Na Veika Dauveivakacegui ni Matanitu

Elder M. Russell Ballard

Mai na Kuoramu ni Apositolo Le Tinikarua

Vakacegu—vakacegu dina, e yavutaki vakayalo e na uto sara ni nomu bula—e lako wale ga mai e na loma kei na vuku ni vakabauta naTuraga o Jisu Karisito.

Kemuni na taciqu kei na ganegu, me’u kaya beka, e na vukuda taucoko, ka vakacaucautaka talega na mataveiliutaki ni Soqosoqo ni Veivukei kei na nodra matabose e na nodra mai qaravi keda ka ra se qai mai vakacegui ga oqo.

Vakadua noda sa yacova tale mai na itinitini ni dua na koniferedi rabaraba ka veilaveti ka veivakauqeti. Au dau vakaukauwataki ka vakararamataki e na gauna ni veivakatavulici kei na ivakadinadina oqo. Au kila ni vakakina e vuqa vei kemuni. Rairai beka na veika e da vakila e tautauvata talega vei ira na nona tisaipeli taumada na iVakabula ni ratou muri Koya mai na dua na vanua ki na dua tale ka rogoca Nona vakatavuvulitaka na itukutuku vinaka ni Nona Kosipeli.

E na vuqa na sala e gauna veivakayalolailaitaki kina vei ira na luvei Isireli na vei siga oqo. Na nodra cakacaka kaukauwa e na ruku ni veiliutaki ni Matanitu vaka-Roma, e ra mosita na galala kei na vakacegu. E ra waraka na Mesaia; era kila deivaki ni na lako mai ka vueti ira mai na nodra leqa vakayago kei na polotiki. E so era goleva na kosipeli ni marau kei na vakacegu ni iVakabula, e dina ga ni ra se bera ni kila vakavinaka sara na kena ivakavakayagataki vakayalo.

E na dua na siga e na nona veiqaravi voli vakatamata na Turaga, era a muri Koya yani na lewe vuqa ki na wai mai Kalili, ka ra wavoliti Koya ni duri tu e matasawa. “E a … vodo e na dua na waqa ka tiko sobu kina mai wai; a ra sa tu kecega na lewe vuqa mai matasawa. “E vakatavulica vei ira e vuqa na ka e na vosavakatautauvata” (Marika 4:1–2).

Era vakatavuvulitaki e na siga ko ya na veika cecere ka totoka, e okati kina na vosa vakatautauvata ni daukabukaburaki (raica Marika 4:3–20). E na icavacava ni dua na siga ni veivakavulici kei na veivakasalataki, e a vakatura vei iratou nona tisaipeli na Turaga me ratou takoso ki na taikadua ni Uciwai na Kalili.

Ni ratou soko tiko e na bogi ko ya, “sa tubu e dua na cagi levu sara, a sa seva na waqa na biau, a sa voleka ni luvu kina.

“A sa tiko ko koya e na mua emuri, a sa moce e nailokoloko; a ra sa vakayadrata, ka kaya vua, Vakavuvuli ko sa wele beka ga ni da sa mate?

“A sa tu cake ko koya, ka vunauca na cagi, a sa kaya ki na wasawasa, Mo cegu, mo sa maravu levu mai. A sa ruru na cagi, a sa maravu levu mai.” (Marika 4:37–39).

E rawa beka ni o raitayaloyalotaka na nodratou vakasama na iApositolo e na nodratou sarava dina na veika ka yaco—na cagi levu, na uca kei na wai—talairawarawa ki na ivakaro malumu ni nodra iVakavuvuli? E dina ga ni ra se qai kacivi ga ki na ilawalawa apositolo tabu, e ratou a kilai Koya ka lomani Koya ka vakabauti Koya. Era biuta mai na nodra cakacaka kei na nodra matavuvale me ra mai muri Koya. E na dua ga na gauna lekaleka eratou rogoci koya ni vakatavuvulitaka na veika veivakakurabuitaki, ka ratou raici koya ni vakayacora e vuqa na cakamana lelevu. Ia, oqo e sivia na veika e kilai rawa ka rawa me vakatakilai e matadratou.

“A sa kaya vei ira ko koya, dou sa rere e na vuku ni cava? e vakaevei ni sa sega na nomudou vakabauta?

“A ra sa rere vakalevu, a ra sa veikayaka vakai ira, O cei beka oqo, ni sa talairawarawa vua na cagi kei na wasawasa?” (Marika 4:40–41).

E na gauna ni veilecayaki kei na rere, na yalayala ni iVakabula me baleta na vakacegu tawayalani ni lomada e dau vakavuna na tubu ni yaloqaqa vei keda, me vaka ga na nona rawa ni vakamaravutaka na se ni biau, sa yaco me vakayaco ka lelevu vei ira era tiko vata kaya e na bogi ni cagi ca ko ya.

