Na Valetabu e Baleta na Matavuvale
Ni o lako mai ki na valetabu ko na lomana vakalevu cake na nomu matavuvale ena loloma o se bera ni bau vakila vakadua.
Me vaka e se qai tukuna ga ko Peresitedi Hinckley, na ika 123 ni valetabu ni Lotu i Jisu Karisito ni Yalododonu Edaidai a se qai vakatabui walega oqo mai vei Peresitedi Hinckley e Sacramento, California. Na valetabu totoka oqo era qaravi kina e sivia na 80,000 na lewenilotu talei ka nanamaki e Sacramento kei na veivanua vakavolivolita. E sivia na 168,000 na vulagi era a sarava na valetabu ena gauna e Dolavi Raraba kina. A tukuni vei ira ni ra na toro voleka yani vua na iVakabula ko Jisu Karisito na lewenilotu ena loma ni veivale totoka oqori mai na veivanua kecega e vuravura. Era kila na noda lewenilotu ni ena Vukuna era na kunea kina na vakacegu kei na inuinui ka na tokoni ira kei na nodra matavuvale ena vuravura ni leqaleqa oqo.
Ni o lako mai ki na valetabu ko na lomana vakalevu cake na nomu matavuvale ena loloma o se bera ni bau vakila vakadua. Na valetabu e baleta na matavuvale. Ni keirau vakalevutaka na neirau veiqaravi ena valetabu kei Karen, na watiqu, sa tubu me levu cake na neirau veilomani kei na neirau lomani ira na luvei keirau. Ia, e sega ni yala ga e kea. E yaco yani vei ira na itubutubu, veitacini tagane kei na yalewa, nei, momo, tavale, o ira na noda kawa ka vakabibi vei ira na makubuda! Oqo na Yaloi Ilaija sai koya na yalo ni itukutuku ni matavuvale, ia ni vakauqeti ena Yalo Tabu ena vakauqeta na vagolei ni yalodra na qase vei ira na gone kei na yalodra na gone vei ira na qase. Ena vuku ni matabete oqo era sa vauci vata kina na tagane kei na watidra; era vauci na gone vei ira na itubutubu me tawamudu ka na tawamudu kina na matavuvale ka sega ni tawasei ena mate.
Ni keirau se itubutubu gone kei na watiqu ka ra tiko e vale na gone lalai keirau a bolei ira me ra cavuqaqataka na Yavu ni Vakabauta. Na icocovi ni kena rawati, me ra na gade vata kei Ta ena dua na bogi. Keirau marau ni ratou rawata na bolebole o iratou na le tolu ka qase cake. Ena gauna sa cavuqaqataka rawa kina na luvei keirau yabaki vitu na 13 na Yavu ni Vakabauta, keirau dabe vata ka digia e dua na bogi kei na itavi me keirau na cakava vata. Au a osooso sara tiko ena cakacaka, na itavi ni Lotu kei na itavi tale eso ka na sega kina ni rawa ni keirau na gade vata kei na luvequ tagane me yacova ni oti e rua na macawa. Sa rarawa sara vakalevu ko koya. Ia, au qai kila ni tiko ena koro keitou tiko kina e dua na vanua ni vaqiqi polo ka dau dola tu ena bogi taucoko. Keirau a digia sara e dua na siga ka lewa me keirau tekivu ena 5 ena mataka. Na neirau ituvatuva me keirau yadra ena 4 ena mataka, katalau ka lako sobu.
Ni yaco mai na siga ko ya, au vakila ni dua sa tavia tiko na tabaqu ena mataka caca, niu tovolea meu dolava na mataqu au rogoca na luvequ ni kaya, “Sa kena gauna beka ta?” Au raica na noqu kaloko vakaalamu ka se qai 2 ena mataka!
“Moce tale luvequ,” au kaya, “E se bera na gauna.”
Ena dua ga na auwa ka tarava e baci yaco tale na ka vata o ya. “Ta, ta, sa kena gauna me daru lako?” Niu vakatalai koya lesu me laki moce ena ikarua ni gauna, sa sega ni rawa niu levea meu sa na vakila talega na nona nanamaki.
Ia ena 4 keirau duri mai, katalau, ka biubiu ki na vanua ni vaqiqi polo. Sa dua na gauna talei keirau tiko vata kina o ya.
Au diva meu rawa ni kaya niu dau tiko vata kei ira kece na luvequ ena veitavi qaravi guiguilecavi dredre vaka ko ya, ia e sega ni rawa. O au e dua vei ira na itubutubu ka dau via taleva tale eso na ka.
Me vakataki kemuni au sega ni vinakata me yali e dua na luvequ. Au vinakata meu na tiko vata ga ka tawamudu vata kei na noqu matavuvale. Na valetabu e solia vei keda eso tale na inuinui ena kena tomani ka vakavinakataki cake tikoga na noda veiwekani ni oti sara mada ga na bula oqo. Na kaukauwa ni veivauci e vakayagataki ena valetabu e yalataki kina na ikuri ni veivakalougatataki.
