Ka na Sega ni Dua na Ka me Vakatarabetaki Ira

Elder David A. Bednar

Ena Kuoramu ni iApositolo Le Tinikarua

Mai na veivakaukauwataki ni kaukauwa ni Veisorovaki i Jisu Karisito, o iko kei au sa rawa me daru vakalougatataki ka levea na kaukauwa ni veivakatarabetaki.

Na yakavi nikua au masuta na Yalo Tabu me na vukei au kei iko ena nodaru railesuva vata na ivakavuvuli bibi ni kosipeli.

Me vaka e dua na iliuliu ni matabete e dua na itavi qaravi taleitaki vei au sa ikoya noqu dau sikovi ira na lewe ni Lotu ena nodra veivale. Au taleitaka vakalevu sara na veisiko kei na veitalanoa vata kei ira na lewenilotu era sa dau kilai tu ni ra sa “luluqa ena lotu.”

Ena veiyabaki au veiqaravi tiko kina vakaperesitedi ni iteki, e vakawasoma na noqu dau veitaratara vata kei na dua vei ira na bisopi ka sureti koya me masulaka me vakaraitaki mai na tamata vakayadua se matavuvale e rawa me keirau laki sikova vata. Ni bera na neirau lako ki na dua na vale, keirau dau tekiduru kei bisopi ka kerea vua na Tamada Vakalomalagi na veidusimaki kei na veivakauqeti, vei keirau kei ira na lewenilotu ka keirau na laki sotava.

E dau rawarawa tu ga na neirau veisiko. Keirau vakamacalataka na neirau loloma kei na vakavinavinaka me baleta na gauna donu ka keirau tiko rawa kina ena nodra lomanivale. Keirau vakadonuya ni keirau dauniveiqaravi ni Turaga ena Nona veitalai ki na nodra vale. Keirau vakaraitaka na neirau dau divi ira ka gadrevi ira—ka ni ra gadreva na veivakalougatataki ni kosipeli vakalesui mai. Ena so na gauna ni dau tekivu na veivosaki au dau taroga e dua na taro vakaoqo: “E rawa beka ni o ni vukei keirau me keirau kila na vuna o ni sa sega tiko kina ni vakabulabulataka na nomuni vakaitavi ena veivakalougatataki kei na veiparokaramu ni Lotu?”

Au sa vakayacora oti e drau vakadrau na mataqali veisiko vakaoqori. Na tamata yadua, na matavuvale yadua, na veivale yadua, kei na isaunitaro yadua e duidui. Ia, ena veiyabaki sa oti, au toboka rawa e dua na ulutaga kilai vinaka ena vuqa na isau ni noqu taro. E vakawasoma na kena dau saumi me vakaoqo:

“Ena vica na yabaki sa oti e dua e a tukuna vei au e dua na ka ena Wilivola ni Sigatabu ka vakatarabetaki au, au sega tale ni lesu yani me tekivu mai na gauna o ya.”

“E sega ni dua ena tabana oqo me kidavaki au se lako yani vei au. Au dau vaka tu ga e dua na vulagi. E dau vakamavoataka na yaloqu na nodra sega ni dau veikauwaitaki ena tabana oqo.”

“Au sega ni duavata kei na ivakasala e solia vei au na bisopi. Au na sega ni lesu tale yani ki na vale oqori me yacova ni sa veisautaki o koya ena itutu oqori.”

E laurai ni vuqa talega na ka e vakavuna na veivakatarabetaki vakaoqo—mai na duidui ni ivunau ena kedra maliwa na uabula ki na veivakamadualaki, veivakanini, kei na veivakuwai mai vei ira na itabagone. Ia na iulutaga rogo wasoma sa ikoya: “E vakatarabetaki au o …”

Keirau na dau vakarorogo ena yalodei kei na yalodina kei bisopi. Ka na qai dau dua beka vei keirau ena taroga na nona saumaki kei na ivakadinadina ki na kosipeli vakalesui mai. Ni keimami dau veivosaki, e dau tonawanawa na wainimatadra ena nodra dau vakananuma lesu na tamata vinaka oqo na ivakadinadina vakadeitaki ni Yalo Tabu ka vakamacalataka na veika vakayalo era a sotava taumada. E levu vei ira na tamata “luluqa ena lotu” kau a sikovi ira e tu vei ira e dua na ivakadinadina matata ka malumu ni dina ni kosipeli vakalesui mai. Ia, era sega ga ni vakaitavitaki ira ena itavi qaravi eso kei na veisoqoni ni Lotu.

