Ciqociqo ena Yalotabu
Ni da vakanamata ki na … vakasaqaqara kei na ciqociqo ena Yalotabu, eda sa sega soti ni kauwaitaka na qasenivuli se o koya e vosa tiko ka dreta na noda vakarorogo eda na kauwaitaka vakalevu cake me da solia na noda vakarorogo ki na Yalotabu.
Ena dua na mataka niu veiqaravi voli me vaka e dua na daukaulotu gone e Beaumont, mai Texas, a tauvimate na noqu itokani ka gadreva me vakacegu. Ni oti na nona ivakasala na neirau peresitedi ni kaulotu me baleta na gauna vakaoqo, au dreta e dua na idabedabe ki na yasa ni katubaleka ni neirau vale ka tekivu wilika na iVola i Momani.
Sega ni dede sa luvuci au na ivolanikalou, ia ni oti e dua na gauna, au sa yacova sara yani na ika 29 ni iwase ni Alama, na tikina e 1 kei na 2:
“Raica meu agilosi mada ga meu tabalaka na domoqu me vaka na davui ni Kalou, sa yavalati vuravura, meu vunauci ira na tamata kecega me ra veivutuni!
“Io meu vunautaka ena domo sa vaka na kurukuru, me ra veivutuni na tamata kecega me ra bula kina; io me ra veivutuni ka lesu vua na Kalou, me ra marau kina e delai vuravura.”
Niu vakasamataka na vosa i Alama, sa yaco me tarai au sara vakalevu. Keirau sa tukituki ena vica na drau na katuba e Beaumont kei na noqu itokani, ia e sega ni vinaka sara na veika keirau sa rawata. Ena mata ni noqu vakasama, sa tekivu meu raitayaloyalotaka se na vakaevei beka kevaka meu agilosi ka rawa meu kacivaka na veivutuni ena dua na domo me kuretaki vuravura. Au iro yani e katubaleka vei ira na tamata era lako mai ka lako yani ena gaunisala e ra. Au raitayaloyalotaka se na vakaevei beka kevaka e rawa meu tucake tu e kea ka serau tu me vaka na agilosi, ka laveta tu na ligaqu, kau vosa me vaka ena domo ni kurukuru. Au rawa ni raica ni sa sakure tu na veivale ka ra bale sobu ki na qele na tamata. Ena vuku ni veika oqo au raitayaloyalotaka ni sa basika vakasauri vei ira na gagadre me ra rogoca na veika au na tukuna!
Ia au qai wilika na tikina ka tarava: “Ia sa kilikili ga meu vakavinavinakataka na ilesilesi sa kacivi au kina na Turaga; raica au sa tamata ga, ka sa vakacalai au na nanuma ni lomaqu.” (t.3)
Au yalomalumalumu niu kila ni sa lomani ira kece na Luvena na Turaga ka tiko na Nona ituvatuva ena vuku ni Nona cakacaka. Na noqu cakacaka meu vakayacora na noqu itavi.
Au yalomalumalumu talega niu kila e dua tale na ka. Ena gauna ko ya, au kila kina ni veika au wilika tiko e sega ni ka buli—e ka dina sara. E yaco mai vakamalua na vakadigagalu ena noqu wiliwili tiko, au sa vakasinaiti ena rarama kei na noqu kila ni ko Alama oqo e tamata dina ga, ni a bula ena dua na gauna, ni a gadreva talega vakalevu ko koya me wasea na itukutuku ni kosipeli vei ira na tani.
Kevaka beka mo a tarogi au ena gauna ko ya, “O kila beka ni dina oqo?” Au na sauma vakaoqo, “Io!” Ena gauna o ya, e matata vei au, niu a ciqoma tiko e dua na ivakadinadina vakayalo me baleta na dina ni iVola i Momani.
Niu dau vakananuma na veika o ya—kei na vuqa tale na ivakadinadina bula vakaoqo me tekivu mai ena gauna ko ya—Sa yaco meu kila na kena bibi me da ciqoma ena Yalotabu. Eda dau vakanamata vakalevu, me vaka ni veiganiti kaya, ena bibi ni veivakavulici ena Yalotabu. Ia ena gadrevi me da nanuma ni sa tukuna na turaga ni tautauvata, kevaka e sega ni levu cake, na bibi ni noda ciqociqo ena Yalotabu. (Raica na V&V 50:17–22.)
Na ciqociqo vakaoqori e ivalavala taumada vakosipeli. Sa vakotori ena cakacakatabu vakalotu sara ga eda vakadeitaki kina me da lewena na Lotu. Ena cakacakatabu vakalotu oqo, eda sa dusimaki kina me da “ciqoma na Yalo Tabu.” Oqo na veisureti me da cakacaka, me da ciqoma na isolisoli cecere oqo.
Niu sa qai kila vakavinaka cake na ivakavuvuli oqo, au raica ni ivolanikalou era sinai tu ena ivunau ni ciqociqo. Me vaka sa tukuna ko Peresitedi Boyd K. Packer, “E sega tale ni dua na ivolanikalou me basika vakalevu cake ena ivolanikalou, me vaka na, ‘Kerekere, ka na soli’” (“Reverence Invites Revelation,” Ensign, Nove. 1991, 21).
