Na Kaukauwa ni iVakadinadina Yadua
Na noda ivakadinadina yadua ka tudei ena vakauqeti keda me da veisautaki keda ka vakalougatataka na vuravura.
Ena iVola i Momani eda wilika kina na nona vakaroti na cauravou ko Nifai mai vua na Turaga me taya e dua na waqa. A totolo na nona muria na ivakaro oqo, ia o iratou na tuakana eratou a lomalomarua. “Ia ni rau sa raici au na tuakaqu niu sa vakarau taya na waqa erau sa vosakudrukudrutaki au ka kaya: Sa lialia ko tacidatou, ni sa nanuma ni rawa me taya e dua na waqa; io, e nanuma talega me kosova rawa na wasawasa levu oqo” (1 Nifai 17:17).
Ia a sega ni yalolailai ko Nifai. E sega ni dua na kila ni ta waqa e tu vua, ia e taukena tu e dua na nona ivakadinadina tudei “ni [na] vakarautaka na Turaga e dua na sala [me] ra rawata kina na luve ni tamata na ka kece sa vakarota vei ira ko Koya” (1 Nifai 3:7). Ni tu e yalona na ivakadinadina kaukauwa oqo kei na veivakauqeti, a tara ko Nifai e dua na waqa ka ra kosova kina na wasawasa levu, e dina ni tu na veisaqasaqa kaukauwa mai vei iratou na tuakana tawavakabauta.
Meu wasea mada vei kemuni e dua na ka au sotava mai ena noqu gauna vakaitabagone me baleta na kaukauwa ni inaki dodonu.
Ni oti na tiko yavavala ena iKarua ni iValu Levu, a laki tini na neitou matavuvale ena Tokalau kei Jamani ka ra sa tawana tu na kai Rusia. Niu lako ena kalasi va sa dodonu me’u vulica na vosa vaka-Rusia me imatai ni noqu vosa vou e koronivuli. Au raica ni dredre sara toka oqo ena vuku ni matanivola vaka-Sirilika, ia ni sa toso tiko na gauna sa vaka meu vinaka mai kina.
Niu yabaki 11, keitou a biuti Jamani ena dua na bogi me baleta na nona vakamatautaki ki na bula vakapolitiki na tamaqu. Oqo meu sa na laki vuli ena Ra kei Jamani, ka ra tawana tu na kai Amerika ena gauna ko ya. Ena koronivuli mai kea sa gadrevi vei ira kece na gonevuli me ra vulica na vosa vaka-Valagi ka segai na vosa vaka-Rusia. Sa bau dredre toka na vulica na vosa vaka-Rusia, ia na vosa vaka-Valagi sa sega sara ga ni rawa vei au. Au nanuma ni a sega ni buli na gusuqu me vosa vaka-Valagi. Sa dua na gauna dredre vei qasenivuli. Erau kune rarawa kina na noqu itubutubu. Kau kila ni sega dina ga ni noqu vosa na vosa vaka-Valagi.
Ia a qai veisau e dua na ka ena noqu bula vakagone. Au dau vodoka na noqu basikeli ki na rara ni waqavuka voleka ni veisiga kecega ka sarava na nodra vuka yani kei na nodra ro mai na waqavuka. Au wilika ka vulica na veika kecega au rawa ni raica me baleta na vuka. E a noqu gagadre levu duadua meu dua na pailate. Au sa rawa ni raitayaloyalotaki au niu dabe toka ena idabedabe ni pailate ni dua na waqavuka levu ni usa pasidia se ena dua na waqavuka ni vala. Au vakila mai vu ni yaloqu ni oqo na ka au vinakata!
Au qai kila ni kevaka meu na pailate, au na gadreva meu vosa vaka-Valagi. Ena siga ka tarava, ena nodra kurabui na tamata kecega, sa vaka me veisau na gusuqu. Sa rawa niu vulica na vosa vaka-Valagi. E se gadrevi tikoga kina e vuqa na cakacaka, na sasaga, kei na vosota, ia au yaco meu kila na vosa vaka-Valagi!
Baleta na cava? Baleta e dua na inaki donu ka kaukauwa!
Na noda inaki kei na noda vakanananu ena laki vakauqeta na noda ivalavala. Na ivakadinadina ni kena dina na kosipeli vakalesui mai i Jisu Karisito ka sai koya na kaukauwa veivakauqeti uasivi duadua ena noda bula. Sa dau vakabibitaka vakavuqa ko Jisu na kaukauwa ni vakanananu vinaka kei na inaki vinaka: “Drau kakua ni rere se lomalomarua; ia mo drau vakaliuci au ena nomudrau nanuma kecega” (V&V 6:36).
