Dou Raici Ira na Nomudou Lalai
Ena vuravura nikua era gadrevi … keda yadudua na gone me da taqomaka, vakavulica ka lomani ira.
Ena noqu veiqaravi tiko ena veikacivi oqo, au sa mai rawata eso na noqu itokani vou. Ko Eliza e rawa ni laga e levu na sere ni Lalai. Ko Lucas e vulica tiko na Yavu ni Vakabauta ena vosa vaka-Sipeni. Ko Caitlyn e mamadua, ia e via kila na ka. Au dabe volekati Martha ena Lalai, ka mokoti au mai ko koya. Ko ira na gone oqo e raitayaloyalotaki na rarama ni kosipeli e matadra.
O cei so na gone ena nomuni vale se ko ira era tu vakavolivoliti kemuni? Ni raici ira. Ni vakananumi ira. E vakavulici keda na iVakabula ni curu ki na matanitu ni Kalou, e dodonu me da vaka na gone “talairawarawa, yalomalua, yalomalumalumu, dauvosota, ka dauloloma” (Mosaia 3:19).
Ia, e dina ni ra lako mai vei keda na gone ena sinai ni vakabauta era donuya na bolebole ni vuravura ivalavala ca. Na cava me vakayacori me vukei ira na gone me ra maroroya na rarama ni vakabauta e matadra? Eda kila ni sega ni dua na ka e rawa ni sosomitaka na itutu ni matavuvale yalododonu ena nona bula e dua na gone. Ia ena vuravura nikua era na gadreva na gone e sega walega ni dua na tina kei na tama dauloloma, era na gadrevi keda yadudua me da taqomaka, vakavulica, ka lomani ira.
Kemuni na taciqu kei na ganequ, na taqomaki ira na gone e kena ibalebale na noda vakarautaka e dua na volau e sureta na Yalotabu ki na nodra bula ka vakadeitaka ni dina ki na lomadra. Ni sega ni nakiti na kena bokoci vakatotolo e dua ga na ituvaki ni vakaduiduile, vakawelewele, veivakacacani, ivalavala kaukauwa, se veivakayagataki.
Ni sa bibi sara tiko na ivakarau ni bula tawa savasava, me da taqomaki ira talega na gone mai na ivakarau tale eso e veivakacacani me vaka, na nanamaki e toka sara e cake se rui toka sara e ra, na veivakamenemenei vakasivia, na tuvalaki vakasivia ni itavi qaravi kei na nanumi koya ga vakaikoya. Na yasana ruarua e vakadruma na nona igu e dua na gone me raica ka kila, vakararavi, ka tuberi mai vua na Yalo Tabu.
Na gone era dolavi vakalevu cake ki na dina ni kosipeli mai na dua tale na gauna, ia na gauna ni nodra susugi e gauna duadua ga ka rawa ni vakavulici ka vakaukauwataki kina na gone me ra digitaka na dodonu.
E rawarawa me kilai na ka me vakavulici. Na ivolanikalou kei ira noda parofita era matata ena veika me da vakavulica vei ira na luveda. E vakalekalekataka ko Nifai ena tikina oqo, “Ia eda sa tukuni Karisito, ka rekitaki Karisito, ka vunautaki Karisito, ka parofisaitaki Karisito; me ra kila kina na noda kawa na sala me bokoci kina na nodra ivalavala ca” (2 Nifai 25:26).
Ni kilai ni da vakavuvulitaki Karisito kei na Nona kosipeli, eda na cakava vakacava? Tekivu ena nomu vakamuria na nodra ivakasala na noda parofita kei na noda vakarautaka na gauna e vale me da masumasu vakamatavuvale, vulica na ivolanikalou kei na lotu vakamatavuvale. Eda sa rogoca vakawasoma li na ivakasala oqo me sa rairai rawarawa se eda sa rui osooso, ni da vakuria tale e dua na ka, e vakilai ni dredre? Au vakadinadinataka, ni gauna e vaka me lailai kina na mana ni noda sokalou vakamatavuvale, na talairawarawa duadua ga e sureta mai na veivakalougatataki ni Turaga.
Oqo na ka dina, na noda talairawarawa yadua kei na ivakaraitaki ena veitiki kece ni noda bula era itinitini ni nodra lesoni vakosipeli na gone. Sai koya mo vulica, kila ka vakayagataka na kosipeli. Eda sega ni rawa ni vakatavulica na ivakavuvuli eda sega ni kila ka da sega ni bulataka. O cei koi keda kei na cava e tiko e lomada, era raimatatataka cake mai vakatotolo na gone mai na ka eda nanuma.
O koya gona mo lomani ira na gone. Au kila niu a lomani niu se gone, ena vuku ni ka o ya, e rawarawa kina vei au meu kila ni lomani au talega na iVakabula. Na gone era na bula vinaka ena matavuvale ka ra tiko kina na itubutubu era kila na ibalebale ni “nodrau itavi bibi me rau susugi ira cake na luvedrau ena loloma kei na bula dodonu” (“Na Matavuvale: A iVakaro ki Vuravura Raraba,” Liaona, Okot. 2004, 49).
