Ka Me Ra Kilai Kemuni
Eda rawa ni vulica na lesoni vakayalo kevaka eda rawa ni sotava na veivakararawataki, rarawa ni lomada, kei na yalobibi ena noda raica matua na Karisito.
Eratou sa lagata na matasere “Jesus the Very Thought of Thee.”1 Ena iVola i Momani, e vosa kina ko Nifai ena parofisai vakamesaia:
“Ia era na okati Koya me ka wale ko ira na kai vuravura, ni ra sa tamata ivalavala ca; era na vakanakuitataki Koya ka na vosota ga ena vuku ni nona yalololoma kei na nona dau vosoti ira na luve ni tamata.”2
Na levu kei na mosi bibi ni veivakararawataki ka sega na ka me vakatautauvatani rawa e na iVakabula e a baleti keda; me maroroi keda me da kua ni vakararawataki me vakataki Koya.3 Ia na veivakararawataki e tiki tu ni noda bula ka na lewe lailai era na dro mai kina. Me vaka ni dua na ka eda a sa lakova oti yadudua, se da lakova tiko oqo, se da na qai lakova, e tiko na vosa ni Kalou ka vakatura ni da na rawa ni vulica mai kina eso na lesoni vakayalo kevaka eda rawa ni sotava na veivakararawataki, rarawa ni lomada kei na yalo bibi ena noda raica matua na Karisito. Ena gauna makawa e vola ko Paula ni noda vakararawataki e solia vei keda e dua na gauna me da kila vinaka kina na iVakabula. E vola ko Paula vei ira na kai Roma:
A Yalo oqo sa tukuna mai ki na yaloda ni da sa luve ni Kalou:
“Ia kevaka eda sa gone, eda na qai taukei, eda na taukena na veika ni Kalou, eda sai taukei vata kei Karisito; kevaka eda sa vosota vata kaya na ca, eda na vakalougatataki vata kaya talega.”4
Me kua ni dua e vakasaqara na dredre kei na vakararawataki e sega ni o koya oqori na ka e vakavulici tiko. Sai koya ga na nodai ivakarau ni sotava na dredre kei na veivakatovolei e vukei keda me da kila vinaka na iVakabula. Na veika sa yaco oti vei keda e vakavulica ni veivakararawataki sai koya eso na ka ka ra na dau yaco tu ga mai ena noda bula ka sega ni dua na ka da vakasaqara. Ke rawa meu vakayagataka e dua na ivakaraitaki ka yaco sara ga vei au:
Ena vica na yabaki sa oti ni se qai yabaki dua na neirau ulumatua tagane au a vakavuna e dua na veivakararawataki ka sega ni dodonu me a yaco. Keirau vakarautaki tiko ena dua na Koliji, ka dua na yakavi au qito voli kei na noqu cauravou ena buturara. Au biuta na loqi meu lako ki vuli lesoni ia ena noqu sogota na katuba e rairai ni via tosovi au mai ka laveta na ligana e daku ni uluna ka curu na qaqalo ni ligana ena idi ni katuba. Ena noqu sogota na katuba e a yaco e dua na mavoa levu ena qaqalo ni ligana.
Keirau cici vakatotolo ki na loqi ni leqa tubukoso e valenibula ka soli vua e dua na wainimate me vakalailaitaka na mosi, ka lako mai e dua na vuniwai ka vakadeitaka ni rawa ni vakavinakataki. Me vaka ga ni dau yaco, na ka ga e vinakata na noqu yabaki dua me roqoti koya ko tamana. Kevaka e raici au tikoga, ena vorata na sasaga me vesuki, me caka vua na veisele bibi oqo. Ena noqu biuta na loqi e a yalo maravu ka sa rawa sara vei vuniwai me tekivu.