Na ivakadinadina kei Jisu Karisito kei na kosipeli vakalesui mai ena vukei keda ena noda bula, me da vulica na nona ituvatuva na Kalou me baleti keda, ka cakacakataka. E vakadeitaka vei keda ni bula dina tiko, dina, kei na vinaka ni Kalou, na ivakavuvuli ni Veisorovaki i Jisu Karisito, kei na nodra ilesilesi vakalou na parofita ni gauna oqo. Na noda ivakadinadina ena vakauqeti keda me da dau bula dodonu, ka bula ena sala dodonu, ena vakavuna me kaukauwa cake na noda ivakadinadina.
Na Cava na iVakadinadina?
E dua na ivakamacala ni ivakadinadina sai koya, “e dua na ivakadinadina bibi ni kena dina e dua na ka,” e kau mai na vosa vaka-Latina na testimonium kei na vosa testi ka kena ibalebale ivakadinadina bula (“Testimony,” http://www.reference. com/browse/wiki/Testimony; Merriam-Webster’s Collegiate Dictionary, 11th ed. [2003], “testimony,” 1291).
Vei ira na lewe ni Lotu i Jisu Karisito ni Yalododonu Edaidai, na vosa ivakadinadina e dua na vosa logaloga vinaka ka matau ena ivosavosa ni noda lotu. E malumu ka kamica. Eda vakila na kena tabu. Ni da veitalanoataka na ivakadinadina, eda nanuma kina na veika eda vakila e lomada kei na noda vakanananu ka sega ni kena sosoqoni na veika dina ka savasava ni vakasama. Oqo na isolisoli ni Yalotabu, na ivakadinadina bula mai vua na Yalo Tabu ni dina na vakasama eso.
Na ivakadinadina sai koya na kena kilai dina se veivakadeitaki, mai vua na Yalo Tabu, ena dina kei na vakalou ni nona cakacaka na Turaga ena veisiga e muri oqo. Na ivakadinadina sai koya “na veivakadeitaki veivauci, bula, ka toso ni dina veivakayarayarataki era vakatakilai ena kosipeli i Jisu Karisito” (Marion G. Romney, “How to Gain a Testimony,” New Era, Me 1976, 8; vakamatatataki).
Ni da wasea na noda ivakadinadina, eda tukuna na taucoko ni dina ena itukutuku ni kosipeli. Ena dua na gauna ni ra raica e lewe levu na dina me ivakatautauvata ga, e sega soti ni dau taleitaki kina vakalevu na kacivaki ni dina e taucoko, e sega talega ni dodonu se vinaka vakapolitiki. Na ivakadinadina ni veika ena “kedra ituvaki dina” (Jekope 4:13) e doudou, dina, ka bibi baleta ni tu na kedra revurevu tawamudu ki na kawatamata. Ena sega ni kauwaitaka ko Setani kevaka eda na kacivaka na itukutuku ni noda vakabauta kei na ivunau ni noda kosipeli ni rawa ni veisautaki me vakatau ena veika eda sotava. Na noda tudei ena dina ni kosipeli sa ikelekele ni noda bula; e tudei ka nuitaki me vaka na Iribuli. Na ivakadinadina e ka ni tamata yadua ka na duidui beka vakalalai vei keda yadua, baleta ni da duidui kece na tamata. Ia na ivakadinadina ni kosipeli vakalesui mai nei Jisu Karisito ena dau tikoga kina e dua vei ira na dina rawarawa eso oqo:
-
E bula tiko na Kalou. O Koya na Tamada Vakalomalagi dauloloma, ka sai keda na Luvena.
-
O Jisu Karisito na Luve ni Kalou bula ka iVakabula kei vuravura.
-
O Josefa Simici na Parofita ni Kalou ka a vakalesui mai vua na kosipeli i Jisu Karisito ena veisiga e muri.
-
Na iVola i Momani e vosa ni Kalou.
-
O Peresitedi Gordon B. Hinckley, koi rau na nona daunivakasala kei ira na lewe ni Kuoramu ni iApositolo Le Tinikarua era parofita, daurairai, ka dauvakatakila ena noda gauna.
Ni da sa rawata me da kila vakatitobu cake na dina eso oqo kei na yavu ni veivakabulai ena kaukauwa kei na isolisoli ni Yalo Tabu, sa rawa ni “vakatakila vei kemudou na dina ni veika kecega” (Moronai 10:5).
Eda na Rawata Vakacava e Dua na iVakadinadina?
