Oqo na Sala Eda Vakatoka me Bula
Ni o ni tudei e na sala dodonu, na icocovi ka kune ni sa mai cava na ilakolako e rau na veidonui vinaka sara kei na gauna dredre ko ni a sotava e na tolo ni sala o ya.
Kemuni na itokani, au marau ni’u tiko rawa kei kemuni eke edaidai. Au via vosa vakatabakidua vei ira na gonetagane na lewe ni Matabete i Eroni. Au lomani kemuni ka’u kawaitaki kemuni dina sara vakalevu.
E na ivolalalai vou na Me iSakisaki ni iTabagone, eratou kaya vei kemuni na Mataveiliutaki Taumada: “Kemuni na neimami gonetagane lomani … keitou vakabauti kemuni dina sara. O ni yalo digitaki ka ni o ni lako mai edaidai e na gauna e levu dina kina na icolacola kei na galala, ka vaka kina na veitemaki. O ni sa mai tekivuna na nomuni ilakolako e na bula vakatamata oqo. E vinakata na Tamamuni Vakalomalagi na nomuni bula me vakasinaiti e na reki ka mo ni lesu tale i na Nona iserau. Na digidigi o ni na kitaka edaidai e na lewa e levu na veika ka na yaco e na nomuni bula kei na gauna taucoko ni tawamudu” ([ivolalailai, 2001], 2).
Au nuitaka ni rawa e na dua na tikina lailai, edaidai, mo ni na vuli mai na noqu yabaki ni bula voleka ni vitusagavulu ni’u lakova tiko na sala oqo ni bula. Era sa na tukuna oti beka vei kemuni na nomuni itubutubu se tukamuni na veika oqo: “Ni o ni qase cake mai, sa totolo na toso ni gauna.” E vaka ni dua na miniti o ni yabaki tinikarua ka tu taucoko e matamuni na nomuni bula ka dua tale na miniti e tarava o ni sa voleka ni yabaki vitusagavulu kei na tete levu cake tiko ga i liu ni kete!
E dredre me’u vakabauta ni sa voleka me yabaki 13 na iotioti ni noqu a vosa e na bose raraba ni matabete. E na gauna o ya au a wasea vei ira na itokani me baleta e dua na ilakolako au a cakava e na basikeli kei ira na luvequ tagane, ka vakayagataka na veika e a sotavi mai kea e na bibi ni vakarau vakavinaka e na noda ilakolako ni bula.
Edaidai au via talanoataka vei kemuni na veilakoyaki tale e so au a cakava ka wasea kei kemuni na lesoni au vulica mai kina.
Wale tiko ga oqo, e so na lewe ni noqu matavuvale eratou a nanuma ni na lasa me keitou vodo basikeli mai Bozeman, Montana i Jackson Hole, Wyoming e Amerika. E rauta e 362 na kilomita na balavu ni sala oqo ka na taura e tolu veimama na siga ka keitou na kosova na Continental Divide vakatolu. Keitou a kila ni ilakolako e na kosova na veiulunivanua e na draki vinaka e na veivakavulici lagilagi ka na vukea me keitou diva na veibuli ni Kalou.
Ni oti na vakavakarau vakamaqosa, e rua na luvequ tagane kei dua taudua na luvequ goneyalewa kei au keitou a tekivuna na ilakolako e na vodo basikeli i na neitou imatai ni cegu e Big Sky, Montana. E a totoka na mataka, ka keitou nanuma ni toso e na gole vinaka. Ia, ni keitou ia tiko, a sa tekivu basika na o butobuto ka tau sara na uca ka a vuki me veiwaki na uca kei na uca cevata kei na uca mokimokiti cevata ka vukica na draki me batabata, suasua, ka vakatubu rarawa. Ni keitou vakacavara na imatai ni siga ka yacova na neitou icegucegu e na bogi, au a nanuma lesu ni bula e rawa sara ni vaka na imatai ni siga o ya. E a vinaka ni keitou a sa vakavakarau mai me baleta na veimataqali draki kece; kevaka me a sega, e rawa sara me dredre me vakaoti na neitou imatai ni siga. E na veiwasewase ni sala e na bula oqo e dodonu meda tekivuna e na vakasinaiti e na vakanuinui kei na vakabauta, ia meda vakarau tale sara tu ga meda sota kei na veicoqacoqa se veidredre e na so na tiki ni ilakolako.
