Elder Gerald N. Lund
Mai na Vitusagavulu

Na Kalou e sega ni lawakitaka e dua ka sega talega ni dua ena lawakitaka na Kalou,’ oqri na ivosavosa nei tamaqu. E dau kaya talega vakawasoma vei keitou, ‘Na Kalou e dua na daucakaveisaumi vutuniyau,’” e kaya o Elder Gerald N. Lund, e dua na lewe ni Vitusagavulu ka qai kacivi vou.

“Keitou a susugi cake mai ena vakasama oqori,” e tomana tale, “ka se dau vakamacalataka tiko ga na noqu nanuma me baleta na veiqaravi. Na levu ga ni noqu vinakata me’u vakavinavinaka vua na Kalou, na levu ni Nona vakalougatataki au, ka sa qai vakavuna me’u sa qai dinau ga kina vakalevu Vua. Ena sega sara ni rawa mo rorovi koya yani.”

Ena gauna e lesu mai kina ena nona kaulotu o Gerald Lund, a nanuma o koya ni vinaka cake me sa na cakacaka mai na lako tale ki vuli.

“Au a cakacaka ena dua na kabani ni tara vale,” e vakamacalataka. “Ni oti e dua na macawa ena nona vakasavasavataka na kisi ni simede ena dua na barasi livaliva, au a qai kila ni sega ni o koya oqo na cakacaka au vinakata me’u cakava ena noqu bula.”

A la’ki curu kina Brigham Young University, ka rawata mai kina na nona koroi na bejila kei na masita. Na nona lewa me lako tale ki vuli a sega walega ni veisautaka na nona bula, ia a mani yaco talega kina me vakavulica na kosipeli vei ira e vicasagavulu na Yalododonu Edaidai ena vica vata na yabaki.

A tekivu veivakavulici ena semineri o Gerald Lund e Salt Lake City ena 1965, ka tekivutaka kina na nona cakacaka me 34-na yabaki ena Tabana ni Vuli ena Lotu. A kuria na nona veivakavulici ena semineri, na nona veivakavulici talega ena yavulotu, veiqaravi vakadairekita ni yavulotu, a cakacaka vakadauvolaivola ni lewenivuli, ka veiqaravi talega ena vica na itutu vakaveiliutaki. A vola talega o koya e vuqa na ivola kilai levu.

A sucu o Elder Lund mai Fountain Green, Sanpete County, Utah, kivei rau o Jewell kei Evelyn Lund ena I ka 12 ni Sepiteba 1939. Eratou a toki ki Salt Lake City ni se qai yabaki dua voli o koya ka ratou qai gole sara yani ki Murray, Utah, na vanua ka la’ki tubu cake kina vakalevu.

Ena 1963 a vakamautaki Retta Lynn Stanard mai Great Falls, Montana kina. E 7 na luvedrau ka 17 na makubudrau. O Sister Lund e dua na kenadau ena ivakatagi ka sa tabaka oti e vica tale na ituvatuva ni ivakatagi. Erau sa dau vakaitavi vata vakalevu na veiwatini na Lund ena vakatasuasua ni ivakatagi ni Kirisimasi kei na Siganimate.

Sa veiqaravi oti o Elder Lund vakaperesitedi ni tabana, bisopi, ka daunivakasala vua na bisopi. Ena gauna e kacivi kina ki na iKarua ni Kuoramu ni Vitusagavulu, a veiqaravi tiko o Elder Lund vaka-Peresitedi ni iTeki na Brigham Young University 14th Stake.