Eda kila kece ni rawarawa cake me da veitalanoataka e dua na ivakadinadina mai na noda rawata e dua. Na iwalewale me rawa kina e dua e conaki ena lawa ni tatamusuki: “Na ka kecega sa kaburaka na tamata ena tamusuka talega ko koya” (Kalatia 6:7). E sega ni dua na ka vinaka ena yaco mai ke sega na sasaga kei na solibula. Kevaka me da na cakacaka vakaukauwa me da rawata e dua na ivakadinadina, eda na yaco me da kaukauwa vakalevu cake o keda kei na noda ivakadinadina. Ni da sa kila ka, sa na rawa ni da vakatorocaketaka na noda maqosa kei na noda itovo ni bula.
Na ivakadinadina e dua na iyau talei baleta ni sega ni rawa ena noda vakasama se ka ni veivosaki, e sega ni rawa ni voli ena iyau vakavuravura, ka sega ni soli me iloloma se me isolisoli vakawa mai vei ira na noda qase. Eda na sega ni rawa ni vakararavi ki na nodra ivakadinadina eso tale. Eda na gadreva me da kila vakataki keda. E kaya ko Peresitedi Gordon B. Hinckley, O ira yadua na Yalododonu Edaidai sa nodra itavi me ra kila deivaki vakataki ira ka sega tale na kena lomalomarua ni ko Jisu, sai koya ga sa vakaturi cake tale mai na mate, na Luvena bula na Kalou bula” (“Fear Not to Do Good,” Ensign, Me 1983, 80).
Na ivurevure ni kila ka dei kei na veivakadeitaki tudei oqo na ivakatakila vakalou, “ia na itukutuku kei Jisu na yalo ni parofisai” (iVakatakila 19:10).
Eda rawata na ivakadinadinna oqo ni vosa na Yalo Tabu ki na yalo e tiko vei keda. Eda na rawata e dua na veivakadeitaki malumu ka sega ni veivukiyaki, ka na ivurevure ni noda ivakadinadina kei na noda yalodei veitalia ga na noda itovo, na matatamata eda lako mai kina, na vosa, se na keda ituvaki ena bula veimaliwai kei na ilavo. Ena yaco me yavu dina ka tarai cake kina na noda ivakadinadina na veivakauqeti ni Yalotabu ka sega ni vakasama walega.
Ena uto tikoga ni ivakadinadina oqo na noda vakabauta, kei na noda kilai Jisu Karisito kei na Nona itavi vakalou, o koya sa tukuni Koya ga ena ivolanikalou, “Koi au na sala, kei na vu ni dina, kei na vu ni bula” (Joni 14:6).
Ia eda na rawata vakacava e dua na ivakadinadina ka teivaki ena ivakadinadina bula ni Yalo Tabu? Sa tuvai tu ena ivolanikalou na kena iwalewale:
iMatai: Gadreva mo vakabauta. E vakayaloqaqataki keda na iVola i Momani: “Dou yadra mada ka vakasama, dou rogoca na noqu vunau ka vakabauta” kei na “dou rogoca mada ga ka vakasamataka, de mani rawa mo dou vakabauta e vica na tikina” (Alama 32:27).
Eso beka era na kaya, “Au sega ni rawa ni vakabauta au sega ni tamata lotu.” Vakasamataka mada ga, sa yalataka na Kalou na veivuke e vakalou kevaka mada ga eda gadreva me da vakabauta, ia me gagadre dina sara ka sega ni gagadre vakailasu.
iKarua: Vakasaqaqara ena ivolanikalou. Taroga eso na taro, vakasamataka, vakasaqaqara ena ivolanikalou ena kena isau. E dua tale, e tu ena iVola i Momani na ivakasala vinaka me baleti keda: “Kevaka ko sa tea e lomamu e dua na sorenikau” ena kena vulici vagumatua na vosa ni Kalou, “ni ko sa vakila ni sa tubu cake mai” kevaka ko na sega ni vorata ena tawavakabauta. Na sorenikau vinaka oqo ena “vakamarautaka na yalo[mu], [ko na] taleitaka sara” (Alama 32:28).
iKatolu: Cakava na loma ni Kalou, muria na ivunau. E sega ni rauta me da tiko ena dua na veisavosa kevaka eda gadreva tiko me da kila vakataki keda ni sa vakalesui mai ki vuravura na matanitu ni Kalou. Na vuli vagauna talega e sega ni rauta. Me da sa cakacaka sara ga o keda, oqori me da vuli ka cakava na loma ni Kalou.