Me vakataki ira era a bula e na Nona veiqaravi vakatamata voli, era tu e so vei keda ka ra vakaqara na vakacegu vakayago kei na tiko sautu me ivakaraitaki ni kaukauwa veivakurabuitaki ni iVakabula. E da guilecava ni vakacegu sega ni vakaiyalayala ka yalataka o Jisu e vakacegu e loma, sucu e na vakabauta, vakadeitaki e na ivakadinadina, maroroi e na loloma, ka vakaraitaki e na talairawarawa sega ni yalani kei na veivutuni. E vakacegu ni yalo ka tara na uto kei na loma. Kevaka me dua e kila dina ka bulataka tiko na vakacegu e loma oqo, sa na sega na rerevaka na tatawasewase vakavuravura kei na duidui yalo. E na kila e dua e yalona ni sa vinaka na ka kece e vakabetena.

Ia sa sega sara na vakacegu e na ivalavala ca. E na yaco beka na tiko vinaka, rogo, vakatalega kina na rawa ka; ia e sega na vakacegu. “ko na sega ni kune marau e na nomu ivalavala ca” (Alama 41:10). E na sega ni rawa vua e dua me vakacegu kevaka e sega ni bula tiko me salavata kei na dina. E na sega na vakacegu e na yalo-qaciqacia se veiqati. E sega na vakacegu e na vosavosa ca, veivakadukadukalitaki se vakatarai ni valavala ca. E sega na vakacegu e na vakayagataki ni waigaga ni veivakamatenitaki, mateni se veivakagarogaroi ca ni loma, yago se e na tiko vata, vei ira era dau veivakalolomataki era na tu ga e na veilecayaki ni vakasama kei na yalo me yacova ni ra sa lako mai vei Karisito e na yalomalumalumu ka kere veivosoti e na veivutuni ni yalodra taucoko.

E na dua dina ga na gauna ni da segata na “vakacegu ni Kalou, ka sa uasivita na ka kecega” (Filipai 4:7) Na vakacegu ni yalo veilecayaki oqo e na yaco mai vei keda ni da muria na rarama ni Kalou, ka sa “soli vua na tamata kece ga me ra kila kina na vinaka mai na ca (Moronai 7:16), ni na tuberi keda ki na veivutuni kei na kere veivosoti. Ni da sa gadreva kece me da kila “na veika ni noqu matanitu.” (V&V 36:2) ka me ra tovolea “na vua ni valavala dodonu” kei na “veivakacegui vei ira era sa ia tiko na veivakacegui”, (Jemesa 3:18). E na veivale, itikotiko, se tikotiko raraba sa dodonu me da segata na vakacegu, ka kua ni duavata se dau vakatekivuna na veiba se veitawasei.

E na itukutuku makawa ni volanikalou, e yalataka tu na Turaga na vakacegu vei ira na dau muri Koya. E vola kina na Daunisame: “E na solia na Kalou na Kaukauwa vei ira na Nona tamata; E na vakalougatataka na Nona tamata ko Jiova ni sa vakacegui ira (Same 29:11). E a vakatokai Koya ko Aisea me “Tui ni Sautu” Aisea 9:6) E a raica rawa ko Nifai na nodra veisiga na nona kawa, “Ia na Luve ni Yalododonu e na rairai vei ira; e na vakabulai ira ko Koya na veisaututaki kaya.” (2 Nifai 26:9).

Ni vo ga e vica na auwa me vakayacora na itavi lagilagi ka dredre ni Veisorovaki, e a yalataka vei ira na tisaipeli na Turaga. “Au sa laiva vei kemudou na vakacegu, au sa solia vei kemudou na noqu vakacegu.” (Joni 14:27)

E a yalataka tiko li vei ira na nona itokani na mataqali vakacegu ka kila ko vuravura, ni tiko vinaka taqomaki ka sega kina na veiba se veivakararawataki? Sa dina sara na itukutuku ni veika makawa e sega ni vakakina. Ko ira na iApositolo taumada era kila vakalevu na veidredre kei na veibeitaki e na vo taucoko ni nodra bula, sai koya beka ka vakaikuritaka kina na Turaga na rai oqo ki na nona yalayala ni vakacegu: “au sa sega ni solia vei kemudou me vakasa solia ko vuravura. Me kakua ni rarawa na yalomudou, se rere. (Joni 14:27).

“A veika oqo ka’u sa tukuna vei kemudou, mo dou rawata na vakacegu e na vukuqu,” e a tomana “Dou na kunea e vuravura na rarawa; ia mo dou vakacegu; au sa vakamalumalumutaki vuravura” (Joni 16:33, vakaikuritaki).

