Na Yavu ni Veivakabulai
Eda sa sega ni biu taudua tu me da lako duadua ka sega tiko ni kila na ituvatuva ka sa vakarautaka tu na Turaga me baleti ira kece na luvena.
Ena noqu a lotu tiko ena dua na soqoni ni sakaramede ena vula ikatakata, au kalougata niu a rogoca kina eso na itukutuku mai vei iratou e lewe tolu na gonevuli ka ratou a sereki tu mai me donumaka na vulaikatakata. Na nona vosa e dua vei iratou e a lauti au sara.
Ena gauna e sereki mai kina na vuli, e a mai cakacaka voli ena dua na valenikana ka ra dau keleva vakalevu na draiva ni keria. E dua na draiva ka sa dau dua tu ga na nona gauna ni cici e sa dau mai cegu ka kana e kea ena siga vata tikoga ena veimacawa. Na kena veitaravi na nona dau kele mai e vakavuna na kena rawa na veitalanoa vakalekaleka. E tarogi goneyalewa se vakaitikotiko mai vei. E qai kaya o goneyalewa ni tiko voli oqo e vale ka ni sereki mai na vuli ka mai cakacaka tiko me rawa ilavo ni bera ni lesu tale yani ki vuli ena vula ko Okosita. Nona taro e tarava, “Ko vuli tiko mai vei?” Kena isau: “BYU—Idaho.” Vinakata o koya me kila e levu na ka baleta na koronivuli ka tekivuna na veitalanoataki ni kosipeli. Nona imatai ni vakasama me vakavulici koya baleta na Vosa ni Vuku. Lako vinaka sara. E a rawa talega ni vakauqeti koya me sa biuta na vakatavako.
Sa qai mai veisau na nona gauna ni cakacaka, ka sa sega kina ni rawa me dau qaravi koya, ka sa mani vola ga vua e dua na itukutuku lekaleka ka biuta vata kei na dua na tikidua ni yavu ni veivakabulai. Ni oti tale e vica na siga sa ciqoma e dua na ivola mai vua na draiva. E kaya ga, “ko sa veisautaki au sara ga.” A vakavinavinakataki koya na goneyalewa oqo, ni sa mai kunea rawa o koya na itukutuku me vakavuna me vakasamataka na veisau me vakayacora ena nona bula. Au sega mada ni kila na itinitini ni italanoa oqo ni dua na goneyalewa cakacaka e valenikana kei na dua na draiva ni keria, ia sa veisau ga kina na bula ni cauravou.
Sa qai tukuna o goneyalewa na kena rawarawa ni wasei na totoka ni kosipeli vei ira na tani. Ena basika ena veisiga ni noda bula, na gauna me da dolava kina na gusuda me da tukuna kina vei ira na tamata na dina ni kosipeli ka vakalougatataki ira eke ena gauna sara ga oqo ka vakakina ena bula sa bera mai.
Era lewe levu era dau taroga, “Eda lako li mai vei? Na cava na inaki ni noda mai tiko eke? Eda lako tiko li ki vei?” Na Tamada Tawamudu e sega ni talai keda mai vakaveitalia ki vuravura. E vakarautaka e dua na ituvatuva me da vakamuria. Sai Koya na Kenadau ni ituvatuva o ya. E tuvai tu kina na ilakolako ni tamata me yacova sara na veivakabulai kei na bula vakalou. Mai na idusidusi ni kaulotu na Vunautaka na Noqu Kosipeli:
“Na Kalou e Tama ni yaloda. Eda luvena vakaidina, ka lomani keda o Koya. Ni se bera na noda sucu mai ki na vuravura oqo eda a bula ka luvena vakayalo na Tamada mai Lomalagi. Ia eda sega ni tautauvata kei na Tamada Vakalomalagi e sega sara ni rawa ni yaco me da tautauvata kaya ka da marautaka na veivakalougatataki kecega e marautaka o Koya kevaka eda sega ni mai bula ena bula oqo ka taukena e dua na yago.
“Na inaki duadua ni Kalou—Nona cakacaka kei na Nona lagilagi—sa ikoya me rawa kina vei keda yadua me da marautaka na Nona veivakalougatataki kecega. E sa vakarautaka e dua na ituvatuva maucokona me vakayacori na Nona inaki ni bera na noda qai lako mai ki na vuravura oqo eda sa kila tu ka ciqoma oti na ituvatuva oqo” ([2004], 52–53).