Na itovo o ni tauyavutaka e na nomuni gauna ni itabagone e na rawa me sala vata kei kemuni e na nomuni bula vakatamata kece. Ni caka na digidigi dodonu edaidai o ni na rawa moni taura na sala ka na vukei kemuni moni vosota na veigauna batabata ka dredre mai muri.
Me ivakaraitaki, kevaka o ni taura na itovo mo ni dau vosavosaca, na dede ni o ni vakayagataka na kena dredre moni veisau me tini. E vinaka cake oqo moni taura e dua tale na sala, e dua e gole i na savasava ni vakasama, na vosa kei na kena vakayagataki me rawa kina moni marautaka na veitokoni ni Yalo Tabu. Vakasamataka na dredre ni veiqaravi kaulotu ka tiko na vosavosaca me basika e na lomamuni e na gauna o ni guta kina na Yalo Tabu me volekati kemuni e na gauna kece. Kevaka e nomuni leqa na vosavosaca, oqo na gauna moni veisau kina.
E na ikarua ni siga ni neitou ilakolako keitou sa gole i na ra i West Yollowstone. E lako vinaka kece na veika kece sara—era cici vinaka na basikeli, sa cegu vinaka na yavai keitou, ni keitou naulu tiko yani i na ikarua ni neitou icegucegu. E kea au a nanuma kevaka keitou sega ni vakadikevi keitou vakavinaka e na gauna e tu vinaka tiko kina na bula e na rawa me basika na veitemaki me guilecavi na Tamada Vakalomalagi ka soli na vakavinavinaka vei keitou vakaikeitou me baleta na ituvaki vinaka. Kakua ni coko e na cala o ya.
E a vakavulica na Parofita o Josefa Simici: “Na bula marau e inaki kei na ituvatuva ni noda bula; na kena icavacava talega, kevaka eda vakasaqara na sala ka gole kina; na sala o ya na bula savasava, tu dodonu, yalododonu, bula vakalou, kei na talairawarawa i na ivakaro ni Kalou” (Teachings of the Prophet Joseph Smith, digitaka Joseph Fielding Smith [1976], 255–56).
E sinai na iVola i Momani e na veiitukutuku e baleti ira era vakalougatataki mai vua na Turaga ka ra qai dokadokataka na veika era rawata. E sa qai yaco e na nodra dokadoka mera biuta na sala dodonu ka ra mai vakayalia kece na veika era taukena ni ra sa lutu mai na dina. Moni vakadeitaka moni kakua ni vakataki ira na Nifaiti ni gauna e liu; moni nanuma na ivurevure ni nomuni veivakalougatataki.
E na ikatolu ni siga ni neitou sala au a kila ni dina keitou na sota e so na itosotoso dredre e na cabeti cake na neitou bula, na neitou vakasama dei e na lewa se keitou sotava vakacava. E na siga o ya keitou kosova vakatolu na Continental Divide, ka cabeta cake na delana mai na 4800 na fiti ki na 8300 na fiti. Na cabeti ni itatakoso ni ulunivanua cecere e na basikeli e vinakata na vakasama dodonu me rawati kina na cecere dodonu. E tautauvata e na bula. E na kena tuvani na inaki yaga ka wadravi vakamatua sara, o ni na vulica na vakaivakarautaki-vakaikeda ka rawata e levu na ka. Io, e na so na gauna na cabeta na icabecebe dredre ni ulunivanua cere e a sa yacova na iyalayala ni ka e rawa me’u rawata, ia au a sega ni via guce ni’u a sa yavutaka oti na noqu inaki.
