Na iMatai ni iTabatamata

Elder Paul B. Pieper

Ena Vitusagavulu

Ni ko ni imatai ena nomuni matavuvale mo ni ciqoma na kosipeli o ni sa yaco kina mo ni imatai ni itabatamata, e dua na itabatamata digitaki ka rawa me ra vakalougatataki kina na itabatamata sa sivi yani, ena gauna oqo kei na kena sa bera mai.

Ena vica na siga sa oti, ena dua na gauna ni kana vakamatavuvale keitou a veivosakitaka tiko kina na vosa. O Clarissa, na luvei keirau goneyalewa yabaki 13, e a vakarautaka tiko na nona vosa ena soqoni ni sakaramede ena neitou tabana e Moscow ka vakaraitaka eso na nona nuiqawaqawa. Au vakadeitaka vua ni sega ni dua na ka me leqataka kau vakamacalataka vakalailai na noqu nuiqawaqawa vakaiau ena noqu kaya ni vinaka o koya ni sega ni laki vosa ena koniferedi raraba vei ira e udolu vakaudolu na tamata. E solia vei au eso na veivakadeitaki o Clarissa kei na nona ivakasala ga vakaikoya, “E sega ni dua na ka Tamaqu, raitayaloyalotaka ga ni dua na tabana levu.” Kemuni na taciqu kei na ganequ, sai kemuni e dua dina na tabana vakaitamera.

Au sa digitaka meu vosa ena mataka edaidai kivei ira na imatai ni itabatamata lewenilotu i Jisu Karisito ni Yalododonu Edaidai. Sai kemuni na imatai ena nomuni matavuvale mo ni rogoca ka ciqoma na itukutuku ni kosipeli i Jisu Karisito ka sa vakalesui mai ki vuravura ena noda gauna vata kei ira na parofita bula, daurairai ka dauvakatakila. O ni vakayalomalumalumutaki kemuni, cakacakataka na vakabauta ka veivutunitaka kece na nomuni ivalavala ca ka taura na yaca i Jisu Karisito mai na nomuni papitaiso ena tabadromuci, ka ciqoma na Yalo Tabu.¹ Ni ko ni imatai ena nomuni matavuvale mo ni ciqoma na kosipeli o ni sa yaco kina mo ni imatai ni itabatamata, e dua na itabatamata digitaki ka rawa me ra vakalougatataki kina na itabatamata sa sivi yani, ena gauna oqo kei na kena sa bera mai.²

E sega ni dau ka rawarawa ni da imatai ni itabatamata lewe ni Lotu. O ni na lakova na veivanua ka ra se bera ni lakova na nomuni matavuvale. Na ivakarau ka ra tu vakavolivoliti kemuni e rawa me ra veibolei. E rawa me vica, se sega sara ga, na nomuni itokani se wekamuni me ra kila ka tokoni kemuni. Ena vagauna na kena rawa ni yaco mo ni vakayalolailaitaki ka lomatarotarotaka se cava na kedra yaga. Na noqu inaki ena mataka nikua sa ikoya meu vakadeitaka vei kemuni ni vakakina.

O ira na imatai ni itabatamata lewenilotu era tawana e dua na vanua kilai tani ka bibi ena Lotu kei na nodra matavuvale. O ni kila tiko li ni o ira na imatai ni itabatamata lewenilotu era lewena e rauta na veimama ni lewe ni Lotu taucoko?³ E kena irairai ni sega tale ni dua na gauna mai na veigauna taumada ni Lotu me ra lewena na imatai ni itabatamata e dua na pasede cecere ni lewe ni Lotu taucoko me vaka edaidai. Na nomuni vakabauta kei na ivakadinadina era na veivakaukauwataki ka veivakalougatataki vei ira na tani. Mai vei kemuni, eda rawata kina e dua na kila titobu ni ivakavuvuli ni kosipeli ka vaqaqacotaka na noda ivakadinadina.

O ni dua talega na kaukauwa levu ena Lotu ena nomuni vakayagataka na nomuni ivakadinadina, taledi, rawa ka, kei na igu me taraicake kina na matanitu ena nomuni veitabanalevu kei na veitabana. O ni sa ivakaraitaki uasivi ena kena wasei na kosipeli, qaravi ni kaulotu, vakauti ira na gone me ra kaulotu ka ivakaraitaki ni vakabauta. O ni dolele yani ena loloma kivei ira era tu vakavolivoliti kemuni, laveti ira ka vakalougatataki ira mai na veiuqeti ni veiqaravi. Na levu ni ka e sa caka ena Lotu ena sega ni rawa kevaka me a sega na nomuni sasaga.

E bibi cake, me vaka ni o ni imatai ni itabatamata lewenilotu, o ni vakatawana e dua na vanua bibi ena nomuni matavuvale. O ni dua na ivakaraitaki ki na nomuni matavuvale me dua na tisaipeli dina i Jisu Karisito. Se era lewe ni Lotu se sega, ni ko ni bulataka na kosipeli e vale, era na vakila na loloma ni iVakabula mai vei kemuni o ira era vakavolivoliti kemuni. Era kila ni ko ni vakaitavi tiko ena dua na ka vinaka, kevaka mada ga era sega ni kila se tu vei ira na vakabauta me ra ciqoma kina. Mo ni dauvosota ka dauloloma, masumasu ena veisiga yadua mo ni kila na sala mo ni qaravi ira kina, ena veivuke ka veivakalougatataki na Turaga mo ni vakayarayarataki ira na nomuni matavuvale ki na vinaka. Mai na nomuni vinaka ka tu dodonu e veigauna, o ni na tauyavutaka na iwalewale ni yalodina kei na yalododonu. O ira na iwalewale oqori era na bulia na nomuni bula, ia e bibi cake, era na yaco me ivakarau ni nomuni matavuvale kei na nomuni kawa tamata.

