Mga Atsara, Mga Turnip, ug Pagpamatuod: Inspirasyon gikan sa Kinabuhi ug mga Pagtulun-an ni Lorenzo Snow
Samtang kamo magtuon sa mga pagtulun-an ni Presidente Lorenzo Snow karong tuiga, inyo siyang maila-ila isip usa ka propeta, manalagna ug tigpadayag kansang tambag magamit gayud karon.
Kon kamo nakakita og litrato ni Lorenzo Snow, ang ikalima nga Presidente sa Ang Simbahan ni Jesukristo sa mga Santos sa Ulahing mga Adlaw, tingali makahinumdom mo sa iyang taas nga puting bungot ug sa iyang buotang panagway. Ug kon kamo mohunong og kadiyot sulod sa pipila ka minuto sa pag-eksamin niini nga litrato, tingali makamatikod mo sa mga mata ni Presidente Snow—gikapoy apan wala magluya, edaran apan puno sa kusog ug kahayag.
Tingali inyong nadunggan nga si Presidente Snow nadasig sa pagtudlo kabahin sa ikapulo, ug tingali inyong mahinumduman nga nakabasa mo sa iyang sagradong kasinatian nga nahitabo sa Templo sa Salt Lake.
Apan nasayud ba mo kon unsa ang hinungdan nga nahitabo ang iyang kasinatian diha sa templo ug ang resulta niini? Ganahan ba kamong masayud sa istorya kabahin sa pagpadayag nga iyang nadawat mahitungod sa balaod sa ikapulo?
Ug unsa kaha ang mahitungod sa iyang mga mata ug panagway? Human makighimamat ni Presidente Snow, usa ka ministro sa laing tinuohan misulat: “Ang iyang nawong usa ka gahum sa kalinaw; ang iyang presensya usa ka panalangin sa kalinaw. Sa malinawon nga kahiladman sa iyang mga mata dili lamang ang ‘panimalay sa hilum nga pag-ampo,’ apan ang panimalay sa espirituhanon nga kalig-on. … Ang labing katingalahang pagbati milukop kanako, nga ako ‘nagbarug sa balaan nga yuta.’”1 Ganahan ba mong masayud kabahin sa mga panimpalad, mga pagsulay, mga kalampusan, mga kasubo, mga kalipay, ug mga pagpadayag nga nahiusa nga nakamugna sa ingon nga panagway?
Karong tuiga, ang mga sister sa Relief Society ug ang mga naghupot sa Melchizedek Priesthood magtuon sa Mga Pagtulun-an sa mga Presidente sa Simbahan: Lorenzo Snow. Samtang magkat-on kamo sa mga pagtulun-an ni Presidente Snow ug hisgutan kini sa simbahan ug sa panimalay, inyo siyang maila nga labaw pa sa buotan nga tawo diha sa karaan nga painting. Inyo siyang maila isip usa ka tawo sa Dios—usa ka propeta, manalagna, ug tigpadayag kansang tambag magamit gyud kaayo karon.
Aron sa pagdani kaninyo, ania ang pipila ka mga ehemplo sa iyang mga pagtulun-an ug mga istorya nga inyong mabasa diha sa tun-anan sa klase karong tuiga. Sa mosunod nga mga paragraph, ang kapitulo ug pahina nagpasabut sa Mga Pagtulun-an sa mga Presidente sa Simbahan: Lorenzo Snow.
Mahimo ninyong mahinumduman ang usa ka makapaikag nga pakigpulong sa kinatibuk-ang komperensya diin si Elder David A. Bednar sa Korum sa Napulog Duha ka mga Apostoles mikompara sa proseso sa pagkakabig ngadto sa proseso sa paghimong atsara sa pipino.2 Si Elder Bednar dili ang unang Apostol nga mihimo niining pagkompara. Si Presidente Snow mipakigbahin og susamang ideya mga 150 ka tuig ang milabay:
“Pagbutang og usa ka pipino diha sa sudlanan sa suka ug adunay gamay ra kaayo nga epekto nga nahimo niini sa unang oras, ni sa unang 12 ka oras. Susiha kini ug inyong makita nga ang epekto nga nahimo anaa ra sa panit, tungod kay nagkinahanglan og mas taas nga panahon sa paggamos niini. Ang pagbunyag sa usa ka tawo dinhi sa simbahan adunay epekto kaniya, apan dili ingon nga ang epekto makatuhop dayon kaniya. Dili kini makatukod og balaod sa katungod ug katungdanan kaniya atol sa unang 12 o 24 ka oras; siya kinahanglang magpabilin sa simbahan, sama sa pipino diha sa suka, hangtud nga motuhop kaniya ang tukma nga espiritu.”3
Kon si Presidente Snow maghisgut kabahin sa pagkakabig, siya naghisgot gikan mismo sa kasinatian. Siya kanunay maghisgut og duha ka mga panghitabo—ang usa nahitabo sa wala pa siya mamiyembro sa Simbahan ug ang usa nahitabo dili lang dugay human sa iyang bunyag ug kumpirmasyon—nga nakatabang nga “motuhop kaniya ang tukma nga espiritu.” Inyong mabasa ang mga kasaysayan niining mga kasinatian sa mga pahina 1, 3, 69, ug 72–73.