Au na qai kaya e dua na ka vakaoqo. “Meu vakataudeitaka mada niu sa kila na ka e a yacovi iko. Sai koya beka ni dua ena lotu e vakatarabetaki iko, o sa calata tiko kina na veivakalougatataki mai na cakacaka vakalotu ni sakaramede. O sa vakuwai iko mai na veitokani vakawasoma ni Yalo Tabu. Baleta ga ni a dua ena lotu e vakatarabetaki iko, o sa tagutuvi iko tani mai na cakacaka vakalotu ni matabete kei na valetabu. O sa muduka na nomu gauna donu mo qaravi ira na tani ka mo vuli ka tubu. Ko sa biuta tu na ilati ka na vakaleqa na nodra toso ki liu na luvemu, o ira na luvei luvemu, kei na itabatamata ka ra na muri mai.” E vakavuqa era na dau vakasama mada ena dua na gauna ka qai sauma lesu: “Au a sega sara ga ni bau vakasamataka me vakaoqori.”

Keirau na qai dau veisureti sara kei bisopi: “Kemuni na itokani, keirau tiko oqo nikua me keirau vakasalataki kemuni ni sa kena gauna oqo mo ni muduka na nomuni vakatarabetaki. E sega walega ni keirau gadrevi kemuni, ia o ni gadreva na veivakalougatataki ni kosipeli vakalesui mai i Jisu Karisito. Ni yalo vinaka ka lesu tale mai—ena gauna sara ga oqo.”

Digia Mo Kakua ni Vakatarabetaki

Ena noda vakabauta se kaya ni da vakatarabetaki, e kena ibalebale vei keda ni da vakila noda vosa beci, vakayacori vei keda na itovo ca, rukaki, se beci. Ka sakasaka dina, veivakamaduataki, sega ni dokai, kei na yaloca ni veika e yaco ena noda cakacaka vata kei ira tale eso ka yaco me rawa ni da vakatarabetaki kina. Ia, na kena itinitini e sega ni rawa vua e dua tale na tamata me vakatarabetaki iko se me vakatarabetaki au. Sa dina sara, ni yavutaki ena lasu na noda vakabauta ni rawa vua e dua tale na tamata me vakamosia na yaloda. Na mosi ni yaloda sa ikoya e dua na digidigi eda cakava; e sega ni dua na ivakarau e vakayacora se vakaisini keda kina e dua se dua na ka.

Ena iwasewase vakaturaga ni ibulibuli taucoko ni Kalou, era tu eso na veika me caka kei na veika me cakacakataki (raica 2 Nifai 2:13-14). Me vaka ni da luvena tagane kei na yalewa na Tamada Vakalomalagi, eda sa vakalougataki ena isolisoli ni galala ni digidigi ni bula savasava, na kena levu ni cakacaka vakaikoya kei na digidigi. Ena kena soli na galala ni digidigi o iko kei au daru sa itini, ka me daru sa cakava taumada ka kakua ni cakacakataki tu ga. Na noda vakabauta ni dua na tamata se dua na ka e rawa me vakavuna na noda vakatarabetaki, cudru, mavoa se yaloca, ena vakayalia na dina ni noda galala ka veisautaki keda ki na veika me cakacakataki. Me vaka ni da itini, ia, o iko kei au e tu vei kedaru na kaukauwa me daru cakava ka digia se me da ciqoma vakacava na veivakatarabetaki se veika ka rawa ni veivakamavoataki o ya.