Me vaka na imatai ni itabatamata, oi kemuni talega na idola mo ni dolava na nona veivakalougatataki na Turaga kivei ira na lewe ni matavuvale era sa mate ka ra sega ni rogoca na kosipeli ka ciqoma na veicakacakatabu vakalotu ni veivakabulai. E nomuni na gauna donu duadua ga kei na galala mo ni tekivuna na cakacaka tabu vakalotu oqo ena vukudra. Era sa vakanamata tu mo ni vakatakilai ira ka na vukei kemuni ena nomuni vakasaqara na kedra ivolatukutuku. Ni ra sa kilai, na nomuni bula kilikili ena vakatarai kemuni mo ni curu ki na valetabu ka vakayacora na cakacaka tabu vakalotu e yaga ena vukudra. Na cakacaka tabu vakalotu oqo era na vauci kemuni kivei ira na nomuni kawa ka kauta mai na kaukauwa vakayalo uasivi ki na nomuni bula.

E baleta ni o ni dua na imatai ni itabatamata lewenilotu e bibi kina na vakatulewa yadua o ni cakava. Ena rairai takiveiyaga, na vakatulewa lailai sara ena rawa me vakacacana na itabatamata sa sivi yani kei na kena sa bera mai, e vakakina na nomuni bula. O Chris, e dua na imatai ni itabatamata lewenilotu, e a soli vua e dua na gunu alakaolo ena vanua ni cakacaka ni oti ga e dua na siga ni nona papitaiso. Era tiko e kea na nona itokani ka ra gunu kece tiko. Sa dua na ka na veivakatotogani. E sega tale ni dua o koya ga e kila ni se qai oti ga e dua na siga na nona a papitaiso ka veiyalayalati kina vata kei na Turaga. E a lewa me kakua ni gunu ka sa vakalolomataki kina. Ena nona raitayaloyalotaka tiko na ka oqori ena dua na gauna e muri, e vola kina, “E sa vasagavulu oqo na yabaki ni noqu a veiyalayalati [ni papitaiso] kau rawa ni kaya vakaidina niu sa … rokova na Vosa ni Vuku… . Au vakabauta kevaka meu a ciqoma na gunu (o ya) e rairai, sa na dredre sara ga meu rokova na Vosa ni Vuku.”⁴

Ia, o Chris e a rokova na yalayala ni papitaiso. E muri, e a qai sotava ka vakamautaka e dua na lewenilotu yalodina. Erau a susuga vata kei watina e lewe walu na luvedrau ena kosipeli. Ena ikaono ni itabatamata ena gauna oqo, o ira na nona kawa yalodina e sa drau na kedra iwiliwili. E daseni era sa kaulotu ka vakaveikilaitaka na kosipeli vei ira na tani. Na nona sasaga ena volai ni kawa e sa dolava na veivakalougatataki ni kosipeli ki na sivia na drau. E dua na vakatulewa lailai mai vua e dua na imatai ni itabatamata lewenilotu e yaco kina e dua na duidui me baleti ira na udolu vakaudolu.

E rawa mo ni raica ena gauna oqo na vuna e sa rui bibi kina na imatai ni itabatamata? E rawa mo ni kila na itutu o ni tawana tu kei na veivakayarayarataki o ni rawa ni taukena me tawamudu. Ni yalovinaka ka kakua ni beci kemuni kei na kaukauwa ko ni taukena tu ni na rawa me tarai ira na tani. E kilai kemuni tu o Setani ka na rawa me cakava na veika kecega e rawa me bacani kemuni me cala na nomuni digidigi. E vakavuqa, veitalia ga na uasivi ni noda sasaga, eda caka cala kecega. E kalougata, ni Turaga e sa vakarautaka e dua na sala me baleti keda me da vorati ira ena veivutuni kei na vakanuinui ena veisorovaki ni Luvena. Mo ni kakua ni yalolailai kevaka o ni caka cala. Na veivutuni kei na tomani tiko ni toso ki liu era iwalewale bibi duadua me vakatorocaketaki ena imatai ni itabatamata. Ni yalovosota ka toso ki liu ena talairawarawa.

Ena Lotu eda wilika ka vosa vakalevu me baleti ira na painia ena itekitekivu ni itukutuku makawa ni Lotu. Era a imatai ni itabatamata lewenilotu me vakataki kemuni. Era a bula ena veisiga ena sotavi ni bolebole ni matavuvale, cakacaka kei na vakabauta. Era a bulataka na ivakarau ga ni bula vinaka ka ra yalodina ena qaravi ni Lotu ka vakalougatataka na nodra matavuvale. Ena gauna era lutu kina, era duri cake tale ka toso ki liu. Ena gauna oqo, o keda eda nodra kawa eda raica lesu tale ena vakarokoroko kei na vakavinavinaka baleta na nodra yalodina.

E rawa me nomuni na nodra ivotavota me vaka ni ko ni itokani lewenilotu ni imatai ni itabatamata. Mo ni yalodina, dau qaravi ira na nomuni itokani, vakalougatataka na nomuni matavuvale, ka digidigi vakayalomatua. O ni imatai ni itabatamata, e dua na itabatamata digitaki me vakalougatataka na itabatamata sa sivi yani, ena gauna oqo kei ira era sa bera mai. Keimami dokai kemuni. Era na dokai kemuni na itabatamata sa sivi yani kei ira era sa bera mai. Ia na kena e bibi duadua, ena dokai kemuni na Kalou ena nomuni yalodina na imatai ni itabatamata. Ena yaca i Jisu Karisito, emeni.