Ang Balaang Pagtahud sa Dios Mao ang Sinugdanan sa Kaalam
Gikan sa usa ka pakigpulong sa gradwasyon nga gipamulong niadtong Abril 10, 2009, sa Brigham Young University–Idaho. Alang sa kompleto nga teksto sa Iningles, bisitaha ang http://web.byui.edu/DevotionalsAndSpeeches.
Ang kaalam sa kalibutan mahimong labing bililhon kon kini nagsunod sa kaalam sa Dios.
Kita nagpuyo sa kalibutan nga naghingapin ang impormasyon. Tingali ang simbolo niining kalibutan mao ang talagsaong Wikipedia, ang pinakadakong encyclopedia sa internet. Sa pagtabang kaninyo nga masayud unsa gyud ni kadako, sa 2012 lang misobra sa 2.5 ka bilyon ka mga pulong sa Iningles ug sobra sa 22 ka milyon nga artikulo sa mga 284 ka mga pinulongan. Adunay sobra sa 70 ka pinulongan nga bersyon sa Wikipedia nga may dili moubos sa 10,000 ka mga artikulo matag usa. Adunay sobra sa 4 ka milyon nga mga artikulo sa Iningles nga bersyon.1
Ang naghingapin nga impormasyon makita usab sa sobrang paggamit sa social networking site sama sa Facebook, nga namugna niadtong 2004 ug may sobra na sa 1 ka bilyon nga aktibong tiggamit sa tibuok kalibutan sa 2012,2 o ang YouTube, nga gipasiugdahan niadtong 2005, diin ang pipila sa mga video clip nareport nga gitan-aw og sobra sa 100 ka milyon ka beses.
Niining sobra kaayo kadaghan nga impormasyon, hilabihan gayud ang atong panginahanglan sa kaalam, kaalam sa pagpili ug pag-ila kon unsaon paggamit ang atong nakat-unan. Si T. S. Eliot, usa ka Kristiyano nga misulat niini daghang tuig na ang milabay, naghisgot kabahin sa atong kalibutan karon:
O sa tingpamulak ug tinglarag, pagkatawo ug kamatayon!
Ang mahangturong pagbalik-balik sa ideya ug aksyon,
Way hunong nga imbensyon, way hunong nga eksperimento,
Nagdala og kahibalo sa paglihok, apan dili ang kamalinawon;
Kahibalo sa pagpanulti, apan dili ang paghilum;
Kahibalo sa mga pulong, ug kaignorante sa Pulong.
Ang tanan natong kahibalo makapaduol nato sa kaignorante,
Ang atong kaignorante makapaduol nato sa kamatayon,
Usa ka kamatayon nga layo sa Dios.
Asa ang Kinabuhi nga atong nawala tungod sa pagpakabuhi?
Asa ang kaalam nga atong nawala tungod sa kahibalo?
Asa ang kahibalo nga atong nawala tungod sa impormasyon?
Ang paglabay sa panahon sa napulog duha ka mga siglo
Mas nakapalayo kanato sa Dios ug nakapaduol kanato sa Abug.3
Asa kutob ang inyong panabut sa kaalam? Ang pipila makasabut sa usa ka batan-ong babaye, naghinam-hinam sa iyang umaabot nga kasal, kinsa misyagit sa kalipay ngadto sa iyang ginikanan, “Ah, magminyo nako. Anaa na ko sa utlanan sa akong mga kasamok.” Ug ang iyang inahan mihunghong ngadto sa iyang bana, “Oo, apan wala siya masayud kon asa nga utlanan.”
Kon mas nakat-on ko sa kaalam sa Dios, mas nagtuo ko nga naa lang ko sa sinugdanan sa kaalam. Kini nakapaubos kanako sa pagkaamgo nga kinahanglan pa nakong mokat-on og daghan. Karon, naglaum ko nga mapalambo ang atong tinguha sa pagbaton og kaalam ug ilabi na sa kaalam sa Dios.
