2 ka mga Balay nga Gipuy-an ni Joseph Smith

Ni Jan Pinborough

Mga Magasin sa Simbahan

Dali suhira ang importante nga dapit sa kasaysayan sa Simbahan!

Palmyra, New York, mao ang dapit diin ang Pagpahiuli sa Ang Simbahan ni Jesukristo sa mga Santos sa Ulahing mga Adlaw nagsugod 193 ka tuig na ang milabay. Sila si Luke, Rachel, ug Julia S. mibisita niining espesyal nga dapit aron makat-on pa og dugang mahitungod sa gipuy-an ni Propeta Joseph Smith ug sa unsa nga paagi siya mitabang sa pagpahiuli sa Simbahan dinhi sa kalibutan.

Ang Balay nga Troso

Kining balay nga troso gitukod nga pareha sa balay nga gipuy-an ni Joseph Smith gikan sa edad nga 12 hangtud 19.

1. Si Joseph adunay lima ka mga igsoong lalaki ug tulo ka igsoong babaye. Gamay kadto nga balay alang sa 11 ka tawo!

2. Ang pamilya sa kasagaran magpundok sa lamesa sa kusina aron mobasa sa Biblia. Sa dihang nag-edad siya og 14, mibasa si Joseph sa Santiago 1:5: “Kon aduna man kaninyoy nakulangan og kaalam, papangayoa siya sa Dios.” Aduna siyay importante nga ipangutana sa Dios.

3. Usa ka adlaw sa tingpamulak niadtong 1820, si Joseph miadto sa kakahoyan duol sa iyang balay nga troso ug nag-ampo aron makahibalo unsa nga simbahan ang iyang apilan. Ang Langitnong Amahan ug si Jesukristo nagpakita ug misulti kaniya nga dili moapil sa bisan unsa nga mga simbahan. Si Jesus miingon nga si Joseph motabang sa pagpabalik sa Simbahan sa Ginoo dinhi sa kalibutan.

4. Ang tanang unom ka mga lalaki sa pamilya matulog sa kwarto sa ta-as. Usa ka gabii niana sa dihang si Joseph nag-edad og 17, si anghel Moroni nagpakita sa makatulo ka higayon ug misulti niya mahitungod sa bulawan nga mga palid nga hubaron ni Joseph ug imantala isip ang Basahon ni Mormon. Nakuha ni Joseph ang mga palid paglabay sa upat ka tuig.

Ang Balay nga Tabla

Sa dihang si Joseph nag-edad og 19, ang iyang pamilya mibalhin ngadto sa bag-ong balay. Didto siya nagpuyo sa dihang iyang nakuha ang bulawan nga mga palid gikan sa Bungtod sa Cumorah.

5. Ang ubang mga tawo misulay sa pagkawat sa bulawan nga mga palid. Gitagoan kini ni Joseph ilawom sa mga bika sa atubangan niining fireplace.

6.Ang mga igsoong babaye ni Joseph nga sila si Sophronia ug Katherine matulog niining gamay nga kwarto. Usa ka gabii niana giputos ni Joseph og panapton ang mga palid ug gitagoan kini taliwala sa duha ka mga babaye sa ilang higdaanan.