O Thomas B. Marsh, na imatai ni Peresitedi ni Kuoramu ni iApositolo Le Tinikarua ena itabagauna oqo, e digitaka me vakatoka na veivakatarabetaki me dua na ka ka sega ni yaga me vaka na kirimu ni sucu (raica Deseret News, 16 ni Epe. 1856, 44). O Brigham Young, ena dua tale na yasana, e a cudruvi sara vakabibi e matana levu mai vua na Parofita o Josefa Simici, ia e digia me kua ni ciqoma na veivakatarabetaki (raica Truman G. Madsen, “Hugh B. Brown—Youthful Veteran,” New Era, Epe. 1976, 16).

Ena vuqa na gauna, na digitaki ni vakatarabetaki sa ikoya e dua na ivakatakilakila ni dua na tauvimate vakayalo e titobu ka bibi vakalevu sara. E vakatarai koya vakaikoya o Thomas B. Marsh me cakacakataki, ka qai kena itinitini na vukitani kei na yalolailai. E a dua na itini o Brigham Young ka cakacakataka na nona galala ni digidigi ka cakava me vaka na ivakavuvuli dodonu, ka yaco me iyaya ni veiqaravi dokai ena liga ni Turaga.

Na Turaga sa ivakaraitaki cecere duadua ni sala me da sauma kina na veivakatarabetaki ena dua na ka se ituvaki e yaco.

“Ia era na okati Koya me ka wale ko ira na kai vuravura, ni ra sa tamata ivalavala ca; era na vakanakuitataki Koya ka na vosota ga, era na yaviti Koya ka na vosota ga. Io era na kasiviti Koya ka na vosota ga ena vuku ni nona yalololoma kei na nona dauvosoti ira na luve ni tamata” (1 Nifai 19:9).

Mai na veivakaukauwataki ni kaukauwa ni Veisorovaki i Jisu Karisito, o iko kei au sa rawa me daru vakalougatataki ka levea na kaukauwa ni veivakatarabetaki. “A ka levu na nodra vakacegu era lomana na nomuni vunau: Ka na sega na ka me ra bale kina” (Same 119:165).

E Dua na Valenivuli ni Yalododonu

Na levu ni veika me valuti kina na veivakatarabetaki e rairai me yawa sara tu vei keda. Na rawa ni veika vakaoqo, e sega ni taqomaki me baleta se vakaiyalayala ga kivei ira na iliuliu ni Lotu kilai tani me vakataki Brigham Young. Na iusutu ni Veisorovaki ni Dauveivueti kei na inaki ni vakalesui tale mai ni Lotu era nakiti me ra vukei keda ena noda ciqoma vakadodonu na mataqali kaukauwa vakayalo vakaoqo.

O Paula e a vakavulici ira na Yalododonu e Efeso ni iVakabula e a tauyavutaka na Nona Lotu “me ra vakavinakataki kina ko ira sa lotu, me ia na cakacaka ni talatala, me vakatataki cake na ivavakoso nei Karisito:

“Me da yaco sara koi keda kecega me da lomavata ena vakabauta, ka kila sara na Luve ni Kalou, me da tautauvata kei na ivakarau ni tamata dina, era sa sinai sara kei Karisito” (Efeso 4:12-13).

Yalovinaka raica na vakayagataki ni vosa vakataucokotaki. Ena ivakamacala nei Elder Neal A. Maxwell, na Lotu e sega ni vanua ni “vakacegu me sotavi kece kina na nodra gagadre o ira era sa taucoko tu” (”A Brother Offended,” Ensign, Me 1982, 38). Na kena dodonu, na Lotu e sa ikoya e dua na vanua ni vuli me rawati kina na kila vakacakacaka ka dua na vuli cakacaka me rawati kina na kila ena noda vakatovotovotaka na ilakolako ni kena cakacakataki na nodra “vakataucokotaki na Yalododonu.”

