Era Kacivi na Vakaitutu Raraba kei na Vitusagavulu ni Wasewase, Vakakina na Mataveiliutaki Raraba ni iSoqosoqo ni Veivukei

Era a tokoni ena i ka 6 ni Epereli ena i ka 172 ni Koniferedi Raraba Vakayabaki o ira na Vakaitutu Raraba, Vitusagavulu ni Wasewase kei na mataveiliutaki raraba ni iSoqsoqo ni Veivukei era se qai kacaivi vou.

Erau kacivi me rau veiqaravi ena iKarua ni Kuoramu ni Vitusagavulu o Elder Gerald N. Lund kei Elder William R. Walker. A kacivi me peresitedi raraba ni iSoqosoqo ni Veivukei o Bonnie D. Parkin, ka nona imatai ni daunivakasala o Kathleen H. Hughes kei Anne C. Pingree me ikarua ni daunivakasala.

Era a kacivi talega e tolusagavulu na lewe ni Vitusagavulu niWasewase vou—e 13 e Amerika, rua mai Brazil, rua mai Japani, ka yadua mai Argentina, Ositerelia, Bolivia, Chile, Ecuador, Peritania, Ghana, Hong Kong, Korea, New Zealanad, Paraguay, Peru, kei Uruguay.

Ena nona vosa me dolavi kina na soqoni ena iwasewase ni soqoni ena mataka ni Vakarauwai, a vosa kina o Peresitedi Hinckley me baleta na tubu tiko vakatotolo ni Lotu. E vosa tiko me baleta na veivakauqeti vinaka ni Lotu era a vakila na vica na drau na udolu na vulagi, na iliuliu vakamatanitu, kei na daunitukutuku ena nodra sikova mai na siti o Salt Lake ena Olimipiki ni Vulaibatabata. A vosa talega ena kena sa toso tiko vakavinaka na iLavo ni Vuli ka a tauyavutaki ena Epereli ni yabaki sa oti, ka sa vukei ira tiko ena gauna oqo e rauta ni 2,400 na itabagone ni Yalododonu Edaidai ena veimatanitu ka ra se qai vakatorocaketaki tiko me ra rawata kina na nodra vuli.

Ena iwasewase ni soqoni ni matabete, a vosa saqata kina vakaukauwa o Peresitedi Hinckley na nodra dau vakalolomataki na radinivale, o ira na qase, kei ira na gonelalai. “Oqo e dua na ka ena sega ni rawa ni vakadonui se me vosoti,” e kaya.