Ena gauna ni veisele au a lomaleqa kau torova volekata na katuba e dola tu ka rai sara yani e tutuna meu raica se sa vakacava tiko. E rairai ena dua na wakilakila sega ni laurai, niu dau iro lo yani ena tutuna ka toka ena yasa ni dakuna,e dau duri cake na uluna ka saga me raica, seu tiko ekea.
Ena dua na gauna, ena noqu raici koya, e dodo tu na ligana ki na yasana, me talave rawa tu kina na uluna, rawa ni raici tamana—e lako mai vei au e dua na vakasama me baleta e dua tale na Luvena, e dodoka tu na Ligana, lauvako ki na kauveilatai, vakasaqarai Tamana ka lako mai ki na noqu vakasama na vosa, “Noqu Kalou, noqu Kalou ko sa biuti au ena vuku ni cava?”5 Na domobula ni ka e mai yaco ena noqu bula e veisau vakasauri me vakalou.
E tu ena volanikalou eso na ilawalawa turaga kei na marama ka laurai ni ra vakanamata vakatabakidua tu ga vei Karisito—na tamata ka veitalia na cava e kauta mai vei ira na bula, era yalodina ka lomadra tu ga me ra dau vosota. Au na tukuni Eparaama, vagalalataki mai na qele soli vakamatavuvale, ka vakaroti me vakacabori Aisake; o Josefa ka ratou volitaka na tuakana me bobula, biu ki valeniveivesu ni a rokova na bula dodonu kei na ivalavala savasava, qai biu me wawa tu e valeniveivesu baleta e dua na dauveiqaravi sega ni dauveinanumi; o Ruci, yada gone ka biu tu ena dravudravua, ia e a dina tu ga ka yalodina vei vugona; ko iratou na tolu na Nifai, koi rau ruarua ko Alama io sa dina, vata kei na Parofita ko Josefa.
E bibi vakalevu vei au na vosota vakadede nei Nifai. Ena nona dau vosota tu ga na nodratou cudru na tacina, vesu me va na siga ena waqa e lako tiko ki na vanua yalataki. E sega ni rawa ni toso ia ena ikava ni siga, sa voleka me tilomi ira na wasa titobu, erau sa rere de rau na vakarusai,” a rau sa sereka na ivesu ni ligaqu ka raica ni sa vuce vakalevu sara; ia sa vuce ka mosi talega vakalevu na (nona) qurulasawa.
A sa sega ni vosa kudrukudrutaka na Turaga ena nona vakararawataki, ia sa vakararavi ga vua na nona Kalou ka vakacaucautaki koya ena veisiga.”6
Mo nanuma tiko ni ko Nifai e a vola, “era na vakanakuitataki Koya, ka na vosota ga, era na yaviti Koya ka na vosota ga. Io era na kasiviti Koya ka na vosota ga.”7 E a kila na kena ibalebale ko Nifai.
E dina ni sega ni dau kilai vinaka na inaki ni veivakararawataki ena gauna ko ya, e a sotava na parofita ko Josefa, ia kina dua ka vakayalo ka dua tani taudua, ena gauna e wawa tu kina ena valeniveivesu e Liberty. E a vakacegui koya na Turaga:
“I na luvequ, me vakacegu na yalomu; raica sa lekaleka walega na gauna ni nomu rarawa kei na vutugu.
Ia kevaka ko sa vosota rawa, ena laveti iko cake na Kalou; raica ko na vakamalumalumutaki ira kecega na nomu meca.”8
“Mo kila sara na luvequ, ni ko na kalougata vakalevu, kevaka ko sa vosota rawa na veika kece oqo.
