Na Bula Tawamudu, Ena Vukui Jisu Karisito
Me da kila na Turaga o Jisu Karisito, sa dodonu vei keda kei na kawatamata kece me da ciqomi Koya. Ia me da ciqomi Koya, sa dodonu me da ciqomi ira na nona italai.
Ena voleka ni rua na udolu na yabaki sa oti, a taroga kina e dua na taro bibi sara vua na iVakabula e dua na cauravou vutuniyau: “Vakavuvuli vinaka, a cava na ka vinaka me’u kitaka, me’u rawata kina na bula tawamudu?” (Maciu 19:16). Ni da sa “rogoca” na nona ivakaro na iVakabula, kei na Nona veisureti malumu “mo lako mai ka muri au,” (Maciu19:21), a lako tani na cauravou vutuniyau oqo “a sa rarawa na lomana: ni sa levu na nona iyau” (Maciu 19:22).
E ka ni rarawa ni sa rui lewe levu sara na tamata e vuravura ena gauna oqo era se vakabibitaka tu ga ka digia tiko ga na “iyau kei vuravura” mai na “iyau tawamudu” (V&V 38:39), ka ra sega tiko ni kila se me matata vei ira ni “Sa vutuniyau sara ko koya sa rawata na bula tawamudu” (V&V6:7 sa vakaikuritaki); ka ni sa isolisoli cecere taudua ni Kalou vua na tamata na bula tawamudu (raica V&V14:7). Na kena ikaikainaki rawarawa taudua oya ni bula tawamudu sa ikoya na noda bula tawamudu vakavuvale ena iserau ni Kalou (raica V&V132:19–20, 24, 55).
Ena Nona Veimasulaki Cecere ena Vukuda, sa solia kina na iVakabula ki na kawatamata na idola me ra rawata kina na bula tawamudu, “Ia sa i koya oqo na bula tawamudu, me ra kilai kemuni na Kalou dina duaduaga kei Jisu Karisito, ko koya ko ni a tala mai” (Joni 17:3)
Ia ena rawa vakacava vua na tamata me kila na Kalou dina duaduaga?
E sauma na iVakabula: “O i au na sala, kei na vu-ni-dina, kei na vu-ni-bula; sa sega ni torovi Tamaqu walega e dua na tamata, ena vukuqu ga” (Joni 14:6).
Au vakadinadinataka ni sala duadua ga ena rawa kina vei keda kei na kawatamata kece, me da lako vua na Tamada Vakalomalagi ka kilai Koya, ka rawata kina na bula tawamudu, sa i koya me da lako mai vua na Turaga o Jisu Karisito, ka kilai Koya.
Ia o cei o Jisu Karisito, me da lako kina Vua ka kilai Koya? Au sega tale ni bau kila e dua na itukutuku talei me baleta na kena ivakatakilakila kei na nona itavi na Turaga o Jisu Karisito me vaka na nodratou itukutuku na Mataveiliutaki Taumada kei na Kuoramu ni Le Tinikarua, ka kena iulutaga “Se Bula na Karisito,” ka’u na cavuvosa mai kina:
“[O Jisu Karisito] a Jiova Cecere ni Veiyalayalati Makawa, na Mesaia ni Ka Vou. Ena ruku ni veidusimaki nei Tamana, a bulia kina na vuravura… .
“… A solia na Nona bula me sorovaka na ivalavala ca ni kawatamata… .
“… Sa i koya na Ulumatua nei Tamana, na Luvena e Duabau Ga ena lewe, na Dauniveisereki ni Vuravura.
“… Ia ka sa qai tucake tale mai na mate na Karisito, ‘a sa yaco me kedra isevu era sa moce tu.’ (1 Koronica 15:20).
Ni sa vakaturi cake tale mai na mate, a … cakacaka voli na Turaga ena kedra maliwa na Nona ‘sipi tale eso’ (Joni 10:16) mai Amerika makawa… .
“… E rau a rairai o Koya vata kei Tamana ki vua na gonetagane o Josefa Simici, ka rau kauta yani kina na yalayala ka sa waraki sara tu vakabalavu “na itabagauna ni taucoko ni gauna” (Efeso 1:10)… .
“… Sa vakalesui tale mai ki vuravura na Nona matabete kei na Nona lotu—ka “tara cake ena nodra yavu na iApositolo kei ira na parofita, sa i koya ko Jisu Karisito na kena ivakadei ena tutu-ni-vale” (Efeso 2:20).
“… Ena dua na siga ena lesu tale mai kina ki vuravura … ka veiliutaki me nodra Tui na Tui, ka nodra Turaga na Turaga … Eda na tucake yadua me lewai keda ko Koya …
“… Era vakadinadinataka na Nona iApositolo ka ra sa tabaki tu ena kena sala dodonu ni sai Jisu na Karisito Bula, na Luve ni Kalou tawamate rawa. Sai Koya na Tui cecere ko Imanueli. Sa ikoya na rarama, na bula kei na inuinui kei vuravura… .” (Se Bula na Karisito,” Liaona, Epereli 2000, 2–3).
