Na Veisorovaki E Rawa Me Vakasavasavataka, Vakasuka Tale, ka Vakatabuya na Noda Bula
Na Veisorovaki nei Jisu Karisito e sa vakarawarawataki kivei keda vakayadua. Na Nona Veisorovaki e tawa yalani.
E dua na rara ni waqavuka totoka e tiko e Idaho Falls, Idaho. E dua vei ira na kena e ka levu duadua ena yasana, na rara ni waqavuka oqo e vakarawarawataka na ilakolako ki na iwase e cake ni Bucabuca ni Uciwai na Snake. Au nanuma tiko niu a se gonetane kau lesu tiko mai Chile ki na rara ni waqavuka sara ga oqo ka kidavaka na noqu matavuvale ni mai cava na rua na yabaki ni veiqaravi vakadaukaulotu. Na tautauvata ni veika e raici e yaco vakaudolu ena rara ni waqavuka oqo me vaka na nodra ciqoma na Yalododonu yalodina na veikacivi me ra veiqaravi. Sa ikoya e dua na ka yaga dina, e vakataucokotaka na tiki ni siti kei na yasana.
Volekata na rara ni waqavuka e koto kina e dua tale na tiki ni siti yaga vakalevu sara ka rairai totoka: na Freeman Park. Na Uciwai na Snake e drodro muria koto na rara ni gade oqo me rauta e rua na maile. E dua tiko na gaunisala ni taubale ka curuma yani na rara ni gade qai vakamuria wavoki na uciwai ena vica vata na maile.
Na Freeman Park e levu na kena eketea ni veico drokadroka ka sinai tu ena rara ni qito ni pasiketepolo kei na veitavipolo, veimataqali lilili me baleti ira na gonelalai, ivakaruru ni vakatakakana me baleta na soqoni vata ni matavuvale, totoka ni gaunisala rabailevu sinai tu ena veivunikau kei na veikau me baleta nodra gade na veitau. Ni da raica sobu tu na uciwai mai na rara ni gade, ena rawa vua e dua me raica na valetabu vakaturaga e Idaho Falls, duri tu ena vanua cecere qai vulavula ka savasava. Na rorogo ni kena totolo na kui ni Uciwai na Snake ena kena wavokita tiko na vatu ka basika mai na ulunivanua kama e vakavuna me gadrevi vakalevu kina na rara ni gade oqo. Oqo e dua na noqu vanua taleitaki meu taubaletaka vata kei Lynette, na noqu daulomani; cegu, vakanananu ka vakasama. E sa veivakacegui dina ka veivakauqeti.
Na cava beka na vuna au mai tukuna tiko kina na ka me baleta na rara ni waqavuka ni yasana kei na Freeman Park e Idaho Falls? Baleta ni rau tara ruarua ena mataqali vanua vata; oi rau ruarua na vanua totoka ka yaga vakalevu sara oqo e a dau ibenubenu tu eliu.
E dua na ibenubenu sa ikoya e dau bulu vata kei na vica vata na iyatu qele. Ena dikiseniri nei Webster e vakamacalataka e dua na ibenubenu me vaka“e dua na ivakarau ni kena viritaki laivi na duka kei na benu ka bulu yani kina e vica vata na iyatu qele me tara cake kina na vanua lolovira.” (Merriam-Webster’s Collegiate Dictionary, 11th ed. [2003], 699).
E dua tale na ivakamacala ni dua na ibenubenu sa ikoya na “vanua era dau bulu kina na benu ka vakasukai tale na qele. “Na ivakamacala ni vakasukai tale sa ikoya “me kacivi tani mai na ivakarau tawadodonu, ka vakabulai mai na dua na ituvaki sega ni gadrevi” (1039).
Au a vakaitikotiko e Idaho Falls voleka ni noqu gauna ni bula taucoko. Au a biuta e levu na benu ena ibenubenu oqori ena kena inaki me sivia e 50 na yabaki.
Na cava era na vakasamataka na veiliutaki ena siti kevaka me soli e dua na siga meu basika tu yani ena dua na gaunisala ni Rara ni Waqavuka e Idaho Falls se ena lomadonu ni dua na rara veico e Freeman Park vata kei na dua na terekita daukelikeli ka tekivu kelia na veiqara lelevu? Ni ra na tarogi au se cava au cakava tiko, au na sauma lesu niu vinakata meu kelia lesu tale na benu kau a biuta tu ena vica vata na yabaki sa oti.
Au siqema ni ra na tukuna vei au ni sega ni rawa meu kila na noqu benu, ni ra sa vakasukai lesu ka bulu ena dua na gauna balavu sa oti yani. Au vakadeitaka ni ra na tukuna vei au ni sega ni tu vei au na dodonu meu kelia na benu ka niu sa vakarusa e dua na ka rairai totoka ka yaga vakalevu ka a caka mai na noqu benu. Me vakalekalekataki, au sega ni vakabauta me ra na taleitaki au. Au nanuma ni ra na lomatarotarotaka se cava na vuna e vinakata kina e dua me vakarusa e dua na ka rairai totoka ka yaga vakalevu sara ena dua na sasaga me kelia cake mai na benu makawa.