“E kaya na Parofita ko Josefa Simici—ka sega ni se bau vakavuvulitaka e dua na ivunau me veivakacegui cake—ni nodra vauci tawamudu na itubutubu yalodina kei na yalayala vakalou e vakayacori vei ira ena nodra veiqaravi gugumatua ena iNaki Dina, ena sega ni vakabulai ira walega, ia ena vakatalega kina vei ira na nodra kawa. E dina beka ni ra na lako sese eso na sipi, ena dau muri ira voli na matana na iVakatawa, ena dua na gauna era sa na vakila na iqaqalo ni Dauveivakarautaki Vakalou ni sa yacovi ira yani ka kauti ira lesu mai ki na qelenisipi. Se ena bula oqo se na bula sa bera mai, era na lesu mai. Me ra na sauma na nodra idinau ki na lewa dodonu, era na rarawa ena vuku ni nodra ivalavala ca; ka ra na butuka beka e dua na sala votovotoa; ia ena vakauti ira yani, me vaka na gone cidroi sa veivutuni, ki yalona e dua na tama dauloloma ka dauveivosoti, ka na sega kina ni ka wale na veika mosimosi a sotavi.”1
E sega beka ni itukutuku veivakayaloqaqataki oqo vei ira na itubutubu sa vauci tu vei ira na luvedra?
Me da raica mada e vica tale na veivakalougatataki e kauta mai na valetabu. Na valetabu e idrodro mai vuravura. Era wasea na lewenilotu mai Sacramento na vakasama eso oqo vei ira na nodra vulagi ena Dolavi Raraba ni valetabu: “Ena so na gauna sa dau vusolo na neimami mona ena leqaleqa eso ka levu na ka e gadrevi kina na neimami vakasama ena dua vata ga na gauna, sa sega kina ni rawa na vakasama vakavinaka. Ena valetabu e dau seavu yani vakamalua na sosa ni vakasama, e dau talave cake na kabukabu kei na veilecayaki ka rawa ni da ‘raica’ na veika eda a sega ni raica rawa e liu.”2
Na Loqi vakasilesitieli e vanua vakatabakidua ni vakacegu, na sautu kei na veika totoka. Oqori e dua na ivakaruru ka na rawa kina vua e dua me raica lesu, vakanananu, masu ka vakasama vakatitobu ka vakila na nona loloma na Tamada Vakalomalagi kei na iVakabula. Ni da vakanananu ka vakasama vakatitobu ena Valetabu, ena gole ga na noda vakanananu vei ira na watida kei ira yadua na lewe ni noda matavuvale.
Ena ika 2 ni Samuela 22:7 eda wilika kina na vosa i Tevita: “Ena noqu rarawa kau a tagi vei Jiova, kau sa tagi ga vua na noqu Kalou; A sa rogoca na domoqu ko koya mai na nona vale, a sa curuma na daligana na noqu tagi.” Na valetabu e vanua ni ivakatakila yadua ka na vakalougatataki keda ena noda veiqaravi.
E tukuna vei keda o Peresitedi Hinckley ni “me vaka ga na nona sa solia na Nona bula na noda Dauveivueti me isoro veisosomitaki ki na tamata kecega, ena nona vakayacora vakakina sa yaco kina me noda iVakabula, sa vakakina o keda, ena dua na kena ivakatagedegede lailai, ni da vakaitavi ena cakacaka vakaveisosomitaki ena valetabu, eda sa yaco me ivakabula vei ira ena tai kadua ka sega ni dua na sala ena rawa kina vei ira na toso vakavo kevaka e caka e dua na ka ena vukudra mai vei ira era tiko e vuravura ”3
Oqo e dua na veiqaravi cecere eda sa solia ka ra sa yaco kina na tacida kei na ganeda era sa takali yani me ra semati vakavinaka cake vei keda.
Na valetabu e vanua me da kilai rau kina na Tamana kei na Luvena. Na vanua eda na vakila kina na iserau vakalou. A vakayacora na kerekere oqo o Parofita Josefa Simici: “Isa au kerei kemuni mo ni vakasaqaqara vakatitobu sara ena veika vuni ni bula va-Kalou.”4 Evei na vanua me da vakasaqaqara kina? Ena vale ni Kalou.
Me da yaco me da tamata dau tiko ena valetabu ka tamata dau lomana na valetabu. Au vakadinadinataka ni valetabu e baleta na matavuvale. Au vakadinadinataka talega ni veika kece ena valetabu e vakadinadinataki Jisu Karisito. Na nona ivakaraitaki ni loloma kei na nona veiqaravi, e vakilai e kea. Na valetabu e Nona vale savasava. Au kila ni o Koya na Luve ni Kalou, na noda iVakabula, na noda Dauveivueti, ena Vosa ena Vukuda ka noda Dautataro vei Tamana. E lomani keda ka vinakata me marau na noda matavuvale ka me da tiko vata ga me tawamudu. E vinakati keda kece me da dau taleva wasoma na Nona valetabu.
Ena yaca i Jisu Karisito, emeni.