Na Kaukauwa ni Dau Vosota

Elder Robert C. Oaks

Ena Mataveiliutaki ni Vitusagavulu

Na vosota e rawa ni vakasamataki me matamata ki na bula savasava, ka rawa ni veitokoni ki na sasaga ni bula ni veivosovosoti, vosota vakadede, kei na vakabauta.

Au vakavinavinaka ki na veivolanikalou ni Yalododonu Edaidai me baleta na savasava ni uto ni bula va-Karisito.

Na iVola i Momani e vakarautaki tu kina eso na ivakavuvuli me baleta na veiwekani ni vosota kei na loloma cecere. Ni sa dusia oti o Momani ni dua na tamata, “sa sega vua na loloma cecere, sa ka walega ko koya, ia sa kilikili sara me tu vua na loloma cecere” ka cavuta sara yani na 13 na iwasewase ni loloma cecere, se na loloma savasava i Karisito. E veivakayavalati toka niu raica ni 4 mai na 13 na iwasewase oqo ni “veika savasava” e veiwekani sara ga kei na “vosota” (raica Moronai 7:44–45).

iMatai, na loloma cecere sa “dauvosota vakadede.” O ya sa veika taucoko sara ga baleta na vosota. “Na loloma cecere sa sega ni viavialevu” ka sa tiki talega ni vosota, me vaka vata sara ga na “sega ni cudrucudru.” Kena iotioti na “vosota na ka kecega” e vakaraitaka na vosota (Moronai 7:45). Mai na veivakamacala oqo ni kena veiwasewase, sa ivakadinadina ni kevaka me sega ni tiko vei keda na vosota, sa dodonu me da gadreva vakaidina ena doka na noda taukena na ivakarau ni bula va-Karisito.

E vakarautaka tu na iVolatabu na veivakasama ni veika e kilai baleta na vosota. Sa kune sara tu ga e matanalevu ni sa na vakayalia o Jope e levu sara na nona iyau, wili kina o iratou na luvena, ia o Jope e rawata, baleta na nona vakabauta sega ni yavalati rawa, me kainaka kina vakaoqo ne, … “sa solia ko Jiova, ka sa kauta tani ko Jiova; me vakavinavinakataki ga na yaca i Jiova.” Ena gauna taucoko ni mosi kei na nona vakatovolei, “E a sega ni cala kina ko Jope se kaya ko koya ni sa cala na Kalou” (Jope 1:21–22).

Dau vakavica ni da rogoci ira na tamata era vakararawataki me ra taroga tu vakalialia, “Na cava e cakava kina vei au na veika oqo na Kalou,?” ni dodonu ga me ra masu me ra vakaukauwataki ka “ciqoma” ka vosota na ka kecega.”

Na ivakaraitaki vakaivolanikalou cecere duadua ni vosota ena laurai ena ivakaraitaki ni bula nei Jisu Karisito. Na Nona vosota vakadede, vosota, kei na veivosoti e vakaraitaki sara tu ga vakamatata ena bogi ni mosi rarawa e Kecisemani ena Nona a osivaka ena vutugu ni veisorovaki, “I Tamaqu, kevaka e rawarawa, me lako tani mada vei au na bilo oqo; ia, me kakua ga ni vaka na noqu lewa, me vaka ga na nomu lewa” (Maciu 26:39). E sotava dina na dredre, kei na oca ka vosota na ka kecega.

Ni sa vakoti tu ena kauveilatai mai Kalivari, sa qai tosoya ga na Nona ivakaraitaki vinaka na Karisito ena Nona a kaya vakaoqo ne, “I Tamaqu, ni kakua ni cudruvi ira ni ra sa sega ni kila na ka era sa kitaka” (Luke 23:34).

