Sa mai Takali ko Elisa Young Rogers Wirthlin

Ko Elisa Young Rogers Wirthlin na wati Elder Joseph B. Wirthlin ena Kuoramu ni iApositolo Le Tinikarua e sa mai takali ena ika 16 ni Okosita, 2006, ni sa qase sara.

Ena soqoni ni koniferedi raraba ena yakavi walega oqo ni Vakarauwai e tukuni nona itokani tawamudu kina ko Elder Wirthlin (raica tabana 28): “E a noqu kaukauwa ka noqu marau. Baleti koya, au sa mai tagane, lewe ni vale, ka tama vinaka… . Au dinau tu oqo vei watiqu mai na veika au rawa ni wasea. Au sega mada ni kila se a dua na veiwatini e vinaka sara, ia au kila ni neirau e vakakina… . Me vaka na vuni noqu marau levu ko Elisa, oqo na nona takali sa vuni noqu rarawa levu.”

Ko Elisa Rogers, e gone taudua vei iratou e lewe va na gone, ka sucu ena ika 22 ni June, 1919, e Salt Lake City. Erau a vakamau kei Elder Wirthlin ena Valetabu e Salt Lake ena ika 26 ni Me, 1941 ka vakamautaki rau ko David O. McKay, ka a imatai ni daunivakasala ena Mataveiliutaki Taumada. E a kacivi me iApositolo ko Elder Wirthlin ena 1986.

Ko Sisita Wirthlin e kawa vakadodonu mai vei ira na painia e Utah. Na tamana, Orson Madsen Rogers, e makubui Aurelia Spencer Rogers na imatai ni peresitedi ni Lalai ka tauyavutaki e Utah ena 1878. Na tinana, o Bernice Young, e makubui Joseph Young na taci Peresitedi Brigham Young.

E rawata na nona koroi ni vuli bisinisi ena Univesiti e Utah ka cakacaka vakasekeriteri ena valenivolavola liu ni univesiti me yacova ni sucu na imatai ni luvena. Ni oti ko ya e a dau vukei na watina ena cakacaka vakasekeriteri ena nodrau vale ena gauna e manidia tiko kina ni bisinisi vakamatavuvale.

Ko irau na Wirthlins erau itubutubu ni vitu na gone yalewa kei na dua na tagane. O iratou kece na luvedrau eratou gonevuli ni koronivuli na Uintah Elementary, Roosevelt Junior High kei na Koronivuli na East High—na koronivuli kecega e a vuli kina ko Sisita Wirthlin ni se gone yalewa. Ena gauna era vuli tiko kina na luvena e dau vakaitavitaki koya ena iSoqosoqo ni iTubutubu kei na Qasenivuli (STQ) ka me vaka ni lewe ni kalavo ni opera e a vakavulica na kalasi ni opera appreciation vei ira na gone.

E sega ni wasoma nona veilakoyaki ni ratou se lalai na gone ka imatai ni nona vodo waqavuku ni sa yabaki 50. Tekivu mai na gauna ko ya e sa levu na vanua erau veilakoyaki kina vata kei na watina ena ilesilesi vakalotu. Erau a vakaitikotiko na Wirthlins mai Jamani me lima na yabaki, ekea e vakaitovotaki koya kina me lomani na vanua kei ira na kena tamata.

Ena gauna ni nona veiqaravi ena veitabana ena Lotu e dau tarai koya vakabibi ni dau yaco mai vua na gauna donu me veivuke vei ira na matavuvale era tauvimate se tu tale na ka era gadreva. Ena nona ituvatuva ni dina kei na kila ni vanua vinaka mo veiqaravi kina na vanua ko tiko kina, e dau marautaka na madigi kece me vakayagataki koya kina.

Ena dua na vanua vakamareqeti ena nona vale e tiko kina e dua na idabedabe ta ena gauna makawa ka solia vei Sisita Wirthlin ko tinana. E dau vakawasoma na nona dabe ena idabedabe ko ya me wilika na ivolanikalou kei na veivola tabaki tale eso me vakalomavinakataki, vakayaloqaqataki ka vakamarautaki kina. Na qito tenisi, na tali wa kei na taubale e ikuri ni veika e dau taleitaka ko Sisita Wirthlin. E dau marautaka talega na nodrau veimaliwai vakaveiwatini, kei iratou na 8 na luvedra, 46 na makubudrau kei na 49 na makubudrau vakarua.