Eda gadreva me da lako mai vei Karisito ka muria na Nona ivakavuvuli. E vakavuvulitaka vakaoqo na iVakabula; “Sa sega ni noqu na noqu ivakavuvuli, sa nona ga ka talai au mai. Kevaka e dua na tamata sa via cakava na lomai koya, ena kila se sa ka mai vua na ivakavuvuli, seu vosa vakaiau ga” (Joni 7:16–17; vakamatatataki). Ia sa kaya ko Koya, “Kevaka dou sa lomani au dou talairawarawa ki na noqu ivunau” (Joni 14:15).
iKava: Vakasamataka, lolo, ka masu. Me da rawa ni kila ka mai vua na Yalo Tabu sa dodonu me da kerea vua na Tamada Vakalomalagi. Sa dodonu me da vakabauta ni lomani keda na Kalou ka na vukei keda ko Koya me da kila na veivakauqeti ni Yalo Tabu. E tukuna tale vei keda na iVola i Momani:
“Dou wilika na itukutuku oqo, ka kila kina na nona loloma na Turaga vei ira na luve ni tamata, io me tekivu mai vei Atama ka yacova ni dou sa taura na itukutuku oqo, ia ni dou sa wilika, mo dou vakananuma sara e lomamudou.
“Mo dou kerea vua na Kalou na Tamamudou Vakalomalagi ena yaca i Karisito, me vakatakila vei kemudou se dina se sega; ia, kevaka dou sa kerea ena yalodina ena lomamudou taucoko ka vakabauta na Karisito, ena vakatakila vei kemudou ko Koya ena kaukauwa ni Yalo Tabu ni sa dina” (Moronai 10:3–4).
Ka sa kaya na parofita ko Alama:
“Raica au sa kaya vei kemudou, au sa kila ni sa dina na veika au sa tukuna. Ia dou sa kila li na vuna au sa kaya kina ni sa dina?
“ … Raica, au a lolo ka masu … me vakatakilai kina vei au na veika oqo. Ia au sa kila ni sa ka dina, ni sa vakatakila vei au na Turaga na Kalou ena kaukauwa ni Nona Yalo Tabu; ia na yalo ni parofisai oqo sa tiko vei au” (Alama 5:45–46).
Kemuni na taciqu kei na ganequ, a ciqoma ko Alama na nona ivakadinadina bula rauta ni sivia na 2,000 na yabaki sa oti, e rawa ni da sotava na veika vata o ya nikua.
Na Cava na Kena Yaga na iVakadinadina?
Na ivakadinadina e vakarautaka na rai e dodonu, na inaki, kei na dua na yavu kaukauwa me da tara cake kina e dua na bula vakainaki ka tubu. E ivurevure tudei ni yalodei, e itokani dina ka yalodei ena veigauna vinaka kei na veigauna ca. Na ivakadinadina e solia vei keda na veika me da vakanuinui ka marau kina. E vukei keda me da vakabulabulataka e dua na yalo ni nanamaki kei na mamarau ka rawa kina vei keda me da marautaka na veika rairai totoka ka ibulibuli vakalou. Na ivakadinadina e vakauqeti keda me da digia na dodonu ena veigauna kecega ena veika kecega. E vakauqeti keda me da voleka yani vua na Kalou, ka vakatarai Koya me voleka mai vei keda (raica Jemesa 4:8).
Na noda ivakadinadina yadua e isasabai ka itataqomaki, ka vaka na ititoko kaukamea ka tuberi keda tiko yani vakavinaka ena loma ni butobuto kei na veilecayaki.
Na ivakadinadina nei Nifai e solia vua na yaloqaqa me tucake ka wili me dua o koya sa talairawarawa vua na Turaga. A sega ni vosakudrukudru, lomalomarua, se rere se cava ga e lako mai. Ni sa dredre mai na toso e qai kaya, “Au na lako ka kitaka [na veika] sa vakarota na Turaga, ka niu kila ni sa dau vakarautaka na Turaga na sala … [me] ra rawata kina na luve ni tamata na ka kece sa vakarota vei ira ko koya” (1 Nifai 3:7).
Me vaka ga ni sa kilai Nifai na Turaga, sa kilai keda talega na Kalou ka lomani keda. Oqo na noda gauna; oqo na noda veisiga. Eda tu ena vanua ka ia kina na cakacaka. Na noda ivakadinadina yadua ka tudei ena vakauqeti keda me da veisautaki keda ka vakalougatataka na vuravura. Au vakadinadinataka na veika oqo ka laiva vei kemuni na noqu ivakadinadina me vaka niu dua na iApositolo ni Turaga, ena yaca i Jisu Karisito, emeni.