Itukutuku
Keimami sa laiva vei kemuni na neimami iloloma kei na neimami veivakalougatataki. Me tiko ena nomuni veivale na Yalotabu ni Turaga.
Kemuni na taciqu kei na ganequ, e sa veivakurabuitaki dina na noda koniferedi. E sega ni dua na ka e rawa me vakatautauvatataki kaya e vuravura taucoko. Ni da vakasamataka na noda soqoni vata eke ena vale ni koniferedi cecere oqo, ka qai vakau yani na veika eda tukuna ki na veiyasai vuravura me da sokalou vata kina na tamata ena veivanua kecega vua na Kalou bula, sa dua dina na cakamana vakasakiti. Vei kemuni kece o ni a vosa e sa totoka dina vakaoti. Eda gadreva me a levu na gauna me da a rogoci ira kece kina na Vakaitutu Raraba. E ka ni rarawa, ni sega ni rawa ni vakakina. O ira na mata mai na veimataisoqosoqo era sa vakauqeti keda dina ena nodra vosa.
Na veimasu era vakauqeti keda talega vakakina. Na ivakatagi sa uasivi dina.
Eda vakavinavinakataka na Vale ni Koniferedi vakaitamera oqo, na vale cecere oqo me da mai sota kina, kei na tekinoloji sa rawa kina me vakadewataki yani na noda vosa ki vuravura kivei ira na noda ena vuqa na veivanua kei na draki.
Eda gadreva me tu na vakacegu e vuravura ka da masulaka me na yaco mai.
Ena gauna oqo, kemuni na neimami itokani lomani, keimami sa laiva vei kemuni na neimami iloloma kei na neimami veivakalougatataki. Me tiko ena nomuni veivale na Yalotabu ni Turaga. Me vakatulewa na loloma ena nomuni veimaliwai vakamatavuvale.
Sa neimami masu oqo ni keimami vakamoce yani kivei kemuni me yacova na ono na vula ka tarava, ena yaca vakamareqeti ni noda Dauveivueti, na Turaga o Jisu Karisito, emeni.