Bonnie D. Parkin
Peresitedi Raraba ni iSoqsoqo ni Veivukei

“E levu na ka vinaka era tu ena noqu bula era yaco me baleta na iSoqosoqo ni Veivukei,” e kaya o Bonnie D. Parkin. “Au vakabauta na vinaka ka tu vei ira na marama era na taqomaki kina ka na basika talega kina na sala me ra veivakauqeti kina.”

A sucu ena i ka 4 ni Okosita 1940 kivei Jesse H. kei Ruth Butikofer Dansie, e ikatolu ni gone o Sister Parkin ena dua na matavuvale ka lima na kena gone. A susugi cake o koya mai Herriman, e Utah, ena ceva-i-ra ni bucabuca na Salt Lake, ka ra a tawana taumada na tubui tamana ena nona veidusimaki o Peresitedi Brigham Young. O i rau na itubtutubu nei tinana erau a saumaki mai ki na Lotu mai Switzerland ka rau qai mai tawavanua volekati Idaho Falls, e Idaho.

A tauri vola o Sister Parkin ena 1962 ka rawata kina na koroi ni bejila mai na Utah State University ka tekivu veivakavulici sara ena kalasi tolu e Bountiful, Utah. Ena Feperueri 1963 erau a sota kina kei James L. Parkin, ka se qai matai tiko ni nona yabaki ena koronivuli ni vuli vuniwai ena University of Utah. Erau a vakamau ena 1 Julai 1963 ena Valetabu e Salt Lake.

Ena gauna oqo e 4 na luvedrau ka 14 na makubudrau, eratou dau marautaka na vuvale na Parkins na vakacagicagi ena Drano na Powell se na vakasisisi e ulunivanua. E dau taleitaka talega o Sister Parkin na teitei, tenisi, kei na taubale ena mataka.

“Ni’u raica na noqu bula, sa vaqaqacotaki au na ilesilesi kece sara e dau soli vei au,” e tukuna o koya. “Sa dua na bolebole levu vei au na noqu kacivi me’u peresitedi ni iSoqsoqo ni Veivukei ni’u se dua na tina gone sara ena noqu tabanalevu, ia a basika na vakacegu uasivi ni ra sa ciqomi au na marama ena noqu tabanalevu. A vakalougatataka na noqu bula ka vukea na noqu tubu na ilesilesi oqori.”

A veiqaravi ena matabose raraba ni iSoqosoqo ni Veivukei o Sister Parkin mai na 1990 me yacova sara na 1994, ena nona kacivi me ikarua ni daunivakasala ena Mataveiliutaki Raraba ni Goneyalewa. Ena 1997, a kacivi kina na watina me peresitedi ni Tabana ni Daukaulotu na England London South.

“A vakaukauwataki au na veivakalougatataki ni noqu a kaulotu vata kei na watiqu,” e kaya o koya. “Keirau lomani ira na Yalododonu mai Peritania, me vakakina vei ira na neirau cauravou kei na goneyalewa daukaulotu, ka keirau sa vuli vakalevu sara mai vei ira.”

Ena nona gadreva me vakayaloqaqataki ira na goneyalewa me ra kila na totoka ni iSoqosoqo ni Veivukei ka vakakina vei ira na iSoqosoqo ni Veivukei me ra tauri ira yani na goneyalewa, e kaya kina o Sister Parkin, “Vei kemuni kece na yalewa, na iSoqosoqo ni Veivukei sa i koya na vanua eda rawa ni vukei kina me da lako mai vei Karisito.”