Na vakacegu—na vakacegu dina ka kilai dina mai lomada—e lako duadua ga mai e na vuku ni vakabauta na Turaga ko Jisu Karisito. Ni sa yaco me kila na dina talei oqo sa yaco me vakayagataki na kila vaka kosipeli, na vakacegu levu e na lako mai e na uto kei na yaloi ira na luvei Tamada Vakalomalagi. E kaya ko Josefa Simici e na vuku ni iVakabula, “Ko koya sa vakayacora tiko vakadodonu na nona i tavi, e na rawata vakaidina na kena isau; io e na kune vakacegu e na bula oqo ka na rawata na bula tawamudu e na bula sa bera mai: (V&V 59:23).

E dau veivakasakiti e na so na gauna ni da raica na veisau e kauta mai na vakacegu oqo ki na nodra bula ko ira era ciqoma. Ni’u a se veiliutaki tiko mai na Tabana ni Kaulotu e Toronto Canada e na vica na yabaki sa oti, keitou a vakatavulici iratou tiko e dua na matavuvale ka ratou bula tu e na butobuto ni yalo. Eratou a dravudravua ka sega ni vuli, ka laurai votu vei iratou na nodratou sega soti ni kauwaitaka na kedratou irairai kei na nodratou isulusulu. Ia e ratou a tamata vinaka ka dauvakarokoroko “vakai ira era sa yalodina” ka keitou dau masulaka tiko me ra kunei mai vei ira na noda daukaulotu—ka ratou ciqoma vakayalo ka yaco me ratou kila e na imatai ni gauna na vakacegu e solia na kosipeli.

E na gauna keitou kila kina ni ratou sa vakarau papitaiso, keirau a tiko kei Sister Ballard e na lotu ni papitaiso. Au a tucake tu e yasai bisopi ni tabanalevu ni rataou yaco mai na vuvale. E ka dina, me’u tukuna vei kemuni ni a dua na ka na kedratou irairai. E ratou rairai sega ni tu ni kauwaitaki, duka ka, yakusurasura. Baleta ni a sega ni tiko me dua na gauna e tauni o bisopi e a se sega kina ni se sotavi iratou na nona lewenilotu vou, o koya gona na imatai ni sota oqo e a sega soti ni taleitaki. E a kidavaki iratou vakavinaka, ia ni ratou sa gole yani, au kila ni a voleka sara me cibati koya.

Au a mokoti koya yani na bisopi vinaka oqo me ivakaraitaki ni noqu veitokoni—vakayago ka vakakina vakayalo. Au vakila ni dodonu me’u kaya vua: “Bisopi, e sega beka ni totoka oqo? E datou na vakayacora me ratou lewenilotu vinaka sara!”

E a raici au mai ka matadredredre. Au sega ni kila rawa se dredre baleta nanuma ni’u dina, se baleta ni nanuma ni’u baci dua tale na daukaulotu dau nuitaka na vinaka.

E a tekivutaki na lotu ni papitaiso, ka ratou papitaiso na matavuvale oqo. Na siga tarava keitou la’ki lotu sara e na tabanalevu ko ya me keitou vakadinadinataka ni ratou sa ciqomi vinaka na matavuvale oqo mai vei ira na lewenilotu.

Ni ratou sa curu mai na matavuvale oqo e na valenilotu ki na lotu ni sakaramede, au a dabe tikivi bisopi tiko. E a tokara na tama e dua na sote vulavula ka savasava. E a sega ni levu vinaka me rawa ni vakaibulukautaki na domona ka dara toka e dua na neketai ka’u nanuma ni’u dabo tiko vua e dua vei ira na noqu daukaulotu. Ia na matana e a vakaserautaki e na marau kei na vakacegu. Ko tina kei goneyalewa e vaka me rau sa vukici mai na kedrau irairai e na noa. E sega soti ni vakaivukivuki na nodrau ivinivo ia e rau a savasava ka totoka. Koi rau talega, e kune vei rau na iserau ni kosipeli. Koi rau na gonetagane lalai e rau tokara na sote vulavula ka vakavicataki na levu vei rau, ni lobiki cake tu na ligadra. Ka rau tokara na neketai ka voleka ni tara tu na durudrau na kena balavu. E a kilai vakasigalevu ni rau a vakasulutaki rau sara ga e na nodrau isulu na daukaulotu me rawa me rau tokara na isulu e ganita na lotu ni sakaramede.

Eratou dabe vata no kei rau nodratou daukaulotu, ka cila mai vei iratou na rarama ni kosipeli. E vakamacalataka oqo o Alama me “sa vakararamataki kemudou tiko ga na iserau ni matana” (raica Alama 5:14). Au a vakaraviravi yani vei Bisopi ka’u kaya, “Raica, Bisopi? E datou na rawa ni vakayacora me ratou Yalododonu!”

