Toro Voleka Yani Vua
Na matabete, ena cakacaka ni Yalo Tabu ena tosoya yani na tamata yadua me voleka vua na Kalou ena veitabaki, na cakacakatabu vakalotu, kei na vakasavasavataki ni itovo ni tamata yadua
Ena vica vata na yabaki sa oti a toki na neitou matavuvale gone ki na bati ni veivakatorocaketaki ni neitou itikotiko ena gauna ko ya, ka keitou raica vakavinaka kina na veiulunivanua vaka ki na tokalau. Ena dua na mataka ni Moniti, niu se qai vakaisulu oti sara ga ka vakarau meu vakatotolo yani ki cakacaka, sa tubera yani o Craig na luvei keirau yabaki ono ki na loma ni rumu na tacina o Andrew e yabaki va. Ena vakanuinui a raici au cake ko Craig, ka kaya, “Tata, ena noa ena Lalai, e tukuna vei keitou na neitou qasenivuli ni kevaka e tu vei iko na matabete ena rawa ni o tosoya na ulunivanua. Au tukuna vei Andy qai sega ni vakabauti au. E tu vei iko na matabete, se vakacava, Ta?” E qai vukica na yagona lailai ka dusi yani ki tautuba, “Raica na veiulunivanua ko ya, Vakaraitaka vua Tata!”
E dua na ka talei e a qai yaco ni oti oya. Au vakavinavinaka vakalevu ena nodra sa tekivuna tiko mai e dua na gauna ni bula ni kena vulici na matabete o ira luveda tagane lalai.
Ena gauna vata e vakavuvulitaka tiko kina na Turaga vei ira a solia kina na matabete, ni ena vakabauta ena toso kina na ulunivanua,1 ni volai tu eso na veika vata vakaoqori,2 na noqu vakanuinui meu vakavurea eso na kila ka ena tiki ni ivunau me baleta na matabete oqo ka dau vakayavalata na tamata yadua me voleka yani vua na Kalou, ka solia vei ira na gauna vinaka me ra yaco me vakataki Koya ka bula tawamudu ena Nona iserau. Na ivunau oqo era okati ruarua kina na luvena tagane kei na luvena yalewa na Kalou. Au sa masuta kina me na veivuke vei rau ruarua na veika au na wasea.
Ena 1823 sa rairai na agilosi ko Moronai vei Josefa Simici, ka cavuta kina e vica na ivolanikalou ka okati kina na kena oqo mai na Malakai: “Raica au na talai Ilaija na parofita me vakatakila vei iko na iLesilesi Vakabete… .”3 Ena imatai ni idusidusi e volai oqo me baleti ira na matabete ena itabagauna oqo, e namaki kina e dua na ivalavala ena qai vakatakilai mai ena veiyabaki mai muri.
Ena 1829, a vakalesuya mai kina ko Joni na Dauveipapitaisotaki na Matabete i Eroni4 ka ratou muria mai ni oti e dua na gauna lekaleka o Pita, Jemesa, kei Joni ena nodratou vakalesuya mai na Matabete i Melikiseteki.5
Ena 1836, erau a rairai mai ko Mosese kei Ilaisa ka mai solia na idola ni kena vakasoqoni vata ko Isireli kei na itabagauna ni kosipeli i Eparaama,6 a qai tarava mai ko Ilaija, ka vakalesuya mai na idola ni veivauci. A qai tini na ivakatakila, ena nona tukuna ko Ilaija vua na Parofita ko Josefa, “Ia sa soli ki ligamudrau na idola ni cakacaka me vakayacori ena gauna oqo.”7
Ni sa tu tale e vuravura na dodonu kece ni matabete, na itutu, kei na idola, ena 1841, a vakabibitaka kina na Turaga vua na Parofita na bibi ni kena tara na valetabu ena vanua me na vakarautaka kina na Turaga vei ira na Luvena na veicakacaka tabu vakalotu ni matabete me ra vakarautaki kina na Luvena tagane kei na yalewa me ra lesu tale yani ki na Nona iserau.8
E kaya kina: “Me tara na vale oqo … meu vakatakila kina na noqu cakacaka tabu vakalotu vei ira na noqu tamata.
