“Muri Au”
O ira era vakabauta, era biuta tu na nodra lawa ka muria na iVakabula era na sota kaya na mamarau ka ulabaleta na nodra kaukauwa era rawata kina.
Erau a gonedau ni bera na nodrau rogoca na kaci. Erau viritaka tiko na nodrau lawa ni qoli e na Drano o Kalili o Pita kei Adriu, erau a mani tu vakadua ni sa basika yani o Jisu na kai Nasareci, raica na yaloka ni matadrau, ka vosa vei rau, “Muri au.” E vola o Maciu ni o rau na gonedau, “a rau sa biuta sara tu na nodrau lawa, ka muri Koya.”
Na Luve ni Tamata e a basika vei rau e lewe rua tale na gonedau ka rau a tiko e loma ni waqa vata kei tamadrau, ka oneva tiko na nodrau lawa. E a kacivi iratou o Jisu, “a rau [Jemesa kei Joni] sa biuta sara na waqa kei na tama kei na tamadrau, ka muria [na Turaga].”1
O a bau vakasamataka tu se a vakacava sara mada kevaka me da a bula vata na iVakabula e na gauna o ya? Kevaka o a donuya, o na vakarorogo beka e na Nona kaci “Muri au?”
E rairai, e manata cake beka na taro me vakaoqo, “Kevaka me kacivi iko na iVakabula nikua, e rawa beka mo talairawarawa ka biuta tu nomu lawa mo muri Koya?” Au vakadeitaka ni lewe vuqa era na cakava vaka kina.
Ia vei ira e so, e na rairai dredre beka na nodra vakatulewa. E so era raica ni lawa ni qoli, me vaka na kena inaki, e dredre me da biuta tu e na so na gauna.
Na lawa ni qoli e vuqa na kena mataqali na kedra ibulibui kei na kedra lelevu. Na lawa eratou a biuta laivi toka mai o Pita, Adriu, Jemesa kei Joni era lawa dina—na iyaya ni cakacaka ka vukei ira me ra rawata kina na nodra bula.
E so na gauna eda dau nanumi iratou na lewe va na tamata oqo me ratou gonedau mamadua ka sega soti vei iratou na solibula e na gauna eratou a biuta tu kina na nodratou lawa ka muria na iVakabula. Ia na kena veibasai, e kaya o Elder James E. Talmage, e na ivola Jisu na Karisito, ka vakaraitaka kina ni o Pita, Adriu, Jemesa, kei Joni eratou itokani vakabisinisi ka sautu vinaka tu. Eratou “taukena na nodratou waqa, ka ratou solia na cakacaka vei ira e so tale na tamata. Me vaka e tukuna ko Elder Talmage, o Saimoni Pita “e tu vakavinaka sara tu ga vakayago; e na gauna e tukuna kina ni sa biuta na veika taucoko sara me muri Jisu, na Turaga e sega ni cakitaka ni solibula nei Pita e na veika vakayago e a taukena tu … sa rui uasivi.”2
E muri, na lawa ni vutuniyau e a tacori kina na cauravou vutuniyau oqo ka vakadeitaka ni a talairawarawa ki na ivakaro taucoko vakatekivu mai na gauna e a se gonetagane kina. E na nona a taroga na iVakabula se cava so tale e dodonu me cakava me rawata kina na bula tawamudu, e qai kaya vua na iVakavuvuli, “Kevaka ko sa vinakata mo sa vinaka sara, mo lako, mo volitaka na nomu iyau, ka solia vei ira sa dravudravua, ko na qai vakaiyau mai lomalagi; ia mo lako mai mo muri au.” Ia ni sa rogoca na vosa oqo na cauravou, “sa lako tani, a sa rarawa na lomana: ni sa levu na nona iyau.”3
Ni vakamatatataki raraba na lawa sa ikoya na ivakatakilakila me vesuka e so na ka. Ni vakarabailailaitaki vakalevu, ia e kena vakasama bibi,e rawa me da vakamatatataka ni dua na lawa sa ikoya e dua na ka e kauti keda tani mai se tarovi keda mai na noda muria na kaci nei Jisu Karisito, na Luve ni Kalou bula.