“Raica na Luve ni Tamata sa vosota rawa na veika e toro sobu sara. Ia ko nanuma li ni ko sa uasivi cake mai vua?”9
Ni da kacivi me da vosota na veivakararawataki, ka dau vakayacori nakiti vei keda se kani vakacalaka ena so na gauna, oqo e dau biuti keda sara ga ena dua na vanua e duatani—ke da digidigi, sa na rawa ni vakatarai vei keda me da na vakila vou na nona vakararawataki na Luve ni Kalou. Ni tukuna tiko ko Alama, ni, Karisito e colata na noda rarawa me kila kina na noda malumalumu,10 na kena veibasai e rawa talega ni dina vei keda: o ya na noda vakararawataki e vakatara vei keda me da raica yani vakatitobu na bibi kei na ka levu ni Nona solibula ena veisorovaki.
Niu vakananuma na ka e yaco vua na luvequ ena vuqa na yabaki sa oti, au raica rawa vakatitobu na kena bibi kei na lagilagi na veisorovaki. E vuabale na noqu vakavinavinaka ena ka e vakayacora e dua na Tama, ka yalona dina me vakatara me yaco na veika ka yaco vei Luvena, me baleti au kei keda vakayadudua. E yaco vei au, e dua na raiyawa vou ni titobu kei na rabailevu ni Veisorovaki. Au sega ni vakasamataka rawa niu rawa ni vakatara me vakararawataki na luvequ ena dua mada ga na ka lailai; ia na Tamada” ni sa lomani ira na kai vuravura vakaoqo, sa solia kina na Luvena e duabau ga.”11
E dina ni keirau se sega ni veivosakitaka, o luvequ talega, ena rawa me vakavinavinakataka na malanivosa ka kaya kina na iVakabula, “Raica kau sa ceuti iko ena qeteqete ni ligaqu; a nomu bai sa tikotiko ga e mataqu:”12
E dina ga niu sega ni vakatura tiko eke ni via volekata yani na Veisorovaki Tabu na talanoa ni mavoa ni qaqalo ni ligai luvequ, na we ni mavoa e ligai na luvequ e dau vakasamataka tu ga ka sa nona na digidigi, kevaka e vinakata o koya, sa rawa me vakayagataka na we ni mavoa me vakananuma kina na we ni mavoa ena qeteqete ni ligana na iVakabula—ka a vakararawataki ena vuku ni noda ivalavala ca. Ena via gauna vinaka oqo vua, me kila vakaikoya na ibalebale, ni nona loloma na iVakabula ka vakatara kina me vakamawetaki, vakamavoataki, vorolaki ka dresulaki me baleti keda.
E dina ga ni veivakararawataki e rawa ni vakatitobutaka na noda rai, meda qarauna ga me kua ni vakatauvatani kina ia ka ga ni vakavinavinaka. Ena dau tiko ga na duidui vakalou vei keda kei koya na iVakabula. Na nona vosa vei Pailato,”Ko sa sega ni rawata edua na ka vei au, kevaka sa sega ni soli vei iko.”13 e taleva tale vei keda, ni lomana dina ka sa vakatulewa kina me solibula. Eda sega ni vosota rawa na bibi, dua tani kei na rabailevu ni Nona vakararawataki, “Raica koi au na Kalou sa Kaukauwa sara; au sa sautaninini ena mosi ni veivakararawataki ko ya; au a bunotaka na dra ka sa yaluma sara kina na yagoqu kei na yaloqu.”14 Ia me vakataki Nifai e rawa ni levu na noda vakavinavinaka ena veika e cakava ka da rawa ni vakila na Nona yalotabu e vukei keda ka da rawa ni kila na iVakabula ena kila vakaidina, ka “sai koya oqo na bula tawamudu [me da] kilai Koya.”15
Au wasea noqu ivakadinadina ni ko Jisu Karisito e iVakabula kei vuravura ka ni baleta na Nona vakararawataki kei na Veisorovaki eda rawata kina na vakabokoci ni noda ivalavala ca ka rawata na bula tawamudu. Au vakadinadinataka na nona yalomalumalumu kei na nona yalololoma sai Koya na Le Duabau ga nei Tamana, ena veika kecega e cakava kina na lomai Tamana, ena yaca i Jisu Karisito, emeni.