Alang sa Kalig-on sa mga Kabatan-onan
Edukasyon
Dugang kahibalo makahatag nato og oportunidad nga mahimong dakong impluwensya sa pagtuman sa mga katuyoan sa Ginoo.
Uban sa dakong tinguha ug pakabana alang sa kaayohan sa ilang mga kalag, si Jacob mitudlo sa mga katawhan ni Nephi “mahitungod sa mga butang nga anaa na ug kana nga moabut pa” (2 Nephi 6:4). Iya kining mga katawhan, ug gimahal niya sila. Gitudloan niya sila kon kinsa gayud sila ug sa mga saad sa Ginoo mahitungod nila. Samtang siya mitudlo nila bahin sa Manluluwas, siya mituaw: “O pagkawalay katapusan sa pagkabalaan sa atong Dios! Kay siya nasayud sa tanan nga mga butang, ug walay butang nga siya wala mahibalo” (2 Nephi 9:20; emphasis gidugang).
Angay gayud kana nga hinumduman kon inyong hunahunaon ang kaimportante sa edukasyon. Gatusan ka tuig sa sayo pa, sa laing bahin sa kalibutan, si Amahang Abraham “mitinguha sa mga panalangin sa akong mga amahan” “usab nga mahimo nga usa kinsa makaangkon og dako nga kahibalo, ug mahimo nga usa ka labaw nga sumusunod sa pagkamatarung, ug makaangkon og dako nga kahibalo” (Abraham 1:2).
Kamong tanan mga minahal nga mga anak sa Dios1 ug “ang mga kaliwatan sa mga propeta ug kamo anaa … sa pakigsaad diin ang Amahan mihimo uban kang [Abraham]” (3 Nephi 20:25). Sama ni Abraham, anaa kaninyo ang kapasidad nga “makaangkon og dako nga kahibalo” samtang kamo matudloan sa mga butang, “nga angay alang kaninyo sa pagsabut” (D&P 88:78).
Ang Ginoo miingon nga ang maayong kahibalo naglakip “sa mga butang diha sa langit ug diha sa yuta, ug sa ilawom sa yuta; mga butang nga diha na, mga butang nga anaa, mga butang nga sa mubong panahon mahinabo; ang mga butang nga anaa sa panimalay, mga butang nga atua sa layong dapit; ang mga gubat ug ang mga kagubot sa mga nasud, ug ang mga paghukom nga anaa sa yuta; ug ang kasayuran usab sa mga nasud ug sa mga gingharian” (D&P 88:79).
Mga paghulagway sa litrato pinaagi ni Robert Casey
Ngano man? Ngano nga importante ang pag-angkon og edukasyon? Ang Ginoo Mismo mihatag og talagsaong pagpasabut: “Nga kamo unta maandam diha sa tanan nga mga butang kon Ako mopadala kaninyo pag-usab aron sa pagpalambo sa balaan nga tawag diin Ako nagtawag kaninyo, ug sa misyon diin Ako nagsugo kaninyo” (D&P 88:80).
Niining nagkalisud nga kalibutan, ang edukasyon mao ang usa sa labing importante nga maangkon sa kinabuhi. Ug samtang tinuod nga ang dugang edukasyon sa kinatibuk-an mosangpot sa oportunidad alang sa dugang nga temporal nga mga ganti, ang mas dakong bili sa dugang kahibalo mao ang oportunidad nga ikahatag niini nato nga mahimong dakong impluwensya sa pagtuman sa mga katuyoan sa Ginoo. Sumala sa gipasabut sa Alang sa Kalig-on sa Kabatan-onan: “Ang edukasyon usa sa importanting bahin sa plano sa Langitnong Amahan sa pagtabang ninyo nga mas mahisama Kaniya. Gusto Niya nga inyong edukahon ang inyong hunahuna ug palamboon ang inyong mga kahanas ug mga talento, ang inyong gahum sa pagbuhat og maayo sa inyong mga responsibilidad, ug ang inyong kapasidad sa pagpasalamat sa kinabuhi.”2
Si Propeta Joseph Smith mitudlo usab: “Adunay gahum sa kahibalo. Ang Dios adunay mas daghang gahum kay sa tanang mga binuhat, tungod kay Siya adunay mas daghang kahibalo.”3
Alang sa maayo nga mga rason, ang pormal nga edukasyon nagkinahanglan ninyo, sulod sa daghang mga tuig, sa pag-angkon og lain-laing mga kahanas ug mga hilisgutan, tingali ang uban dili ninyo pamilyar o diin dili makalingaw nga inyong tun-an. Bisan pa niana, kinahanglan kamong magmakugihon sa inyong mga pagtuon, kay makapalapad kini sa inyong panglantaw ug mopadako sa kapasidad sa inyong hunahuna aron makat-on usab sa laing mga bahin. Sa pagkatinuod, ang inyong kasinatian sa daghang lain-laing sukaranang mga kahanas ug mga hilisgutan makahatag ninyo og oportunidad sa pag-ila niadtong mga kahanas ug mga hilisgutan nga duna moy tinud-anay nga tinguha. Uban niini nga tinguha, samtang magpadayon kamo sa pagdugang sa inyong edukasyon, kamo adunay oportunidad sa pagpalambo pa niadtong inyong gusto kaayo.
Si Presidente Henry B. Eyring, Unang Magtatambag sa Unang Kapangulohan, mipakigbahin sa bililhong tambag nga iyang nadawat gikan sa iyang amahan diin ang iyang amahan mitambag kaniya sa pagpadayon sa edukasyon nga “ganahan kaayo mo nga dili na mo maghunahuna pa og lain, kana ang inyong hunahunaon”4 Si Sister Cardon ug ako mitambag sa among mga anak sa pagpadayon og edukasyon ug panarbaho nga gusto nila kaayo nga sila “malipayon nga moadto sa trabaho.”
Mipasidaan si Jacob sa iyang mga katawhan batok sa “pagkahuyang, ug ang kabuang sa mga tawo!” Siya mipasabut, “Kon sila makinaadmanon sila nagtuo nga sila maalamon, ug sila dili mopatalinghug ngadto sa tambag sa Dios.” Dayon siya midugang niining talagsaong kamatuoran: “Apan ang pagkamakinaadmanon maayo kon sila mopatalinghug ngadto sa mga tambag sa Dios” (2 Nephi 9:28–29).
Pagmakinaadmanon ug patalinghug ngadto sa Ginoo. Siya mopanalangin ug mopauswag ninyo sa pagtuman sa Iyang mga katuyoan.