Kathleen H. Hughes
iMatai ni Daunivakasala, Mataveiliutaki Raraba ni iSoqsoqo ni Veivukei

“Sa vakalougatataki ira na marama na Tamada Vakalomalagi ena vuqa na isolisoli talei na rawa ka kei na veika vivinaka,” e kaya o Kathleen H. Hughes, na imatai ni daunivakasala ena iSoqosoqo ni Veivukei ka se qai kacivi vou. “Ena nona veivuke kei na noda dau veivukei vakataki keda, ena sega kina ni rawa ni da guce.”

E kaya o Sister Hughes ni vosa ni ivolanikalou, vata kei na nona kila ni luvena yalewa na Kalou, sa vakadeitaki koya ka vukei koya me raica na vakacegu, ena veigauna dredre sara mada ga ni nona bula. Ena dua na gauna me kena ivakaraitaki mada ga, ena nona veiqalisominiwai tiko kei na tadoka ni tina ni gone, erau a veisiko kina kei watina ki na valeniveivesu na Liberty Jail e Missouri. Erau a la’ki railesuva kina na veika a sotava e kea na Parofita o Josefa Simici ka wilika na ivakatakila a ciqoma kina, me vaka e volai tu ena Vunau kei na Veiyalayalati 121. A vakila kina o Sister Hughes ni me vaka ga na nona a tokoni Josefa Simici na Turaga, ena vukei koya talega me vosota na nona vakatovolei. “Oqo e dua na gauna eda na dau nanuma tu—e dua na gauna talei ka’u vakila kina na nona tiko na Turaga ena noqu bula ka vakila talega kina na veika e rawa ni vakayacora na ivolanikalou me yaco kina na vakacegu kei na sautu,” e kaya o koya.

A sucu o Sister Hughes ena i ka 19 ni Okotova 1944 mai Tooele, e Utah, kivei William Daly kei Emma Johanson Hurst. A vakamautaki Dean T. Hughes na dauvola ivola ena i ka 23 ni Noveba 1966 ena valetabu e Salt Lake; e tolu na luvedrau ka lima na makubudrau.

A rawata o Sister Hughes e dua na koroi na bejila ena vulici ni veika vaka-Peritania ena Weber State College ena 1966, ka rawata na koroi ni masita me baleta na veitaba ni vuli digitaki ena Central Missouri State University ena 1974. A veivakavulici me vica vata na yabaki ka sa cakacaka tiko vakaveiliutaki ena Provo (Utah) School District me tekivu mai na 1985.

Ena dua na gauna walega oqo a veiqaravi kina vaka- Peresitedi ni Goneyalewa ena Tabanalevu. Sa vakaitavi talega ena iSoqosoqo ni Veivukei, Lalai, kei na Wilivola ni Sigatabu ka sa veiqaravi oti talega ena matabose raraba ni Goneyalewa.

“Na inaki ni iSoqsoqo ni Veivukei me ra vukei kina na marama kei na nodra vuvale, ena veivuke ni matabete, me ra lako mai vei Karisito,” e tukuna o koya. “Au vakila na vakacegu ena veikacivi oqo ka’u kila ni na dua na gauna vinaka me da cakacaka kina kei ira na marama cecere oqo ena mataveiliutaki.”