Bula Mo Rawata na Veivakalougatataki Tawamudu!
O kila na vuna e sa rui bibi kina me da savasava ka savavuka tu ga.
Ena gauna a sucu kina na imatai ni makubui keirau, na matavuvale taucoko e vakusakusa yani ki valenibula. Au sotava e dua na ka matalau niu raici Maciu, na luvei keirau tagane ulumatua, ni keveta tu na gonetagane lailai se qai sucu ka taleitaki oqo. Ena neitou tucake vata tu kei Chad, na luvei keirau tagane gone duadua, ena katubaleka ni nodra rumu na gone se qai sucu e valenibula, keitou wanonova na yaloka ni mata ikoya na yalo lailai vou oqo—e savasava, e savavuka, se qai tadu ga mai lomalagi. E rairai ni gauna kece e tu vakadua ena gauna sara ga o ya, e rawa me keitou raica na uasivi ni ituvatuva tawamudu. Na vakamareqeti ni bula e makare sese sara, kau vakasolokakana vei Chad, “O kila na vuna e sa rui bibi kina me da savasava ka savavuka tu ga?” E sauma ena vakarokoroko, “O io, Na, au kila.”
E sa kaukauwa dina na gauna o ya kau sa gadrevi kemuni vakayadua na gonetagane kei na goneyalewa, na isausau vou yadudua, kei keda vakayadua, me da vakila ka kila ni sa rui bibi na bulataki ni bula kilikili ka savavuka. E sa ikoya na noda bula kilikili vakayadua eda na rawata kina me da vakayacora vakayadua na noda ilesilesi vakavuravura.
Na noda ilesilesi vakayadua e se tekivu makawa tu mai ni bera ni da yaco mai ki vuravura. Ena bula taumada, eda sa “kacivi ka vakarautaki” me da bula e vuravura ena dua na gauna e sa vakaitamera tu kina na veitemaki kei na bolebole. E sa ikoya oqo “na itukutuku ni [noda] vakabauta tawa yalani kei na caka vinaka” ka baleta talega na noda “dau digitaka na vinaka.”1 E matata tu vei keda na ituvatuva ni Tamada ka kila ni vinaka. E sega walega ni da digitaka, ia eda taqomaka. Eda kila ni noda ilesilesi vakavuravura ena vakasinaiti ena veitemaki, veibolebole kei na dredre, ia eda kila talega ni da na vakalougatataki ena taucoko ni kosipeli, ira na parofita bula, kei na veidusimaki ni Yalo Tabu. Eda kila ka matata tu ni noda rawa ka ena vuravura oqo ena vakatau mai na noda kilikili kei na noda savavuka.
Na cava na kena ibalebale me da kilikili? Ena iVola i Momani, e kerea o tama i Lamonai: “A cava meu kitaka meu rawata kina na bula tawamudu ko sa tukuna tiko?”2 E a qai cakava na tui e dua na yalayala vua na Turaga ena nona kaya: “Raica au na veivutunitaka na noqu ivalavala ca kecega meu kilai kemuni.”3 Ena gauna e sa kila kina na tama i Lamonai se o cei o koya kei na ituvatuva vakaitamera ka wili kina o koya, sa yaco me gagadre ni yalona na kilikili.
Ni da yaco me da kilikili, eda cakava na digidigi ka rawa kina me da lesu ki na iserau ni Tamada Vakalomalagi. Eda vakayacora na veika oqori me da na rawata ka taukena na veivakalougatataki kecega e sa vakarautaka tu o Koya ena vukuda. E sa ikoya oqo na vuna eda tu kina oqo e vuravura—“me da vakatovolei [keda] mada kina, era na muria na veika kece sara … sa vakarota vei ira na Turaga.”4 E sa ikoya mai na noda yalodina kivua na Turaga o Jisu Karisito e rawa kina me da vorata na veivakatovolei.5 Na noda yalodina ena rawa kina vei keda me da levea na ivalavala ca. Ena vakasosataki keda baleta ni “rarama sa sala vata ga na rarama” kei na “ivalavala savasava sa domona ga na ivalavala savasava.”6
Ni da yaco me da kakua ni tauvi duka vakavuravura e sega ni gadrevi walega kina na yalodina, ia na veivutuni kei na talairawarawa. E dodonu me da bulataka na itagede ka cakava na veika oqori me da na rawata kina na veitokani tudei kei na veidusimaki ni Yalo Tabu—baleta na Yalotabu e sega ni rawa me tiko ena vale dukadukali.7
E dua na gonetagane au kila e a kaya: “E sa dredre dina. Bulataki ni itagede ena noqu vuravura e sega ni ka dina. E sa dredre dina.” Ia ni da kila ni o keda na luvena tagane kei na yalewa na Kalou, e dodonu me da sasagataka na kilikili. E dua tale na ilawalawa itabagone era maroroya na ibole: “Au Rawa ni Cakava na Veika Dredre.” Era kila na nodra ivakatakilakila, nodra ilesilesi, na ivurevure ni nodra veidusimaki, ka ra ciqoma na kaukauwa mai na nodra rokova na nodra veiyalayalati. Era kila talega ni gauna era vakayacora kina e dua na cala, e rawa me ra veisau! E vinakati keda taucoko o Setani me da vakasamataka ni sega ni rawa na veivutuni. Oqori e lasu. E sa yalataka tu na iVakabula na veivosoti.8 Ena veimacawa yadua, na kilikili ni vakaivotavota ena sakaramede e rawa kina vei keda yadua me da yaco me da savasava ka savavuka ena noda veiyalayalati me da “dau nanuma [na iVakabula] ka muria nona ivunau.”9 Na kosipeli i Jisu Karisito sa ikoya e dua na kosipeli e rawarawa— ka soli vei keda na iyaya ni cakacaka me caramaka na sala dodonu ka qiqo. E sa galala tu na sala: “Ni sa rawarawa na noqu ivua, ka mamada na noqu icolacola.”10