Na veivakaraitaki ni vosota oqo e vakaibalebale sara vakalevu vei keda ni da nanuma vata na veivosa ni bolebole ka veivakauqeti nei Nifai ka tiko ena 3 Nifai: “Ia, a cava na ivalavala sa kilikili kei kemudou? Au sa kaya vakaidina vei kemudou, mo dou vakataki au” (3 Nifai 27:27).

E sinai tu ena ivolanikalou na ivakamacala ni kena bibi na vosota. Meu vakamacalataka mada e vica:

“Dou kusarawa yadua me vakarorogo, mo dou berabera ga ni vosa, mo dou berabera ni cudru” ( Jemesa 1:19 ).

“Ia, raica sa dau cudruvi ira na nona tamata na Turaga ka sa vakatovolea na nodra dina kei na nodra vakabauta” (Mosaia 23:21).

Ena ivola i Mosaia e vakasalataki keda o Penijamini na Tui ni da “tamata vakayago eda na veimecaki kei na Kalou” me yacova ni da sa veiwekani kei na Yalo Tabu ena noda dauvosota vata kei na ivakarau vinaka tale eso (raica Mosaia 3:19).

E kaya o Josefa Simici, “Na vosota e ka vaka-lomalagi” (History of the Church, 6:427).

E bibi li ka ganita me da vakasamataka ka vakamuria na noda vosota? Io e vakakina kevaka me da kakua ni kalasitaki ira na tamata ki na ‘sega’ ni dauloloma kei na veika e salavata. Kevaka eda na gadreva me da kakua ni meca ni Kalou. Ena yaco kevaka me da vakalomalagi. Ena yaco kevaka me da na vakataki Karisito.

Na sega ni dauvosota kei na tamata vakavuravura sa ikeda kece sara. Eda raica ena kedra itukutuku na itubutubu, ni ra dau cudru, ena vakasaurarataki ni dua na gone, me yacova sara mada ga na mate. Ena noda veitolo ni sala lelevu, na noda raica na yalo ca kei na vakavunene, ka dau laki yaco sara kina na vakacalaka ka so na gauna e yaco sara na mate.

Ena dua na kena ivakaraitaki lailai sara, ia e dau vakayagataki wasoma, sa ikoya na vosa kaukauwa ka isau ni dua e vosa malua tu ga, me vaka e dua e via volitaka e dua na ivoli ena talevoni, se dredre ni nodra dau rogoca na noda ivakasala na luveda. Eso li vei ira oqo e rogo matau?

Sa vinaka ga ni tiko eso na italanoa ni veika vinaka sara ka ivakaraitaki ni vosota dina, ia era sega ga ni dau talanoataki. Ena dua na gauna lekaleka sa oti, au a tiko ena dua na veibulu vua e dua na noqu itokani. E a talanoataka kina o luvena e dua na italanoa rogorogo vinaka ni itubutubu dauvosota. Ena gauna e a se cauravou kina o koya e a dau bisinisi voli nei tamana na volitaki motovai. Dua na siga sa kau mai kina vei rau e dua na iusausa motovai vovou, ka rau sa mai tuva sara ena loma ni sitoa. Cakava sara na gone na ka era dau cakava kecega na gone yabaki vata kei koya ka vodoka sara na kena e tu voleka duadua vua. E a yavalata sara ni lili toka ga na ki ena motovai. Ni sa vakila ni sa sivia sara na ka e sa cakava, sa qai rika sobu mai ra. E kurabui ni nona naulu sobu mai ra e qai butuka ka vakabalea sara ki ra na imatai ni motovai, ka ra qai veitarataravi yani na kena vo ki ra. E a rogoca na cabolo o ya o tamana mai na vanua e veiqaravi tiko kina ka rai sara kina vakadodonu. Sa qai kaya yani vakamalua ena matadredredre, “Sa vinaka luvequ, me daru sa vakavinakataka sara e dua me rawa ni volitaki ka me rawa ni saumi kina na kena vo.”

Na ka e vakaraitaka o noqu itokani e vakamatatataka sara tu ga na veivosoti vaka-itubutubu.