E dina na vukici ni kedratou iraiirai mai na bogi e matata ni vakatauvatani kei na tavuki ni lomadratou ni sa curuma yani na yalodratou keina nodratou bula na kosipeli. Mai na nodratou ivakasala na daukaulotu kei na nona dau veiwasei wasoma kei iratou na nodratou bisopi vinaka kei ira na lewenilotu e vakavuna na nodratou lamata cake mai na butobuto vakayalo na matavuvale oqo ki na rarama kei na dina ni kosipeli. E na rarama oqo e ratou a vakasalataki, vakabulabulataki, ka veisautaki e na vakacegu ka lako mai e na kila ni bula tiko na Turaga ko Jisu Karisito. Na rarama ni kosipeli sa vakalesui mai vua na Parofita ko Josefa Simici sa vakatekivu me tuberi iratou na vuvale oqo ki valetabu, ka ratou a ciqoma kina na nodratou veivakalougatataki tawamudu ni oti e dua na yabaki.

Vakadua tale mai na parofisai nei Aisea: “A luvemu kecega e na vakavulici ira ko Jiova, e na ka levu talega na nodra vakacegu na luvemu.” (Aisea 54:13).

E na gauna ga e da tovolea kina na vua kamica ni vakacegu ni Kalou, sa dau yaco sara mai vei keda na gagadre me da wasea yani vei ira na tani. E a kilai o Francis mai Assisi me “dau lomana na veika buli” ka vakayagataka vakalevu na nona bula e na veivakalotutaki vei ira na dravudravua kei na vakaleqai—bau kina na manumanu. Na vakacegu e kunea e na nona veiqaravi e nona ivakaukauwa ka segata me okati ira talega kina na tani. E a vola:

Turaga, ni qisi au me’u vu ni vakacegu;

Ni tu na veicati,me’u ivakaraitaki ni loloma;

Ni tu na mavoa, veivosoti;

Ni tu na lomalomarua, vakabauta;

Ni tu na yalolailai, na inuinui;

Ni tu na butobuto, rarama;

Ia ni tu na rarawa, reki.

Isa , iVakavuvuli Vakalou, ni vukei au me’u kua soti ni qara

Me’u dau vakacegui, me’u dau veivakacegui;

Ni kilai tu ga, me’u dau kila;

Ni lomani, me’u dau loloma;

E na dausolisoli e rawa kina naka;

E na dauveivosoti e da na dauvosoti,

E na mate e da na sucu kina ki na bula tawamudu.

Vakawasoma na nona dau cikevi ira tiko na Muri Koya na Turaga me ra “dautataro” ka yalataka tiko “ni ra na vakatokai me ra luve ni Kalou” (Maciu 5:9). Na vakasama oqo e kune e na veiyasana e na ivolanikalou, ka vakatubura e dua na kilaka me baleta na tataro mai na vosavakaibalebale kei na dautukutuku:

• “Veivinakati kaya sa beitaki iko” (Maciu 5:25).

• “Lomana na nomudou meca” (Maciu 5:44).

• “Kakua ni daulelewa” (Maciu 7:1).

• “Mo lomana na kai nomu me vaka ko sa lomani iko” (Maciu 22:39).

• “Kakua ni daulelewa” (Luke 6:37).

• “Veivosoti: (Luke 6:37).

• “Dou veilomani” (Joni 13:34).

Sa ikoya oqori e vica walega na ivakasala vakaivolanikalou ka ra vakamatatataka ni vakacegu ni Kalou e sega ni dodonu me bureitaka. Ia, me wasei kei ira na noda lewe ni matavuvale, itakani, kei ira e da bula vata kaya. E dodonu me wasei vei ira sa lotu vakakina kei ira era sega ni lewenilotu. Kevaka era se sega tiko ni tovolea vakai ira na kamikamica kei na veivakacegui ni taucoko ni kosipeli sa vakalesui mai ko ira era bula wavolivoliti keda, sa na rawa me ra na vakalougataki e na nodra raica e na noda bula kei na nodra vakila na vakacegu ni kosipeli e na yasada. Na itukutuku ni vakacegu e na tubu ka buroro e na noda ivakaraitaki.

“Mo dou vakacegui sara,” e kaya na iApositolo o Paula, “ia na tiko vata kei kemudou na loloma kei na Kalou ni vakacegu” (2 Koro. 13:11).

Au vakavinavinaka ni’u rawa ni vakadinadinataka vei iko ni sa Luve ni Kalou o Jisu Karisito, kei na muri Koya, e na vakabauta kei na vakadinata, e da na rawa taucoko ni kunea na vakacegu kamikamica ni lomada e solia tu na kosipeli me vaka e vakatavuvulitaki tiko vei keda e na koniferedi oqo. E na yaca i Jisu Karisito, emeni.