“Niu na vakatakila … . na veika kece me na vakayacori ena iotioti ni gauna.”9
Ni bera oya, a vakavuvulitaka na Turaga vei Josefa na Parofita mai Kirtland, na bubului kei na veiyalayalati ni matabete, ka vakamacalataka na ivakarau me na sotavi kina na veivakalougatataki yalataki.10 E Nauvoo, sa tubu na kila ka me baleta na tawamudu kei na kaukauwa ni matabete11 ena nodra vakalougatataki na Luvena yalodina kece sara, se ena bula oqo se ena kena ka tarava.12 Me vaka ni dau soli na matabete vei ira na luvena kilikili na Kalou, o ira na Luvena yalewa era tiki talega ni Nona “tamata” ka a vakatakila vei ira ko Koya na Nona cakacakatabu vakalotu ni matabete. Kei na yalayala ni “veika kece e taukena [na] Tamana”13 sa vakarautaki tu me baleti ira kece na tagane kei na yalewa era vakabauti Jisu Karisito, ciqoma na cakacaka vakalotu, ka qai vosota ena vakabauta ki na ivakataotioti. “Ia na ilesilesi oqo (ni Matabete i Melikiseteki) sa vakatakilai mai kina na kaukauwa vakalou.”14
Na cakacaka vakalotu cecere ni valetabu sa vakarautaki tu me baleti ira ga na tagane kei na yalewa ni rau sa vauci vata ka tara e dua na matavuvale tawamudu. Ena vuku ni ka oqo kei na cakacaka vakalotu kece tale era na vakalougatataki kina na veimatavuvale ni vuravura.15 Na veivauci oqo e itakele ni nona inaki na Turaga ka sa yalataka kina vei ira era sa yalodina, ka ra sega ni vauci ena bula oqo ena veika era sega kina ni cala, na veivakalougatataki oqo ena bula sa bera mai.16 E sega tale ni dua na ivunau e vakadeitaka vakavinaka cake na nona loloma veirauti na Kalou me baleti ira na luvena tagane kei na luvena yalewa.
Sa koto talega ena matabete na kaukauwa me veisautaka na noda ivakarau ni bula. Me vaka a vola ko Paula, “Ko ira kece era sa lesi ki na matabete oqo era sa vaka na Luve ni Kalou.”17 Na veivakatautauvatataki oqo e sega ni baleta walega na ilesilesi se na cakacaka vakalotu, ia ena kena vakataucokotaki talega na yalo yadua, oqo e dua na ka ena yaco “ena toso ni gauna”18 ni da sa [soli keda] ki na veivakauqeti ni Yalo Tabu ka [biuta laivi] na itovo vakayago.”19 Ni sa lesi e dua na tagane ki na matabete i Melikiseteki, sa curu ki na dua na “ivakarau”20 ena vakasavasavataki kina ena nona veiqaravi vei ira na tani, vakauasivi na nona matavuvale sara ga, ka vakalougatataki ena veitokani tudei ni Yalo Tabu. 21
Sa dusimaki keda kece na Turaga ena Nona vakavuvulitaka vei ira ena matabete, ni bula sega ni dodonu ena muduka na kaukauwa vakalomalagi se na veivakauqeti ia na buladodonu ena vaqaqacotaki ira. E tukuna na tikinibula “ena vakararamataka na yalo” na “veivakauqeti, … na vosota vakadede, … na yalomalua, … na yalomalumalumu, … na loloma sega ni veivakaisini, … na yalo e veidokai, kei na yalomatua.”22 A qai vakuria ena vosa veidusimaki oqo: Ia me uasivi sara na nomu loloma vei ira na tamata kecega, kei ira era sa veitokani ena vakabauta; mo qarauna me savasava tikoga na nomu vakanananu; ia ena taucoko sara kina na nomu vakabauta ena mata ni Kalou; raica ena yaco vei iko na veivakalougatataki ni ilesilesi vakabete, me vaka na tegu sa lutu mai lagi.23
E vakabibitaka toka ni oti na nona sureti keda me da lomani ira na “tamata kecega” e qai vakuria tale na Turaga ena malanivosa, “kei na vuvale ni vakabauta.” Baleta na cava? E sega ni okati kina ena “tamata kecega” na “vuvale ni vakabauta”? Vakasamataka na kena vakayagataki, e nanumi ena malanivosa ka vakuri kina oqo me kena ibalebale vakatabakidua, “na noda veivuvale sara ga ni vakabauta.” E ka ni rarawa, ni so ena loma ni noda Lotu era dau loloma vakalevu cake vei ira era sega ni lewe ni matavuvale ka vakalailai vei ira na watidra kei na luvedra, na tacidra kei na nodra itubutubu. Era na vakaraitaka na loloma e sega ni veivakaisini e matanalevu ia ena veivanua sega ni laurai era kaburaka tiko na sore ni veiqati, ka vakalolovirataki ira e dodonu me ra voleka sara vei ira. E sega ni dodonu me yaco tiko na veika oqo.