Na lawa e na kena itukutuku eke e rawa ni noda cakacaka, veika eda dau vinakata me da cakava, veika eda dau taleitaka, vata kei na, kena ka tiko duadua sara e cake noda veivakatovolei kei na noda ivalavalaca. Me vakalelekataki, e dua na lawa e rawa me dua wale sara ga na ka me dretaki keda tani mai na noda veitokani vata kei Tamada Vakalomalagi se mai na kena vakalesui tale mai na Nona Lotu.
Me’u kaya mada e dua na kena ivakaraitaki ni gauna oqo. E dua na komupiuta e rawa me dua na iyaya e vakayagataki vakalevu ka yaga. Ia, kevaka eda vakayagataka noda gauna e na veika sega na betena, sega ni yaga, ka so na gauna na itavi ka veivakacacani, e sa na yaco me lawa medremedrea.
E vuqa vei keda era dau rekitaka nodra sarava na veisisivi qito, ia kevaka e rawa me da kila na veika matailalai taucoko sara me baleta e dua na dauqito eda dau taleitaka vakalevu sara e na gauna vata oqori sa guilecavi kina na siganisucu se ivakananumi ni vakamau, vakaweleweletaki ni matavuvale, se eda vakaweleweletaka na gauna donu me vakayacori kina na cakacaka ni veiqaravi Vakarisito, ia na qito e sa na rawa me dua na lawa medremedrea.
E na gauna sara nei Atama, na tamata taucoko, e na buno ni matana, e na kania kina na kena kakana. Ia e na gauna eda sa vakayagataka kina vakalevu noda gauna e na cakacaka e sa vakavuna na kena vakaweleweletaki na bula vakayalo, na cakacaka e rawa talega me lawa medredmedrea.
E so era sa mai coko e na lawa ni dinau vakasivia. Na lawa ni kena tubu ni ilavo e a dinautaki e vesuki ira vakatotolo ka gadrevi kina me ra volitaka na nodra gauna kei na nodra icegu me rawa ni sota vata kei na nodra ivakaro na dau soli dinau. Era sorovaka nodra galala, ka yaco me ra bobula e na nodra vakayagataki ilavo vakalialia.
Sa ka dredre na noda vola na levu ni lawa e rawa ni da coko kina ka tarovi keda mai na noda vakamuria na iVakabula. Ia kevaka eda yalodina e na noda gadreva me da muri Koya, e dodonu me da kakua tale ni wawa noda biuta laivi na medremedrea ni veilawa vakavuravura ka muri Koya.
Au se sega mada ni kila e dua tale na gauna e na itukutuku ni veigauna kei vuravura me sa vakasinaiti vakarawarawa vata kei na veimataqali lawa medredmedrea. Na noda bula e sa rawarawa wale tu ga e na kena vakasinaiti vata kei na ilesilesi, bose, kei na itavi. E sa rui rawarawa na noda vesuki e na veimataqali lawa ka ni vakavuqa e dua mada ga na vakatutu me da vakagalalataki keda mai vei ira e rawa ni vakatubu leqa ka vakarerevaki sara talega vei keda.
E vakavuqa noda nanuma ni levu ga ni noda osooso, na levu talega ni noda kilai levu—me vakabeka ni noda osooso e vakamatatataka na keda yaga. Kemuni na taciqu kei na ganequ, e rawa ni da vakayagataka na noda gauna taucoko e na cumuwaqara ni vakayacori tiko na itavi e na ituvatuva ni veika e dodonu me da cakava ka kena itinitini, e sega sara ga na betena.
Ni da cakava e levu na ka era sega soti ni bibi sara. Ni da vakatabakiduataka na igu ni noda vakasama, na lomada kei na yaloda e na veika ka vakaibalebale tawamudu—sa ikoya qori na ka e yaga.
Ni da rogoca tiko na rorogo taucoko ni bula ka lako wavoliti keda tiko, eda rogoca na kaila ni “lako mai ke” kei na “lako i kea.” E na maliwa ni rorogo kei na domo ni vosa kamikamica ka rau veiqatitaka na noda gauna kei na veika eda taleitaka, e dua na tamata e sa tucake taudua tu e na baravi ni Wasawasa kei Kaleli, e kacivi keda lo tiko mai: “Muri au.”
