Vakaraica, Kakavaki, ka Lako vei Karisito

Anne C. Pingree

iKarua ni Daunivakasala ena Mataveiliutaki Raraba ni iSoqosoqo ni Veivukei

E dodoka tu mai na Ligana dauloloma na Mesaia me vakabulai keda—kevaka eda digia me da lako Vua.

Ena droini uasivi nei Menerva Teichert Karisito ena Kote Damudamu, na iVakabula ni kawatamata, na we ni ivako e ligana, tucake vakaturaga ka dodoka tu mai na ligana. Ena yalomalumalumu kei na loloma e raici ira sobu tu na marama ka ra kakavaki tiko yani me ra yacovi Koya.

Au taleitaka na ivakatakarakara ni marama era kakavaki me ra tara na iVakabula. Eda gadreva me da voleka vua na Turaga ka ni da kila ni lomani keda yadudua ka gadreva me vakavolivoliti keda tawamudu ena ligana dauloloma¹. E vakabulai keda mai na mate vakayalo, vakayago kei na mate ni yaloda na ligana. Sa ikoya na noda Dauveisorovaki, iVakaraitaki, Vakatawa vinaka ka noda Dauveivueti. E vei tale me da rai kina, e vei tale me da yaco kina, e vei tale me da lako mai kina, ia vei Jisu Karisito ga, “o Koya sa vakatekivuna ena sauma talega na noda vakabauta”?²

E cavuta, “Io … kevaka dou sa lako mai vei au dou na rawata na bula tawamudu. Raica sa dodo tu yani vei kemudou na ligaqu dauloloma ia ko koya yadua sa lako mai vei au, au na vakabula”³ na Nona yalayala e sega walega ni sureti keda me da yacovi koya yani ia me da taura talega na kalawa bibi ka tarava mai: me da lako Vua.

Oqo e dua na ivunau e veivakauqeti ka veivakamarautaki. E dodoka tu mai na Ligana dauloloma na Mesaia, me vakabulai keda—kevaka eda digia me da lako Vua. Ni dou sa lako vua na iVakabula “ena yalomudou taucoko”⁴ eda na vakila na Nona loloma ka tarai keda vakavoleka sara.

A “sa dua na yalewa”⁵ e a digitaka ka vakila na loloma ko ya. “Ka dua na yalewa, sa turidra balavu ka yabaki tinikarua, a sa vakaotia vei ira na vuniwai na nona ka kecega sa tu vua me bula kina, a sa sega ni bula vua e dua.

“Sa lako mai ki dakuna, ka tara na tutu ni nona isulu; a sa mudu vakasuri kina na davedave ni dra.

“A sa kaya ko Jisu, O cei sa tarai au? Ia ni ra sa vakasegasega kecega, sa kaya ko Pita kei ira sa tiko vata kaya, kemuni na Turaga, sa vakaosoosoi kemuni na lewe vuqa era sa veidrigidrigiti ia ko ni sa taroga, O cei sa tarai au.

“A sa kaya ko Jisu, Sa dua sa tarai au: niu sa kila sa lako tani vei au na kaukauwa.

“Ia ni sa kila na yalewa sa sega ni vuni, sa lako mai ka sautaninini, ka cuva sobu vua, ka tukuna e matadra kecega na lewe vuqa na ka sa tarai koya kina, kei na nona bula vakasauri kina.

“A sa kaya vua ko Koya, Na luvequ yalewa, mo vakacegu: sa vakabulai iko na nomu vakabauta; mo lako ena vakacegu.”⁶

Au a vakatarogi au se na cava beka ena yaco kevaka me a lailai na nona vakabauta na iVakabula na marama turidra balavu oqo, ka sega kina ni a sasagataka e dua na gaunisala me tara rawa na tutu ni nona isulu. Ena kedra lewe levu au vakasamataka ni sa dua na cakacaka levu, na toso vua. “Sega na vakatitiqa”⁷ e toso tikoga.

Me vaka na ivakaraitaki ko ya, sa dodonu me da vakaraitaka talega ni noda vakabauta na Turaga e sa tara vakabibi na utoda me yavalati keda me da cakacakataka.

E dua na noqu itokani e a talanoataka vei au me baleta e dua na gauna ka a dredre kina vua me vakacegui rawa. E a mosi tiko vua e dua na leqa ni matavuvale ka vakavuna me sega ni biuta rawa na nona vale ena dua na siga. E vakidacala na basika ni dua na tacina mai na iSoqosoqo ni Veivukei ka kaya “Au vakila ni ko gadrevi au tiko.” E sega ni via kila se vakataroga e cava na leqa ia e mokoti noqu itokani ga ka taroga, “E rawa ni dua na nodaru masu?” Ni oti na masu sa lesu tale na marama ko ya. Na veisiko loloma ka vakamareqeti vaka ko ya e vakatotolotaka na mavo ni kavoro ni uto inoqu itokani

Na lewe ni iSoqosoqo ni Veivukei yalololoma oqo e sega walega ni vakarogoca na Yalotabu e cakacakataka talega na veivakauqeti oya. Ena lomana dina e vakaraitaka ni a tarai Koya vakabibi na bula dodonu e tiko ena vunau ni veivakabulai ka yaco kina me cakacakataka e veisiga me Vakarisito na nona bula. E vakaraitaka ni kila na ibalebale ni “sega ni mudu na loloma.”⁸