Sa qai vosa na Turaga ena vakasama eso ka sa ukutaki—sauni ka taqomaki tikoga e veigauna kece—ena ivalavala savasava. Na veivakasama oqori e cata sara na ivalavala ca.24 Era na vakavuna na noda veivosaki me “Io na io; ka Sega na sega,”25 ka sega kina na lawaki kei na lasu. Era raica na vinaka kei na veika vinaka ena yaco mai vei ira na tani, ka sega ni vakayavalati ena veika sega ni taucoko vei ira na tani.
E tini na tikina oqo ena dua na idusidusi cokonaki vakamatau ena dua na ivalavala ni vakadewa wai. Me da kila vakavinaka na vakayagataki ni ivakavuvuli oqo ena kena vakasavasavataki na noda dui bula yadua, vakasamataka e rua na bilo iloilo wai, ka tautauvata vinaka na kedrau irairai e taudaku, e rau biu ena dua na rumu katakata. Ni oti e dua na gauna, sa tekivu me laurai na wai ena dago ni dua vei rau na bilo iloilo baleta ni duatani na kena katakata, ena vuku ni veika a vakayacori kina ka sega ni laurai taumada, na bilo iloilo ka dua e mamaca tu ga, e sega ni dua na ka e yaco kina. E sega ni vakasaurarataki na “kena drodro”26 na wai ena dua vei rau na bilo, ka sega ena kena ikarua. Ena sala vata oqori, na ivakarau ni bula ka na vakauqeta na yalo, na loloma cecere vei ira na tani, vakauasivi vei ira na noda matavuvale, kei na vakanananu ka ukutaki ena bula savasava ena moica na ivakarau ni katakata me rawa kina ni drodrova na yaloda na ivunau ni matabete.
Sa vakakina, ni matabete, ena cakacaka ni Yalo Tabu ena tosoya yani na tamata yadua me voleka vua na Kalou ena veitabaki, na cakacaka vakalotu, kei na vakasavasavataki ni itovo ni tamata yadua, ka rawa kina vei ira na Luve ni Kalou me ra yaco me ra vakataki Koya ka bula tawamudu ena Nona iserau—e dua na cakacaka ka uasivia cake na toso ulunivanua na kena lagilagi.27
Au tinia ena noqu vakaduavatataka na noqu masu kei na nei Thomas Kelly, ena vosa ka a vakadodonutaka o Parley P. Pratt:
Ni seyavu yani kabu kei lomalagi
Vei coca e lutuka malua
Vakadeitaka, ka vakayacora
Veika kece namaki vua,
Turaga nomuni vakavuvuli talei
Sa yaco sobu dina tiko mai,
Vakalougatataki, mana nona veiqaravi
Me vakacavara sara cakacaka ni loloma.28
Ena yaca i Jisu Karisito, emeni.