Mga Ideya sa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang pipila ka mga ehemplo.

“Ang Pagkasuperior sa Kaalam sa Dios,” pahina 20: Ikonsiderar ang paghisgot sa kaalam sa kalibutan itandi sa kaalam sa Dios. Mahimo ninyong basahon ang 2 Nephi 9:28–29 ug paghunahuna og mga sitwasyon diin ang kalibutanon nga kaalam lahi sa kaalam nga gitudlo sa ebanghelyo. Paghukom hain nga dalan ang inyong subayon sa kada sitwasyon.

“2013 nga Tema sa Mutual,” pahina 50: Basaha ang mga artikulo ni Elaine S. Dalton ug David L. Beck sa 2013 nga Tema sa Mutual. Ikonsiderar ang pagpangita og mga paagi nga ikatabang sa mga sakop sa pamilya sa paghimo sa panimalay nga usa ka balaan nga dapit. Mahimo kamong mopakita og litrato sa templo sa inyong panimalay ug mohimo og tumong sa pagtambong sa templo isip pamilya.

“Padayon sa Pagpraktis,” pahina 56: Ikonsiderar ang paghimo og pasundayag sa talento sa pamilya. Isugyot nga ang kada sakop sa pamilya mangandam sa pagpakigbahin og kahanas o pasundayag. Pagkahuman basaha ang artikulo “Padayon sa Pagpraktis” ug hisguti sa unsa nga paagi nga ang pagpraktis ug pagpakigbahin sa mga talento makapanalangin niadtong anaa sa palibut.

“Pagpamatuod ni Evelyn sa Templo,” pahina 70: Ikonsiderar ang paghimo og “pagpamatuod sa pamilya.” Pagbutang og mga litrato diha sa kwarto ug ipakolekta sa mga sakop sa pamilya kadtong ilang gituohan (pananglit: mga litrato sa inyong pamilya, sa templo, ni Presidente Thomas S. Monson, bunyag, slip sa tithing, batan-on nga tarung nagsinina). Tapusa pinaagi sa paghisgot nganong mituo kamo niini.

Mga Leksyon sa Kangitngit

Usa ka adlaw sa Oktubre ang among anak nga si Julia, kinsa dili mahimutang panahon sa family home evening, miingon, “Wala gyud kita mag-family home evening sa ngitngit. Mahimo ba?” Naghunahuna mi unsaon ug unsay among itudlo niya sa kangitngit.

Among gipalong ang mga suga, ug hingpit nga kangitngit ang mitabon namo. Dayon giablihan sa akong bana ang iyang cellphone ug nagsugod sa pagtudlo mahitungod sa Kahayag ni Kristo. Iyang gipakita sa unsa nga paagi nga ang Kahayag ni Kristo makapagawas namo gikan sa kangitngit ug mogiya sa among pamilya balik ngadto Kaniya. Ang suga nga gikan sa cellphone dili kaayo hayag, apan igo na kini nga kami makakita.

Samtang mapalong matag karon ug unya ang suga sa cellphone, nakahimo kami sa pagpakita sa among anak kon unsay mahitabo sa among kinabuhi kon wala ang Manluluwas, nga si Jesukristo. Diha gyud ang Espiritu, ug ang among anak hingpit nga nagbinuotan. Bisan karon nakahinumdom siya sa among paborito nga family home evening ug sa mensahe nga gitudlo.

Valquíria Lima dos Santos, Brazil