Ang Akong Unang Pag-ampo kabahin sa Unang Panan-awon

Jing-juan Chen, Taiwan

Sa dihang mihukom ko nga magpabunyag, tungod kini kay nasulbad ang akong mga problema samtang naminaw sa mga panaghisgutan. Dili ni tungod nga nag-ampo ko ug nakadawat og pagpamatuod nga ang Basahon ni Mormon tinuod o si Joseph Smith nakakita sa Langitnong Amahan ug sa iyang Anak, si Jesukristo. Ang mga misyonaryo midapit kanako sa pag-ampo kabahin niining mga butanga, apan wala nako buhata. Yano lang ko nga mituo sa gipangtudlo sa mga misyonaryo ngari kanako.

Tulo ka tuig human sa akong bunyag, usa ka sister ang mibarug sa podium sa chapel ug mipakigbahin sa iyang pagpamatuod sa Basahon ni Mormon ug ni Joseph Smith. Siya mihangyo sa tanan sa pagpamalandong niining pangutana: “Kita ba matinuorong nag-ampo kabahin sa katinuod sa Basahon ni Mormon ug sa kasinatian ni Joseph Smith?” Naigo kaayo ko niining pangutanaha, ug naghunahuna ko, “Wala pa gyud ko kaampo niining mga butanga, apan kinahanglan nako ning buhaton ug buhaton gyud nako.”

Nadasig ko sa pagbuhat niini tungod kay ang akong pagtuo niadtong higayona huyang pa ug ang akong pagpamatuod sa kasulatan mabaw pa. Nianang gabhiuna nag-ampo ko sa akong Langitnong Amahan kabahin ni Joseph Smith ug sa katinuod sa Basahon ni Mormon.

Wala pa koy nabati sa unang higayon nga nag-ampo ko, ni sa ikaduha. Wala mawad-i og kadasig, giablihan nako ang akong kasulatan sa Joseph Smith—Kasaysayan 1:14–17, kini naghulagway giunsa ni Joseph pag-adto sa kakahoyan alang sa personal nga pag-ampo:

“Ako nakakita og usa ka dako nga gilis sa kahayag ibabaw gayud sa akong ulo, labaw sa kahayag sa adlaw, nga nag-anam og paubos hangtud kini midapat kanako.

“Diha-diha nga kini mipakita ako nakakaplag sa akong kaugalingon nga giluwas. … Sa diha nga ang kahayag midapat kanako ako nakakita og duha ka Personahe.”

Samtang nagbasa ko sa mga pulong, mikurog ko ingon og nakuryentahan ang akong tibuok lawas. Diha-diha dayon nasayran nako nga si Joseph Smith sa tinuoray nakakita sa Langitnong Amahan ug sa Iyang Pinalanggang Anak, si Jesukristo. Nasayud ko nga kita anaay Basahon ni Mormon tungod kay gipahubad kini sa Dios pinaagi sa Iyang propeta.

Mapasalamaton ko nga ang Langitnong Amahan mihatag kanako niining saksi sa katinuod sa Unang Panan-awon. Nakaamgo ko nga kon ang ebanghelyo wala pa gipahiuli, dili unta nako masayran ang akong Manunubos. Nasayud ko nga ang kahingpitan sa ebanghelyo tinuod, ug nasayud ko nga akong madawat ang mga saad sa Dios kon matinud-anon kong molahutay sa katapusan.