Anne C. Pingree
iKarua ni Daunivakasala, Mataveiliutaki Raraba ni iSoqosoqo ni Veivukei

E dau taleitaka na wilivola o Anne C. Pingree. Ia e uasivi sara, ni dau taleitaka me vukei ira tale na so me ra vulica na wilivola.

Ni veiqaravi voli kei na watina, o George C. Pingree, ni liutaka tiko na Tabana ni Daukaulotu na Nigeria Port Harcourt, a vagoleya eso na nona sasaga o Sister Pingree ena vakatoroicaketaki ni wilivola, vakabibi vei ira na veiliutaki ni veisoqosoqo. “Au na sega ni guilecava rawa na nodra mamarau na marama ena nodra vulica tiko na wilivola. Ni ra tucake ena gauna ni veituberi ka wilika e vica na laini me baleta na nodra itavi, era na vakasausau na vo ni marama, sa dua na ka na nodra marau,” e kaya o Sister Pingree. “E tadolava e dua na vuravura vou.”

Ena nona koroi ni bejila ena vova vaka Peritania mai na University of Utah, A dau soligauna o Sister Pingree ena wilivola me baleti ira na vosa vakasipeni ena imati ni itataba vuli ena Parokaramu ni “I Can Read” ka dau veivakavulici talega vei ira na ise mai Laotian ena Literacy Volunteers of America.

“Au vakabauta ni na dau vakatara na Turaga mo sotava eso na ka ena nomu bula me vakarautaki iko ki na veika ena qai yaco mai muri,” e kaya o Sister Pingree, ka nanuma ni vakarautaki koya na veika e sotava me baleta na wilivola ki na nona ilesilesi vou. Ni ikarua ni daunivakasala ena mataveiliutaki raraba ni iSoqosoqo ni Veivukei, e nuitaka ni na tomana tikoga na nona vakatorocaketaka na wilivola ena iSoqosoqo ni Veivukei.

E vakuria o Sister Pingree ni vukei koya talega na nona daucakacaka vata kei ira na duikaikai. “Sa rabailevu cake na noqu rai, kei na noqu kila me baleta na marama e vuravura raraba. E levu cake sara na ka era vakavulica vei au me baleta na vakabauta kei na ivakadinadina mai na veika au vakavulica rawa vei ira,” e kaya o koya.

Sa vakalevutaka na nona lomani ira ka taleitaki ira na marama ena Lotu na nona a lewena taumada o Sister Pingree na matabose raraba ni iSoqosoqo ni Veivukei, na peresitedi ni iSoqosoqo ni Veivukei ena tabanalevu kei na iteki, daunivakasala ena mataveilutaki ni Goneyalewa ena iteki, kei na peresitedi ni Lalai ena tabanalevu. “Au nuitaka me na rawa ni’u tarai ira yani na marama yadua ka vukei ira me ra vakila ni ra sa bibi sara ena mata ni Turaga. Era tukuna vei keda na Parofita, me vaka ni da marama ni veiyalayalati, sa tu na veika me da cau kina ki na kena tarai cake na matanitu ena itabagauna e muri oqo. Na noda ivakaraitaki dodonu ena rawa ni basika kina eso na duidui ena vuravura oqo,” e kaya o koya.

A sucu o Sister Pingree e Salt Lake City ena i ka 11 ni June 1941 kivei Ezra T. kei Maude Erickson Clark. Erau a vakamau kei na watina ena Valetabu mai Salt Lake ena 1963. E lima na luvedrau ka va na makubudrau.