Kami Namulong kang Kristo
Pagbati nga Naayo
Unsaon nako sa pag-ilis og diaper, pag-andam og panihapon, o paghupay sa akong mga anak gamit ang usa lang ka bukton?
Sa dihang 17 anyos ko, naputol ang akong wala nga bukton tungod sa aksidente sa sakyanan. Kini nga kasinatian nakausab sa tibuok kong kinabuhi. Bisan tuod adunay lisud nga mga adlaw ug mga higayon sa pagpaningkamot, kining lisud kaayo nga hagit naghatag kanako og oportunidad sa pagsaksi sa gahum sa Pag-ula sa talagsaong paagi.
Ang akong kinabuhi karon kabahin sa pagka-asawa ug pagkainahan, duha ka tahas nga ganahan kaayo ko. Sa wala pa nangatawo ang akong mga anak, naghunahuna ko sa akong pagkaangay isip usa unya ka inahan. Unsaon nako sa pag-ilis og diaper, pag-andam og panihapon, o paghupay sa akong mga anak gamit ang usa lang ka bukton? Kinse ka tuig ang milabay, anaa ko sa tunga-tunga sa pagkainahan uban sa lima ka buotang mga anak. Naka-adjust ko og maayo, ug ang akong mga anak halos wala na makabantay nga lahi ko sa ubang mga inahan. Ang pagkawala sa akong usa ka bukton dili na usa ka babag apan usa ka simbolo sa gugma. Kini usa ka tinubdan sa paghupay nga kuptan sa akong mga anak kon sila manghilak o matulog inigkagabii. Kini nga kasuod nahimo gumikan sa daghang mga butang, apan ako kining gilantaw isip ebidensya sa abilidad sa Manluluwas sa pagmugna og usa ka maayo nga butang gikan sa usa ka butang nga bati.
Dili nako mahulagway ang katam-is nga akong mabati nga kana nga bahin kanako makahupay sa akong mga anak. Ang pagkainahan nakahatag kanako og panglantaw sa akong pisikal nga kakulang, ug mibati ko nga ang Pag-ula misugod sa pag-ayo kanako.
Ang kada adlaw nga panginahanglan sa pagkainahan usahay lisud kaayo. Ang kalisdanan naghatag kanako og rason nga mamalandong sa katinuod sa Pagkabanhaw ug sa abilidad sa Manluluwas sa pag-ayo kanako. Sa ingon ang mga ehemplo nga makapalambo og pagtuo kabahin sa pag-ayo nga mabasa diha sa kasulatan adunay espesyal nga kahulugan ngari kanako. Usa sa akong paborito mao ang pagbisita sa Manluluwas ngadto sa mga katawhan sa Amerika ug miayo sa ilang masakiton. Naghunahuna ko kon unsa kaha ang mahitabo kon usa ko niadtong giayo sa Manluluwas. Ang asoy nagsugod sa Iyang mahigugmaong pagdapit:
“Aduna ba kamo dihay mga masakiton? Dad-a sila ngari. Aduna ba kamo dihay mga bakol, o mga buta, o mga pungkol, o mga angol, … o kadto nga gitakbuyan sa tanan nga mga matang sa sakit? Dad-a sila ngari ug Ako moayo kanila, kay Ako adunay kalooy diha kaninyo; ang akong kasingkasing napuno sa kalooy. …
“… Kay Ako nakakita nga ang inyong hugot nga pagtuo igo nga Ako moayo kaninyo.
“… Sa diha nga siya nahuman sa pagpamulong, ang tanan nga pundok sa mga katawhan, nagkahiusa, ug miduol uban sa ilang mga masakiton ug may mga balatian, ug ilang mga bakol, ug uban sa ilang mga buta, ug uban sa ilang mga amang, ug sa tanan kanila nga gitakbuyan sa tanan nga matang sa sakit; ug siya miayo kanila matag usa kanila” (3 Nephi 17:7–9).
Alang kanako, kini mao ang usa sa labing makatandog nga panghitabo nga gihulagway diha sa mga kasulatan. Apan ang akong panglantaw nausab sa dihang akong gidawat ang pagkainahan nga may usa lang ka bukton. Sa una naghunahuna ko nga usa ko sa mga tawo nga naghinam-hinam sa Pagkabanhaw ug sa ideya nga maayo sa hingpit. Apan karon wala nako magdali-dali. Nagpadayon, mibati ko nga ang Pag-ula may epekto sa akong kinabuhi karon. Nakaamgo ko nga ang gahum sa pag-ayo dili kinahanglang magsugod lamang kon mahitabo na ang Pagkabanhaw. Ang pagkaayo nagsugod sa dihang, kada gabii, usa sa akong mga anak malumo nga mokupot sa nabilin nga bukton ug dayon makatulog. Kini nga pagkaamgo ingon nga makahuluganon kaayo nako sama sa bisan unsa nga milagro sa pisikal nga pagkaayo. Nakahukom ko nga, sa karon, igo ang akong pagkaayo sama nga kinahanglan ko nga mamahimo.
Sa ibabaw: gilitratohan ni Robert Casey