Ang mga Panalangin sa Kaalam
Gusto kong mohatag og gibug-aton sa pipila ka mga baruganan sa kaalam. Una, sa atong panahon sa impormasyon ug kahibalo, kita kinahanglang magtinguha og kaalam. Ang kaalam daghan kaayo og mga aspeto ug nagkalain-lain. Ang kaalam nga sayong naangkon nagdala og daghang mga panalangin. Ang kaalam sa usa ka dapit mahimong dili magamit sa lain nga dapit. Ug ang katapusan, ang kaalam sa kalibutan, nga sa daghang mga hitabo bililhon kaayo, mahimong labing bililhon kon kini nagsunod sa kaalam sa Dios.
Ang kasulatan naghulagway og duha ka matang sa kaalam: ang kaalam sa kalibutan ug ang kaalam sa Dios. Ang kaalam sa kalibutan adunay positibo ug negatibo nga bahin. Sa labing bati nga pagkahulagway, kini mahulagway nga may gamay nga kamatuoran, gisagulan sa pagka-intelihenti ug pagmanipular, sa pagkab-ot sa hinakog o dautang mga katuyoan.
Usa ka ehemplo diha sa Basahon ni Mormon mao si Amlici. Ang kasulatan nag-ingon “may usa ka tawo, nga gitawag og Amlici, siya ingon nga usa ka maliputon kaayo nga tawo, oo, usa ka maalamon nga tawo ingon ngadto sa kaalam sa kalibutan … [nakadani] og daghan nga mga katawhan uban kaniya.” Ang kasulatan nagpadayon sa paghulagway ni Amlici nga “dautan nga tawo, … [kansang] tuyo [mao] nga malaglag ang simbahan sa Dios” (Alma 2:1–2, 4; emphasis gidugang). Kita dili interesado niini nga matang sa kaalam.
Adunay lain nga matang sa kaalam sa kalibutan nga dili gayud dautan. Sa pagkatinuod kini positibo kaayo. Kini nga kaalam mabatunan pinaagi sa pagtuon, pagpamalandong, pag-obserbar, ug pagkugi. Kini bililhon kaayo ug makatabang sa mga butang nga atong gipangbuhat. Alang sa buotan ug desente nga mga tawo, kini moabut samtang kita nagsinati sa atong mortalidad.
Inyong mahinumduman ang komentaryo sa Amerikanong awtor nga si Mark Twain: “Sa dihang 14 anyos pa ko, ang akong amahan ignorante kaayo nga dili gyud ko ganahan kon anaa siya. Apan sa dihang nag-21 anyos na ko, natingala ko sa kadaghan sa iyang nakat-unan sulod sa 7 ka tuig.”4 Kon kita magmabinantayon, kon kita manggihunahunaon, daghan kita’g makat-unan paglabay sa panahon.
Nakahinumdom ko sa dihang migradwar ko sa kolehiyo. Mibyahe ko gikan sa Brigham Young University ngadto sa Preston, Idaho, USA, asa nagpuyo ang akong apohang babaye, si Mary Keller. Siya kaniadto 78 anyos ug nagluya. Namatay siya duha ka tuig human niadto. Siya talagsaon nga babaye, ug nasayud ko nga kon naminaw ug nagkat-on pa ko gikan sa iyang mga kasinatian, makakat-on ko og kaalam nga makatabang kanako.
Atong malikayan ang makaguol nga mga kasinatian nga moabut sa atong kinabuhi pinaagi sa sayo nga pagbaton og kaalam—kaalam nga talagsaon sa usa ka tawo nga atong kaedad. Tinguhaa kini nga kaalam—magmapalandungon, magmabinantayon sa pag-obserbar, hunahunaa ang inyong mga kasinatian sa kinabuhi.
Kita usab makakat-on og kaalam sa atong piho nga mga propesyonal ug personal nga mga paningkamot. Tuguti ko sa paghatag kaninyo og duha ka ehemplo.