E se levu tikoga na tamata ena vuravura oqo e sa vaqara tiko na isau ni taro bibi duadua ena bula oqo. Na kaci ni, “Raica eke” kei na “Raica ki kea” sa qai rogo levu ga, ka sa qai toso cake talega na kena veivakacalai ni sa kaburaki tu yani ena veigaunisala ni kakaburaki ki na veiyasai vuravura. Sa qai levu ga na veivanua ni kakaburaki me kaburaki kina na itukutuku duidui, kau nanuma ni sega ni dodonu me da lialiaci kina. Ena vica na senijiuri sa oti e a kaya vakaoqo o Paula:
“Ni na yaco mai na gauna era na sega ni vosota kina na ivakavuvuli dodonu; ia ena vaka na nodra gagadre ca, era na vakalewevuqataki ira kina na nodra ivakavuvuli ni sa qasikanunu na daligadra;
“A ra na vagolea tani na daligadra mai na ka dina ka lesu ki na itukutuku wale” (2 Timoci 4:3–4).
E sega ni dodonu me da veilecayaki. Na isau ni taro baleta na yavu ni veivakabulai sa soli mai ki na kawatamata me noda idusidusi.
Eda rogoca taumada na yavu ni veivakabulai ni se bera ni da sucu, na ka e vakatoka na ivolanikalou me noda bula taumada (raica Eparaama 3:26). Na ka e yaco ena bula taumada e sega soti ni vakilai vinaka, ia eda kila rawa ni da a bula vakayalo taumada, luvena na Tamada Vakalomalagi, ka da sa tosoya na noda sasaga me da vakarau ka mai taukena e dua na yago me vakavaletaki kina na yaloda ena dua na yago vakavuravura. Eda kila talega ni Tamada Vakalomalagi e a vakayacora e dua na bose me vakamacalataka kina na inaki ni bula e vuravura. E a soli vei keda me da digitaka se besetaka na yavu ni veivakabulai. Eda a sega ni vakasaurarataki kina. Na ilutua ni yavu sa ikoya na nona sasaga vakaikoya na tamata yadua me rawata na veivakabulai e vuravura ena veivuke ni Kalou. E kacivi e dua na iliuliu me vakavuilica vei keda na yavu ka vueti keda mai na ivalavala ca kei na mate. Me vaka e vakamacalataka na Turaga vei Mosese: “A sa kaya vei au na noqu Gone ni Toko, o koya au sa Daulomana kau sa Digitaka mai na ivakatekivu—I Tamaqu, me yaco ga na lomamuni, ka me nomuni tiko na vakarokoroko ka sega ni mudu” (Mosese 4:2).
O Jisu Karisito, na Tuakada Qase sa qai mai iliuliu me tutaka na yavu ka a vakarautaka na Tamada, ka da sa duavata kei na yavu kei na kena ivakarau. Ena digidigi o ya eda sa lako mai kina oqo ki vuravura ki na noda mai bula vakayago e vuravura.
Na Kalou e buli Atama kei Ivi me rau ucui Koya, kei na yago vakalewe ka vakasui, ka biuti rau ena Were ko Iteni. Sa soli vei rau na galala me rau bula tikoga mai na Were se me rau kania na vuanikau ni kila na ka vinaka kei na ka ca ka me rawa ni rau mai tovolea na bula vakayago. Erau ciqoma na bolebole o ya, erau kania na vuanikau, ka rau sa mai tamata vakayago me rawa kina ni na sotava na mate vakayago. Baleta na nodrau digidigi, erau sa na mai sotava kina na veivakatovolei kei na veika dredre ni bula vakayago
E rua na inaki ni bula e vuravura. Na imatai na noda na mai sotava eso na veika ka sega ni rawa ni na sotavi ena dua tani tale na sala. Kena ikarua na noda mai vakayago ka vakasui. Na rua na inaki oqo sa ka bibi ruarua ki na bula ni tamata e vuravura. Eda vakatovolei tiko ka vakasagai me laurai se da na cakava rawa na ka e vakarota vei keda na Kalou me da cakava se sega. Na ivakaro oqo sa ikoya na ivakavuvuli kei na cakacakatabu vakalotu ni kosipeli, ka ra umani vata tu ena kosipeli i Jisu Karisito. Na ivakavuvuli kei na cakacakatabu vakalotu yadua e tiko na kena isema ki na inaki ni noda dau vakatovolei, sa ikoya me da vakarautaki kina me da lesu tale vua na Tamada Vakalomalagi ka me da itovo vata kei koya. A tukuna vakaoqo o Elder Bruce R. McConkie me baleta na muria na sala dodonu ka qiqo:
“Na ka au nanuma ni o keda kece ena ganita me da vakadeitaka se evei na vanua me da tu kina ena veidraki kece ni bula eda na sotava. Tarava na kena vakadeitaki na veika me na qaravi e matata ka rawarawa sa qai vakadeitaki se me da na bula vakacava eke se laki bula vakacava e kea, ka me rawa kina ni da na lako sivia na gauna ni bula vakayago ka me rawa kina ni da na rawata na veivakatovolei ni bula vakayago. Kevaka me da na digitaka na ka dina eda na toso sara yani ki na bula tawamudu, ia kevaka me sega eda na yaco toka ga e ra se matanitu lalai ka sa vakarautaki tu.
