Hugot nga Pagtuo, Paglaum ug mga Relasyon
Ang tinguha, pagtuo, ug paglaum kinahanglang modasig kanato sa pagpalambo og mga relasyon nga mosangput sa kaminyoon.
Nagsulat ba gyud ka og listahan sa mga ikaayo ug dili ikaayo?” Ang pangutana sa akong tin-edyer nga anak nga lalaki sa katingala nagpasabut sa listahan nga iyang nakita sa usa sa akong mga journal. Dili lang ni ordinaryo nga listahan sa ikaayo ug dili ikaayo; kini ang listahan nga akong gisulat mga 30 na katuig ang milabay, sa wala pa ko mag-proposed sa iyang inahan. Wala ko makahibalo kon pila ka lalaki ang naghimo og listahan sama sa akoa, apan sa dihang namalandong ko sa ideya nga magminyo isip 24 anyos nga estudyante sa kolehiyo, ingon og kini ang husto nga buhaton.
Wala na ko makahinumdom og lain pa nga mga pangutana niadtong adlawa gikan sa akong anak nga lalaki kabahin sa pagpanguyab; siya naka-focus lang gyud sa listahan. Nakahinumdom gihapon ko nga naglantaw niya, nagsinggit ngadto sa iyang mga igsoon, “Si Papa naghimo og listahan kabahin ni Mama! Tan-awa kini!” Hinoon, samtang naghinumdom ko, makahunahuna ko og daghang mga pangutana nga mahimo niyang ipangutana.
Wala ka ba mahigugma kaniya? Kini gyud unta ang una niyang pangutana. Ang akong tubag gyud unta kay oo; mao nga naghimo ko og listahan. Nahigugma gyud ko kaniya, ug nagtinguha ko labaw sa tanan nga magmalipayon siya. Ang listahan mas mahitungod sa pagsiguro kon makapalipay ba ko kaniya kaysa kon ako nahigugma o wala mahigugma kaniya.
Wala ba mo malingaw sa usag usa? Usab, ang akong tubag gyud unta kay oo; mao nga naghimo ko sa listahan. Kini usa ka paagi sa pagsiguro nga ang akong tinguha nga siya kanunay malingaw uban nako matinuod.
Wala ka ba maghunahuna nga siya na ang imong minyoan? Siguro kini mao nga pinaka makapaintriga nga pangutana sa tanan. Tubagon gyud unta ni nako og oo; nagtuo ko nga siya na ang “babaye nga akong minyoan,” apan gisigurado nako nga ang akong pagtuo makadasig og askyon sa akong bahin nga mahitabo ang gipaabut.
Nagtuo ko nga wala nako masabti sa hingpit niadtong higayona ang epekto sa mga pagtulun-an sa akong presidente sa misyon kabahin sa hugot nga pagtuo ug sa mga bahin niini nga tinguha, pagtuo, ug paglaum sa akong pagpanguyab. Uban sa mga klaro nga panglantaw gumikan sa paglabay sa panahon, mapasalamaton ko ni Presidente F. Ray Hawkins sa iyang impluwensya ngari kanako. Anaa gihapon nako ang mga mubong mga sulat nga akong gihimo isip 20-anyos nga misyonaryo samtang ang akong batan-ong presidente sa misyon miabli sa mga kasulatan ug mipasabut sa mga elemento sa hugot nga pagtuo nga magamit sa paghimo sa labing importante nga desisyon sa akong kinabuhi.
Mga Pagtulun-an ni Alma sa Hugot nga Pagtuo
Usa sa mga butang nga gipakigbahin ni Presidente Hawkins kabahin sa hugot nga pagtuo mao ang pagtulun-an ni Alma ngadto sa mga pobre taliwala sa mga Zoramites. Si Alma miila sa panginahanglan sa pagbaton og tipik sa hugot nga pagtuo, nga iyang gihulagway nga tinguha (tan-awa sa Alma 32:27). Ang tinguha alang sa usa ka butang nga mahitabo usa ka gamhanang impluwensya alang kanato sa pagbuhat sa gikinahanglang mga lakang sa pagpalambo sa atong pagtuo.
Ang ikaduha nga tipik sa hugot nga pagtuo nga gitudlo ni Alma nagagikan sa tinguha: pagtuo. Siya nanudlo sa mga Zoramites nga tugutan ang ilang tinguha nga modasig kanila hangtud sila motuo sa paagi nga ang iyang mga pulong maanaa sa ilang kasingkasing (tan-awa sa bersikulo 27). Kini nga kombinasyon sa tinguha ug pagtuo magsugod nga mabati diha sa atong kasingkasing, ug ato kining maila nga maayo. Kini mosugod sa pagpadako sa atong mga kalag ug pagdan-ag sa atong salabutan. Magsugod kini nga mahimong nindot. (Tan-awa sa bersikulo 28.)
