E Mai Vakacavari na Qito ni Vulaibatabata e Salt Lake ena Nodra Qito na Lokiloki

A tomani tikoga na yalo ni veisisivi ni qito ena kena a mai vakayacori tale e Salt Lake City na nodra Qito ni Vulaibatabata na Lokiloki ena 2002 mai na i ka 8–16 ni Maji. E sivia ni 4,000 na soligauna kei na udolu vakaudolu na sarasara era kailavaka na nodra sasaga na dauqito lokiloki mai na veiyasai vuravura ena nodra veisisivi ena vakasisisi mai delana, na hoki, kei na vakasisisi takoso e lomanivanua.

Veisolitaki ni buka

Ena i ka 7 ni Maji, era a tu kina ena mata ni Valenivolavola ni Lotu na Mataveiliutaki Taumada kei na lewe ni Kuoramu ni Apositolo Le Tinikarua me ra veisolitaka na buka ni nodra Qito na Lokiloki. Eratou kidavaki Carrie Snoddy mai Park City na Mataveiliutaki Taumada ni ratou duri tu ena ikabakaba. A solia yani na nona buka vei Peresitedi James E. Faust, na iKarua ni Daunivakasala ena Mataveiliutaki Taumada, e qai solia yani o koya vei Peresitedi Thomas S. Monson, na iMatai ni Daunivakasala ena Mataveiliutaki Taumada, ka qai solia yani o Peresitedi Monson vei Peresitedi Gordon B. Hinckley.

E qai laveta cake o Peresitedi Hinckley na buka me ra raica mai na sarasara. “Bula vinaka, ni bula vinaka mai, kivei ira na dauqito lokiloki, vei ira na dauqito cecere oqo ka ra sa tubucake!” e kaya. ”Ni toso yani! Qaqa ena veisisivi! Taura me nomu na metali! Ni marautaka, ni marau. Keimami tokoni kemuni. Keimami kailavaki kemuni. Keimami vinakata mo ni qaqa, ka keimami nuitaka ni dua na soqoni vakairogorogo kivei kemuni yadua na vakaitavi oqo. Mo ni qaqa kece sara. Hurray!“

Sa qai solia o Peresitedi Hinckley na buka vei Margaret Stocks mai na Tabanalevu na Brigham City Second, na iteki na Brigham City Utah Box Elder, o koya a qai kauta sara yani.

Ira na dauqito vakaitavi

Ena kedra maliwa na 1,000 na dauqito mai na 36 na matanitu era a veisisivi ena Qito ni Lokiloki ni Vulaibatabata ni 2002 erau koto kina e rua na Yalododonu Edaidai. O Lacey Heward, e dua na lewenilotu yabaki 22 ena Tabanalevu na Mount Mahogany, ena iteki na Highland Utah East, e sisi sivita yani e vuqa na nona yalorere kei ira e levu cake sara era veisisivi vata tiko ena 11 ki na 14 ni Maji, ka rawata kina e rua na metali varasa ena nodra veisisivi vakasisisi ena ucacevata na marama.

E se qai vula 18 ga o Sister Heward ena kena yacovi koya na vakacalaka ka vakavuna na nona lokiloki. Ia a sega ni vakaberaberataka na lokiloki oqori na nona sasaga me “ena kena vinaka duadua e rawata.”

“Au a cakacaka sara vakaukauwa me’u yacova mai na vanua oqo,” e kaya. “Sa dua na ka na kena talei me’u yacova mai na vanua oqo, me rawa me’u yavalata na yagoqu, me’u lako yani ka rawata.”

O Keith Barney, e dua na lewenilotu ena Tabanalevu na Alpine 11th, na iteki na Alpine Utah, a veisisivi ena veitau vakasisisi dabe takosova na lomanivanua vei ira na tagane. O koya talega e dua vei iratou na lewe ni timi ni vodo baisikeli ni Amerika vei ira na lokiloki.

A vakaleqai vakadua na yavai Brother Barney ena dua na vakacalaka ni se qai yabaki 14. Ena gauna oqo sa cakacaka tiko Tabana ni Qaravi Bula ena University of Utah. E dau vakavulici ira na se qai lokiloki vou na sala me ra rawata vinaka kina na nodra bula.

Itukutuku butakatakata ni Olimipiki

Me kedra ikuri na dauqito ni Olimipiki ka ra a taba ena Liahona ni June 2002 a matataka kina o Quinn Wheeler, yabaki 28, ka lewe ni Tabanalevu na Taylorsville 39th, ena iteki na Taylorsville Utah South, na U.S. Virgin Islands ena timi ni vaqiqi ena ucacevata. A tekivu taura o Brother Wheeler na vaqiqi ena ucacevata ena nona se vuli voli ka yaco me veikilai kei iratou na timi ni vaqiqi ena ucacevata ena nona cakacaka voli e St. Thomas ena loma ni yabaki 2000. A lewena na timi ena kena yaco e dua na leqa sega ni namaki.