E rawa beka me ciqomi tale e dua na bula, ena vuku ni sega ni veikauwaitaki sa wili tu vakabenu, ka sa kena irairai ni sa sega ni rawa ni vosoti? Se vakacava beka o koya e cakava tiko e dua na sasaga ena yalodina, ia sa lutu tale vakavuqa ki na ivalavala ca ni sa vakila ni sa sega na sala e rawa me voroka kina na irairai ni ituvatuva tawamudu? Se e vakacava na tamata ka ra sa veisautaka na nodra bula ia era sega ga ni rawa me ra vosoti ira vakaira?
Ni vakabalei ki na Veisorovaki i Jisu Karisito, na parofita o Alama e vakavulici ira na tamata e Kitioni:
“Ia ena mai vunau voli ko Koya; ena vosota na ka rarawa, na veivakararawataki kei na veivakatovolei kecega; a sa yaco na veika oqo me vakayacori kina na vosa sa tukuni, ni na colata ko Koya na nodra ivalavala ca na nona tamata.
“Ena soli Koya me mate me sereka kina na ivesu ni mate sa vesuki ira tu na nona tamata; ia sa mai bula vakatamata ko Koya me kila kina na nodra malumalumu na nona tamata, ka vakabulai ira ena nona yalololoma.
“Raica sa kila na ka kecega na Yalo Tabu; ia ena vosota na ka rarawa na Luve ni Kalou, me colata kina na nodra ivalavala ca na nona tamata; ia ena bokoci na nodra ivalavala ca ena nona isoro; raica au sa kila ni sa dina na veika oqo” (Alama 7:11–13).
Ni veivosakitaki tiko na Veisorovaki, e a vakavulica o Jekope na taci Nifai: “Ia sa kilikili me vakacabori e dua na isoro va-Kalou; ia kevaka sa sega, ena sega ni vakaisulu na yago vuca oqo me kakua tale ni vuca rawa. Ia era na sega ni sereki me tawamudu mai na imatai ni itotogi sa tau vua na tamata. Ia kevaka era sa sega ni sereki, sa na lesu tale na yago oqo ki na qele me vuca ka rusa ka sega ni tucake tale” (2 Nifai 9:7).
Na Veisorovaki nei Jisu Karisito e sa vakarawarawataki kivei keda vakayadua. Na Nona veisorovaki e tawa yalani. E okati kina na tamata yadua, o iko sara mada ga. E rawa ni vakasavasavataka, vakasuka tale, ka vakatabuya; o iko sara mada ga. Sa ikoya oqori na ibalebale ni tawa yalani—na kena levu taucoko, vakacavari , taucoko, tawamudu. E a vakatavulica o Peresitedi Boyd K Packer: “E sega ni dua na ivakarau matau, veivakabobulataki, vakaduiduile, ivalavala ca, se vuki tani, se basulawa me sega ni wili ena yalayala ni taucoko ni veivosoti. Sa ikoya oqori na yalayala ni veisorovaki nei Karisito” (“The Brilliant Morning of Forgiveness, Ensign, Nove. 1995, 20).
Me vaka ni ibenubenu e gadrevi kina na cakacaka kei na kena qarauni ena yalodina, cakacakataki na kena vakayagataki na iyatu vakaiyatu ni duka me vakasukai tale na vanua lolovira, na noda bula e gadrevi talega kina na qaqarauni vata ga, tomani tiko na kena vakayagataki na iyatu vakaiyatu ni veivakabulai ni isolisoli ni veivutuni.
Me vaka ga na nodra na sega ni taleitaka na tama ni siti kei Idaho Falls me dua e laki tovolea me kelia cake mai na nodra benu makawa, na Tamada mai Lomalagi, kei na Luvena o Jisu Karisito, erau vakila na rarawa ena noda digitaka me da tikoga ena ivalavala ca, ni sa tu vakarau na isolisoli ni veivutuni ka rawa mai na Veisorovaki, me vakasavasavataka, vakasuka tale, ka vakatabuya na noda bula.
Ena noda ciqoma ena vakavinavinaka ka vakayagataka na isolisoli vakamareqeti oqo, sa rawa kina me da marautaka na kena irairai totoka kei na kena yaga vakalevu na noda bula, ka sa vakasuka mai na Kalou ena Nona loloma tawa yalani ni Veisorovaki na Luvena ka tacida o Jisu Karisito.
Au vakadinadinataka ni o Jisu na Karisito, e Luve ni Kalou bula, ni Nona Veisorovaki e ka dina, kei na nona mana ni veivosoti. Sa rawa kina Vua me vakasavasavataki keda vakayadudua tale, o iko mada ga. Ena yaca i Jisu Karisito, emeni.