“… Na tamata kece ena Lotu ka ra sa vakamuri sala dodonu ka qiqo tiko, o koya sa sasaga tiko, tovolea tiko, ka vinakata tiko, me cakava na ka e dodonu, ka dina ni na rairai yawa mai na vinaka sara ena bula oqo; na gauna sa biuta kina na bula oqo ena nona se tikoga ena sala dodonu ka qiqo, o koya e sa na vakadodonu sara ga kina ki na nona icocovi tawamudu ena nona matanitu na Tamada (The Probationary Test of Mortality devotional address, Salt Lake University Institute of Religion, 10 ni Janu., 1982, 8–9).
E vakavuna na kena rawati na veika oqo o Jisu Karisito. O Koya na uto ni yavu tawamudu ni Tamada, na iVakabula ka a vakarautaki me qai soli yani me baleta na kawatamata. Na Kalou e tala mai na Luvena Daulomani me mai vakamalumalumutaka na lutu nei Atama kei Ivi. O Koya e lako mai ki vuravura me mai noda iVakabula ka Dauveivueti. O Koya e voroka na dredre ni mate vakayago me baleti keda ena Nona solia na Nona bula. Na gauna e mate kina o Koya ena kauveilatai, erau a veitalatala kina na yalona kei na Yagona. Erau sa qai veisotari tale me tawamudu na Yalona kei na Yagona ka sega ni na veitawasei tale ena ikatolu ni siga.
Na bula e vuravura e vakaiyalayala ga. Ena yaco mai na gauna vei keda kece me veitalatala kina na yalo mai na yago ni sa mate. Me vaka ga ni sa Tucaketale o Jisu Karisito, eda na tucake kece tale, ka veitalia ga se eda caka vinaka se caka ca ena bula oqo. Na tawamate rawa e isolisoli ni Tamada Vakalomalagi vei ira kece sara na luvena. Na mate e dodonu me raici vaka e dua na katuba ki na dua tale na bula vou ka vinaka cake. Na gauna lagilagi ni tucaketale, erau na semati vata tale na yago kei na yalo. Eda na taukena na yago tawamate rawa ka na sega ni vakarurugi vakadua kina na mate. Ia, na lagilagi eda na taukena ena bula sa bera mai ena vakatau ena noda gumatua ena bula oqo. Na isolisoli walega ni tucaketale kei na noda talairawarawa ki na kosipeli ena qai rawa ni da na laki bula vata tale kei na Kalou.
Ni oti na Tucaketale ni iVakabula, eratou sa qai lako yani na Nona Le Tinikarua me ratou vunautaka na itukutuku lagilagi ki na veivanua kecega e vuravura. E levu sara na vanua eratou vunautaka kina na itukutuku ni nona veivakalotutaki na iVakabula. Levu sara na veitosoyaki ni kena sa tete na Lotu Vakarisito ki na veivanua tale eso. Ia, na Lotu sa qai sisi yani ki na dua na itutu ni vukitani ka sa mai muduki kina na isema ni matabete. Na kaukauwa ni qarava na itavi vakayalo ni cakacakatabu vakalotu sa mai kau laivi e delai vuravura.
