Ang Lima ka Minuto nga Leksyon

Ni Christopher James Smith

Wala ko kaabut sa lima ka minuto nga cut off nga mahimo pang makasulod. Ang ingon niana nga gidugayon dili siguro makapugong nako sa pagtambong sa akong gradwasyon sa unibersidad.

Sa pagtapos sa katapusan nako nga tuig sa unibersidad, motambong ko og seremonyas sa gradwasyon diin ang bag-ong mga gradwado, magsul-ob sa naandan nga kalo ug gown, makadawat og degree gikan sa bisita nga dignitary. Gipaabut ko kini nga higayon, usa ka pagsaulog sa upat ka lisud nga tuig sa pagtuon. Nianang buntag dayon sa seremonyas, nakadawat ko og sulat gikan sa unibersidad apan wala ko kini dayon ablihi.

Ang seremonyas magsugod sa 1:30 sa hapon, ug nagplano ko nga magpalitrato sa dili pa kini magsugod. Subo lang, dunay daghang nagpalitrato, ug akong gitan-aw ang relo ug hapit na gayud magsugod. Apan dugay na kong naghulat ug determinado kong magpalitrato. Sa katapusan nahuman 10 ka minutos sa wala pa magsugod ang gradwasyon, midagan ko padulong sa hall.

Sa pag-abut nako didto, bisan pa, sirado na ang mga pultahan ug dunay mga gwardiya. Mihangyo ko nga makasulod apan mibalibad ang mga gwardiya, nag-ingon nga kinahanglan kong moabut 15 minutos sa dili pa magsugod aron makalingkod. Una kadtong higayon nga nakadungog ko mahitungod sa gikinahanglan, mao nga misupak ko. Apan ang mga gwardiya wala molihok. Upat ka tuig ko kining gitrabahoan aron maangkon kini nga degree, ug dili nako kini makuha atol sa seremonyas. Didto ko milingkod sa balkon uban sa mga tumatan-aw.

Dihang mipauli ko ug giablihan ang sulat nga nadawat nako nianang pagkabuntag, akong nabasa ang klaro nga instruksyon nga manglingkod na pinakaminus 15 minutos sa di pa magsugod o dili na makasulod. Gibati nako nga sama sa buangon nga mga dalagang birhen sa sambingay sa Manluluwas:

“Ug samtang [ang buangon nga mga dalagang birhen] nangadto sa pagpamalit, miabut ang pamanhunon ug sila nga andam misulod uban kaniya ngadto sa kumbira sa kasal: ug unya ang pultahan gitakpan.

“Tapus niini nangabut usab ang ubang mga dalaga, nga nanag-ingon, Senyor, Senyor, ablihi kami.

“Apan siya mitubag nga nag-ingon, Sa pagkatinuod magaingon ako kaninyo, nga wala ako makaila kaninyo” (Mateo 25:10–12).

Bisan og ang dili pagpaapil sa importante nga selebrasyon ingon og grabe nga sangputanan tungod sa daw gamay lang nga pagkasayop, akong naamguhan nga mao usab kini sa mga pagpili ug mga sangputanan. Kon mopunit ko sa tumoy sa usa ka tukog, gipunit sab nako ang laing tumoy niini. Mao usab sa bisan unsang pagpili, gipili nako dili lamang ang lihok apan usab ang kauban nga sangputanan—bisan og dili pa makita ang sangputanan niini.

Si Satanas ang gusto nga magpunting kita sa mga pagpili nga dili magtagad sa mga sangputanan. Sagad siyang mobuhat niini pinaagi sa pag-agni kanato sa pag-focus sa pisikal nga kahinam, “sa kabubut-on sa tawo” (2 Nephi 2:29), ug diha-diha nga katagbawan.

Ang atong Langitnong Amahan, sa laing bahin, nagtinguha nga kita mag-focus sa kalipay ug mahangturong mga panalangin. Naglaum siya kanato nga mohunahuna sa mga sangputanan kon magbuhat kita og mga desisyon ug sa paghimo sa mga sangputanan nga bahin sa atong kadasig: “Sila gawasnon sa pagpili sa kalingkawasan ug sa kinabuhi nga dayon, pinaagi sa halangdon nga Tigpataliwala sa tanan nga mga tawo, o pagpili sa pagkabihag ug sa kamatayon” (2 Nephi 2:27).

Samtang dili ko mapasalamaton nga wala makaabut sa pormal nga pagdawat sa akong degree, nagpasalamat ko sa unsay natudlo kanako niini nga kasinatian sa mahangturon nga panghunahuna—nga dili gayud ko mohimo og pagpili nga makasanta kanako sa pagsulod sa presensya sa Pamanhunon. Imbis masirad-an uban sa pulong nga “wala ako makaila kaninyo,” naningkamot ko sa paghimo og pagpili nga makapadungog kanako sa Iyang pag-ingon nga, “Dumuyog ka sa kalipay sa imong agalon” (Mateo 25:21).