Si Dr. DeVon C. Hale usa ka doktor sa Siyudad sa Salt Lake nga nagdako sa Idaho Falls, Idaho. Nahingangha ko sa iyang kahibalo ug kaalam kalabut sa tropikanhon nga mga sakit. Dili lang ang kahibalo ni Dr. Hale apan ang iyang panabut usab sa paggamit niini nga kahibalo, naghan-ay sa matag bahin sa impormasyon ug nagdesisyon pinaagi sa pagkompara niini. Usa ka panalangin nga makabaton og ingon ana nga matang sa kaalam sa medikal para sa mga misyonaryo sa tibuok kalibutan.
Ikaduha nga ehemplo: Sa dihang ang among kinamagulangan nga anak nga lalaki nagsugod sa pag-eskwela og elementarya sa among dapit sa Tampa, Florida, USA, gusto namo nga makighimamat sa iyang magtutudlo sa kindergarten, si Mrs. Judith Graybell. Siya usa ka babaye nga mga 50 na ang panuigon ug may talagsaong abilidad sa pagtudlo sa mga bata. Nasayud siya kon unsaon sa pagdasig kanila, kanus-a modayeg kanila, ug kanus-a mag-inistrikto kanila. Adunay siyay kahibalo unsaon sa pagtudlo kanila, apan adunay daghan pa kalabut kaniya. Kami naningkamot nga mapasulod ang among mga anak sa iyang klasehanan sa kindergarten.
Kining duha ka tawo nagpakita og pinili nga kaalam sa kalibutan. Ang ilang kaalam nakatabang sa daghang mga tawo ug nagtugot kanila nga magmalampuson sa ilang propesyon.
Hinoon, kinahanglan natong hunahunaon ang limitasyon niini nga kaalam. Ang kaalam sa usa ka dapit mahimong dili magamit sa lain nga dapit. Sama pananglit, dili nako gusto nga si Mrs. Graybell modayagnos sa tropikanhon nga mga sakit, ug dili nako gusto nga si Dr. Hale motudlo sa klase sa kindergarten sa akong anak.
Labaw nga importante, ang kaalam nga nakahatag og kalampusan dinhi sa kalibutan kinahanglang ikaduha lang sa kaalam sa Dios ug dili hunahunaon nga mas labaw niini.
Hinumdumi: ang tanang kaalam wala mamugna nga patas.
Ang Salmista miingon, “Ang pagkahadlok sa Ginoo mao ang sinugdanan sa kaalam” (Salmo 111:10). Ang gisapabut sa kasulatan mao nga ang “mahinuklugong balaan nga pagtahud”5 sa Ginoo mao ang sinugdanan sa kaalam. Kana nga mahinuklugong balaan nga pagtahud moabut tungod kay ang atong Langitnong Amahan “aduna sa tanan nga kaalam, ug tanan nga gahum, sa langit ug sa yuta” (Mosiah 4:9). Ang Iyang kaalam hingpit. Kini putli. Kini dili hakog.
Kini nga kaalam, usahay, mao ang katugbang sa kaalam sa kalibutan, buot ipasabut ang kaalam sa Dios ug ang kaalam sa kalibutan magkasumpaki sa usag usa.
Nakahinumdom ba kamo sa mga pulong sa Ginoo diha sa Isaias?
“Kay ang akong mga hunahuna dili mao ang inyong mga hunahuna, ni ang inyong mga dalan akong mga dalan, nag-ingon ang Ginoo.
“Kay maingon nga ang mga langit hataas kay sa yuta, mao man ang akong mga dalan labi pang hataas kay sa inyong mga dalan, ug ang akong mga hunahuna kay sa inyong mga hunahuna” (Isaias 55:8–9).