Ia eda rawa ni veivuke kece. Kauwaitaki ira na gone era tu wavokiti iko ka kila na yacadra. Ka qai sureti ira, vakarorogo, vakayaloqaqataki, veituberi, veitaraicake, veiqaravi ka wasea na nomu ivakadinadina. Na nomu loloma e rawa ni vukea e dua na gone me kila na loloma ni iVakabula.
Ko Vasily e dua na gone, e vakayalia vakalevu na nona gauna ena saqata ni koro ka sega ni tokoni mai vei rau na nona itubutubu ena nona vakasaqara na dina. E a kunea e dua na tabana lailai ni Lotu ena nona tauni ka dau lako ki na veika kece e vakayacori e valenilotu. E a kauti iratou talega mai ki lotu na tacina gone e lewe tolu ka ra tomani koya na nona itokani tale eso ena Lalai. E ka dina oqo, ena dua na gauna, na iwiliwili levu ni Lalai ena vanua ko ya era lewena o ira na gonetagane lalai oqo era sega ni lewe ni Lotu. Era a dreti ki na dina ka sa tekivu me raitayaloyalotaki e matadra na rarama ni kosipeli. Era a kidavaki, taqomaki, vakavulici ka lomani mai vei ira na lewe ni tabana lailai oqo, era wili kina na itabagone, isausauvou, daukaulotu, qasenivuli, kei ira na iliuliu ni matabete. Vakananumi ira na gone era vakaitikotiko volekati iko se na kalasi ni Lalai. O cei so na gone ni nomu tabana se tabanalevu? E tiko beka e dua, vakataki Vasily, me gadrevi iko tu?
Niu vakasamataki iratou na gonetagane oqo kei ira na gone vakataki iratou, au taura mai e levu na inuinui mai na nona veisiko na iVakabula ki na vanua ko Amerika. Nanuma ni se bera ni rairai na iVakabula e a liwa na cava levu, tavuki ni vanua, kama, ka tolu na siga na butobuto loaloa (raica 3 Nifai 8). Au dau vakananumi ira vakawasoma na gone era sotava na veika e yaco oqo. Ka rawa niu raitayaloyalotaka na rere kei na lomaleqa ni lomadra na itubutubu.
E qai basika mai na iVakabula ka vakarota na lewevuqa “me ra kau mai Vua na gone lalai” (3 Nifai 17:11). E vakacava beka na nodra igu na itubutubu oqori me ra kauta na luvedra vua na iVakabula. Ia era qai vakaraica ni sa tagicaki ira na luvedra na iVakabula, ka vakalougatataki ira yadudua, masulaki ira vei Tamana, ka kacivi ira mai na agilosi me ra qaravi ira (raica 3 Nifai 17:21, 24). Na itukutuku oqo e taleva vei keda ni sai koya na iVakabula na dau veitaqomaki levu, na itinitini ni qasenivuli ka ivurevure tawamudu ni loloma kei na veivakabulai.
Me vaka ni wavoliti keda tu na butobuto loaloa ni vuravura oqo, eda vakaroti talega me da kauti ira na luveda vua na iVakabula me vaka e talevi keda kina ko Elder Ballard, “Oi keda oqo e sa lesi keda na Kalou me da vakavolivoliti ira na gone nikua ena loloma kei na vakabauta kaukauwa kei na kila ni ko cei o ira” (“Behold Your Little Ones,” Tambuli, Okot. 1994, 40; “Great Shall Be the Peace of Thy Children,” Ensign, Epe. 1994, 60).
Kemuni na taciqu kei na ganequ me vaka e dua na tina ka veiliutaki ena Lalai, au kila ni cakacaka oqo e sega ni rawarawa. Na nodra taqomaki, vakavulici kei na lomani na gone e gadreva na solibula, e veivakayalolailaitaki vakawasoma, veivakawawaletaki ena so na gauna, ka vagauna na berabera ni kena laurai na vua ni noda sasaga. Ia na kena dodonu baleta ni dredre na kauti ira na gone vua na iVakabula, me da liu Vua koi keda.
Ni da vakasaqarai Koya kei na Nona Yalotabu me vukei keda, eda na raica e dua na cakamana. Eda na kila vinaka ni sa veisau na lomada ka da sa yaco talega me da “talairawarawa, yalomalua, yalomalumalumu, dauvosota, dauloloma, [ka] sinai ena loloma” (Mosaia 3:19). Oi keda talega ena raitayaloyalotaki na rarama ni kosipeli e matada. Eda na qai kila na ibalebale ni nona vosa na iVakabula, “Ia ko koya yadua sa vinakata e dua na gone lailai vakaoqo ena vuku ni yacaqu, sa vinakati au” (Maciu 18:5).
Au lomana na iVakabula kau vakadinadinataka na kaukauwa ni Nona veivueti me baleti au kei iko kei ira na luveda ena yaca i Jisu Karisito. Emeni.