni sega ni curu ki na yago, ia me vaka a vola e dua wale toka ga qo, “O ira na veimau ilavo e ra bolea na leqa ka sega walega ni ilavo. Na nodra bula kei na bula ni matavuvale sa na tu talega kina na leqa.”

‘Dua walega na nomu raica na iyaloyalo ca e na initaneti se dua walega na nomu raica na iyaloyalo lobi e na mekesini ka na kauta mai na gagano ca. E rogorogo mamada ga ia na ka e da raica sa dredre sara ga me da lako tani mai kina ni vakatauvatani kei na ka eda biuta e lomada. E lewe levu na kaivesu ivakarau kaukauwa e ra sa vakadinadinataka ni ra tekivuna na nodra basulawa ena nodra sarava walega na iyaloyalo ca.

E so beka era na kaya ni veivakamarautaki sega ni vinaka nikua se gauna cava ga ni sa DONU. Ia qo sa dau wasoma ni dau kauti keda ki na ivalavala kaukauwa, gagano ni veimaliwai tawadodonu, vosa vakaisi, cavuta walega na yaca ni Turaga, kei na so tale na veika ca

Au sa vosa sara vakabalavu me baleta na veika o sega ni vinakata me yaco vei iko. Me da vakaraica mada e so na veika vivinaka ka o na vinakata me yaco vei iko. Kevaka o na vinakata mo tauca na vua ni gugumatua, na veika vivinaka e na yaco vei iko, e rawa ni sivia sara na nomu tadra kei na ka o a namaka! E dau wasoma eda sega sara ga ni bau raica na ka eda rawa ni rawata i na marau kei na veika e da rawa ni rawata e na bula qo kei na bula tawamudu baleta, me vaka a kaya na iApositolo o Paula, “ Edaidai eda sa raica me vaka na titiro e na iloilo buwawa.” Ia na iloilo e rawa ni serau ka savasava vakakarisitala e na veiuqeti ni Yalo Tabu. Na i Vakabula e yalataka vei keda ni Dauniveivakacegui, e na “vakavulici kemudou e na ka kecega,” kau a “vosataka vei kemudou,” ka na “tuberi kemudou ki na ka kecega e dina.”

E dodonu me da nanuma vinaka ni vakaiyalayala ga na noda isolisoli kei na rawa ka, ia ni vakatoroicaketaki e na veiuqeti ni Yalo Tabu, na ka eda rawa ni rawata e vakalevutaki vaka vicavata. O na gadreva na veivuke ni dua na kaukauwa ka sivia na nomu kaukauwa me na rawa ni o cakava e so na ka yaga ka dau sagasagai dredre. O i kemuni na cauravou e rawa ni soli vei kemuni na gauna kei na veivakalougatataki ka sivia sara na nomuni tatadra kei na ka o ni dau namaka. Na nomu veisiga ni mataka ena rairai sega toka ni vakairogorogo se vutuniyau, ia e na rawa ni vakaibalebale ka veivakacegui. Nanuma ni veika eda cakava e na bula qo e na laki voqa e na bula tawamudu.

E so vei kemuni na cauravou e se sega beka na nomuni ivakadinadina ni itekitekivu vakayalo ni Lotu oqo me vakataki ira na nomuni itubutubu. O na gadreva beka mo na vakadeitaka sara ga ni o Josefa Simici a raica dina e na raivotu na Kalou na Tamada kei na Luvena, o Jisu Karisito, kei na Vola i Momani a vakadewataki dina mai na peleti koula. E na tiko beka e so na yalo vakatitiqa me baleta na lawa ni ikatini, na lawa ni tiko savasava, se na Vosa ni Vuku. Qo e sega ni ka e duatani sara vei ira na itaba gone vakataki iko. Na nomu vakabauta e se bera beka ni vakatovolei vinaka sara. O se bera beka ni valataka na nomu vakabauta se ivakarau ni bula. Au vakadeitaka vei iko ni veika lelevu e rawa ni yaco vei iko. E rawa ni o ciqoma na ivakadinadina tawayavalati rawa ni oqo na Lotu i Jisu Karisito, kei na taucoko ni kosipeli sa vakalesui mai ki vuravura e na vuku ni itavi e qarava o Josefa Simici. Ia na ivakadinadina o ya e na sega beka ni lako mai me yacova ni sa vakatovolei na nomudou vakabauta.

E na vuqa na yabaki sa oti e rau a kaciva e dua na cauravou gone sara e rua na Vakaitutu Raraba me peresitedi vou ni dua na iteki. A vakaraitaka na peresitedi vou ni iteki e na nona sauma ni na gumatuataka na nona itavi ka na sega ni kerea e dua na lewe ni nona iteki me na gugumatua cake mai vua. Ka qai mai wasea na nona ivakadinadina ni vakabauta na kosipeli mai na utona taucoko ka na tutaka me bulataka tiko.