Ang kaalam sa Dios dili moabut kanato tungod kay katungod nato kini; kinahanglan nga kita andam sa pagpangita niini “Kon aduna man kaninyo’y nakulangan og kaalam, papangayoa siya sa Dios, nga nagapanghatag ngadto sa tanang mga tawo sa madagayaon gayud ug sa walay pagpamoyboy; ug kini igahatag kaniya” (Santiago 1:5; emphasis gidugang).
Ang kaalam sa Dios usa ka espiritwal nga gasa. “Ayaw pangita sa mga katigayunan apan sa kaalam, ug tan-awa, ang mga misteryo sa Dios pagaablihan nganha kanimo, ug unya ikaw mahimo nga adunahan” (D&P 6:7; emphasis gidugang).
Ang pagpangita sa kaalam sa Dios sa kanunay pagaubanan sa pagkamasulundon ngadto sa mga kasugoan.
Sa kinatibuk-an, ang espiritwal nga gasa sa kaalam moabut anam-anam samtang kita matinuoron ug makugihong mangita niini. “Ako mopadayag ngadto sa mga katawhan og pagtulun-an human sa usa ka pagtulun-an, lagda human sa usa ka lagda, … ug bulahan kadto kinsa mopatalinghug ngari sa akong mga lagda, … kay sila makakat-on og kaalam; kay ngadto kaniya nga modawat Ako mohatag og dugang pa” (2 Nephi 28:30; emphasis gidugang).
Si Joseph Smith miingon niini: “Ang butang sa Dios adunay bug-at nga kahulugan; ug ang panahon, ug kasinatian, ug pagmabinantayon ug pagpamalandong ug matinud-anong mga hunahuna maoy bugtong paagi nga makakaplag niining tanan.”6 Dili nato basta-basta lang nga makita ang kaalam sa Dios.
Sa katapusan, ang tinubdan sa kaalam sa Dios lahi kay sa kalibutan. Ang kaalam sa Dios makita diha sa mga kasulatan, sa mga pagtulun-an sa mga propeta (sama sa kinatibuk-ang komperensya), ug, siyempre, sa atong mga pag-ampo (tan-awa sa D&P 8:1–2). Ug kanunay gayud kini nga kaalam moabut kanato pinaagi sa gahum sa Espiritu Santo. Si Apostol Pablo miingon:
“Kay kinsa bang pagkatawhana ang nasayud sa mga hunahuna sa tawo, gawas sa espiritu nga anaa nianang tawhana? Maingon man usab,walay bisan usa nga makasabut sa mga hunahuna sa Dios, gawas sa Espiritu sa Dios. …
“Kini among panagsultihan dili pinaagi sa mga pulong nga gitudlo sa tawhanong kaalam, kondili gitudlo sa Espiritu Santo” (1 Mga Taga-Corinto 2:11, 13; emphasis gidugang).
Gamit ang kaalam sa Dios, kita makalantaw lapas pa sa atong sirkumstansya karon tungod, sama sa gisulti sa kasulatan, “ang Espiritu … namulong sa mga butang ingon nga sila gayud mao, ug sa mga butang ingon nga sila gayud mahimo unya” (Jacob 4:13).
Ang kaalam sa Dios mao ang kaalam nga angay sa atong hingpit nga atensyon.
Kaalam ug Ikapulo
Tingali ang labing importante nga punto mao nga dili tanang kaalam gimugna nga patas. Kita kinahanglan nga makat-on nga kon adunay panagsumpaki tali sa kaalam sa kalibutan ug sa kaalam sa Dios, kinahanglan kita mosunod sa kabubut-on sa Dios.
Kita mga anak sa Dios. Kita espiritwal nga mga nilalang nga anaa sa mortal nga misyon. Kita nga mapahinunguron sa pagkat-on sa kaalam sa kalibutan ug sa kaalam sa Dios kinahanglang dili gayud maglibug kon asa nga kaalam ang mas importante.
