Pagpakigbahin sa Akong Kahayag
Dolores Sobieski, California, USA
Dili kadto ordinaryo nga adlaw sa Southern California, USA, nga may dunay panugdog, kilat, kusog nga ulan, ug grabeng kainit. Naghinam-hinam ko nga maka-relaks ug magtan-aw og salida sa akong air-conditioned nga balay. Apan sa akong paglingkod, mibati ko nga kinahanglang tawagan nako ang akong higala nga si Sherrill.
Sa akong pagtawag, akong nahibaloan nga walay kuryente sa ilaha sukad pa pagkabuntag. Siya nabalaka nga ang iyang frozen nga pagkaon mahilis ug ang gatas madaot, busa among gibalhin ang iyang pagkaon sa akong refrigerator.
Pagkasunod gabii si Sherrill ug ako nagbarug atubangan sa iyang balay. Matag balay sa bahin sa dalan nga habig sa iyang balay ngitngit ang tanan, samtang ang naa sa pikas bahin sa dalan adunay kuryente. Usa ka balay ang nakakuha sa akong atensyon. Sa pikas bahin sa dalan, ang balay puno sa kahayag samtang ang mga tawo naglingkod diha sa may balkonahe nag-istoryahanay, nagkinataw-anay, ug naglingaw-lingaw.
Sa sunod nga mga adlaw, dili gyud nako makalimtan kadto nga eksena. Ang kalainan klaro gayud: hingpit nga kangitngit sa pikas bahin sa dalan ug hayag sa mga suga sa pikas bahin; ang mga tawo naglingkod sa kangitngit samtang ang mga silingan nagtagamtam sa kahayag.
Ang imahe nakapahunahuna kanako kon kapila ko nahisama niadtong mga tawo sa pikas bahin sa dalan—nagtagamtam sa kahayag sa ebanghelyo samtang ang uban naglingkod diha sa kangitngit. Naghunahuna ko sa akong kaugalingon nga naglingkod sa may balkonahe uban sa pipila ka mga higala sa simbahan, nagtagamtam sa kahayag sa ebanghelyo nga wala mopakigbahin niini sa uban.
Ang tanan nga anaa dinhi sa kalibutan natawo nga may kahayag—ang Kahayag ni Kristo. Isip miyembro sa Simbahan, kita adunay pribilehiyo sa pagdugang nianang kahayag pinaagi sa pagpakigbahin sa ebanghelyo. Ang Manluluwas mitudlo:
“Tan-awa, magdagkot ba ang mga tawo og usa ka kandila ug ibutang kini sa ilawom sa tadyaw? Dili, apan sa kandilero, ug kini mohatag og kahayag ngadto sa tanan nga anaa sulod sa balay;
“Busa, himoa nga ang inyong kahayag mohayag sa atubangan niini nga mga katawhan, aron sila makakita sa inyong maayo nga mga buhat ug himayaon ang inyong Amahan kinsa anaa sa langit” (3 Nephi 12:15–16).
Isip miyembro sa Simbahan, kita may responsibilidad nga ipakigbahin ang atong mga pagpamatuod kabahin ni Kristo aron ang tanan makakita—ilabi na niadtong naa sa espirituhanon nga kangitngit. Human niini nga kasinatian, determinadto ko nga mahimong matang sa tawo nga masaligan sa Langitnong Amahan nga mobiya sa kahayahay sa akong balkonahe ug dad-on ang kahayag sa ebanghelyo ngadto sa akong mga silingan nga anaa sa kangitngit.