Na Saumaki e Taucoko sa Kauta mai na Marau
Na nomuni marau oqo kei na tawamudu e na vakatau e na nomuni itagede ni saumaki kei na veisau e kauta mai ki na nomuni bula.
O ikeda yadua eda daudikeva na sala era daumuria yadudua e na nodra bula na lewe vuqa e na nodra vakayacora na veika e dodonu. E vaka me ra marau, ka ra taleitaka sara na bula. E na gauna me dau vakayacori kina e so na digidigi dredre, era sega ni qai dau lutu e na cakava o koya e dodonu, e dina ga ni tu e so na veitemaki me veisosomitaki ka sa dau rawa tu vei ira. Eda kila ni ra sa qali tu ki na veitemaki, ia era sega ga ni raica. Sa vakakina na noda dikevi ira na tani ka ra sega ni doudou e na vakatulewa era cakava. E na vanua e rui kaukauwa sara kina na veivakayavalati ni vakayalo, era sa dau nakita me ra vinaka cake, ka veisautaka na nodra ilakolako ni bula, ka laiva vakatikitiki na itovo ka dau veivakamalumalumutaki. Era dau dina sara e na nodra inaki dei me ra veisau ia e dau totolo sara me ra lesuva tale na veika vata ga era a nakita me ra sa biuta vakadua.
Na cava sara mada e vakaduiduitaka na nodra bula na ilawalawa e rua oqo? E na rawa vakacava mo ni na vakayacora tikoga na nomuni digidigi donu? Sa solia tu vei keda na vosanikalou na sala me da kila kina. Vakasamataka na talei kei na sega ni dau qaqarauni i Pita. E na tolu na yabaki e a veiqaravi kina vakaiapositolo e yasa ni iVakavuvuli, vakadikeva na cakacaka mana ka rogoca na vakadewataki ni ivakavuvuli kei na ivakamacala vuni ni veivosa vakatautauvata. A sotava ko Pita kei Jemesa vata kei Joni na vakamataliataki lagilagi i Jisu Karisito ka salavata mai kei na veisiko mai nei Mosese kei Ilaijia.1 Ia e na veika kece oqo, a raica rawa na iVakabula ni ko Pita e sa sega tikoga ni taucoko sara na nona ivakarau. E kilai koya vakavinaka na iVakavuvuli me vaka ga na Nona kilai keda yadudua. E na iVolatabu, eda wilika:
“Ka sa kaya na Turaga, i Saimoni, i Saimoni, raica sa kerei kemudou ko Setani, …
Ia ka’u sa masulaki iko, mo kakua ni malumalumu na nomu vakabauta: ia ni ko sa saumaki tale, mo vakataudeitaki ira na wekamu. A sa kaya vua ko koya koya, “Kemuni na Turaga, au sa vakarau me’u lako vata kei kemuni ki na vale ni veivesu, ki na mate talega.”2 E dina ga ni oqo e sega, ia mai na vakanananu nei Pita, a tau kina e so na vosa ka sega ni vakaibalebale. E kila vinaka tu na ka e a tukuna, ia e a duatani ga na ka e cakava.
