“Na Loloma Uasivi ka Veivakurabuitaki”

Elder Anthony D. Perkins

Ena Vitusagavulu

Na vakabauta vagone ena taucoko ni loloma ni Tamada Vakalomalagi kei Jisu Karisito ena “tawasea tani” na icori nei Setani ni tawakilikili, sega ni taucoko tu, kei na cala.

Na gone e savavuka nodra vakabauta era vunautaka, “Keimami vakabauta na Kalou, na Tamada Tawamudu, kei na Luvena, o Jisu Karisito, kei na Yalo Tabu.”¹ Ia ena so na gauna eda sega ni dau vakila na itabagone kei na uabula na kaukauwa ni ivakaro rawarawa oqo.

O Setani sa ikoya na “meca ni ivalavala dodonu kecega”;² e qai teivaka na vakatitiqa me baleta na ituvaki ni Lewetolu Vakalou kei na noda veiwekani vata kei Iratou. E parofisaitaka o Jisu Karisito ni ra na vakacalai talega na digitaki³ ena iotioti ni itabagauna. Vakasamataka e tolu na ivakaraitaki kei Lusefa ena nona “veretaki ira ka via coriti ira na tamata yalododonu ni Kalou.”⁴

Na icori vakailasu ni tawakilikili. E dua na tamata gone yalodina e vakila ni sega ni rawa me sotava na nodra gagadre eso tale. E vale vakakina e koronivuli, e ka dredre me vakacaucautaki ka dau vakalewai wasoma. Na ivolatukutuku kilai levu e tukuna vua ni sega ni rairai vinaka se maqosa. Ena veisiga e dau taroga na marama yalododonu oqo se e dua o koya e kilikili kaya na loloma ni Tamada Vakalomalagi, na solibula ni veisorovaki ni iVakabula, se na veidusimaki tikoga ni Yalotabu.

Na icori ka vakalevutaka na sega ni taucoko tu. E dua na daukaulotu gugumatua e vakila nona sega ni rawa me sotava na veika e namaka na Kalou. Ena nona vakanananu, e raitayaloyalotaka na italatalaqase bula kilikili oqo e dua na Tamada Vakalomalagi dodonu sara, ka vakaitavi ena kena sega ni rawa me veisau na vakatulewa, e dua na iVakabula ka rawa me vakasavasavataka nodra ivalavala ca na tani ia e sega ni nona na italatalaqase oqo, kei na dua na Yalo Tabu me rau salavata kei na dua na tamata e sega ni taucoko tu.

Na icori ni cala sega ni gadrevi. E dua na marama uabula ka tina gugumatua, itokani dauloloma, e dauveiqaravi yalodina ena Lotu, ka dua e dau lako wasoma ki na valetabu. Ia e yalona, e sega ni rawa me vosoti koya na marama oqo ena ivalavala ca a vakayacora ena veiyabaki sa oti ni sa veivutuni ka wali taucoko mai vei ira na iliuliu ni matabete. E vakatitiqataka se rawa me ciqoma na Turaga na nona bula ka sa yali na vakanuinui ni bula tawamudu ena nona iserau na Tamada Vakalomalagi.

Kevaka e tu eso na vakanananu kei na vakila e tautauvata kei ira na Yalododonu vinaka oqo, au sureti kemuni mo ni yaco mo ni dua na gone lailai ka vakila tale “na loloma uasivi ka veivakurabuitaki nei Tamada kei na Luvena, me lako mai kina ki vuravura na iVakabula.”⁵ Na vakabauta vagone ena taucoko ni loloma ni Tamada Vakalomalagi kei Jisu Karisito ena “tawasea tani”⁶ na icori nei Setani ni tawakilikili, sega ni taucoko tu, kei na cala.