Tuguti ko nga mopakigbahin og kasinatian gikan sa usa ka matinud-anong Santos sa Ulahing mga Adlaw sa São Paulo, Brazil. Siya naghisgut sa iyang panlimbasug sa pagbayad sa iyang ikapulo o sa tuition. Kini mao ang iyang mga pulong:
“Ang unibersidad … nagpugong sa mga estudyante nga may utang [o wala makabayad sa ilang tuition] sa pagkuha sa mga eksamin.
“Nakahinumdom ko og higayon sa dihang … misagubang ko og seryosong kakulang sa pinansyal. Huwebes kadto sa dihang nadawat nako ang akong sweldo. Sa dihang nahimo na nako ang binulan nga badyet, nakabantay ko nga dili kini paigo sa pagbayad [sa duha] sa akong ikapulo ug sa unibersidad. Kinahanglan ko nga mopili og usa kanila. Ang matag duha ka bulan nga mga eksamin magsugod na sa sunod semana, ug kon dili ko makakuha niini, hagbong nako karong tuiga. Nasagmuyo ko pag-ayo. … Tumang kaguol ang akong gibati.”
Kini usa ka direktang panagsumpaki tali sa kaalam sa kalibutan ug sa kaalam sa Dios. Bisan tuod buotan mo kaayo ug matarung, inyo kining masinati sa inyong kinabuhi, kon kamo matinuoron sa inyong kaugalingon, nga maguol mo pag-ayo kon kini nga mga pagsumpaki mahitabo.
Mobalik ko sa iyang istorya. Una, iyang gibayaran ang iyang ikapulo pagka-Dominggo. Pagka-Lunes iyang gi-asoy ang nahitabo:
“Ang oras sa pagtrabaho hapit na matapos sa dihang ang tag-iya miduol kanako ug mihatag kanako sa katapusang mga order nianang adlawa. … Sa kalit lang, mihunong siya, ug nangutana, ‘Kumusta ang imong eskwela sa kolehiyo?’ [Iya kining gihulagway nga bati og batasan nga tawo, ug ang iya lang nasulti mao kini:] ‘Maayo ra ang tanan!’”
Dayon milakaw ang tag-iya. Diha-diha dayon ang sekretarya misulod sa kwarto. Miingon siya, “Ang tag-iya bag-ohay lang nga misulti nga sukad karon, ang kompaniya mao ang mobayad sa tanang bayrunon sa eskwelahan ug sa imong mga libro. Sa dili pa ka mogawas, hapit una sa akong lamesa ug pahibaloa ko kon pila ang bayrunon aron inigka ugma mahatag nako nimo ang tseke.”7
Kon kamo sensitibo [receptive], inyong makaplagan nga kamo makasinati sa makadaghan niining mga matang sa pagsulay sa inyong kinabuhi. Asa man kamo mosalig? Paminawa ang pasidaan sa Ginoo direkta ngari kanato:
“O ang pagkakawang, ug ang pagkahuyang, ug ang kabuang sa mga tawo! Kon sila makinaadmanon [sa kaalam sa kalibutan] sila nagtuo nga sila maalamon, ug sila dili mopatalinghug ngadto sa tambag sa Dios, kay sila misalikway niini, nagdahum nga sila nasayud sa ilang mga kaugalingon [sa kaalam sa kalibutan], busa, ang ilang kaalam mga binuang ug kini dili mapahimuslan kanila. Ug sila malaglag.
“Apan ang pagkamakinaadmanon [sa kaalam sa kalibutan] maayo kon sila mopatalinghug ngadto sa mga tambag sa Dios” (2 Nephi 9:28–29; emphasis gidugang).
Karon gikan ni Pablo:
“Hain na man ang tawong manggialamon? … wala ba sa Dios pakabinuanga ang kaalam nga iya sa kalibutan?” (1 Mga Taga-Corinto 1:20).
“Wala untay bisan kinsa nga maglimbong sa iyang kaugalingon. Kon aduna kaninyoy magadahum nga siya manggialamon niining kapanahonan karon, magpakabuang unta siya, aron mahimo siyang manggialamon.