“Ngano nga ang [usa] ka tawo gitawag sa pagbarug isip presidente sa usa ka grupo sa katawhan?” nangutana kausa si Presidente Snow. “Aron ba sa pagbaton og impluwensya ug unya gamiton kana nga impluwensya alang sa pagtuboy sa iyang kaugalingon? Dili, apan sa sukwahi, gitawag siya sa paglihok sa mao nga katungdanan diha sa samang baruganan nga ang priesthood gihatag ngadto sa Anak sa Dios, nga siya kinahanglan nga maghimo og mga sakripisyo. Alang sa iyang kaugalingon? Dili, apan sa mga kaayohan sa katawhan kinsa iyang gidumala. … Mahimong sulugoon sa iyang mga kaigsoonan, dili ilang agalon, ug sa pagtrabaho diha sa ilang kaayohan ug kapuslanan.”4
Isip usa ka lider sa Simbahan, si Presidente Snow nagsunod niining baruganan, ug usahay siya mamugnaon sa pagbuhat niini. Sama pananglit, kausa migamit siya og mga turnip, mga bedsheet, ug mga straw aron sa pagbayaw sa grupo sa mga Santos nga nag-antus. Kini nga kasaysayan mabasa sa kapitulo 7. Aron makabasa sa pipila sa iyang mga pagtulun-an kabahin sa pagpangulo sa Simbahan, tan-awa ang kapitulo 18.
Si Presidente Snow gamhanan, mamugnaon, ug epektibo nga lider tungod kay siya nasayud kon si kinsa ang tinuod nga Lider. Siya mitudlo, “Ang dakong buhat karon gipatuman—ang pagpundok sa mga tawo gikan sa kanasuran sa kalibutan dili gikan sa hunahuna ni bisan kinsa nga tawo o grupo sa mga tawo; apan nagagikan kini sa Ginoo nga Labawng Makakagahum.”5 Isip tubag sa panagpundok sa mga miyembro sa Simbahan kinsa mipasidungog kaniya sa iyang ika-85 nga adlawng natawhan, siya miingon, “Ako mibati nga kon unsa man ang akong nahimo dili kana si Lorenzo Snow, ug ang mga kasinatian nga nagdala kanako niini nga posisyon isip Presidente sa Simbahan—dili si Lorenzo Snow, apan ang Ginoo ang naghimo niini.”6
Kini nga kamatuoran iyang gitudlo sa tibuok niyang pagpangalagad, apan siya napahinumduman niini sa balaan ug sa personal nga paagi sa wala pa siya nahimong Presidente sa Simbahan. Siya ang nahimong senior nga Apostol sa Simbahan sa dihang namatay si Presidente Wilford Woodruff niadtong Septyembre 2, 1898. Gikonsiderar ang iyang kaugalingon nga dili takus sa pagtuman niining responsibilidad, siya nag-inusara nga miadto sa usa ka kwarto sa Templo sa Salt Lake aron mag-ampo. Siya nangamuyo og paggiya apan mibati nga walay tubag sa iyang pag-ampo, busa pagkataud-taud migawas siya sa kwarto ug misulod sa dakong hawanan. Didto iyang nadawat ang tubag. Ang nabanhaw nga Manluluwas mibarug sa iyang atubangan, mga tulo ka pye (1 m) ibabaw sa salug, ug misulti kaniya kon sa unsang paagi pangulohan ang Simbahan. Sa pagkat-on og dugang kabahin niining kasinatian, basaha ang kapitulo 20.
Si Presidente Snow nailhan pag-ayo sa pagdawat sa pinadayag sa balaod sa ikapulo. Alang sa mga miyembro sa Simbahan niadtong 1899, kini nga pinadayag gisugdan uban sa maisugong pagpahayag: “Ang panahon miabut na karon alang sa matag Santos sa Ulahing mga Adlaw, kinsa nagtinguha sa pagpangandam alang sa umaabut ug mobarug nga lig-on diha sa tukmang pundasyon, sa pagbuhat sa kabubut-on sa Ginoo ug sa pagbayad sa iyang ikapulo sa hingpit. Kana ang pulong sa Ginoo nganha kaninyo.”7
Ang mga Santos sa Ulahing mga Adlaw matinud-anong mituman sa tambag sa ilang propeta, ug ang Ginoo mipanalangin kanila sa tinagsa ug sa tiningub nga paagi isip resulta niini. Ang impluwensya niana nga pagpadayag nagpadayon karon, samtang ang mga miyembro sa Simbahan sa tibuok kalibutan nakadawat sa espiritwal ug temporal nga mga panalangin pinaagi sa pagkamasulundon sa balaod sa ikapulo. Aron sa pagbasa sa kasinatian nga nakaparesulta niini nga pagpadayag ug sa mga panalangin nga nagsunod niini, tan-awa sa kapitulo 12.