E rawarawa sara ga me yamekemeke na noda bula. Au vakananuma sara e na vica na yabaki sa oti ka sa bau dua sara ga na bolebole dredre dina vei au. Eratou sa lewe vitu na gone e na noqu matavuvale. Au a daunivakasala tiko e na matabisopi oti sa qai soli vei au na ilesilesi tabu ni bisopi e na neitou tabana levu. Au a tovolea tiko me’u qarava na itavi ka gadrevi kina na balavu ni veisiga yadua. Au doka vakalevu na watiqu totoka e na nona dau vakarawarawataka vei au e na noqu veiqaravi vua na Turaga.
E sa rui dau sivia sara ga na ka me caka me veiganiti vata kei na gauna yalataki. Na kena dodonu me solibulataki na ka e vinakata taudua, au sa mani lewa me’u dau yadra sara vakamataka lailai, qarava noqu itavi, au qai dau vakayagataka na gauna e gadrevi me’u tama ka lewenivale vinaka, ka lewe ni Lotu yalodina. E a sega ni ka rawarawa. E so na mataka ni dau tagi na alamu ni kaloko au sa dau oca na saga me rai e dua na yaloka ni mataqu ka wanonova tu, de lakolako e sega ni mudu rawa na kena tagi.
Ia veitalia, na Turaga e sa rui dauloloma ka vukei au me’u kunea na icegu kei na gauna me’u cakava kece kina na ka e dodonu me’u kitaka. E dina ga ni dredre, e se sega vakadua ni’u veivutunitaka e na noqu digia me’u vakarorogo e na kaci ni iVakabula ka muri Koya.
Vakasamataka na noda dinau Vua. O Jisu sa ikoya “na tucake tale, kei na bula: “Ko koya sa vakabauti [Koya], kevaka sa mate, e na bula ga.”4 Era tu e so era vutuniyau, ia era na solia nodra iyau taucoko me kena ikuri ka me soqoni vata kei na vica tale na yabaki, vula, se mani siga sara ki na nodra bula vakayago. Na cava beka e dodonu kina me da dau lomasoli ka da solia me baleta na bula tawamudu?
Era tu e so ka ra na solia taucoko na veika era taukena me ra sota kaya na vakacegu. “Dou lako mai vei au, koi kemudou vakayadua ga sa oca ka colata na icolacola bibi,” e vakavulica na iVakabula, “ia ka’u na vakacegui kemudou.”5 Ia e sega walega ni vakacegu e yalataka na iVakabula vei ira era muria nona ivakaro ka vosota me yacova na ivakataotioti, ia na bula tawamudu, “Oqo na isolisoli uasivi duadua ni Kalou.”6
Eda na bula tawamudu, me baleti koya na iVakabula. Na bula tawa cava e kena ibalebale ni da na sega ni mate rawa. Ia, na bula tawamudu e kena ibalebale ni da bula tawa mudu e na bula vakalou e veivanua me veitokani vata kei ira eda dau lomana vakalevu, ka vakavolivoliti e na loloma vakaitamera, na reki ka titobu, kei na lagilagi.
E sega ni saumi rawa vakailavo na bula vakalou oqo. Na bula tawamudu sa isolisoli mai vua na Tamada Vakalomalagi dauloloma ka soli wale e na lomasoli vei ira kecega era vakarorogo ka talairawarawa ki na kaci ni Tagane kei Kalili.
Sa ka ni rarawa dina, ni lewe levu era medremedrea vakalevu e na nodra lawa ka dredre kina nodra vakarorogo ki na kaci. Na iVakabula e vakamacalataka ni, “Ia dou sa sega ni vakadinata, ni dou sa sega ni noqu sipi … ia ka’u sa kilai ira, ka ra sa muri au.”7
Eda muria vakacava na iVakabula? Mai na noda cakacakataka na vakabauta. Mai na noda vakabauti Koya. Mai na noda vakabauta na Tamada Vakalomalagi. Mai na noda vakabauta ni Kalou e vosa vua na tamata e vuravura edaidai.
Eda muria na iVakabula mai na noda veivutunitaka noda ivalavalaca—mai na noda sotava na rarawa baleti ira ka lako tani mai kina.