“Kay ang kaalam nga iya niining kalibutana maoy usa ka binuang sa atubangan sa Dios” (1 Mga Taga-Corinto 3:18–19; emphasis gidugang).
Ang pagsulay sa kanunay mao kon ato bang tugutan ang kaalam sa Dios nga maoy atong giya sa dalan kon mosumpaki kini sa kaalam sa kalibutan.
Si Ammon namalandong, “Kay sila dili mangita og kaalam [ang kaalam sa Dios], ni sila mitinguha nga siya momando ibabaw kanila” (Mosiah 8:20). Kon maghunahuna kabahin niadtong andam nga ang kaalam sa Dios modumala kanila, makahunahuna ko og usa nako ka higala sa mainland China, si Xie Ying, kinsa mihimo og dagkong mga sakripisyo aron mamiyembro sa Simbahan ug magserbisyo og misyon sa New York. Makahunahuna ko sa akong duha ka anak nga babaye, silang duha mga intelehente kaayo nga may mga master’s degree apan mipili sa panalangin sa pagkainahan ug magbaton og mga anak. Makahunahuna ko og usa ka higala gikan sa South America kinsa mibiya sa iyang nindot kaayo nga trabaho sa dihang iyang nasayran nga kini wala mobayad sa eksaktong buhis. Silang tanan misunod sa kaalam sa Dios kaysa kaalam sa kalibutan.
Makaguol, ang kaalam sa kalibutan makalingla sa makamao nga mga tawo. Si Joseph Smith miingon niini nga paagi: “Adunay daghan usab nga bantugang maalamon nga mga lalaki, ug mga babaye, sa taliwala kanato kinsa maalamon ra kaayo nga matudloan; mao nga kinahanglan gayud silang mamatay sa ilang ka ignorante, ug sa pagkabanhaw ilang makaplagan ang ilang sayop.”8
Ang Kaalam ug mga Panalapi
Tungod sa kalisud sa atong ekonomiya, tuguti ko nga hisgutan ang personal nga panalapi. Sa atong kahimtang karon kitang tanan mas mapainubsanon ug mas matudloan —apan hunahunaa ang nanglabay nga mga katuigan.
Ang kalibutan nagtudlo nga kon gusto nato ang usa ka butang, kinahanglang maangkon nato kini. Kinahanglang dili kini nato paabuton. Ang utang makapahimo nga maangkon kini nato karon. Kana nga utang mahimo pinaagi sa mga credit card, o pinaagi sa pagkolateral sa atong gipanag-iya nga balay. Atong makolateral ang naa kanato, bisan gani ang atong edukasyon. Ang bili kanunay magsaka, ug kita molambo. Ang kaalam sa kalibutan mao nga ang kantidad sa binulang pagbayad mas importante kaysa katindad sa atong gi-loan. Ang atong pinansyal nga mga obligasyon ingon og makontrol ra nato, ug kon mapakyas ang tanan, ang pagka-bankrupt mao ang atong katapusang opsyon.
Karon hunahunaon nato ang kaalam sa Dios sa personal nga mga panalapi, nga kanunayng gitudlo sa mga propeta. Ang sukaranan mao ang pagpaningkamot sa kaugalingon ug buhat. Atong gamiton ang kwarta sa saktong gamit niini pinaagi sa pagbayad og matinuorong ikapulo ug paghatag og sobra sa atong mga halad. Kita magpuyo nga ubos pa kaysa atong kinitaan, ug kita moila tali sa atong mga panginahanglan ug sa atong gusto lang. Kita maglikay og utang gawas lang sa kinahanglanon gayud nga mga panginahanglan. Kita magpakabuhi sumala sa atong badyet. Kita magtigom. Kita mobayad sa tanan natong pinansyal nga mga obligasyon.