E uto ni noda bula vakatovolei na digidigi me da ciqomi Jisu Karisito. E vakavuvulitaka na iApositolo ko Joni:
“Sa lako mai ko koya vei ira na kai nona, ka sega ni vakabauti koya ko ira na kai nona.
“Ia ko ira kecega sa vakabauti koya, sa solia vei ira ko koya me ra yaco rawa me ra luve ni Kalou” (Joni 1:11-12).
E sega ni tarova rawa ena nona vakataroga e dua se vica beka na isolisoli kei na veivakalougatataki e vakavolivoliti keda tu ka da sega ni se ciqoma. Sa kaya na Turaga: “A cava na kena yaga vua na tamata kevaka sa vakarautaki tu na isolisoli me nona, ka qai sega ni taura? Raica sa sega ni vinakata na isolisoli sa soli vua; io sa sega talega ni vinakati koya sa solia” (V&V 88:33).
Ena noda veisoqoni vaka-Lotu, ena noda vuli ivolanikalou yadudua ka vakakina vakamatavuvale, kei na siga sara mada ga oqo ni da vakarorogo vei ira na nona parofita kei na nona iapositolo na Turaga, eso vei keda era na “ciqoma” vakalevu cake mai vei ira tale eso. Baleta na cava? Au sa vulica tiko ni o ira era ciqoma vakaidina sara era dau vakayacora e tolu na ka kevaka e lailai, ka ra sega beka ni dau cakava na kena vo.
Taumada, era vakasaqaqara. Eda bula tiko ena dua na vuravura dau veivakamarautaki, e dua na vuravura ni sarasara. Eda sega ni vakila, na noda lako mai ki na koniferedi se da lako yani ki lotu ena ivakarau ni vakasama vata o ya, “Koi au oqo; ni vakauqeti au.” Sa yaco me da matemate vakayalo.
Ni da vakanamata ki na vakasaqaqara kei na ciqociqo ena Yalotabu, eda sa sega soti ni kauwaitaka na qasenivuli se o koya e vosa tiko ka dreta na noda vakarorogo eda na kauwaitaka vakalevu cake me da solia na noda vakarorogo ki na Yalotabu. Nanuma tiko na ciqoma e vosa cakacaka. E ivakavuvuli ni cakacaka. E ivakaraitaki bibi ni vakabauta.
Kena ikarua, o ira era ciqociqo era vakila. Ni dau lako mai ki na vakasama kei na yalo na ivakatakila, e vakavuqa ni dau vakilai. Me yacova na gauna eda qai vulica kina me da dau vakarorogo ki na veika dau vakilai vakayalo oqo, e vakavuqa ni da dau sega ni kila na Yalotabu.
Ena dua na neirau veitalanoa ena dua na gauna lekaleka sa oti vata kei na dua vei ira na vugoqu, e vakatura o koya ni rawa ni da vukei ira kece na gone me ra vakila na Yalotabu. E rawa ni da taroga vei ira na taro me vaka na: “Na cava soti o vakila ni da wilika vata na ivolanikalou oqo? Na cava o vakila ni vakauqeta tiko vei iko na Yalotabu mo cakava?” Oqori na taro vinaka me baleti keda kece. Era vakaraitaka na gagadre ni ciqociqo.
iKatolu, o ira era dau ciqociqo ena Yalotabu e nodra inaki me ra cakacaka. Me vaka e veidusimaki kina ko Moronai na parofita, me da ciqoma e dua na ivakadinadina bula ni iVola i Momani, e dodonu me da kerea “ena yalodina” (Moronai 10:4). Ena veivakavulici na Yalotabu ni sa lomada dina sara me da cakava e dua na ka ena veika eda vulica.
Niu vakawilika lesu na noqu ivolaniveisiga meu kila ka vulica eso tale na ka me baleta na veika au a sotava vakadaukaulotu, au qai raica ni dina ga niu sa dau wiliwili oti ena iVola i Momani e liu, na veika a yaco mai Beaumont ena mataka o ya e duidui baleta niu a duatani. Ena noqu se lecaika tu, ena gauna o ya au a tovolea ena yaloqu dina meu vakasaqaqara ka vakila, ka noqu inaki meu cakacakataka ena vakabauta na veika au vulica. Au sa kila ena gauna oqo ni ivakadinadina vakaoqori sa vakarautaki tu vei keda yadua ena gauna oqo e veigauna, kevaka eda na ciqoma.
Na iVola i Momani e vosa ni Kalou. Ko Jisu na Karisito. Sa vakalesui mai na kosipeli, ka sa tu vakaidina ena kedra iserau na iapositolo kei na parofita ni gauna oqo.
Au masuta ena siga oqo kei na veisiga kecega, ni da na vulica me da ciqociqo cake vakavinaka, me da na reki vakaidina kina ena isolisoli ka vakakina “vua e solia na isolisoli.”
Ena yaca i Jisu Karisito, emeni.