Vakabauta Talairawarawa
“Vakabauta Talairawarawa” e ka ni veivakadinati. E rawarawa na taro: Eda vakadinata li na Tamada Vakalomalagi? E da vakadinati ira li na noda Parofita?
E na vuravura eda bula kina oqo, e sega ni vaka na kedra irairai na veika eso. Eda sega soti ni dau vakila na vei idre kaukauwa era dau dreti keda. Na irairai ni veika e dau rawa ni veivakacalai.
E na vica na yabaki sa oti a yaco vei au na veivakacalai ni irairai ka rawa sara me a veivakaleqai. Eratou a sikovi keitou mai na tavalei watiqu mai Utah kei iratou na nona matavuvale. E a dua vei ira na siga e na vula ikatakata e maravu na matasawa mai Oregon ka keitou siwa toka e loma ni wai. E a taleitaki sara ka keitou lasa sara e na neitou tobo ika toka, ia e vakasauri ga ena noqu raivuki yani, na vuna au sega ni kila, au sa raica e dua na ua ka walu na futi na kena vakaitamera ni sa cuvari keitou sobu mai. E soli ga vei au na gauna me’u kailavaka na leqa ni se bera ni samuta taucoko na dela ni waqa. E a vuki cake tu ga na waqa ia, e a kolotaki yani ki wai o Gary na tavalei keirau. Keitou a vakaiqaloqalo kece tu, e via dredre vakalailai na neitou muataka yani na waqa ka sa veimama tu e na wai, ki na vanua e vakaciriciri koto kina, keitou mani dreti koya mai waqa.
Keitou a sotava na ka ka vakatokai me ua tubukoso. E sega ni dau yaco vakawasoma ka sega sara ni dau kilai na kena vakarau yaco mai. E muri keitou a qai kila ni a sa veitubuyaki voli e na matasawa e Oregon-Washington e na siga koya, ka vakaluvuca e lima na tamata, e na tolu na leqa duidui e waqa. E a vu taucoko mai vua na ua tubukoso vata ga koya, ka sega ni kilai na vuni nona lamata cake mai e dela ni wasawasa. E na gauna keitou soko sivita kina e dua na yamotu, e a maravu ka tadodo na wasawasa ka sega sara ni dua na ivakatakilakila ni leqa e kune kina. Ia, e a veivakacalai sara tu ga na irairai ni wasawasa ka sega saraga ni vaka na ka e a se qai yaco ga.
E na noda ilakolako e na vuravura oqo, sa dodonu me da dau qarauna tikoga na veivakacalai, ka sega e na kena irairai ga. Kevaka e da sega ni qaqarauni sa na rawa me ivakarere ki na mate na veiua tubukoso ni bula me vakataki ira e na loma ni wasawasa.
E dua vei ira na lawaki tubukoso vakaoqo nei koya na keda meca sa ikoya na noda vakabauta ni talairawarawa sega na kena taro ki na ivakavuvuli ni ivakaro ni Kalou e talairawarawa mataboko.
E nona lalawa sa ikoya me vakatubura vei keda na vakabauta ni dodonu me da muria tikoga na noda bula vakayago kei na noda veilalawa qaciqacia. Oqo e vakayacora e na nona vecei keda e na vakasama ni “mataboko” na noda muri ira na parofita ka talairawarawa ki na veiivakaro ka sega ni noda vakasama vakaikeda. E vakatavuvulitaka ni sega ni yalomatua ke da vakayacora e dua na ka baleta ni tukuna vei keda e dua na parofita bula se mai vei ira na parofita ni ivolanikalou.
Na noda talairawarawa sega ni vakatarotaro ki na veiivakaro ni Turaga e sega ni talairawarawa mataboko. E vakavulica vei keda o Peresitedi Boyd K. Parker e na koniferedi ni Epereli 1983. ‘Ko ira na Yalododonu edaidai e sega ni ra talairawarawa baleta ni ra vakaukauwataki mera talairawarawa. Era talairawarawa baleta ni ra kila e so na dina vakayalo ka ra sa navuca e lomadra, me nodra ivakaraitaki ni talairawarawa vakatabakidua vakaiira ki na veiivakaro ni Kalou… . E sega ni da talairawarawa baleta ni da mataboko ia baleta ni da rai. Boyd K Packer [Epereli 1983 CR]
E da na rawa beka ni vakatoka me “vakabauta talairawarawa.” E na vakabauta, e talairawarawa ko Eparama e na nona vakarautaki Aisake me isoro; e na vakabauta e a talairawarawa, o Noa me tara na waqa; e na vakabauta, e a talairawarawa o Nifai e na nona lakauta mai na peleti parasa; e na vakabauta sa rawa kina vua e dua na gone talairawarawa me lade mai e na dua na vanua cere ki na liga kaukauwa i tamana. “Vakabauta Talairawarawa” e ka ni veivakabauti. E rawarawa sara na taro, e da vakabauta li na Tamada Vakalomalagi? Eda vakabauti ira li na noda parofita?
E dua tale na veivakacalai nei koya na keda meca sa ikoya na nona vakavuna me da vakabauta ni vuku kei na vulici ni veika vakavuravura e sa ivurevure duadua ga ni kilaka ka dodonu me da muria. Na taci parofita Nifai o Jekope, e a kidava na lalawa ni Meca e a qarauna me kakua ni vakacalai mai vua na daunivuku e na nona kaya kevaka ko sa vuli sa sega ni yaga mo muria na ivakasala ni Kalou.