E vakatavulica na Vosa Vakaibalebale, “Ia me vaka na vakanananu ni lomana, sa vakakina ko koya.”⁷ Meu vakatututaka mada—me ikuri ni masumasu vakawasoma, vulici ni ivolanikalou, kei na lako ki Lotu kei na valetabu—e lima na veisau ki na nomu vakanananu kei na lomamu mo vakila taucoko sara na malumu ni loloma ni Kalou.

iMatai, mo raici iko mo dua na luvena taleitaki naTamada Vakalomalagi dauloloma. O ira noda gone era dau lagata ena yalodei na, Au luve ni Kalou, E a talai au mai.”⁸ O ira na gonelalai era vakila ka kila na veika o sa rairai guilecava. O iko na luvena tagane se yalewa daulomani na Tamada Vakalomalagi, ka buli “me ucui koya,”⁹ ka levu sara na kena yaga—me vaka ni sa rui levu a solia kina o Jisu Karisito na Nona bula ena vukumu.

Na Kalou na Tamada e dauloloma ka tawa yalani nona lomani iko veitalia ga na nomu cala. Na domo i Setani walega ena vakavuna nomu vakila ni tawa yaga. Na kena veibasai, na Yalo Tabu ena vakavuna mo vakila na “rarawa sa vaka na loma ni Kalou”¹⁰ mo veivutuni ena kena ivakarau ka vakasinaiti iko ena vakanuinui kei na veisau vinaka.

Ni o vakila nomu tawayaga, “nanuma ni sa ka talei ena mata ni Kalou na tamata kecega.”¹¹ Levea nomu vakasamataka wasoma se na nomu cavuta na vosa veisaqasaqa me baleti iko—e matata vinaka tu na kedrau duidui na yalomalumalumu kei na veivakamaduataki. Vakaraitaka ka vakayagataka nomu taledi uasivi mai na tikoga vakadua ena nomu malumalumu.

iKarua, biuta na nomu icolacola vei Jisu Karisito. Ena nomu vakasinaiti ena nanamaki kei na bolebole, kakua ni valuta duadua na ivalu. Muria na nodra ivakaraitaki na gone lalai, ka tekiduru ena masu.

O Jisu Karisito e vakaroti keda, “Drau kakua ni rere se lomalomarua; ia mo drau vakaliuci au ena nomudrau nanuma kecega.”¹² Na vakatitiqa, rere, kei na lomaleqa e vakaraitaka ni da sa taura taucoko na icolacola ni bula kei na lomaocaoca. Ni dewava na vakanananu ni da sa tawa yaga, tukuna ena yalodei, “Au sa rawata na veika kecega ena vuku i Karisito o koya sa vakaukauwataki au.”¹³ Ni da “kitaka na veika kecega [eda] sa rawata ena yalo mamarau,”¹⁴ e rawa mo na vakacegu ni Turaga ena cakava na kena vo sa na qai yaco me dodonu na veika kecega.

E yalataka na iVakabula, “Dou lako mai vei au, koi kemudou vakayaduaga sa oca ka colata na icolacola bibi, ia kau na vakacegui kemudou.”¹⁵ Ena nomu “biuta vei Jiova na [nomu] icolacola bibi,”¹⁶ mo rawata kina na vakacegu ni Yalotabu.¹⁷

iKatolu, vosoti iko ena nomu ivalavala ca kei na nomu sega ni taucoko tu. E sega ni namaki iko na Tamada Vakalomalagi mo yaco mo vinaka taucoko tu ena bula oqo. E kila tu ni o ira na luvena era na caka cala ena nodra vuli mai na veika era sotava ena bula vakavuravura. Ia “Ni sa lomani ira na kai vuravura vakaoqo na Kalou”¹⁸ ka sa vakarautaka tu na Nona ituvatuva ni marau e dua na iVakabula dauloloma.

E kaya o Jisu, “Ia koi au na Turaga, au na vosoti ira ga kau sa lewa; ia koi kemudou sa kilikili mo dou vosota na tamata kecega.”¹⁹ Tekivu mai na nomu vosoti iko vakaiko ka vosoti ira talega na tani. Kevaka me sega ni nanuma na Kalou na noda ivalavala ca eda sa veivutunitaka,²⁰ ia na cava na betena vei keda? Levea na vakaoti gauna kei na igu ena nomu bulataka tale na gauna sa oti.