Vakamalua sara na nodra sa vakauqeti eso na tamata me ra tekivutaka na kena vakavoui. E vakamacalataka o Peresitedi Hinckley ni vaka na rarama mai ni dua tale na siga vou. E tukuna vakaoqo:
“Sa qai yaco, ena gauna balavu duadua ni butobuto, sa qai waqari e dua na kadrala. Na yabaki ni veivakabulabulataki e kauta mai e dua na gauna me sa mai sevi na vuli, kila ka, kei na vakadidike. Era basika talega eso na tagane kei na yalewa yaloqaqaa dau vakararavi tu ki lagi ena nodra vakadinadinataka tiko na Kalou kei na Luvena vakalou. Eda vakatoka na gauna o ya me gauna ni Veivakavoui.
“Ni oti o ya, ka oti e vica na itabatamata era lakova voli na delai vuravura—ena veiqati, veicati, ena butobuto kei na ivalavala ca—sa qai basika mai na matanisiga vou ka cecere ni Veivakalesui mai. Na kosipeli lagilagi oqo e kauta vata mai na nodrau rairai na Tamada kei na Luvena vua na cauravou o Josefa. Na mataka vou ni itekitekivu ni iotioti ni gauna sa basika e vuravura. Na veika vivinaka kece, rairai totoka, na veika vakalou ni veitabatamata sa oti yani sa vakalesui mai ena gauna lagilagi taleitaki oqo” (“The Dawning of a Brighter Day” Liaona, Me 2004, 82–83).
Tarava mai na gauna lagilagi ni iMatai ni Raivotu, na kena laki soli vei Parofita Josefa Simici na ivolatukutuku tabu ni iVola i Momani. Oqo sa kauta tale mai e dua nai vakadinadina vou ni noda Turaga ka iVakabula kei na Nona itavi ki na kawa tamata e vuravura.
Oqo eda sa qai kila kina na ituvatuva tawamudu ni Tamada ni Nona loloma e sega ni vakaiyalayala. E okati kece sara ga kina o ira na Luvena. E tautauvata na itekitekivu ni tamata kecega kei na tautauvata ni nodra rawa ni rawata e dua icavacava tawamudu.
Na parofita o Amuleki ena iVola i Momani e vakadinadinataka tiko ni vosa i Karisito e rawa ni vakabulai keda, ena nona kaya vakaoqo:
“Oi kemudou na wekaqu, dou sa rogoca na veika oqo, ka wilika na kena ivakadinadina sa volai ena ivolatabu; ia sa dodonu sara mo dou veivutuni ka vuataka na vua e kilikili.
“Ia dou lako mai ka kakua ni vakaukauwataka tiko na yalomudou raica oqo sara ga na gauna kei na siga mo dou vakabulai kina; Ia kevaka dou sa yalomalumalumu ka veivutuni, dou na vakabulai vakaidina.
“Raica me na vakarautaki koya na tamata ena bula oqo me lesu tale vua na Kalou; io oqo na bula me kitaka kina na tamata na nona cakacaka kecega” (Alama 34:30–32).
Me da kakua ni veiciriyaki wale tu ga ena cagi ni veivakavuvuli vakavuravura (raica Efeso 4:14). Me da kaya yani ki vuravura ni sa tadola tale o lomalagi ka sa vakatakilai tale mai ki na kawatamata na dina kei na ituvatuva tawamudu ni Kalou. Eda sa bula tiko oqo ena iotioti ni itabagauna ni taucoko ni gauna. Eda bula donuya tiko na gauna ni sa tiko na ivakadinadina ena veivalenikalou me baleta na ituvatuva cecere ni Turaga ka sa vakarautaka vei ira na luvena mai na ivakatekivu ki na gauna oqo na iotioti ni itabagauna. Na ivakadinadina era sa vakaivolataki tu; eda sa sega ni biu taudua tu me da lako duadua voli ka sega tiko ni kila na ituvatuva ka sa vakarautaka tu na Turaga me baleti ira kece na luvena. O Koya e sa yalataki koya tu ena veiyalayalati tabu me na vakalougatataki keda ena veika vakalomalagi me vaka na noda dau talairawarawa ki na Nona ivakaro. Io, nanuma, nanuma, ni veika oqo e dina, ni sa vakaraitaka oti mai vei keda na Turaga na Kalou na veidina tawamudu oqo. Ena yaca i Jisu Karisito, emeni.