E Nuitaki Keda o Koya!
Ni da na laki tu yadudua ena mata ni Kalou ka solia na itukutuku me baleta na noda veiqaravi ena matabete.
Ena vica vata na yabaki sa oti keirau a kacivi vata kei Sisita Ellis me keirau laki liutaka na Tabana ni Kaulotu na Brazil São Paulo North. E ibalebale ni veikacivi ko ya ni keirau sa na tiko tani me tolu na yabaki. Ena vuku ni neirau itikotiko kei na neirau bisinisi, keirau sa nanuma me keirau na maroroya tikoga na neirau itikotiko kei na bisinisi e Houston ka kakua ni volitaka.
Ni sa tekivu me keirau qarava na vakavakarau e gadrevi, sa matata ni dodonu me na vakarautaka na neirau loya e dua na kaukauwa vakalawa. Oqori e dua na itukutuku vakaloya ka soli kina vua e dua tale na dodonu me vakayacora na ka kecega ena vukui keirau. Na tamata e tu vua na ivola o ya e rawa ni volitaka na neirau vale se na iyauqaqa tale eso, kere dinau ena vukui keirau, vakayagataka na neirau ilavo, se volitaka sara mada ga na neirau bisinisi. Na vakanananu ni kena soli vua e dua na tamata na kaukauwa kei na dodonu vakaoqori ena veika e baleti keda e ka vakarerevaki toka.
Keirau sa mani nanuma me keirau solia na neirau kaukauwa vakalawa vua e dua keirau rawa ni nuitaka, e dua na itokani vinaka ka ilawalawa, ka a vakayagataka vakavinaka na kaukauwa kei na dodonu o ya. Ena vakayacora na veika keirau na vakayacora kevaka keirau a tiko e kea.
Kemuni na taciqu, ni vakasamataka mada na veika sa solia vei keda na Turaga—na Nona dodonu kei na kaukauwa! Na dodonu kei na kaukauwa me da cakacaka ena Vukuna ena veika kece sara me baleta na Nona cakacaka!
Ena kaukauwa ni matabete oqo, kei na gauna ena gadrevi kina, na nodra veivakadonui o ira e tu vei ira na kena idola, e rawa ni da qarava na veicakacakatabu vakalotu ni veivakabulai ena Yacana: papitaiso ena vakabokoci ni ivalavala ca, veivakadeitaki ka solia na Yalo Tabu, solia na matabete ka tabaki ira eso tale ki na veitutu ni matabete ka qarava na veicakacakatabu vakalotu ni valetabu. Ena Yacana sa rawa kina me da qarava na cakacaka ni Nona Lotu. Ena Yacana sa rawa kina ni da veivakalougatataki, veituberi vakavuvale, ka vakabulai ira sara mada ga na tauvimate.
Sa dua na veinuitaki sa biuta vei keda na Turaga! Ni vakasamataka mada na veitacini, E nuitaki keda o Koya!
Ni bera ni da taura na matabete eda sa vakarautaki ka vakadinadinataki oti. Eda sa cakacakataka na noda vakabauti Jisu Karisito, veivutuni, eda papitaisotaki, ka ciqoma na isolisoli ni Yalo Tabu. E duidui tu na ivakatagedegede ni veika eda sa vakila mai ni bera ni da mai tabaki. Ia na kena ivalavala vakalotu e duavata ga. Eda a sa masulaki ka vakatarogi mai vei ira era vakayagataka tu na veidola vakamatabete. Eda sa tokoni ena nodra laveliga na lewe ni Lotu ena noda tabanilotu. Eda a tabaki mai vua e dua e tu vua na dodonu ka vakadonui me vakayacora vakakina.
Sa dau qaqarauni vinaka na Turaga ena vukudra na Nona matabete—Me ra cakacakataka na Nona kaukauwa kei na dodonu sa dua na vakanuinui tabu.
Sa vakasakiti dina ni rawa ni nuitaki keda na Kalou! E nuitaki iko! E nuitaki au!