E muria e na Ulunivanua ni Veiolive, a qai parofisai ko Jisu vei iratou na Nona tisaipeli, “Dou na tarabe kecega e na vukuqu e na bogi edaidai; ni sa volai, Au na yavita na ivakatawa ni sipi, ka ra dui vakasesei na qele ni sipi.” A sa sauma tale ko Pita, “Kevaka e na tarabe ko ira kecega, koi au, ka’u na segai.” Oti sa qai parofisai vakamatata na iVakavuvuli, “Au sa kaya vakaidina vei iko, E na siga oqo, e na bogi ga edaidai, ni sa sega ni tagi mada vakarua na toa, ko na cakitaki au vakatolu.” Ki na ka oqori a sauma kina vakayalokatakata ko Pita, “Kevaka edaru na mate vata, au na sega sara ni cakitaki kemuni.”3
Vei au, e dua na tiki ni ivosanikalou sa veivakayavalati dina ni vakamacalataka na ka e qai mani yaco. E veivakananumi vinaka dina ki vei keda yadua me kilai ni vakayacori na ka e dodonu, e na kena igu sara mada ga e gadrevi me vakayacori kina na ka e dodonu, se sega ga ni veirauti. E dau wasoma me dau dredre me vakayacori na ka eda kila vinaka tu ni dodonu me da vakayacora. Eda wilika:
“Ia sa dua na vada sa raica [Pita] … ka kaya, ko iko talega sa dua vei ira. A sa cakitaki … ka kaya, Yalewa au sa sega ni kilai koya … Sa dua tani tale sa raica, ka kaya, Ko iko talega e dua vei ira. A sa kaya ko Pita, Ko iko, e segai koi au … Sa mai vakadinadina matua sara e dua … Sa dina ga sa tiko kaya, ko koya oqo: … A sa kaya ko Pita, Ko iko, au sa sega ni kila na ka ko sa kaya. Ia ni sa vosa tiko ko koya, sa tagi sara na toa. A sa vuki na Turaga, ka vakaraici Pita. A sa nanuma ko Pita na vosa ni Turaga, … a … lako ki tautuba, ka tagi vakalevu sara.”4
Me vaka ni rui mosi sara me vakataka na vakadeitaki ni parofisai oqori vei Pita, a sa vakatekivu me veisau sara ga vakadua na nona bula. A yaco o koya me dua na dauveiqaravi sega ni yamekemeke, e dei me vaka na vatu, ka yaga sara ki na ituvatuva ni Tamada, ni oti na nona Vakoti ki na kauveilatai kei na Tucaketale mai ni iVakabula. Na veivakayavalati ni tikina oqo e vakaraitaka tale tu ga na levu ni nona lomani Pita na iVakabula. E dina ga ni a sa tu o Koya e na maliwa ni bolebole me vakamalumalumutaka Nona bula vakataki koya, kei na bibi ni ka kece e na vakacolati E tabana, ia e a vuki ga ka vakaraici Pita– na loloma ni dua na qasenivuli e a vakadewataki ki na dua na gonevuli daulomani me solia vua na kaukauwa kei na veivakararamataki e na gauna e gadrevi kina. Ni oti o ya, sa tubu ko Pita ka rawata vakavinaka na nona ilesilesi. A veivakavulici e na kaukauwa kei na ivakadinadina e sega ni vakayavalati rawa veitalia ga na veivakarerei, biu ki na vale ni veivesu, kei na vakanakuitaki. A sa saumaki dina sara ga ko koya.
E na so na gauna e dau vakayagataki na vosa saumaki me vakamacalataka na nona yalodina e dua ka sa lewa me papitaiso. Ia ni dauvakayagataki vakadodonu, na saumaki e levu cake sara na kena ibalebale ki vua e sa qai curuvou ka vakakina ki vei koya e sa lewenilotu tu mai vakadede. E na macla kei na rawarawa ni itovo vakaivunau, o Peresitedi Marion G. Romney e vakamacalataka na saumaki:
“Saumaki e kena ibalebale na veisau mai na dua na vakabauta se ilakolako ni ivalavala ki na dua tale. Saumaki sa ikoya na veisau vakayalo ka savasava. Saumaki e sega walega ni kena ibalebale na vakadonui iJisu kei na nona ivakavuvuli ia e veivakabulabulataki talega ni vakabauti koya kei na nona kosipeli. Na vakabauta sa ikoya e cakacakataka na veisau, na veisau dina ni nona kila e dua na ibalebale ni bula kei na nona yalodina vua na Kalou e na veika e taleitaka, e na nanuma, kei na itovo. E dua e sa taucoko dina na nona saumaki, gadreva na veika e veibasai ki na kosipeli iJisu Karisito e sa mate vakaidina. Ka vakaisosomitaki kina, sa ikoya na loloma ni Kalou, kei na lewa ni inaki e dei me maroroi na nona ivakaro.”
