Kacivaki na iUlutaga Vou ni Muavata ni 2007

Ena 2006 era a wasea na nodra taledi kei na ivakadinadina ko ira na cauravou kei na goneyalewa ena Lotu ena nodra muataka na nodra soqo, ki na nodra iulutaga ni Muavata, “Dou tucake ka rarama mai; io me cila yani na nomudou rarama me ivakaraitaki vei ira na veimatanitu” (V&V 115:5).

Ena 2007 na iulutaga ena vakanamata ki na nodra vakaukauwataki vakayalo yadudua. Na iulutaga vou ni Muavata e tauri mai na raivotu nei Parofita Josefa Simici ena gauna e titobu tu kina na nona lomabibi ena valeniveivesu e Liberty. “Me savasava tikoga na nomu vakanananu; ia ena taucoko sara kina na nomu vakabauta ena mata ni Kalou” (V&V 121:45).

Ena dua na nodrau itukutuku vata erau kaya kina na Mataveiliutaki Raraba ni Goneyalewa kei na Cauravou ni ko ira na itabagone era sotava tiko na leqa ni veilecayaki kei na vakatitiqa era na kunea na inuinui ena iulutaga vou ni Muavata. “Na nuidei ena mata ni Kalou e nuidei dina,” e tukuni ena itukutuku ko ya, “Ke ko sa nuidei ena mata ni Kalou, ko sa rawata na nuidei ena matadra kece sara.”

Baleta, “sa raica na yalo ko Jiova” (1 Samuela 16:7), ko ira na itabagone e savasava na nodra vakanananu era na nuidei ni na ciqomi ira na Kalou ka na vakalevu me ra bulataka na bula savasava. Ko iratou na Mataveiliutaki Raraba ni Goneyalewa kei na Cauravou era vakauqeti ira na itabagone me ra kunea na veituberi me ra bulataka kina na bula savasava ena Me iSakisaki ni iTabagone (naba ni ivola 36550).

Ena rawa vakacava me savasava tikoga na nodra vakanananu na itabagone? E kaya ko Peresitedi James E. Faust, iKarua ni Daunivakasala ena Mataveiliutaki Taumada, ni “na ivakarau vinaka e levu na kena ibalebale, me vaka na ivakarau e cecere sara, na vakayacori kei na vakasamataki ni ka dodonu, na itovo vinaka se ivalavala savasava” (“How Near to the Angels,” Ensign, Me 1998, 95).

“E levu na tamata era sega ni kila vakavinaka na ibalebale ni vakarau savasava,” E kaya ko Peresitedi Faust. “E dua na ibalebale ka kilai raraba tu ko ya me da dodonu se bula savasava ia na vakarau savasava ena kena vakasama taucoko e kovuta sai koya na itovo kece ni bula dodonu ka vukea me bulia na noda itovo” (“The Virtues of Righteous Daughters of God,” Liaona kei na Ensign, Me 2003, 108).

E vakamacalataka o Elder Joseph B. Wirthlin ena Kuoramu ni iApositolo Le Tinikarua na kena tara na noda nuidei na bula dodonu. “Ni da cakava tiko na ka e dodonu eda na sega ni ririko se lomalomarua me da vakasaqara na gaunisala vakalou. Eda na kila ni na sauma na noda masu na Turaga ka na vukea na noda gagadre” (“Personal Integrity,” Ensign, Me 1990, 33).

Ni da bulataka na ka dina e kauta mai na veitokani ni Yalo Tabu ka kauta mai na veivakauqeti ni Turaga kei na nuidei ena Matana.

Ena dua na ivola ena 1 ni Okosita, 2006 ka vakarautaki kina na iulutaga ni Muavata ni 2007, eratou vakauqeti ira na veiliutaki vei ira na Cauravou kei na Goneyalewa na Mataveiliutaki Taumada me ra vakabibitaka na iulutaga ni Muavata ena idola ni veisoqoni kei na veitaviqaravi tale eso ni itabagone.

Na ikuri ni veivola tabaki tale eso me baleta na iulutaga ena rawa ni laurai ena Liaona kei na New Era ni Janueri 2007.