Paglilingkod sa Simbahan

Pagbibigay sa mga Bata ng Pagkakataong Maglingkod

Ni Jenny Baker

Sinumang naglilingkod sa Primary ay masasabi sa inyo na ang mga bata kadalasan ay nahihirapang pumunta sa Primary na handang maupo nang tahimik at matuto. Gaano man kahusay ang isang lider o gaano kamahal ng mga guro ang kanilang klase, magugulo pa rin ang mga bata kung minsan.

Sinabihan ang mga Banal sa mga Huling Araw na lahat ng bagong miyembro ng Simbahan ay kailangan ng responsibilidad.¹ Ang pagkakaroon ng responsibilidad ay nakakatulong upang madama nila na bahagi sila ng Simbahan at binibigyan sila ng pagkakataong matuto at umunlad. Matatamasa ng mga bata ang mga pagpapala ring ito kapag binigyan sila ng pagkakataong maglingkod.

Hindi binibigyan ng katungkulan ang mga bata, ngunit maaaring mapanalanging maghanap ang mga lider ng Primary ng mga pagkakataong maglingkod kahit ang pinakamaliit na bata. Narito ang ilang ideya:

• Sabihan ang isang batang nakatatanda na tulungan ang isang nakababata sa oras ng pagbabahagi.

• Patayuin sa may pintuan ang isang batang maagang dumating para batiin ang iba pagpasok nila sa Primary.

• Ipabahala ang mikropono sa isang batang nakatatanda para tiyakin na gumagana ito.

• Pakuhanin ng chalk, pambura, mga krayola, o iba pang mga bagay ang ilang batang nakatatanda mula sa library.

• Sabihan ang isang batang marunong mag-piyano na tumugtog ng pambungad o pangwakas na himno.

• Paupuin ang dalawang magkaibigan sa tabi ng isang bisita o bagong miyembro at ipadama rito na malugod siyang tinatanggap.

• Anyayahan ang isang bata na tumulong sa pagkumpas.

• Patulungin ang ilang bata sa pag-aayos o pagbababa ng mga upuan.

• Pabisitahin ang isang bata at ang pamilya nito sa isang batang bagong lipat sa inyong ward o branch.

• Pahawakan sa isang bata ang isang larawan.

• Pagdrowingin ang isang bata gamit ang simpleng chalk para gamitin sa iyong aralin.

• Pag-imbentuhin ang piling mga miyembro ng klase ng mga galaw para sa isang bagong awiting pinag-aaralan nila.

• Tulungan ang isang 11-taong-gulang na bata na magplano ng Primary activity day. Matutulungan nito ang bata na makumpleto ang isang kailangan sa Pananampalataya sa Diyos.

Gaano man kalaki o kaliit ang kanilang responsibilidad, alalahaning pasalamatan ang mga bata sa kanilang paglilingkod.

Nasiyahan akong makatulong sa mga bata sa pagkatuto nilang maglingkod. Karangalan ang mamasdan silang lumalaki at ginagamit ang kanilang mga kahusayan sa mga programa ng Young Men at Young Women na nasimulan nila sa Primary.

Tala

1. Tingnan sa Gordon B. Hinckley, “Converts and Young Men,” Ensign, Mayo 1997, 47.

Ano ang Tunay na Mahalaga

Ikinuwento ni Elder Kenneth Johnson ng Pitumpu noong pinturahan niya ang labas ng bahay niya at mag-alok ng tulong ang limang-taong-gulang na anak niyang lalaki: “[Matapos ko siyang bigyan] ng luma kong kamiseta na halos tumakip sa kanya, at halos sumayad sa sahig at nakatupi nang ilang beses ang mga manggas, sinimulan naming pinturahan ang pintuang papasok sa aming tahanan. Pinipinturahan niya ang bandang ibaba ng pinto habang ako naman sa itaas na bahagi. Napansin ko na dahil sa kanyang kabataan at kaliitan, hindi pantay at bukul-bukol ang pagpipintura niya. Tuwing yuyuko siya para isawsaw ang kanyang brush sa pintura, mabilis kong pinapantay ang pintura sa gawing ibaba ng pinto, at bumabalik ako kaagad sa pinipinturahan ko para hindi niya mamalayan ang ginawa ko. Makalipas ang ilang sandali ipinasiya ko na mas mahalaga ang pagkakataong makatulong ko ang aking anak kaysa sa napakahusay na pagpipintura. Sa aking pag-iisip natanto ko kung gaano kahusay siyang gumawa. Mula noon, tuwing lalapitan ko ang pinto at makikita ang kakaibang estilo ng dekorasyon, naaalala ko kung ano ang talagang mahalaga sa ating buhay.”

Mula sa “We All Have a Father in Whom We Can Trust,” Ensign, Mayo 1994, 30.

Kanan: paglalarawan ni Robert Casey