Ang paglaum lain nga importanting tipik sa hugot nga pagtuo. Si Alma miingon sa mapainubsanong mga Zoramite nga ang hugot nga pagtuo dili ang pagbaton sa hingpit nga kasayuran sa mga butang. Kini ang “paglaum sa mga butang nga diin dili makita, diin mga tinuod” (Alma 32:21; emphasis gidugang). Si Mormon usab mitudlo nga ang paglaum kinahanglanon nga tipik sa hugot nga pagtuo sa dihang miingon siya ngadto kang Moroni, “Unsaon nga kamo makakab-ut ngadto sa hugot nga pagtuo, gawas nga kamo magbaton og paglaum?” (Moroni 7:40). Ang paglaum mahimong ihulagway nga abilidad nga makakakita sa mas maayo sa umaabot.1 Ang akong listahan mao ang akong paagi sa paglantaw sa umaabut uban ang mata sa hugot nga pagtuo ug, sama ni Abraham, determinado nga “adunay labaw nga kalipay ug kalinaw” (Abraham 1:2) alang kanako nga maminyo sa akong asawa.
Ang pagbaton og tinguha nga tipik sa hugot nga pagtuo, nanginahanglan ko og pagtuo ug paglaum aron mahingpit ang akong hugot nga pagtuo, ug kinahanglan ko nga molihok pinaagi sa paghangyo ni Rosalie sa pagminyo kanako. Ang listahan—akong pagpakita sa tinguha, pagtuo, ug paglaum—importante nga nakahatag kanako sa kaisug sa pagbuhat sa gikinahanglang aksyon sa pagkompleto sa akong hugot nga pagtuo. Si Santiago mitudlo nga ang pagtuo patay kon kini walay binuhatan (tan-awa sa Santiago 2:17). Walay bisan unsang gidaghanon sa tinguha, pagtuo, o paglaum ang makatabang kanako sa pagkakaplag og labaw nga kalipay ug kalinaw nga akong nasinati sa kaminyoon kon kadtong mga tipik wala pa moggiya kanako sa pagpangutana sa mahinungdanon kaayo nga pangutana. (Makaguol, sa unang higayon nga mi-propose ko, mibalibad si Rosalie, apan kini lain na usab nga istorya para sa laing higayon. Sa sama niini nga mga sirkumstansya—kon ang mga butang wala mahitabo sumala sa atong plano o timing—ang hugot nga pagtuo aduna gihapoy mahinungdanon nga bahin sa atong kinabuhi.) Kini nagkinahanglan og pagkamakanunayon ug pagmapailubon namong duha, ug sa wala madugay nagminyo mi sa tugnaw kaayo [snowy] nga panahon niadtong Disyembre 1982.
Ang hugot nga pagtuo importante sa tanan natong gibuhat, lakip ang pagpakig-date ug pagpanguyab. Ang tinguha, pagtuo, ug paglaum nga adunay labaw nga kalipay ug kalinaw nga nagpaabut kanato modasig kanato sa pagbuhat sa pagpalambo og mga relasyon nga modala ngadto sa kaminyoon. Nagtinguha ba mo sa pagsunod sa plano sa kalipay? Nagtuo ba mo nga ang pagsunod sa plano modala ngadto sa labaw nga kalipay ug kalinaw? (Tuohi ko kon mosulti ko kaninyo nga ang pagsunod sa plano ug pagminyo sa templo modala ngadto sa labaw nga kalipay ug kalinaw.) Naglaum ba mo sa malipayon nga kaminyoon? Ang inyo bang paglaum makapakita kaninyo sa inyong kaugalingon nga maanaa sa mas maayo nga dapit sa umaabot? Kon ang inyong mga tubag niining mga pangutanaha kay oo, nan kompletuhon ninyo ang inyong hugot nga pagtuo pinaagi sa paglihok. Hangyoa ang usa ka tawo nga mag-date! Dawata ang imbitasyon nga makig-date! Ibutang ang inyong kaugalingon sa sitwasyon nga makahimamat sa ubang mga young adult nga sama nimo og panghunahuna. Sa mubong pagkasulti, pagtinguha og dalan nga modala ngadto sa labaw nga kalipay ug kalinaw.