Ni sa saumaki, mo ni nanuma me gumatuataki na vakayagataki ni veivosa bibi e na nomuni bula, “loloma ni Kalou, kei na lewa ni inaki e dei me maroroi na nona ivakaro.” Na nomuni marau oqo kei na tawamudu e na vakatau e na itagede ni nomuni saumaki kei na veisau e na kauta mai ki na nomuni bula. Ko na yaco beka vakacava mo saumaki dina? E vakamacalataka o Peresitedi Romney na ikabakaba e dodonu mo ni muria:
“Lewe ni Lotu kei na saumaki e sega ni dodonu me tautauvata. Na saumaki kei na tiko ni ivakadinadina e sega ni dodonu talega me duavata ga na ka. A ivakadinadina e lako mai e na gauna e solia kina na Yalo Tabu vua e vakasaqara vagumatua na ivakadinadina ni dina. Na ivakadinadina e veivakayavalati e vakaukauwataka na vakabauta. O ya, e kauta mai na veivutuni kei na talairawarawa ki na ivunau. Saumaki sa ikoya na vua se isau ni veivutuni kei na talairawarawa.”5
Me tukuni vakarawarawa sara, na saumaki dina sa ikoya na vua ni vakabauta, veivutuni kei na talairawarawa tikoga. Vakabauta e lako mai na rogoci ni vosa ni Kalou6 kei na kena saumi. Ko ni na rawata mai vua na Yalo Tabu e vakadeitaka na ivakadinadina ni veika ko ni ciqoma e na vakabauta ka lomasoli e na kedra bulataki.7 Ko ni na liutaki ki na veivutuni ni veicala e yaco mai na vakayacori ni veika e sega ni dodonu se sega ni vakayacori na ka dodonu. Na ka sa qai yaco, e na vakaukauwataki me levu na nomuni talairawarawa tikoga. Na ilakolako oqo ni vakabauta, veivutuni kei na talairawarawa tikoga e na liutaki kemuni ki na saumaki e levu cake sara kei na veivakalougatataki e sala vata. Na saumaki dina e na vakaukauwataka na nomuni vinakata mo ni vakayacora na ka e dodonu mo ni vakayacora e na gauna e dodonu me vakayacori kina, veitalia ga e na kena itutu cava.
Na vosa vakatautauvata ni daukabukaburaki e a vakavuvulitaka ko Jisu ka dau nanumi raraba tu ni vakamacalataka na sala ni kena dau ciqomi mai vei ira na duidui yadudua ni vosa ni Turaga e na kena dau vunautaki. Vakasamataka e na dua na tiki ni gauna e na rawa vakacava ki na vosa vakatautauvata ga oqo me vakayagataki vei kemuni e na duidui ni veika e yaco e na nomuni bula, ni ko ni sotava na bolebole e so se ni ko ni lakova e so na veivakayavalati kaukauwa sara. Na vosa, se na ivakavuvuli ni iVakabula, e na rawa ni lako mai vei kemuni e na levu sara na sala; ni ko ni dikevi ira na tani, se e na nomuni masu ga vaka ikemuni se vakasamataki vakatitobu ni vosanikalou se e na nona veidusimaki na Yalo Tabu. Ni’u taleva tale na ivakamacala ni vosa vakataautauvata a solia ko Jisu vei iratou Nona tisaipeli, dikeva vakavinaka mada na nomuni bula. Raica kevaka e tiko e so na gauna e dau kunea kina na ivakavuvuli dina vei kemuni e so na ivalavala e sega ni veirauti mo ni ciqomi ira kina, o koya gona era sa yali kina na vua yalataki ni marau, vakacegu, lasa, kei na toso ki liu.
“Sa kaburaka na vosa na dauveikaburaki. “[E so] era vaka e na tutu ni sala … ia ni ra sa rogoca oti, sa qai lako sara mai ko Setani, a sa kauta tani na vosa sa kaburaki e lomadra.”