Na vosota e rawa ni vakasamataki me matamata ki na bula savasava, ka rawa ni veitokoni ki na sasaga ni bula ni veivosovosoti, vosota vakadede kei na vakabauta. Ni a tarogi Karisito o Pita se me vosoti tacina vakavica, e a tukuna vua o Karisito, “Vakavitusagavulu na vitu” ka sega ni vakavitu me vaka e a nanuma taumada o Pita. Na veivosoti me vakavitusagavulu na vitu sa na taura sara toka ga e dua na tama ni vosota vakaiyanaqa (Maciu 18: 21–22).

O Elder Neal A. Maxwell e semata na vosota kei na vakabauta ena nona vakatavuvulitaka, “Na vosota e semati vakavoleka sara ki na vakabauta na Tamada Vakalomalagi. E dina sara, ni gauna eda yalototolo kina, eda sa vakatura tiko ni da kila na ka e vinaka duadua—vinaka cake mai vua na Kalou, se tovolei mada ga, eda sa kaya tiko ni noda ituvatuva e vinaka cake mai na Nona” (Neal A. Maxwell, “Patience,” Ensign, Okot. 1980, 28).

Ena rawa walega ni dau tubu na noda vakabauta, kevaka me da rawata na waraka ena vosota me da raica e matada na inaki kei na ituvatuva ni Kalou ena nona gauna ga vakataki Koya.

Me vaka ni yalototolo e tiki ni bula ni tamata, eda na vakatorocaketaka vakacava na bula vosota savasava vakalou? Eda rawa vakacava ni toki mai na ivakarau ni bula ni tamata vakavuravura ki vua na noda ivakaraitaki vinaka ni vosota, o ya o Jisu Karisito?

iMatai, me da kila ni ka oqo ena gadrevi me da cakava vakakina, kevaka me da gadreva me da marautaka na taucoko ni veivakalougatataki ni kosipeli vakalesui mai. Na kila oqori ena vakauqeti keda me da:

Wilika na veivolanikalou ka tiko ena idusidusi vakaiulutaga ka volai tu ena ruku ni “vosota” ka vakasamataka na ivakaraitaki ni vosota nei Karisito.
Tarogi keda se evei na vanua eda tu kina ena ivakarau ni vosota? Ena vakacava beka na levu ni noda vosota e dodonu me da yaco me da vakataki Karisito? E dredre na ilovi keda vakaoqo. Ia, e rawa ni da kerei watida se o ira na lewe ni matavuvale me ra vukei keda kina.
Vakaraitaka ni o kauwai ki na veivakaraitaki ni vosota kei na yalototolo ka vakayacori wavokiti keda tu oqo ena veisiga. Me da sa vakatotomuri ira sara ga o ira eda okati ira me ra dau vosota.
Vakadeitaki keda ena veisiga me da dau vosota vakawasoma, ka vakadeitaka me ra tiki tiko ni noda sasagataka na vosota eso vei ira na lewe digitaki ni noda matavuvale.

Oqo e vaka me sa cakacaka levu tale, ia, ni sagai e dua na ituvatuva e vinaka cake, e gadrevi na cakacaka vakaukauwa. Vakakina na kena tovolei me vakamalumalumutaki na bula vaka tamata vakavuravura ka sagai na bula va-Karisito ena sasaga ni vosota sa na dua toka na ituvatuva e vinaka ka matau. Au masulaka me da na vakamuria na sala oqo ena gumatua kei na yalodina.

Au vakadinadinataka ni o Jisu na Karisito, ka sa liutaka tiko na Lotu oqo nikua, ka sa dusimaki keda tiko mai vua e dua na parofita bula ka sa vakalougatataka tiko na veika kece sara eda cakava tiko me rawa ni da vakataki Koya. Kau sa vakadinadina kina ena yaca tabu i Jisu Karisito, emeni