Mahimong Pamilyar ni Lorenzo Snow

Ni Christopher D. Fosse

Ania ang pipila ka mga butang nga mahimong wala ninyo masayri kabahin sa ikalima nga Presidente sa Simbahan.

Karong tuiga ang manwal sa mga klase sa Relief Society ug Melchizedek Priesthood nag-focus sa kinabuhi ug mga pagtulun-an ni Presidente Lorenzo Snow (1814–1901). Tungod lang nga dili kini gamiton sa inyong mga kaedad, kana wala magpasabut nga wala namoy mahibaloan bisan gamay kabahin kaniya. Si Presidente Snow nagpuyo og talagsaong kinabuhi uban sa mga pagsulay ug mga kalampusan.

Usa ka Dumadapig sa Ebanghelyo

Si Lorenzo Snow unang nakadungog kabahin sa Simbahan sa dihang batan-on pa siya. Sa sinugdanan wala siyay tinguha nga magpabunyag, bisan pa nga ang iyang igsoong babaye si Eliza (mao nga Eliza R. Snow kinsa misulat sa himno sa mga Santos sa Ulahing mga Adlaw ug miserbisyo isip ikaduhang kinatibuk-ang presidente sa Relief Society) naghinam-hinam sa pagdawat sa ebanghelyo. Hinoon, iyang nakita nga ang doktrina sa Simbahan maayo kaayo. Sa dihang si Lorenzo nagsugod sa pag-eskwela sa kolehiyo sa Oberlin, Ohio, kanunay siyang mopakigbahin sa mga pagtuo sa Simbahan ngadto sa mga estudyante kinsa gipangbansay nga mahimong mga ministro sa Protestante. Bisan tuod wala pa siya magpasalig nga magpabunyag, maayo kaayo niyang gipresentar ang ebanghelyo nga daghan sa mga estudyante sa Oberlin miangkon nga mahimong tinuod ang gipahiuli nga Simbahan.

Ingon nga lig-on siya nga misyonaryo sa wala pa niya dawata ang ebanghelyo, dili ikatingala nga si Lorenzo mas mapahinunguron sa buhat human siya mabunyagi. Atol sa iyang bag-ong mga katuigan isip miyembro sa Simbahan, siya gitawag sa pagserbisyo og pipila ka full-time mission. Siya unang nagserbisyo sa Ohio, pagkahuman sa Missouri, Kentucky, ug Illinois, USA. Sa wala madugay siya gipadala ngadto sa Great Britain aron sa pagtabang sa pag-organisar sa Simbahan didto sa England. Samtang naa didto, gihatagan niya og mga kopya sa Basahon ni Mormon sila si Queen Victoria ug Prince Albert. Sa wala madugay nagserbisyo siya og misyon sa Italy, Switzerland, ug sa nailhan karon nga Hawaiian Islands.

Milagro diha sa Dagat

Sa dihang si Elder Snow mibiya sa England aron mobalik sa Nauvoo, Illinois, kauban niya ang dakong grupo sa bag-ong nabunyagan nga mga miyembro. Silang tanan misakay sa barko nga Swanton ug miandam alang sa taas nga panaw ngadto sa Amihanang Amerika.

Bisan tuod ang kapitan sa Swanton bati og tinagdan sa mga Santos sa Ulahing mga Adlaw sa iyang barko, dili usab siya mahigalaon ngadto kanila. Kasagaran magpalayo siya gikan kanila. Apan human sa mga duha ka semana diha sa dagat, adunay usa ka butang nga nahitabo. Ang tig-alagad sa kapitan naaksidente. Walay nagdahum nga ang tig-alagad mabuhi pa nianang gabhiuna.

Apan usa sa matinuorong sister kinsa nag-asikaso sa himatyong marinero adunay sugyot. Iyang giingnan ang tig-alagad nga si Elder Lorenzo Snow makapanalangin kaniya ug basin makaluwas kini sa iyang kinabuhi. Ang tig-alagad—nga nagtrabaho aron makasuporta sa iyang asawa ug duha ka mga anak nga anaa sa Germany—miuyon dayon.

Sa tunga-tungang gabii, si Elder Snow gipukaw ug gihangyo nga moadto sa kwarto sa himatyong tawo. Sa iyang pag-abut, iyang nahimamat ang kapitan sa barko. Ang kapitan nagpasalamat kaniya apan mipahayag nga wala nay paglaum sa sitwasyon. Si Elder Snow nakakita nga naghilak ang kapitan.

Misulod siya sa kwarto, mipandong sa iyang mga kamot diha sa ulo sa tig-alagad, ug mihatag kaniya og panalangin sa priesthood. Diha-diha dayon pagkahuman og hatag og panalangin, ang tawo mibangon gikan sa higdaanan. Ang tig-alagad hingpit nga naayo, ug siya mibuhat sa iyang mga buluhaton pagkasunod adlaw.

Ang Bili sa mga Kalag

Ang pagkaayo sa tig-alagad nakapausab sa kahimtang diha sa Swanton. Ang kapitan misugod sa paggahin og daghang panahon kutob sa iyang mahimo ngadto sa mga Santos, ug gani siya nagtuon sa ebanghelyo ug mitambong sa mga miting sa Simbahan. Ang ubang mga marinero nakadayeg usab pag-ayo. Sa dihang ang barko miabut sa destinasyon, ang mga tripulante mahigugmaong nanamilit sa mga Santos. Pinaagi sa gahum sa priesthood, dili lang ang kinabuhi sa usa ka tawo ang naluwas, apan daghan usab ang nakasinati sa gahum ug gugma sa Dios. Ang tig-alagad ug daghan sa mga tripulante sa wala madugay nabunyagan.

Daghan pang talagsaong mga hitabo ang nahitabo sa kinabuhi ni Presidente Lorenzo Snow. Mao nga karong tuiga, samtang ang mga hamtong magtuon sa Mga Pagtulun-an sa mga Presidente sa Simbahan: Lorenzo Snow, nganong dili kamo magsunod? Ma-dominggo o kon naa moy libre nga panahon, mahimo ninyong basahon ang pipila sa mga pagtulun-an ni Presidente Snow. Mas makatampo mo sa mga panaghisgut sa pamilya kabahin sa ebanghelyo, ug sa proseso mas mailhan ninyo ang talagsaong tawo kinsa nahimong propeta sa Dios.

Miserbisyo og misyon sa Hawaii.

Miserbisyo og pipila ka misyon sa Estados Unidos.

Mitudlo sa mga baruganan sa ebanghelyo ngadto sa mga estudyante nga mahimong mga ministro.

Miayo sa tig-alagad sa kapitan sa usa ka panaw pabalik sa Amihanang Amerika.

Mihatag og mga kopya sa Basahon ni Mormon nila ni Queen Victoria ug Prince Albert.