Autalavou
Faasao Kathy
Ia Ianuari 1976, na ou maua ai se valaau mai le telefoni mai se uo sa faigaluega mo auaunaga lautele. Sa ia fesili mai pe ma te mananao ma lo’u toalua e tausia se tama fai. E toalua la ma’ua lava fanau laiti sa i ai i lea taimi, peitai na ma malilie e tatala atu lo matou aiga mo Kathy e 17 tausaga le matua.
E lei leva ona taunuu mai Kathy i lo matou aiga, ae fesili mai pe mafai ona matou o i le lotu. Na matou fai i ai ua lelei, ma e lei pine ae toaga Kathy i le lotu. O le toatele o uo a Kathy mai lana aulotu muamua na iloa lona toesea, ma sa le fiafia i le iloaina o lea ua auai o ia i le Ekalesia AAG.
I se tasi aso ina ua tuua le aoga, na ta’u mai e Kathy o loo fuafua e lana lotu muamua e faia se po e ta’u o le “Faasao Kathy” mo le fonotaga a taitai o la latou autalavou. Sa talosaga mai Kathy pe mafai ona ma toalua ma ia i lena fonotaga ma fesoasoani ia te ia e puipui le Ekalesia. Na ou ioe ma le faatuatuai ona e ui ou te lei manao e finau ma ana uo e uiga i eseesega o aoaoga faavae, ae sa ou iloa e lei lava lona iloa e uiga i le Ekalesia e puipuia ai. Na ou filifili e aumai se isi valaaulia, o Richard Jones, faatoa foi mai lana misiona.
O le aso o le “Faasao Kathy” i le po, o se aso o le anapogi ma le tatalo mo matou uma. Sa ou tatalo ia i ai le Agaga i le fonotaga ma ia aua nei i ai ni finauga.
Ina ua matou taunuu i le lotu i lena afiafi, na matou iloa ni lagona lē fiafia, peitai na talia fiafia matou e le faifeau ma valaaulia matou e faamatala i le aofia e uiga i le Ekalesia ma o matou talitonuga. Ao faasoa atu e Richard le uluai lesona a faifeautalai ma aoao atu e uiga i le Toefuataiga, sa faalologo ma le toto’a ia talavou e to’a 15 sa i ai i le potu. E oo foi i le faifeau talavou sa matua gauai mai.
Ona matou faaaluina lea o le taimi na totoe o le afiafi i le taliina o fesili ma faia se talanoaga matagofie e uiga i le talalelei. O foliga o le ita na matou lagonaina muamua na vave ona mou ese ao matou faamatala atu ma le to’a lo matou talitonuga. Sa i ai le faaaloalo i itu e lua. Na faatumulia le potu e le Agaga Paia ao matou faasoa atu a matou molimau ma tali i fesili.
I le faaiuga o le talanoaga, sa faafetaia e le faifeau lo matou o atu. Ae ina o le a matou o, sa tulai se tamaitai talavou ma fai mai, e i ai se mea na te fia ta’u mai ia i matou. Sa fai mai ae matou te lei o atu, na te lei manatu o Mamona o ni Kerisiano, ae o lea ua talitonu atonu e sili atu ona matou Kerisiano i lo ia.
Semanu e le mafai ona matou tusia se faaiuga e sili atu o la matou talanoaga. Ou te iloa semanu e le mafai ona sologa lelei le feiloaiga pe ana matou le anapogi ma tatalo, tagi atu mo le faatasi mai o le Agaga, ma aioi atu i le Alii ina ia leai ni finauga. Ua na o le mafuta mai o le Agaga Paia e mafai ona faamanuiaina ai lo tatou faasoa atu o le savali o le talalelei.