Ang Bili sa Edukasyon

Ang edukasyon usa ka mahinungdanon nga bahin sa ebanghelyo ug sa pagpangandam aron maapil sa katilingban ug sa pagsangkap sa indibidwal ug sa iyang pamilya.¹ Si Elder Craig A. Cardon sa Seventy naghisgut sa kaimportante sa edukasyon sa mga pahina 54–55 niini nga isyu.

“Niining nagkalisud nga kalibutan, ang edukasyon mao ang usa sa labing importante nga maangkon sa kinabuhi,” siya nagsulat. “Ug samtang tinuod nga ang dugang edukasyon sa kinatibuk-an mosangpot sa oportunidad alang sa dugang nga temporal nga mga ganti, ang mas dakong bili sa dugang kahibalo mao ang oportunidad nga ikahatag niini nato nga mahimong dakong impluwensya sa pagtuman sa mga katuyoan sa Ginoo.”

Nasulat sa Alang sa Kalig-on sa mga Kabatan-onan: “Ang inyong edukasyon kinahanglang maglakip sa espirituhanong pagkat-on. Pagtuon sa mga kasulatan ug sa mga pulong sa mga propeta sa ulahing mga adlaw. Apil sa seminary ug institute. Padayon sa tibuok ninyong kinabuhi sa pagkat-on kabahin sa plano sa Langitnong Amahan. Kining espirituhanon nga pagkat-on motabang kaninyo nga makit-an ang tubag sa mga hagit sa kinabuhi ug modapit sa pagpakig-uban sa Espiritu Santo.”²

Mga Sugyot sa Pagtudlo sa mga Batan-on

Pagbasa sa seksyon sa edukasyon sa Alang sa Kalig-on sa mga Kabatan-onan. Pagpakigbahin sa inyong positibong mga kasinatian diha sa eskwelahan ug sa pagtuon sa ebanghelyo. Kini makapahimo kaninyo sa paghisgut niining sumbanan uban sa inyong tin-edyer ug sa pagtubag sa bisan unsa niya nga pangutana.
Pagtabang sa inyong tin-edyer sa paghan-ay og mga tumong sa panarbaho ug sa pag-eskwela nga nakabase sa iyang mga talento ug mga interes. Pagtabang kanila sa pag-ila og pipila ka mga lakang sa pagsugod sa pagtrabaho niining mga tumong.
Pagkonsiderar sa pagbuhat og family home evening sa kaimportante sa edukasyon (usa ka maayong kapanguhaan mao ang artikulo ni Elder Dallin H. Oaks ug Kristen M. Oaks, “Pagtuon ug Mga Santos sa Ulahing mga Adlaw,” Liahona, Abr. 2009, 26–31).
Pagbisita sa youth.lds.org ug iklik ang “For the Strength of Youth” ubos sa Youth Menu. Ubos sa “Education,” kamo makakita og mga kasulatan kabahin sa edukasyon, mga video (tan-awa, sama pananglit, “Surfing or Seminary?”), mga programa sa radyo sa Mormon Channel, mga pangutana ug mga tubag, ug mga artikulo, lakip sa mga pakigpulong sa mga General Authority.

Mga Sugyot sa Pagtudlo sa mga Bata

Makalingaw nga makakat-on og bag-ong mga butang, apan ang pagkat-on mahimong lisud usab. Ang isyu karong bulana naglakip sa istorya nga giulohan og “Andam sa Pagbasa” (pahina 66). Ang istorya naghulagway sa usa ka babaye nga may dyslexia kinsa nanlimbasug sa pagbasa og kusog ug sa unsang paagi ang mga bata sa Primary nag-awhag kaniya sa pagbuhat sa iyang pinakamaayo. Ikonsiderar sa pagbasa niining istorya ngadto sa inyong mga anak ug magdungan sa paghisgut sa mosunod nga mga pangutana:

Unsa ang gibati ni Mary sa dihang siya naningkamot sa pagbuhat og usa ka lisud nga butang? Nganong importante nga padayong makat-on bisan kon lisud?
Unsa ang gibuhat sa ubang mga bata aron matabangan si Mary? Unsa ang inyong mahimo aron matabangan ang uban sa pagkat-on diha sa panimalay, sa simbahan, ug sa eskwelahan?

Paghulagway pinaagi ni Taia Morley