Kemuni na gonetagane ni Matabete i Eroni, au vakadreti kemuni moni nakita na nomuni inakinaki vakaikemuni me vaka na vakacavara na seminari, vakaotia na kaulotu e na yalodina, rawata na nomuni ivola mai koronivuli, ka kilikili mo vakamau e na valetabu. E na nomuni yabaki ni bula era rawa ni vaka mera inakinaki lelevu, ia kevaka o ni tekivu kaba cake edaidai o ni na vakarau sara vakavinaka mo ni rawata.
E na rua na yabaki sa oti keirau a nakita vata kei Elder Richard G. Scott mai na Kuoramu ni Tinikarua na iApositolo me keirau soko drano e na bavelo e na yasayasa lekutu ni Quetico kei Ontario, Canada e na cola bavelo mai na dua na drano ki na dua tale. Ni keirau yacova na veimama ni neirau sala e na dua na drano levu, a veisau na draki me sa voravora na drano ka a maravu a sa cudrucudru dina sara, me sa tekivu viritaka na bavelo.
Me keirau sa lewa se cava me caka. Me keirau tovolea ga me keirau yacova na neirau ikelekele se keirau gole i na dua na yanuyanu ka vakaruru. Na isau ni taro edaidai e rawarawa sara, ia e na gauna o ya e a dredre me keirau kila. Kevaka keirau toso tiko ga e rawa me keirau yacova na tikina me keirau la’ki vakacegu kina. Ia kevaka keirau wawa keirau na via berata sara na neirau yaco ka qai toso e na buto. Ni keirau vakasamataka tiko na cava me keirau cakava, keirau a vakauqeti me keirau gole vakatotolo sara i na yanuyanu voleka duadua. Ni keirau a kitaka o ya, a sa qai ca sara na draki ni a sa roro mai e dua na cagi kaukauwa. Kevaka keirau a toso tiko ga e na voce, e a rawa sara me keirau vakaleqai.
E na bula vakatamata eke e vinakati meda vakatulewa bibi, na wena e na vakamawe ka na dede e na noda bula vakayalo ka se bera mai. Au vakauqeti kemuni moni raica moni kilikili e na gauna kecega ka qara na veivukei ni Yalo Tabu moni digidigi dodonu e na gauna kece.
E kaya vei keda o Nifai e na iVola i Momani: “Dou sa tu e na sala dodonu ka rabailailai sa basika ki na bula tawamudu; io dou sa curu mai e na matamata ni koro; dou sa muria na ivunau nei Tamada kei na Luvena; dou sa rawata na Yalo Tabu.” (2 Ni. 31:18).
Ni keitou sa mai vakaotia na neitou ilakolako 362 na kilomita vakamatavuvale keitou a vulica ni veitalia na dredre eda rawa ni sotava e na sala ka da vakatoka na bula oqo, na marau vakaitamera e waraki ira era talairawarawa i na ivakaro ka vosota me yacova na ivakaotioti.
Kemuni na gonetagane ni Matabete i Eroni moni taukena na inakinaki moni dikeva matua na nomuni icavacava tawamudu. Io, na ilakolako ni bula e na vuqa na kena vinaka vata kei na kena dredre. Io, e na tu na siga o ni na vakila na dredre matua ni itosotoso. Ia ni o ni tudei e na sala dodonu, na icocovi ka kune ni sa mai cava na ilakolako e rau na veidonui vinaka sara kei na gauna dredre ko ni a sotava e na tolo ni sala o ya.
Me vakaruataki, mai na ivolalalai Me iSakisaki ni iTabagone, eratou vola na Mataveiliutaki Taumada: Moni taqomaka vinaka me savasava na lomamuni kei na yagomuni mai na ivalavala ca ni vuravura me rawa kina moni cakava na cakacaka levu ka tu e matamuni. Keitou masu moni kilikili moni rawata na nomuoni ilesilesi ni tara na matanitu ni Kalou ka vakarautaka na vuravura i na iKarua ni Lako Mai ni iVakabula” (tabana 3).
Kemuni na noqu itokani gone, au kerea moni kila na bibi ni yalomatua e na nomuni vakamuria na ivakasala nodra na Parofita, e na nomuni kina na yalomarau e na sala kece ni bula.
Au vakadinadinataka oqo e na yaca i Jisu Karisito, emeni.