Ni ko vosoti iko vata kei ira na tani, e dodonu mo vakabauta na Veisorovaki i Jisu Karisito. A masu na parofita o Sinoki, “Oi kemuni na Turaga; ko ni sa cudruvi ira na tamata oqo, ni ra sa beca na nomuni loloma levu ena vukuna na Luvemuni.”²¹ E rarawa na Tamada mai Lomalagi ena noda yalana na kaukauwa ni solibula ni veisorovaki ni Luvena. Ni ko cakacakataka na vakabauti Jisu Karisito, e rawa me “bokoci laivi” na nomu ivalavala ca.²² Kevaka me tikoga na ivalavala ca ni oti na veivutuni vakaidina, vakabauti ira na nomu iliuliu ni matabete ena nodra vakaraitaka na nomu kilikili.²³

iKava, tokona na vakanuinui ni bula tawamudu. Kevaka o raitayaloyalotaka tiko ni nomu ivalavala ca taumada, itovo ca, kei na lewa ca ena tarovi iko mai na nomu ciqoma na veivakalougatataki kecega ni Kalou, vakasamataka na veika e sotava o Alama na Qase. Ena nona raica lesu tiko na nona veiyabaki ni gone me vaka e dua na bete tawasavasava ena vuku ni ivalavala ca nei Noa na Tui, e a tusanaka o Alama, “Au a coko talega ena dai ko ya ka kitaka e vuqa na ka sa vakasisila ena mata ni Turaga, ia au sa rarawa kina vakalevu ka veivutuni.”²⁴ Ia a sa taucoko na veivutuni nei Alama kei na Veisorovaki nei Karisito e sa tawa yalani ka yaco me parofita o Alama ka yalataki vua na bula tawamudu.²⁵ Ni ko cakava na nomu uasivi duadua ena talairawarawa kei na veivutuni, o na rawata talega e dua na tikina ena matanitu vakasilesitieli mai na Veisorovaki kei na loloma wale i Jisu Karisito.²⁶

iKalima, vakasaqara e veisiga yadua na reki. E dua na ivurevure ni reki sa ikoya na veiqaravi, ena nomu osooso tiko ena vukei ira na tani, ena lailai nomu gauna ni rarawa bibi me baleta nomu malumalumu vakaiko. E vakavulica vakavuku na iVakabula, “Ia ko koya yadua sa via maroroya na nona bula, ena vakayalia; ia ko koya yadua ena vakayalia na nona bula ena vukuqu kei na itukutuku vinaka, ena maroroya.”²⁷

O na sotava na reki levu cake sara ena nomu bula ni o muduka na vakanananu ca ni o sa qase ka vakaisosomitaka ena yalodei me vakataki ira na gone. Na yalodei sa ikoya e dua na kaukauwa ka vakatarai keda me da raica na liga loloma ni Kalou ena matailalai ni noda bula. E dua na sere taleitaki e veivakasalataki, “Wilika nomu kalougata; Loloma levu ni noda Kalou.”²⁸

Au vakadinadinataka ni Tamada Vakalomalagi, ena nona loloma uasivi ka veivakurabuitaki e dolele yani kivei ira yadua na Luvena. Au vakadinadinataki Jisu Karisito, o koya sa “kaukauwa me ia na veivakabulai”²⁹ keda mai na noda tawakilikili, sega ni taucoko tu, kei na ivalavala ca. Au vakadinadinataka na Yalo Tabu, ka na salavata kei ira na tawakilikili ia era sa veivutuni. Kivei kemuni na Yalododonu yalodina ka kilikili ko ni veivala tiko ena gauna oqo vata kei na icori ni tevoro,³⁰ “me vakamamadataka na Kalou na nomuni icolacola ena vuku ni Luvena.”³¹ Ena yaca tabu i Jisu Karisito, emeni.