Sama sa ubang propeta, si Presidente Snow mipamatuod og gamhanang pagsaksi ni Jesukristo. Siya mitudlo: “Kitang tanan nagsalig ni Jesukristo, sa iyang pag-anhi sa kalibutan sa pag-abli sa dalan diin kita makabaton og kalinaw, kalipay ug kahimayaan. Ug kon wala pa niya kini buhata kita dili gayud makabaton niini nga mga panalangin ug mga pribilehiyo nga gipasalig ngari kanato diha sa ebangehlyo.”8 Siya mipamatuod sa pagkatawo sa Manluluwas, mortal nga pangalagad, Pag-ula, personal nga miatiman sa Iyang gipahiuli nga Simbahan, ug sa Ikaduhang Pag-anhi. Alang sa dugang nga mga pulong sa pagpamatuod ni Jesukristo, tan-awa sa kapitulo 24.
Siyempre, kining mubo nga artikulo makahatag kaninyo og mubong kasayuran sa kinabuhi ug pangalagad ni Presidente Snow. Sa inyong pagtuon sa Mga Pagtulun-an sa mga Presidente sa Simbahan: Lorenzo Snow, kamo makakaplag og daghan pang makapadasig nga mga istorya, lakip sa kasaysayan sa iyang unang oportunidad sa pagtudlo isip usa ka misyonaryo, ang iyang hingpit nga pagkasurprisa sa dihang gitawag sa pagserbisyo sa Korum sa Napulog Duha ka mga Apostoles, ang iyang mga pagbati sa dihang nagsakay siya sa usa ka barko sa may Atlantic Ocean atol sa kusog kaayo nga unos, ug upat ka mga higayon nga ang gahum sa priesthood miluwas sa mga katawhan (lakip mismo ni Lorenzo Snow) gikan sa kamatayon. Makakat-on kamo pag-ayo gikan sa iyang mga pagtulun-an sa daghang mga hilisgutan, lakip sa panaghiusa, pagkamapainubsanon, pakigsaad, buhat sa templo, relasyon sa pamilya, paningkamot para sa kahingpitan, priesthood, Relief Society, ug ang kalipay sa pagpakigbahin sa ebanghelyo.
Kon kamo nakagahin og panahon sa pagbasa ug pagpamalandong sa pipila sa mga kasaysayan ug mga pagtulun-an nga gihisgutan niining artikulo—o gani determinadto nga basahon kini unya—makasigurado kamo nga malipay si Presidente Snow sa inyong paningkamot. Siya nagkat-on sa tibuok niyang kinabuhi, ug siya nagtudlo nga kita kinahanglang “maningkamot sa atong kaugalingon” aron kita “mouswag diha sa mga baruganan sa kamatuoran” ug “molambo diha sa langitnong kahibalo.”9 Siya miawhag, “Matag pinakaulahing adlaw o matag pinakaulahing semana kinahanglan mao ang labing nindot nga atong nasinati, buot ipasabut, kinahanglan natong palamboon og gamay ang atong kaugalingon matag adlaw, diha sa kahibalo ug kaalam, ug sa abilidad sa paghimo og maayo.”10
Unta ang inyong kinabuhi magmabungahon karong tuiga pinaagi sa inyong pagtuon sa Mga Pagtulun-an sa mga Presidente sa Simbahan: Lorenzo Snow. Samtang kamo nagtuon, makasinati kamo og sama niadtong buotan nga ministro nga nakahimamat mismo ni Presidente Snow. Maglantaw lapas pa sa mabination nga nawong ug kadtong malinawon nga mga mata, inyong mabati nga kamo nagbarug sa balaan nga dapit—dili tungod kay nakaila ninyo si Lorenzo Snow apan mas naduol kamo sa inyong Langitnong Amahan ug ni Jesukristo, nga usa siya ka saksi Kanila.
Si Presidente Snow nagsangyaw nga ang pagbayad og ikapulo magdala og mga panalangin. Ang ikapulo sa una pagadawaton sa mga opisina sama sa gipakita dinhi (Salt Lake City, mga 1880). Sa wala: Agig pagpangandam sa pag-abi-abi sa pipila ka mga higala, si Presidente Snow naghimo og mga butanganan sa kandila gikan sa mga turnip sa pagpanuga sa iyang balay nga troso [log home].
Si Lorenzo Snow adunay balaanong kasinatian nga nakakita sa nabanhaw nga Ginoo diha sa Templo sa Salt Lake.
Sa wala: background © Artbeats; litrato pinaagi ni John Willard Clawson © IRI; sa tuo: gilitratohan ni Robert Casey
Gikan sa wala: paghulagway pinaagi ni Brian Call; gilitratohan ni Robert Casey; litrato sa maayong kabubut-on sa Church History Library
Litrato sa maayong kabubut-on sa Church History Library; detalye gikan sa Ang Ikaduhang Pag-anhi, ni Grant Romney Clawson © IRI