Sa dua na ka talei, ka yaga sara vakalevu, me da kila se o cei sara na Turaga o Jisu Karisito.
Ia me vakadua tale, au vakadinadinataka ni sala duadua ga ena rawa kina vei keda kei na kawatamata kece, me da lako vei Tamada Vakalomalagi ka kilai Koya, ka rawata kina na bula tawamudu, sa i koya me da lako mai vua na Turaga o Jisu Karisito, ka kilai Koya.
Na cava na kena ibalebale me da kila na Turaga o Jisu Karisito, kei na sala cava ena rawa me da kilai koya kina.?
E sauma na iVakabula: “E qiqo na matamata, ka rabailailai na sala sa basika ki na bula, kei na bula e vakaikuritaki; ia sa lewelailai sa kunea, ni dou sa sega ni vakabauti au se kilai ena bula oqo.Ia kevaka dou sa vakabauti au e vuravura, dou na qai kilai au …” (V&V 132:22–23).
E rawa beka ni da kila dina sara ka kila taucoko sara na Nona vosa? “… kevaka dou sa vakabauti au,” koi au ko Jiova cecere, na Mesaia, na dauveibuli ni vuravura, na iVakabula ka Dauveisereki ni vuravura, na Luve ni Kalou tawamate rawa; “kevaka dou sa vakabauti au … , dou na qai kilai au” (V&V 132:23 sa vakaikuritaki).
Me da kila na Turaga o Jisu Karisito, sa dodonu vei keda kei na kawatamata kecega me da ciqomi Koya. Ia kevaka me da ciqomi Koya, sa dodonu me da ciqomi ira na nona italai (raica Maciu 10:40; V&V 1:38; 68:8–9; 84:36; 112:20).
Me da ciqomi Koya, sa dodonu me da ciqoma na taucoko ni Nona kosipeli, na Nona veiyalayalati tawamudu, ka okati kina na dina taucoko oqori se na lawa, na veiyalayalati, kei na veicakacaka vakalotu ena gadreva na kawatamata me rawa ni lesu tale kina ki na Nona iserau na Kalou (raica V&V 39:11; 45:9; 66:2; 76:40–43; 132:12; 133:57).
Me ra ciqomi Koya, sa dodonu me ra ciqoma na Nona matabete, ka qarava vakavinaka na ilesilesi era kacivi kina o ira na luvena tagane yalodina na Kalou (V&V 84:33–35).
Ia na kena ilutua ga, me da ciqomi Koya ka kilai Koya, o keda ka vakakina na kawatamata kece sa dodonu, me vaka e veivakasalataki kina o Moronai, “… Dou lako vei Karisito … , mo dou vinaka kina” (Moronai 10:32; sa vakaikuritaki). Ena dua tale na kena vosa, sa dodonu me da lako mai vei Karisito ka segata “me da yaco” me da vakataki Koya” (raica: “Na Bolebole me da Rawata,” Liaona, Janueri 2001, 40–43).
E kaya na Turaga sa vakaturi cake tale mai na mate: “… a cava na ivalavala sa kilikili kei kemudou? Au sa kaya vakaidina vei kemudou, mo dou vakataki au” (3 Nifai 27:27). Na ibalebale ni vosa “sa kilikili” me vaka e vakayagataki ena Nona taro, “… a cava na ivalavala sa kilikili kei kemudou?” sa bibi sara ena noda kila na isau ni Nona taro, “mo dou vakataki au.” Na vosa “sa kilikili,” e kena ibalebale, “e yaga” se “me da vesuki ki na noda itavi se na veika eda soli keda kina” (Noah Webster’s First Edition ni American Dictionary of the English Language ika vitu ni kena tabaki [1993], “ought” raica talega Luke 24:26). Na ivolanikalou makawa kei na ka vou, era vakadeitaka, ni sa “yaga sara,” ka ni da sa “vauci tu,” ena veiyalayalati, “me da” me vaka sa tukuna o Koya, “me vakataki au” (raica 3 Nifai 27:27; raica talega 3 Nifai1 12:48; Maciu 5:48; 1 Joni 3:2; Moronai 7:48).
Sa noqu masu me “… me na “yaco kusarawa” mai na gauna me na tete yani kina na nona kilai na iVakabula ki na veimatanitu, veimataqali, duivosavosa kei ira na tamata” (Mosaia 3:20; raica talega Mosese 7:62; Aisea 11:9), ka me rawa vei ira kece era gadreva, me ra ciqomi Koya, me vaka na Turaga o Jisu Karisito, ka kilai Koya, me rawa kina ni ra lako mai vua na Tamada Vakalomalagi, ka rawata kina na bula tawamudu, ena yaca i Jisu Karisito, emeni.