Ang Ehemplo ni Joseph Smith sa Hugot nga Pagtuo
Atong ikonsiderar si Joseph Smith isip ehemplo sa hugot nga pagtuo ug sa pagpakita sa mga tipik nga tinguha, pagtuo, ug paglaum.
Si Joseph nangita sa tinuod nga Simbahan ni Jesukristo. Ang iyang tinguha kusog kaayo nga kini naggiya kaniya ngadto sa mga kasulatan, diin siya nakabasa, “Ug kon aduna man kaninyoy nakulangan og kaalam, papangyoa siya sa Dios” (Santiago 1:5). Siya naghunahuna kabahin niining kasulatan. Siya nagtinguha nga makabaton og kaalam, ug siya nagtuo nga siya makaangkon niini kon siya mangutana sa Dios. Gibuhat lang niya ang angayan nga buhaton: siya nag-ampo ug nangutana sa Dios. Karon hunahunaa kini sa makadiyot. Si Joseph adunay tinguha nga masayud sa kamatuoran. Siya mituo sa mga pulong ni Santiago. Siya milaum og tubag. Apan kon mihunong pa siya didto, wala unta ta dinhi karon. Ang paggamit og hugot nga pagtuo nagpasabut nga kinahanglan niyang moadto sa kakahoyan ug mag-ampo. Nagtuo ko nga sa dihang si Joseph miadto sa kakahoyan para mag-ampo, siya nagdahum nga siya tubagon. Tingali wala siya magdahum nga makakita sa Langitnong Amahan ug ni Jesukristo, apan siya nagdahum og tubag. Talagsaon gyud nga ehemplo sa hugot nga pagtuo! Siya adunay tinguha, siya nagtuo, siya naglaum, ug siya milihok.
Ang hugot nga pagtuo sa 14 anyos nga batang lalaki nakapausab sa kalibutan. Tungod sa pag-ampo ni Joseph sa Sagradong Kakahoyan, ang kalangitan nabukas ug ang Dios nakigsulti pag-usab sa Iyang mga anak pinaagi sa propeta.
Usa sa Inyong mga Oportunidad sa Pagpakita og Hugot nga Pagtuo
Ang Ginoo nagpadayon sa pagsulti pinaagi sa Iyang propeta karon. Mga sobra lang sa usa ka tuig ug tunga ang milabay, si Presidente Thomas S. Monson miingon:
“Adunay yugto sa panahon nga higayon na nga seryosong maghunahuna kabahin sa kaminyoon ug mangita og gusto nimo nga ikauban hangtud sa kahangturan. Kon kamo maalamon nga mopili ug kon kamo mapasaligon sa kalampusan sa inyong kaminyoon, wala nay lain pa niining kinabuhia nga makahatag kaninyo og mas dakong kalipay.
“Kon kamo magminyo, … pangandoy kamo nga maminyo diha sa balay sa Ginoo. Alang kaninyo kinsa naghupot sa priesthood, kinahanglan nga wala nay lain pang kapilian. Pagmabinantayon aron dili mawala ang inyong kaangayan nga makasal sa ingon nga paagi. Makahimo kamo sa inyong panag-uyab nga anaa sulod sa mga lagda samtang nalingaw gihapon.”2
Ang inyong tinguha, pagtuo, ug paglaum mahimong dili makita diha sa usa ka listahan, sama sa akoa, apan sa bisan unsang paagi nga inyong mapakita kini nga mga kinaiya, kini makatabang kaninyo sa paghingpit sa inyong hugot nga pagtuo pinaagi sa pagsunod sa propeta sa Ginoo sa pagpangita og paris nga makakaplag kamo og labaw nga kalipay. Ang inyong tinguha, pagtuo, ug paglaum makatabang usab kaninyo sa pagpili sa maayo.
Ang mga panalangin sa pagpadayon ug pag-amuma og mahangturong kaminyoon mogiya kanato sa pagsinati sa bunga sa ebanghelyo, nga gihulagway ni Alma nga “bililhon kaayo, … tam-is labaw sa tanan nga tam-is, ug … putli labaw sa tanan nga putli.” Iyang gipadayon, “Kamo mokaon [niini nga bunga] gani hangtud kamo mabusog, nga kamo dili na gutumon, ni kamo uhawon” (Alma 32:42). Imbis nga mahadlok sa umaabot, gamita ang hugot nga pagtuo nga makatugot kaninyo sa pag-angkon sa mga saad sa Ginoo.
Paghulagway sa litrato pinaagi ni Ann Higgins
Mga paghulagway sa litrato pinaagi nila ni Craig Dimond ug Justin John Soderquist