E vakamacalataka talega vakatitobu vakaoqo o Elder Maxwell ni vale ni vuli ni yalododonu oqo ka kilai me vakalesui mai ni Lotu, era lewa na lewenilotu na “ulutaga ni vakadidike” (raica “Jesus, the Perfect Mentor,” Ensign, Fepe. 2001, 13) ni ka yaga me baleta na tubu kei na vakatorocaketaki. E dua na dauveisiko e vulica na nona itavi ena nona veiqaravi ka lomani ira na tacina ena iSoqosoqo ni Veivukei. E dua na dauveisiko tawa vuku e vulica na veilesoni yaga vakalevu ena nona vakavulici ira na gonevuli dauveitokoni kei ira ka sega ni daulotu, ka yaco kina me dua na qasenivuli yaga vakalevu sara. Kei na dua na bisopi vou e vulica me bisopi mai na veiuqeti kei na cakacaka vata kei ira na lewenilotu ena tabanalevu ka ra tokoni koya ena vu ni yalodra taucoko, mai na nodra kila tu mada ga na nona malumalumu vakatamata.

Mai na noda kila ni Lotu e sa ikoya na vanua ni vuli me vukei keda ena noda vakavakarau me baleta e dua na ka dina sega ni levei rawa. Ena so na gaunisala kei na so na gauna, e dua na tamata ena Lotu oqo ena cakava se tukuna e dua na ka e rawa ni vakasamataki me veivakatarabetaki. Na veika vakaoqori ena rawa dina ni yaco kivei keda vakayadua—ka na yaco dina vakadua se sivia. E dina ga ni ra sega ni dau nakita nodra veivakamavoataki se veivakatarabetaki, ia e rawa me ra sega ni veinanumi ka ra yalo kaukauwa.

O iko kei au daru na sega ni lewa na nodra gagadre se itovo eso tale na tamata. Ia, eda lewa me da na cakava vakacava. Yalovinaka nanuma tiko ni o iko kei au e daru itini ka soli vei kedaru na galala ni digidigi ni bula savasava, ka rawa me da digia me da kakua ni vakatarabetaki.

Ena dua na gauna ni ivalu rerevaki, e dua na veivolavolai e yaco vei rau o Moronai, na kavetani ni mataivalu na Nifai, kei na Paorani, na turaganilewa levu ka kovana ni vanua. O Moronai, ka ra vakaleqai tiko na nona mataivalu ena takiveiyaga ni veitokoni mai na matanitu, e vola vei Paorani “e vica na ka meu beitaki kemudou kina” (Alama 60:2) ka beitaki koya vakaca sara ena sega ni vakasama, vucesa, kei na vakawelewele. E rawa vei Paorani me cudruvi Moronai vakarawarawa kei na nona itukutuku, ia e a digitaka me kakua ni ciqoma na veivakatarabetaki. E a sauma lesu ena yalololoma o Paorani ka vakamacalataka e dua na veileti ka saqata na matanitu ka sega tu ni kila o Moronai. E a qai sauma lesu, “Au sa volavola yani vei iko Moronai, niu sega sara ni marautaka na leqa ko ni sota kaya tiko, ia au sa rarawataka sara vakalevu… . Raica ko a beitaki au vakaca sara mai ena nomu ivola; ia e sega ni dua na ka ko ya, kau sega sara ni cudru kina; ia au sa rekitaka ga na nomu kauwai” (Alama 61:2, 9).

E dua na ivakaraitaki cecere duadua ni noda dui matua vakayalo ena vakatakilai mai na noda sauma lesu na veimalumalumu, na tawa vuku, kei na rawa ni rawata na nodra itovo ni veivakatarabetaki na tani. E rawa ni veivakatarabetaki e dua na ka, dua na ka e yaco, se e dua na ka e tukuni, ia o iko vata kei au e rawa me daru digitaka me kakua ni veivakatarabetaki—ka tukuna vata kei Paorani, “e sega ni dua na ka ko ya.”

Rua na Veisureti

Au tinia na noqu itukutuku vata kei na rua na veisureti.