Ni oti o ya e na gauna ni vakasigalevu e dua na Vakaitutu Raraba a mani taroga na peresitedi vou ni iteki oqo se kila deivaki ni dina na kosipeli. A sauma ni sega. Na i Apositolo qase a qai kaya tale vua na ikarua ni i apositolo, “E kila vinaka me vakataki iko sara ga. Na ka ga e sega ni kila ni kila tiko ko koya. E na dua na gauna lekaleka e sa na kila kina… . Kakua ni o leqataka.”

Sega ni dede, a qai vakadinadinataka na peresitedi ni iteki vou ni mai cava toka ga e dua na ka ni veiuqeti vakayalo, “E turu na wai ni mataqu ni vakavinavinaka vua na Turaga e na nona veitaqomaki, taucoko, kei na ivakadinadina taucoko ka lako mai ki na noqu bula e na cecere ni cakacaka oqo.”

E lewe levu vei keda e sega soti ni vakila na veika e kila tiko. E dina ga ni da sa vakavulici e na kosipeli, e da na sega beka ni kila vinaka sara na veika e tugana na Turaga ki na “lomada” ka vola ki na “yaloda.” O ikemuni na cauravou ni veiyalayalati, o ni sa taukena na iyalayala e vuqa. O ni rawa ni sivi ira sara na “daumusu kau se dautaki wai.”

Au sega ni kaya niu sa kila vinaka na ivakavuvuli ni kosipeli, ia au sa mai vakadeitaka ga na vakayalo kei na kaukauwa ni Lotu oqo. Ia e lako mai vei au e veigauna, vakalailai eke, vakalailai mai kea. Au sa qai kila niu sa kila, me vaka ga ni ko rawa ni kila ni o sa kila. E rawa ni yaco vei iko.

Na kila ka e rawa mai na vakabauta. E na gauna kei na siga oqo e dodonu me da na kila na dina ni veika a tiko e na peleti koula, veitalia ke da sega ni raica. E ra sa sega ni tiko me da raica ka tara me vaka a yaco vei ira na Tolu kei na Walu na iVakadinadina. E so vei ira na raica ka taura sara ga na peleti koula era sega ni tudei e na vakabauta e na lotu. Na raica e dua na agilosi e sa gauna talei, ia e vinaka sara me da kila na ilesilesi vakalou ni i Vakabula e na vakabauta kei na ivakadinadina ni Yalo Tabu.

O na rawa talega ni kila na veika o kila me vaka e dua na luvena tagane na Kalou e na bula mai liu. E rawa ni yaco vei iko. Ia e na sega ni yaco ga mai vakataki koya. O na cakacakataka na vakabauta. Na sala duadua ga me rawati kina na kilaka vakayalo ka laiva me waqawaqa rarama tiko sa ikoya na yalomalumalumu, daumasu, ka dau sasaga vagumatua me maroroi kece na ivakaro.

E na dolavi ni 2002 ni Qito ni Vuravura e na Olimipiki e Salt Lake City, era a laga kina na MormonTabernacle Choir kei na Utah Symphony Orchestra e dua na sere totoka ka a vola o John Williams me vakatabakidua me sere ka uto ni Qito. A kena iulutaga “Kaci ni Jabeni.” Na itekivu ni vica na vosa ka veivakayavalati sara na: citius (totolo), altius (cecere), kei na fortius (kaukauwa), ka sa uto tiko ni Olimipiki me tekivu sara mai na 1924.

O i kemuni na veitacini ni matabete, e da bula tiko e na dua na gauna talei. E sega vakadua ni bau dua na gauna e na Lotu ka da bau sivia kina na ivakadinadina e na dina ni cakacaka tabu oqo. E ra tiko na noda dauveivakasewasewani kei na dauveidusi me vaka ga e ra sa dau tu ga mai liu. Ia e se bera ni bau kaba cecere, toso totolo, se me kaukauwa me rawati kina na ilesilesi. Sa kena gauna oqo vei keda kece sara me da kakavaki ki cake ka toso ki liu. E na cakacaka ni Kalou sa dodonu talega me da vakatotolo, laveti cake na ivakatagedegede ni cakacaka; ka taketetaki na cecere kaukaua vakayalo, ia me da vakararavi ki na kaukauwa ni Kalou. E rawa ni yaco vei iko.

Na sala dina kina bula marau kei na veivakalougatataki e na lako mai vei iko ke o muria na noda parofita bula, o Peresitedi Gordon B.Hinckley. Sa levu sara na veika vivinaka e lako mai vei keda mai vei ira na noda parofita sa sivi yani, ia na domoi Peresitedi Hinckley e dodonu me da rogoca nikua, na nona ivakasala e dodonu me da muria me rawa ni yaco kina vei keda na veika vivinaka. Qo au sa vakadinadinataka e na yaca i Jisu Karisito, emeni.