A vakamautaki au vata kei na turaga watiqu ena tolusagavulu-ka-walu na yabaki sa oti o Peresitedi Gordon B. Hinckley ena Valetabu e Salt Lake. Na ivakasala kei na veidusimaki e solia vei keirau ni siga o ya e sa yaco me dua na ivurevure ni veivakauqeti ena neirau bula. Ena neirau biuta na valetabu me dua na veiwatini, keirau a gole ki na dua na vanua ni gade volekata na lomanibai ni valetabu ka vola ena ivolaniveisiga na veivosa ni vuku keirau a ciqoma. E vakasalataki keirau me keirau dau nanuma wasoma na neirau dau masumasu ena bogi kei na mataka; na masumasu ni dua na veiwatini kei na dua na matavuvale. E vakasalataki keirau me keirau dau sauma taucoko vakadodonu ena yalodina na ikatini. E vakasalataki keirau me keirau wilika na ivolanikalou e veisiga ka bulataka na ivakavuvuli ena neirau bula. Ka vakasalataki keirau me keirau kilikili tu ga. E kaya: “Drau bulataka e dua na kena sala ni gauna o drau gadreva kina na veivakalougatataki ni Turaga, e rawa mo drau kerei Koya ka ciqoma na veivakalougatataki o drau gadreva baleta ni o drau kilikili.” E kaya, “Ena yaco mai ena nomudrau bula na veigauna o drau gadreva kina na veivakalougatataki vakatotolo. Ena gadrevi mo drau bula tu ena dua na sala me rawa ni soli kina—e sega ni baleta na loloma ia e baleta ni o drau kilikili.” Au sega ni taura rawa ena gauna ko ya na kena ibalebale o ya, ia ena loma ni 38 na yabaki ka tarava, keirau sa dau kerea na Tamada Vakalomalagi ena vuku ni vuqa na “veivakalougatataki vakatotolo.” Ena veisiga yadua, na itovo tabu vakaoqo kei na ivalavala savasava sa dau veivuke ena noda vakadeitaki ena sala ka na kauti keda lesu ki na nona iserau na Tamada. Ena veisiga, na “ivalavala vakalou kei na ivakarau yalododonu” oqo e vukea sara me vakadeitaki keirau ena sala ka lesu tale ki na nona iserau na Tamada. Ia edaidai au kaya—“Turaga keitou vuabale, Parofita ni sa lewa, Kosipeli sa soli mai, Cilavi keimami edai.”11
Na kilikili vakatamata yadua e ka yaga ni da curuma na Nona valetabu ka kena itinitini ena yaco me da taukena na “ka kecega … sa nei Tamaqu.”12 E kaya na Turaga, “Me savasava tikoga na nomu vakanananu; ia ena taucoko sara kina na nomu vakabauta ena mata ni Kalou.”13 Ni da vakayacora oqo, e rawa me da curuma ena yalodei na veivaletabu ni Kalou vata kei na kila ni da sa kilikili me da lako ki na vanua e lako kina o Koya na Turaga. Ni da kilikili ka savavuka, e sega walega ni rawa me da curuma na valetabu, e rawa me curumi keda na yalotabu ka kunei ena valetabu. Na yalayala ni Turaga ni veivakabulai kei na marau sa yaco me noda—kei na noda ilesilesi vakavuravura sa yaco me Nona.
Ena vula ga sa oti na luvei keirau tagane gone duadua, o Chad, e a lako ki na valetabu vata kei na dua na goneyalewa totoka, kilikili me rau vakamau ena gauna taucoko oqo ka tawamudu. Ena nona sa taura na ligana ka tekiduru ena icabocabo ni isoro, au rai yani ki na iloilo ena yasana ruarua kau baci vinakata tale meu vakasolokakana—“O kila na vuna e sa rui bibi kina me da savasava ka savavuka tu ga?” Ia ena gauna oqo, e sega ni yaga meu taleva lesu tale vua baleta na Yalotabu e sa vakasolokakana oti.
Kivei kemuni na itabagone ka tu na nomuni itutu vakaulumatua turaga, mo ni raica na yasa ni tawamudu! Ni raici kemuni ena valetabu ni Turaga. Ni raici kemuni mo ni bulataka na bula kilikili ka savavuka. Na itabatamata ena qai muri mai era vakararavi tu vei kemuni! Au vakadinadinataka ni rawa na kilikili baleta na veivakabulai kei na kaukauwa ni Veisorovaki i Jisu Karisito. Au masulaka ni rawa me tukuni vei keda vakayadua: “A ra na lako voli kei au ena isulu vulavula: ni ra sa yaga.”14 ena yaca i Jisu Karisito, emeni.