Veisureti #1

Au sureti iko mo vulica ka vakayacora na ivakavuvuli ni iVakabula me baleta eso na ka era yaco kei na so na ka lalai ka rawa me vakatokai me ka ni veivakatarabetaki.

“Dou sa rogoca ni sa kainaki, Mo lomana na wekamu, ka cata na nomu meca.

“Ia koi au, kau sa kaya vei kemudou, Dou lomani ira na nomudou meca, vosa vinaka vei ira sa rukaki kemudou, caka vinaka vei ira sa cati kemudou, ka masulaki ira sa vakalialiai kemudou, ka vakacacani kemudou;

“Ia kevaka dou lomani ira sa lomani kemudou, a cava ena kemudou isau? era sega li ni cakava vakaoqo ko ira sa kumuna na ivakacavacava?

“Ia kevaka dou veikidavaki duadua ga kei ira na wekamudou, a cava dou sa uasivi cake kina? era sega li ni cakava vakaoqo ko ira na lewe ni veimatanitu tani?

“O koya mo dou qai vinaka sara, me vaka sa vinaka sara na Tamamudou sa tiko mai lomalagi” (Maciu 5:43–44; 46–48).

E veivakauqeti, na ivunau “o koya mo qai vinaka sara” sa ikoya na veivakasalataki ka dau liu mai vakatotolo me baleta noda cakava vakacava na kena saumi lesu na caka cala kei na vakatarabetaki. E matata vinaka tu, na veika e gadrevi me ra vakataucokotaki kina na Yalododonu okati kina na veitavi ka ra vakatovolei keda ka bolei keda. Kevaka e dua na tamata e kaya se cakava e dua na ka eda nanuma ni veivakatarabetaki, na imatai ni noda itavi sa ikoya me da kakua ni ciqoma na ca ka qai veitaratara vata taudua ga, ena yalodina ka vakadodonu sara kei koya na tamata o ya. Na sala oqori e sureta na veivakauqeti ni Yalo Tabu ka vakatara me vakadodonutaki na kena vakadewataki cala ka me kilai na kena inaki dina.

Veisureti #2

E vuqa beka na tamata yadua kei na matavuvale ka ra gadreva vakalevu me ra rogoca na itukutuku oqo me baleta na noda digitaka me da kakua ni rarawataka na ka era rairai sega ni vakaitavi vata tiko kei keda ena koniferedi edaidai. Au siqema ni o keda taucoko eda veimaliwai vata tu kei ira na lewenilotu era sa vuki tani mai na lotu baleta ni ra sa digitaka me ra ciqoma na veivakatarabetaki—o cei beka ena vakalougatataki mai na nona lesu tale mai.

Yalovinaka ka masulaka mo kila e dua na tamata e rawa mo sikova ka sureti koya vakadua tale me mai sokalou vata kei keda? De rawa mo wasea e dua na ilavelave ni vosa oqo vua e dua, se o gadreva mo veivosakitaka na ivakavuvuli eda railesuva edaidai. Ka yalo vinaka mo nanuma ni dua na kerekere vakaoqori e dodonu me vakadewataki ena loloma kei na yalomalumalumu—ka sega ena yalo ni veivakadonui ka vakacerecerei koya vakaikoya kei na dokadoka.

Ena noda sauma lesu na veisureti oqo ena vakabauta na iVakabula, au vakadinadinataka ka yalataka ni ra na via rogoca na tamata, eda na vakauqeti ena veika me da kaya, na Yalo Tabu ena wasea na ivakadinadina ni dina tawamudu, kei na bukawaqa ni ivakadinadina era na caudre tale.

Me vaka ni da Nona italai, au vakavoqataka na vosa ni iVakavuvuli ena Nona tukuna, “Au sa vosataka na veika oqo vei kemudou, mo dou kakua ni vakatarabetaki” (Joni 16:1). Au vakadinadinataka na dina kei na vakalou ni dua na iVakabula bula kei na Nona kaukauwa me vukei keda me da levea ka vorata na veivakatarabetaki. Ena yaca tabu i Jisu Karisito, emeni.