Ni da taura na matabete, eda vakayacora vakakina ena veiyalayalati. Na veiyalayalati e dua na yalayala ka rau duavata kina e lewe rua. E yalataka o Koya me na vakalougatataki keda ia me da cakava eso na ka. Eda yalataka ni da na cakava na veika kece sara oqori. Ni da sa vakayacora vakakina, sa dau dina ena Nona vosa na Turaga ka vakalougatataki keda. E vakavuqa ni dau solia vakalevu cake vei keda o Koya mai na veika sa vakadonui tu. Sa rui dau lomasoli o Koya.
Ni da taura na Matabete i Melikiseteki, eda sa taura na ka e vakatokai me “bubului kei na veiyalayalati” ni matabete. Eda yalataka vua na Turaga e rua na ka, ka yalataka vei keda o Koya e rua na ka. Eda yalataka me da “yalodina ki na ilesilesi ruarua vakabete” ka yalodina ena nodra “vakayacora vakavinaka na nodra itavi.” Sa yalataka ko Koya ni na “vakasavasavataki ira na Yalotabu.” Ni oti na noda sa yalodina tiko ena ka kecega ki na ivakataotioti, sa yalataka ko Koya ni “veika kecega sa tu vei Tamana ena soli vei (keda)” (raica V&V 84:33–41).
Na sala e vakalougatataki ira kina na Luvena na Turaga sai koya na noda veiqaravi vakamatabete. Me vukei keda me da qaqa ena noda veiqaravi vakabete. Sa dau dusimaki keda ka vakasalataki keda me da qaqarauni. Sa vakayacora oqori ena ivolanikalou, ka tomana tiko na nona dusimaki keda mai vei ira na noda iliuliu kei na veivakauqeti ni Yalo Tabu.
E tu ena ivolanikalou e vuqa sara na itukutuku ni veidusimaki kei na ivakasala ni qaqarauni ki vei ira na matabete. E dua vei ira ka uasivi duadua sai koya na wase 121 ni Vunau kei na Veiyalayalati. Ena vica na tikina oqori e vakavulici keda kina na Turaga ni matabete ena vakayagataki ga ena buladodonu. Me da dau raici ira na tani ena veivakauqeti, ena vosota vakadede, na yalomalua, kei na yalomalumalumu. E taleva tale vei keda na bibi ni loloma uasivi kei na bula savasava me noda itokani tudei kina na Yalo Tabu.
Na iwase o ya e vakasalataki keda ena ivakarau ni bula kei na ivalavala eso ka na vakavuna me yali vei keda na kaukauwa ni matabete. Kevaka eda sa dau segata “me ra qoroi ira kina ko ira na tamata,” tovolea me da “ubia na noda ivalavala ca,” tovolea me da “qaciqacia” se na noda “dokadoka” se da saga me da viavia “lewai” ira na tani, sa na yali na kaukauwa ni noda matabete (raica tt. 35–37). Mai na gauna ko ya eda sa na vakayagataka tiko kina na bete vakailasu. Eda sa na biuta na veiqaravi vua na Kalou ka biuti keda ki na veiqaravi nei Setani.
Ena vinaka vei keda na matabete me da dau taleva tale ena veigauna eso na Vunau kei na Veiyalayalati wase 121. E rawarawa me da kila na vuna era sa vakabibitaka kina na parofita ni gauna oqo me da maroroya na noda bula kilikili ka solia vei keda na Me iSakisaki ni iTabagone me idusidusi me vukei keda.
E dua na vuna me da taqomaka tiko kina na kilikili ni noda bula baleta ni da sega ni kila na gauna eda na kacivi kina me da vakayagataka na matabete.
Ena gauna e yabaki lima kina ko Maciu na luvei keirau tagane. A lutu mai na papa ni rika rewaicake ena tobu ni sisili volekata na neitou itikotiko. A tau ena simede e yasana ka kaca na nona qavokavoka salavata kei na mavoa ni nona mona. A cicivaki yani ena dua na elikoputa ki na Valenibula mai Houston ena veiqaravi vakatotolotaki. Au a gadreva vakatotolo sara na veivuke vakabete. A kilikili tu na nodrau bula ka rau vakarau tu ena gauna koya na neitou dauveituberi ni matavuvale, kei na neitou iliuliu vakabete. Erau a veivuke ena nona vakalougatataki o Maciu ka bula cake sara mai kina vakavinaka.
Sa dodonu me da vakarau tu ena veigauna kecega. Me vaka e dau tukuni ena gauna ni sikauti, “Mo vakarau tu.”