“Raica na nona qaseqase na vu ni ca! Raica na nodra sesewa, na nodra malumalumu kei na nodra lialia na tamata! Ni ra sa kila-ka era sa vakasama ni ra sa vuku, ka ra beca na ivakaro ni Kalou ka sega ni via vakarorogo kina, ni ra sa vakasama era sa kila na ka kecega; ia sa ka sesewa ka sega ni yaga vei ira na nodra vuku. Ia era na rusa. (2 Nifai 9:28)
E sega ni kaya o Jekope me da kakua ni kila na ka. E a kaya ga ni sa vinaka na vuku kevaka era sa muria na ivakaro ni Kalou.
E so era nanuma sara ni rawa mo digitaka se evei vei ira na veivakaro ni Kalou mo muria. Era vakatakilakilataka e vuqa na ivakaro me ra ka walega ka rawa me levei ka sega ni ra ka me rerevaki se me ra ka yaga. Na veika me vaka na noda dau masu, rokova na siga ni vakacecegu. Noda dau tukuna vei ira na luveda ni da lomani ira, wiliki ni vosanikalou, saumi ni katini, tiko e na veisoqoni kei na so tale.
Ko Tamada Vakalomalagi e veitokani vinaka kei keda na luvena. E a taroga na taro oqo na iApositolo o Paula, “Ia kevaka e na rorogo na davui-ni-valu ka sega ni kilai na kena rorogo, o cei e na vakarautaki koya me la’ki valu? (1 Koro 14:8) E na vunautaki ni kosipeli e sega kina na rorogo ka sega ni kilai. E sega na taro me baleta na ibalebale ni ka sa tukuni se baleta na veiliutaki ni yalo. Na kosipeli e sega ni vakatara na veilecayaki se vakataroga se cava me da cakava. Era sa vakaraitaki matata vei keda e na vuqa na veisala. E da a sega ni biu wale tu. E tu na vosanikalou, ko ira na parofita, noda itubutubu lomani kei ira na iliuliu.
Na cava e da dau lako sese kina e na so na gauna? Na cava eda dau vakatara kina me vakacalai keda na Meca? Na iwali ni veivakacalai oqo e matata e na kena tukuni ia e na so na gauna e dredre e na kena bulataki. Ko Peresitedi Harold B Lee e na koniferedi ni Okotova1970 e a vosa me baleta na Turaga, na Meca kei na iwali ni nona dau veivakacalai.
“E levu sara na veivanua dredre eda na gole kina ni se bera ni vakacavara na turaga na lotu kei na vuravura e na iwasewasei ni tabagauna oqo, … E na tubu na kaukauwa nei Setani; e da raica e na veiyasana … Ia oqo na ivakaruru duadua e noda ni da lewenilotu sa ikoya me da cakava saraga na ka e kaya na Turaga ki na lotu e na siga e a tauyavutaki kina. Sa dodonu me da muria na vei vosa ni ivakaro ka solia mai na Turaga vei ira na parofita… . E so na ka e na taura na vosota kei na vakabauta.”
E a qai vakuria o Peresitedi Lee e na dua na ivakasala e na nona kaya ni da na sega ni dau taleitaka tu ga na veika ka lako mai vei ira na vakaitutu e na lotu, baleta ni na dau veicoqacoqa kei na noda rai vakaikeda se coqa e so na noda bula ni veimaliwai. Ia, e da na rogoca ka vakayacora na veika oqo me vaka sa lako mai e na gusuna na Turaga e da na sega ni vakacalai ka na noda na veivakalougatataki lelevu.
E kauti keda lesu tale ki na talairawarawa. E na dau vaka tu ga koya. E tiki ni tuvatuva ki na Marau Tawamudu. Au sega ni kila e dua na ivakavuvuli me uasivi cake mai na kilai ni veika me baleta na bula oqo kei na kena e tarava. Na vosanikalou kece era vakatavulica na talairawarawa ka sega ni dua na apositolo se parofita e a bula me sega ni vakatavuvulitaka na ivakavuvuli ni talairawarawa.
E na so na gauna e dodonu me da talairawarawa kevaka mada ga e da sega ni kila na inaki ni lawa. E ka ni vakabauta na talairawarawa. Na Parofita o Josefa Simici e na nona vakatavuvulitaka na talairawarawa e kaya “Na veika kece sa lavaka na Kalou e donu, dina ga ke da sega ni kila na vuna, ia e muri.” (raica Teachings of the Prophet Joseph Smith, digitaki mai vei Joseph Fielding Smith [1976], 256).
Au vakavinavinaka ni keitou a vakaiqaloqalo tu e na siga katakata koya e wasawasa. Au vakavinavinaka ni keitou levea rawa na vakacalaka ka vakayacora na ua tubukoso ko ya vei ira oya. Sa noqu masu me da na dau daramaka tikoga na noda iqaloqalo ni talairawarawa ka rawa kina me da levea na veileqa ka na yaco mai kevaka e da vakacalai ka muria na veitemaki ni meca.
Au vakadinadinataka ni bula tiko na Tamada Vakalomalagi, ni lomani keda kevaka e da dau talairawarawa sega ni vakatataro ki na Nona veivakaro e na rawa tale vei keda me da bula kei Koya kei na Luvena o Jisu Karisito na noda iVakabula ka noda Dauveivueti, e na yaca i Jisu Karisito, emeni.