Mga 14 ka tuig ang milabay, si Presidente Gordon B. Hinckley (1910–2008) mipasidaan: “Mosugyot ko nga ang panahon miabut na nga han-ayon nato ang atong mga panimalay. Daghan kaayo sa atong mga katawhan ang nagpuyo nga hapit dili paigo ang ilang kinitaan. Sa pagkatinuod, ang pipila nagpuyo na lang sa utang. … Adunay timailhan sa maunuson nga panahon sa unahan nga kinahanglan natong pangandaman.”9
Pipila ka tuig ang milabay sa panahon nga kita mabungahon gyud kaayo, si Presidente Thomas S. Monson miingon:
“Mga kaigsoonan, likayi ang pilosopiya nga ang kahayahay kaniadto nahimo na nga panginahanglan karon. Dili kini panginahanglan gawas kon mao kana ang atong hunahuna. Daghan ang misulod sa dugay nga pagpangutang hangtud adunay moabut nga kausaban: mga tawo nasakit o dili na makatrabaho, mga kompaniya nabangkaruta o nanaktak og empleyado, nawad-an og mga trabaho, natural nga mga katalagman moabut. Sa daghang mga katarungan, ang pagbayad sa dagko nga mga utang dili na mahimo. Ang atong utang nahimong espada ni Damocles nga nagbitay sa ibabaw sa atong mga ulo ug naghulga sa pagpatay kanato.
“Nag-awhag ako kaninyo sa pagpakabuhi sumala sa inyong kinitaan. Dili makagasto ang usa ka tawo sobra sa kinitaan ug makabayad sa iyang mga obligasyon. Mosaad ako kaninyo nga mas magmalipayon kamo kay sa pirme kamong mabalaka kon unsaon sa pagbayad sa sunod ang wala kinahanglana nga utang.”10
Inyo bang nakita kon sa unsa nga paagi nga ang kaalam sa Dios nagkasumpaki sa kaalam sa kalibutan? Ang pagpili dili ingon ka klaro kon ang tanan mabungahong tan-awon. Daghang mga miyembro sa Simbahan nagmahay nga unta mas nagpatalinghug sila.
Kini mao ang kaalam sa Dios.
Mosugyot ko nga inyong isulat ang mga isyu nga inyong gisagubang. Linyahi ang tunga-tunga sa piraso sa papel. Ilista ang kaalam sa kalibutan sa wala nga bahin ug ang kaalam sa Dios sa tuo nga bahin. Isulat ang mga isyu nga nagkasumpaki sa usag usa.
Unsa man ang inyong pilion?
Sa seksyon 45 sa Doktrina ug mga Pakigsaad, nga naghisgut sa mga hitabo sa hapit na ang Ikaduhang Pag-anhi sa Manluluwas, ang Ginoo nagsaysay pag-usab sa istorya sa napulo ka mga birhen ug dayon mibilin niining mga pulonga: “Kay sila nga maalamon, ug nakadawat sa kamatuoran, ug nakadawat sa Balaan nga Espiritu Santo alang sa ilang paggiya, ug wala malimbongi—sa pagkatinuod Ako moingon nganha kaninyo, sila dili pagaputlon ug ilabay ngadto sa kalayo, apan molahutay niana nga adlaw” (D&P 45:57).
Kita magtinguha sa kaalam sa Dios. Kita anaa karon sa krisis sa ekonomiya sa tibuok kalibutan, ug kini nakatampo og pipila ka mga problema samtang kita nagplano para sa atong mga trabaho ug kinitaan. Apan adunay daghang maayo ug mabungahong mga adlaw sa umaabot. Adunay daghan kaayo nga atong makat-unan karon kabahin sa kaalam. Mosaad ko kaninyo nga ang mga panalangin sa Ginoo maanaa kaninyo samtang kamo magtinguha og kaalam—ang kaalam sa Dios.
Paghulagway sa litrato pinaagi ni Derek Israelsen