E dina sara eda vinakata me levei na bete vakailasu. Ia sa vakasalataki keda na iApositolo ko Paula ena dua tale na ka rerevaki. E vakasalataka ni ena noda gauna era na tu ko ira “na lotu vakarairai, ia sa sega vei ira na kena dina” (2 Timoci 3:5).
E rawa vakacava me vaka ni da matabete me noda ga na lotu vakarairai ka sega vei keda na kena dina? E rawa beka ni baleta ni da taura tu na matabete ka sega ni cakacakataka? sikovi ira na noda matavuvale, ka sega ni veituberi vakavuvale vei ira? masulaka e dua ena dua na cakacaka vakalotu se ena veitabaki, ka sega ni vakalougatataka? cakava na cakacaka ni Turaga ena gaunisala uasivi duadua eda kila ka sega mada ni bau vakatakekere mo kila ka cakava na Lomana ena Nona sala?
Me da nanuma na nona ivakasala vei keda na Turaga mai vei Nifai me da “dou masulaka taumada na veika kece dou sa kitaka vua na Turaga” (2 Nifai 32:9).
Ena vica vata na yabaki sa oti au a kacivi meu veiqaravi ena mataveiliutaki ni iteki na Houston Texas North. Au a vulica tiko na italanoa vakaibalebale ni taledi. O na nanuma beka na italanoa. Sa vakarau me lako vakayawa e dua na tamata, sa mani nuitaka tu vei iratou na nona tamata na nona iyau. E dua e soli vua e lima na taledi, e dua tale e rua, kei koya na iotioti a soli vua e dua. Ni lesu mai a kerea vei iratou me ratou mai tukutuku vua.
O koya na tamata a taura e lima ka vakasuka mai e tini, ka vakakina o koya a taura e rua ka vakasuka mai e va, a tukuni vei rau, a tamata vinaka ka dina. Ia na ka e dreta na yaloqu o koya na tamata a taura e dua, a laki maroroya ka vakasuka tale mai vakavinaka vua na nona turaga. Au a kurabui ena veika e tukuna na turaga: “A tamata ca ka vucesa … kauta tani vua na taledi … mo dou biuta ena butobuto e tautuba”! (Raica Maciu 25:14–30.)
Oqo e dua na ivalavala kaukauwa vua e dua ka kena irairai ni a tovolea tiko me qarauna na veika a soli vua. Ia a qai vakavuvulitaka vei au na Yalotabu na dina oqo—e namaka na Turaga me dua na veisau! Au a kila ena gauna o ya ni da na laki tu yadudua ena mata ni Kalou ka solia na itukutuku me baleta na noda veiqaravi ena matabete kei na noda itavi. Eda a vakayacora li e dua na veisau? Me baleti au, a vinaka cake beka na iTeki na Houston Texas North ena gauna au sa vagalalataki kina mai na gauna au a kacivi kina?
Eda vakavinavinaka, ni vakavulica vei keda na Turaga na sala me da vuavuai vinaka kina, na sala me da vakayaco veisau kina. “Ko koya sa tu vei au, koi au talega vei koya, sa vua vakalevu” (Joni 15:5). Kevaka eda cakacakataka na Nona matabete ena Nona sala, ka muria na idusidusi eda ciqoma mai vei ira na Nona italai kei na Nona Yalotabu, eda na tamata vinaka ka dina!
Kemuni na taciqu ena matabete, e bula tiko na Turaga ko Jisu Karisito, na noda iVakabula ka noda Dauveivueti. E kilai keda. E lomani keda. Sa biuta vei keda na Nona vakanuinui ena Nona solia vei keda na kaukauwa kei na dodonu ni Nona matabete. Koi au e dua na ivakadinadina bula ni ka dina oqo. Sa noqu masu me da vakayagataka na Nona kaukauwa kei na Nona dodonu me da cakava na Lomana ena Nona sala.
Ni da rogoci iratou ko Peresitedi Hinckley, Peresitedi Monson, kei Peresitedi Faust, au cavuta na noqu ivakadinadina bula vakataki au ni o iratou yadua eratou parofita, daurairai ka dauvakatakila. Au sa nanamaki tu me’u rogoca na nodratou ivakasala. Ena yaca i Jisu Karisito, emeni.