Vei kemuni na milioni na veitacini ni iSoqosoqo ni Veivukei yalodina ka vaka na tacida dauloloma, ena nona vakananuma na loloma Vakarisito sa sega ni mudu,⁹ ka ni sa loloma sa uasivi sara, e kaya kina vakaoqo ko Peresitedi Gordon B. Hinckley, “E sega ni wiliki rawa na nodra cakacaka vinaka na marama totoka, maqosa, yalovinaka, ena nodra vukei o ira era leqa, vadretitaki na nodra mavoa na tauvimate, veivakauqeti ka veivakacegui vei ira era rarawa—ena nodra laveti cake ko ira era bale ka soli vei ira na kaukauwa kei na veivakayaloqaqataki kei na yalo ni toso ki liu.”¹⁰

Na yalo ni toso oqori vua na iVakabula e vinakati kina ena so na gauna na veivutuni ena gauna vata ga ko ya. Na noda vakila ni da caka cala se sega ni vakauqeta se vukea e dua. Na vuli yadudua vakaoqo ni veivakadodonutaki ni vakanananu, ivakarau kei na vosa e bibi vei ira era via lako vei Karisito. Era na vakaraitaka na veidigidigi yadua ni noda tara e dua na bula ena rawarawa ni veivosaki se vosa e vakaibalebale.

Eda voleka vua na iVakabula ni da vakavolivoliti ira eso ena liga dauloloma. Se eda sega. Eda vakaceguya na mosi ni mavoa ni yalo kei na yago. Se eda sega. Eda veiraici ena veilomani kakua ena rai ni veivakalewai. Se eda sega. Eda cakava na cakacaka dredre vakayalo me da vosoti ira era caka cala vei keda. Se eda sega. Eda vakadodonutaka vakatotolo na noda cala kei na noda dau veivakacalai vei ira na wekada ena gauna eda vakila kina. Se eda sega.

Me vakataki iko au kila na ibalebale ni yaga me vakadodonutaki ni gaunisala e muri. Au nanuma e dua na gauna au a sega kina ni nakita, na noqu vakacudruya e dua na taciqu ena neitou tabanalevu. E dodonu meu vakavinakataka na leqa oqo, ia au tusanaka ni tarovi au mai na noqu laki kere veivosoti vua na noqu dokadoka. Na matavuvale, na itavi, kei na so tale na ka, au a vakasaqara e so na gaunisala meu yaraka kina na noqu veivutuni. Au vakadeitaka ni yaco me na qai vinaka ga mai na veika kece ena dua na gauna. Ia e sega.

Ena vakanomodi ni sega walega ni dua na bogi, ia eso tale, au a yadra cake ena noqu vakila macala niu sega ni muria tiko na gaunisala e vinakata na Turaga meu muria. Au sega ni cakacaka tiko ena noqu vakabauta ni ligana loloma e dodoka dina tiko mai vei au—kevaka meu caka dodonu tiko. Au masu ka kerea na kaukauwa kei na yalodei, yalomalumalumu, kau lako ki na vale ni taciqu oqo ka kerea na nona veivosoti. Keirau vakila ruarua na kamikamica ni vakabulai.

Ena so na gauna na vuli yadudua ni veivakadodonutaki e vakasauri sara me vaka na noda muataki keda tani mai na noda vakusakusa sara yani kina katuba ki tuba ni suka na Lotu, ia eda qai taubale tale yani me da laki vakabula ki na dua na tacida e galili tu na nona bula, ka da kila vinaka tu ni dau talanoa vakabalavu. Ena vuqa na gauna ena balavu ka vakawasoma, na nomu na vorata na yalo ni cata eso na wekamu era ca vei iko—e veigauna vakaoqo eda saga tikoga kina me da tara e dua na veiwekani vinaka. Vakawasoma, na vuli yadudua ni veivakadodonutaki vakaoqo era tiki bibi ni veivutuni sa qai vuataka “na vua ni yalododonu era sa veivakacegui.”¹¹

Ena noda vakasaqara na vua ni yalododonu, e sega ni vakurabuitaki ni koi keda, me vakaira na marama ena droini uasivi nei Minerva Teichert, eda sasaga vua na iVakabula ena gagadre kei na vakarokoroko ni da kila ni sa dodoka tu “na ligana loloma vei ira era vakabauti Koya.”¹² Baleta ni dina na yalayala lagilagi oqo, kivei tale me da qai rai kina, kivei tale me da yaco kina, kivei tale me da lako kina, vei Jisu Karisito ga, na Rarama kei Vuravura, na Lami ni Kalou, na noda Mesaia?

Au kila ni “na Luve ni Yalododonu ena kauta lako ena tabana na veivakabulai”¹³ sega ni baleti koya walega na yalewa turidra balavu, me baleti keda yadudua talega. Ena tuberi ka vakalougatataki keda ka na vakasoqoni keda—ke da digia me da gole vua. Me da cakava mada ga oqo ena veisiga kece ni noda bula.

Ena yaca i Jisu Karisito, emeni.