Eda muria na iVakabula mai na noda sobuta na wai ni veipapitaisotaki ka ciqoma na ivakabokoci ni noda ivalavalaca, mai na noda ciqoma na isolisoli ni Yalo Tabu ka vakadonuya na kaukauwa oqori me veivakauqeti, veivakasalataki, veidusimaki ka vakacegui keda.
Eda muria vakacava na iVakabula. Mai na noda talairawarawa Vua. O Koya kei na Tamada Vakalomalagi e rau sa solia vei keda na ivakaro—me kakua ni veitotogitaki se vakararawataki keda, ia me vukei keda me da yacova na vuabale ni reki, vei rau ruarura e na bula oqo kei na tawamudu era na qai muri mai, ka yacova na vuravura tawa vakaiyalayala.
Na kena veibasai, ni da taura matua na noda ivalavalaca noda taleitaka, ka so na gauna na veika mada ga eda nanuma me noda itavi, vorata na kaukauwa ni Yalo Tabu; ka biuta vakatikitiki na nodra vosa na veiparofita, oti me da na qai tucake tu e na baravi ni noda Kalili, ka vesuki keda tu na medremedrea ni veilawa. Eda na raica na dredre ni noda biuti ira laivi tu mai ka muria na Karisito bula.
Ia na iVakatawa ni sipi e kacivi keda vakayadua edaidai. E rawa li me da kila rawa na domo ni Luve ni Kalou? E rawa beka li me da muri Koya?
E rawa beka ni dua noqu vosa ni vakasala? Era tu e so era nanuma kevaka eda muria na iVakabula, e na galala na noda bula mai na lomaocaoca, mosi kei na taqaya. E sega ni dodonu me vakaoqo! Na iVakabula vaka iKoya e a vakamacalataki ni tamata dau rarawa.8 O ira na tisaipeli e na gauna e liu era a muria na Karisito ka ra a sotava na veivakararawataki kei na veivakatovolei vakaitamera. Okati talega kina na Parofita o Josefa Simici. E vaka talega kina e so vei ira na ivuvu ni Yalododonu Edaidai, na iotioti ni itabagauna. E sega talega na kena duidui nikua.
E a soli vei au na gauna donu me’u veitalanoa vata kei na dua na marama ka a rogoca na kaci ni iVakabula ni se qai yabaki 18. O tamana, e dua na vakailesilesi e cake e na dua tale na lotu, e a yaco me lewe ni Lotu i Jisu Karisito ni Yalododonu Edaidai, e sa rawa me na biu tani vakadua mai na matavuvale.
E dina ga ni solibula e sa rui uasivi, ia na goneyalewa e a vakarorogo ka muria na kaci ni iVakabula ka sobuta na wai ni veipapitaisotaki.
O tamana e dredre sara me ciqoma na nona lewa, ka qai tovolea me vakaukauwataki koya me biuta laivi na nona lotu vou. O rau vakaveiwatini e rau vakalewa vakalevu sara na nona lewa me yaco me lewe ni Lotu ka vakarota me cakitaka ka lako tani mai na nona vakabauta vakalotu.
E dina ni basika mai na cudru, na yaloca, kei na vosa kaukauwa kei na yalokatakata nona kila ni a sa rogoca oti na nona kaci na iVakabula ka sa na muri Koya, veitalia sara ga na veika e na qai yaco e muri.
Ni oti o ya, na gone yalewa oqo e a qai kunea rawa e dua nona itikotiko vinaka, a idrodro ka tiko vata kei na dua na matavuvale dauloloma lewenilotu ka yawa sara mai na veivakarerei kei na veivakararawataki nei tamana.
Erau a qai sota kei na dua na gone tagane yalodina ka rau mani vakamau sara e na valetabu, ciqomi kina na veivakalougatataki digitaki ka salavata e na dua na vakamau ka dau vakayacori ga e na valetabu.
Nikua e sa tu e na kedra maliwa na lewe vuqa ka ra a solibula sara vakalevu me muria na nona kaci na iVakabula.
E dina, au sega ni vakatututaka ni gaunisala e na rawarawa. Ia au solia vei kemuni na noqu ivakadinadina ni o ira era vakabauta, era biuta tu na nodra lawa ka muria na iVakabula era na sota kaya na mamarau ka ulabaleta na nodra kaukauwa era rawata kina.