E na rawa beka ni yaco o ya vei kemuni, e na ituvaki cala ni veika e vakavolivoliti kemuni, kei na cala ni nomuni itokani?
“[E so] ki na vanua veivatu; era rogoca na vosa, ka vakabauta sara e na reki. Ia ka sega ga na wakana e lomadra, a ra sa tu dede vakalailai ga: ia ni sa tubu … na veivakacacani … era sa tarabe sara.”
Ko ni a sa bau sota kaya beka e dua na ka vata vaqo ni dua e vakatututaka mai e dua na ka e sega ni dodonu ko ni a qai sega ni cakava e dua na ka mo ni vorata kina?
“[E so] sa kaburaki ki na veiwa vakavotona: ko ira oqo era sa rogoca na vosa, Ia na lomaocaoca e na vuku ni vuravura oqo, … kei na dau gadreva na ka tani e so sa curu kina, ka vakaruguta na vosa, a sa sega kina ni vua.”
E tiko li e so na gauna ni ko ni dau gadreva sara vakabibi e dua na ka ko ni vakadonuya ka biu toka vakatikitikki na nomuni ivakarau?
“[E so] sa kaburaki ki na vanua vinaka; era sa rogoca na vosa, ka vakabauta, ka vua, sa vua itolusagavulu e so, ka onosagavulu e so, ka drau e so.”8
Au kila ni oqori na sala ko ni via bulataka kina na nomuni bula. E vakacava na taucoko ni nomuni lomasoli ni vakadonuya na ivakavuvuli ni iVakabula e na vakatau kina na levu ni vuana, na veivakalougatataki, ko ni na tamusuka e na nomuni bula. Na vosa vakatautauvata oqo e vakaraitaka na itagede ni nomuni lomasoli ni talairawarawa ki na veika ko ni kila ni dodonu mo ni cakava, vorati ni veika e so e sega ni dodonu me vakayacori vakakina, e na vakatautaka se ko ni sa saumaki dina. Ia e na levu vakacava na nona vakalougatataki kemuni na Turaga e na nomuni bula.
Na saumaki dina e solia na vua ni vosoti ni mamarau ka rawa ni marautaki kevaka sara mada ga e na gauna e na veilecayaki kina ko vuravura ka ra lewe vuqa sara na tamata era sega tu ni marau. Ni dua na ilawalawa ni tamata era sotava yadudua na dredre, na iVola iMomani e vakatavulica: “Era sa daulolo ka masu vakawasoma, ka sa dei tikoga na nodra vakamalumalumutaki na ka sa kaukauwa sara na nodra vakabauta na Karisito; a sa vakasinaiti na yalodra e na marau kei na vakacegu; io, sa vakavoui ka vakasavasavataki na yalodra; ia sa yaco na veivakasavasavataki oqo ni ra sa solia na yalodra vua na Kalou.”9
Peresitedi Hinckley e tukuna ni saumaki dina sa ikoya e vakayacora na duidui.10
Me rawati na veivakalougatataki yalataki mai na saumaki dina mo ni na vakayacora e so na veisau e na nomuni bula. Na iVakabula e kaya “Ia dou na sega li ni veivutunitaka na nomudou ivalavala ca ka saumaki ka lesu mai vei au me’u vakabulai kemudou? … Kevaka dou sa lako mai vei au, dou na rawata na bula tawamudu.”11
Au tukuna na ivakadinadina ni ko ni masuta na veidusimaki, na Yalo Tabu e na veivuke me vakatakila na nomuni veisau sara ga vaka ikemuni ko ni gadreva me vakayacora na saumaki e taucoko. Na Turaga e na qai vakalougatataki kemuni me levu sara. Na nomuni vakabauti Koya e na viribaiti, e na tubu me levu na nomuni veivutuni, kei na nomuni ni talairawarawa e na vakataudeitaki. E bula tiko na iVakabula. E lomani kemuni ko Koya. Ni ko ni vakayacora na nomuni vinaka uasivi, e na vukei kemuni ko Koya. E na yaca iJisu Karisito, emeni.