Unsay Nakat-unan ni Agung sa Badminton
Usa ka tin-edyer nga Taga-Indonesia nakat-on nga ang pagbaton og paglaum makapugong niya sa pag-undang.
Igang kaayo sa Jogjakarta, Indonesia, ug nagkadusingot ang agtang ni Agung samtang siya naghulat sa iyang kontra nga moserbisyo. Ang sangka sa badminton sikit kaayo, ug ang 15 anyos naningkamot nga modaog.
Human sa grabing binayloay, ang iyang kontra mihapak sa bola [shuttlecock] palayo gikan ni Agung. Dili gusto nga makapuntos ang kontra sa maong sikit nga dula, gidayban ni Agung ang bola apan wala kaabut—ug nagkadugo tungod sa pagka-slide sa semento nga korte.
Makita gayud nga ganahan kaayo siya sa sangka sa badminton. Apan si Agung wala magdamgo nga mahimong propesyonal nga magdudula sa badminton. Dili siya kinahanglang mopili tali sa pagdula sa badminton didto sa Olympic ug pagserbisyo og misyon. Sa iyang kaugalingon pagtuo, dili siya maayo sa sport.
Mao nga nganong kining gamay nga tin-edyer nga dunay dakong pahiyom naningkamot pag-ayo? Paglaum.
“Nagtuo ko nga mas momaayo ko,” miingon siya.
Usa ka Rason alang sa Paglaum
Ang paglaum mao ang rason nga kita mibuhat og daghang mga butang. Mag-ehersisyo kita tungod sa paglaum nga mas makusgan ug mahimsog kita. Magpraktis kita og instrumento sa musika tungod kay naglaum ta nga makat-on sa pagpatukar. Nagpraktis si Agung og badminton tungod kay naglaum siya nga molambo.
“Kon dili ko maglaum nga mahimong mas maayo ug modaog, sayon kaayo ang pag-undang,” miingon si Agung.
Ang paglaum usa ka importante nga elemento sa plano sa kaluwasan. Ang paglaum nga kita mapasaylo mogiya nato sa paghinulsol ug pagsulay pag-usab human kita mapakyas sa pagtuman sa usa ka sugo.
Ang Pag-ataki ni Satanas sa Paglaum
Duha sa labing maayong hinagiban ni Satanas batok nato mao ang pagduha-duha ug pagkawala sa paglaum. Wala siya makausab sa plano sa Langitnong Amahan pinaagi sa paghunong sa Pag-ula. Apan makasulay gihapon siya sa pag-usab sa makapalimpyo nga epekto sa Pag-ula sa atong mga kinabuhi kon siya makapawagtang sa atong paglaum nga kita mapasaylo.
“Si Satanas gusto nga mawad-an kita og paglaum,” miingon si Agung, “tungod kay kon kita mohunong, makapalayo kini nato gikan sa Langitnong Amahan.”
Hinoon, kon si Satanas magmalampuson sa pagkuha sa atong paglaum, adunay mga paagi nga makakita kita pag-usab sa paglaum.
Pagpangita og Paglaum
Kon nagkinahanglan ta og paglaum alang sa umaabut, makatan-aw kita sa nangagi. Gigamit ni Agung ang ehemplo gikan sa eskwelahan nga nakatudlo niya niini nga leksyon. “Akong nakita nga kon ako magtuon og maayo, magmalampuson ko sa akong mga eksam,” miingon siya. “Tungod niana nga kasinatian, ako adunay paglaum nga kon ako magpraktis og maayo, mapalambo nako ang akong badminton,” miingon siya. “Ang akong kasinatian naghatag nako og paglaum.”
Kon nagkinahanglan ta og paglaum diha kang Jesukristo, makat-unan nato kini sa atong milabay nga mga kasinatian sa gahum sa Pag-ula (tan-awa sa Mga Taga-Roma 5:4) ug sa mga kasinatian sa uban, lakip sa mga kasinatian nga inyong madunggan sa sakrament miting, sa leksyon sa Sunday School, sa Liahona, o sa mga kasulatan (tan-awa sa Jacob 4:4–6).
Samtang magtuon kita sa malaumon nga mga pulong sa mga propeta, mag-ampo alang sa espirituhanong gasa sa paglaum, ug magkat-on sa pag-ila sa gahum sa Manluluwas sa atong mga kinabuhi, ang atong hugot nga pagtuo Kaniya motubo, ingon man usab ang atong paglaum nga Siya motabang nato sa umaabut.1
Ayaw Gayud Paghunong
Nakahibalo si Agung nga dili gayud tingali siya mahimong propesyonal nga atleta, apan nasayud siya nga kon magpadayon siya sa pagpaningkamot, adunay paglaum nga siya molambo.
Nakat-on siya nga ang dakong gahum sa paglaum mao kini: “Basta dili ka lang mohunong, adunay paglaum,” miingon siya.
Sa kinabuhi, ang Pag-ula ni Jesukristo mao ang importante nga tinubdan sa paglaum. Tungod sa Pag-ula makahinulsol kita kon kita makahimo og sayop. Nagpasabut usab kana nga tungod sa Pag-ula, wala kita mapakyas sa atong kinabuhi nga pagsulay kon kita masayop gawas kon kita mohunong sa pagpaningkamot sa paghinulsol ug pagsunod.
Mao nga nagpadayon si Agung sa pag-imbitar sa iyang amahan ngadto sa simbahan kada Dominggo. Mao nga nagpadayon siya sa pagbarug unsay eksakto, bisan kon ang iyang mga higala dili. Mao nga kanunay siya magbiseklita padulong og balik sa meetinghouse alang sa seminary, Mutual, mga miting sa Dominggo, mga klase sa pagpangandam sa misyonaryo, ug sa pagtabang og limpyo sa building.
“Dili sayon ang pagpaningkamot nga mahisama ni Jesus,” miingon si Agung. “Usahay mawala ang akong paglaum, apan dili ko mohunong. Tungod sa Iyang sakripisyo alang nako, duna koy paglaum nga mahimong mas maayo.”
Tungod sa Pag-ula adunay paglaum. Ug tungod sa paglaum, ang Pag-ula makapausab sa atong mga kinabuhi.
Mga litrato pinaagi ni Adam C. Olson