E na noqu sota vata kei ira na lewe ni Lotu totoka oqo—o ira na gone kei na qase—e sa uqeti au dina ka’u vakasinaiti vata kei na vakamuduo vei ira e na nodra vakabauta ka rogoca na kaci ni iVakabula ka ra sa muri Koya.
Dua na kena ivakaraitaki, e dua na dau caka kaukaumea e muria na iVakabula e na veisiga kecega, e na loma ni sivia na tolu na itabatamata, e dau wilika nona ivolanikalou e na veigauna ni vakasigalevu ka ra dau vakalialiai koya na cakacaka vata. Na marama dawai oqo yabaki 70 e sa dabe toka e na idabedabe vaqiqi,—o ira vakayadua era dau la’i veisiko yani e dau vakabulabulataka na yalodra ka sega ni cala nona dau tukuna vei ira na nona kalougata mai na nona —muria na iVakabula. Na gone e vakasaqaqara mai na nona dau masu ka veitaratara vata kei na iVakavuvuli ni vuravura, e sa muria tiko na iVakabula. Na lewenilotu vutuniyau ka dau solia vakayauyau ki na Lotu kei ira na wekana e muria na iVakabula.
E na nona tucake tu o Jisu na Karisito e na veibaravi ni Wasawasa kei Kalili e na 2,000 na yabaki sa oti yani, e tucake tale tu ga e daidai o Koya, ka kacivaka tiko yani na kaci vata ga e a kacivi iratou kina na gonedau yalodina o ya ia oqo kivei keda taucoko sara ka rawa ni rogoca Nona kaci: “Muri au!”
E tu vei keda na lawa ka dodonu me ra maroroi kei na lawa ka dodonu me onevi. Ia e na gauna e sa kacivi keda kina na iVakavuvuli ni wasawasa, vuravura, kei na lomalagi, “Muri au,” e dodonu me da biuta laivi ki dakuda na medremedrea, ni lawa vakavuravura ka muria na mawe ni yavana.
Kemuni na taciqu kei na ganequ, e na levu ni reki ni domoqu au vunautaka kina ni kosipeli e sa vakalesui tale mai! E a tadola na lomalagi vua na Parofita o Josefa Simici, e raica ka veivosaki vata kei na Kalou, na Tamada,kei na Luvena, o Jisu Karisito. Mai na veiliutaki vakalou kei na ivakavuvuli mai na vuravura selesitieli na dina, na dina tawamudu era a valalesui tale mai vua na tamata!
Edaidai e dua tale na parofita uasivi e bula tiko ka vakasoqona vata tiko e veisiga na nona ivakadinadina kivei ira na dina tabu oqo. O Peresitedi Gordon B. Hinckley e tucake tu e na nona ilesilesi tabu me gusu ni vosa ni noda Turaga ka iVakabula ko Jisu Karisito. E rau tucake tu e yasana o rau na nona daunivakasala dokai. Kena ikuri, na nodra veitokani na Kuoramu ni Le Tinikarua na iApositolo, na Kuoramu ni Le Vitusagavulu, kei na milioni na lewenilotu e vuravura taucoko era vukei koya nodra vakasoqona vata domodra yadudua e na kena vunautaki na itukutuku lagilagi e na kena vakalesui tale mai na kosipeli ni a vakalesui tale vakadua vua na tamata!
O Jisu Karisito sa ikoya “na sala, kei na vu-ni-dina, kei na vu-ni-bula; sa sega ni torovi Tamaqu walega e [dua] na tamata, e na [Vukuqu] ga.”9 Na ivakadinadina ka kilai tani kina o Koya, au vakadinadinataka vei kemuni edaidai ni na yaco mai a gauna na tagane yadua, yalewa, kei na gone era na veirai vata kei na matana dauloloma na iVakabula. Na siga oqori, e dau na kila kina e na veivakadeitaki na yaga ni noda lewa me da kua tale ni wawa ka muri Koya.
O keda vakayadua me da na rogoca na nona kaci na iVakabula ka kua tale ni wawa noda biuta laivi na noda lawa medremedrea ka rekitaka noda muri Koya sa ikoya noqu masu e na yaca i Jisu Karisito, emeni.