Mensahe sa Unang Kapangulohan
Ang Tingog sa Ginoo
Ang Doktrina ug mga Pakigsaad nagdapit sa tanang katawhan bisan asa sa pagpaminaw sa tingog ni Ginoong Jesukristo (tan-awa sa D&P 1:2, 4, 11, 34; 25:16). Kini napuno sa Iyang mga mensahe, pasidaan, ug madasigong pag-awhag nga gihatag pinaagi sa pagpadayag ngadto sa pinili nga mga propeta. Niining mga pinadayag makita kon sa unsang paagi ang Dios motubag sa atong mga pag-ampo nga may hugot nga pagtuo pinaagi sa mga mensahe sa panudlo, kalinaw ug pasidaan.
Sa atong mga pag-ampo kita nagtinguha nga masayud kon unsa ang gusto sa Ginoo nga atong buhaton, unsa ang angay natong buhaton aron kita makakaplag og kalinaw ug kalipay niini ug sa sunod nga kinabuhi, ug unsay nagpaabut kanato. Ang Doktrina ug mga Pakigsaad napuno sa mga tubag nga gipangutana sa ordinaryong mga tawo ug mga propeta diha sa mapainubsanong pag-ampo. Kini mahimong bililhon nga giya nga nagtudlo kanato kon unsaon makadawat og tubag sa mga pangutana kabahin sa atong temporal nga kaayohan ug mahangturong kaluwasan.
Ang pagkamapainubsanon ug hugot nga pagtuo diha sa Ginoong Jesukristo mao ang yawe. Si Oliver Cowdery nakadawat og tubag gikan sa Ginoo kabahin sa iyang tinguha sa pagtabang og hubad sa Basahon ni Mormon: “Hinumdumi nga kon wala ang hugot nga pagtuo ikaw walay mahimo; busa pangayo diha sa hugot nga pagtuo. Ayaw pagtiaw-tiaw niini nga mga butang; ayaw pangayo niana nga wala nimo kinahanglana” (D&P 8:10).
Nagbalik-balik diha sa Doktrina ug mga Pakigsaad, ang Ginoo nagkinahanglan sa hugot nga pagtuo ug pagkamapainubsanon sa dili pa Siya motabang. Usa sa rason niini mao nga ang Iyang mga tubag dili mao ang atong gipaabut. Ni sa kanunay sayon kini dawaton.
Ang kasaysayan sa simbahan ug ang mga kasinatian sa atong katigulangan naghulagway niini nga reyalidad. Ang akong apohan sa tuhod nga si Henry Eyring nag-ampo pag-ayo kon unsa ang angay niyang buhaton sa dihang nakadungog siya sa gipahiuli nga ebanghelyo niadtong 1855. Ang tubag miabut pinaagi sa damgo.
Siya nagdamgo nga siya naglingkod uban nila ni Elder Erastus Snow sa Korum sa Napulog Duha ka mga Apostoles ug sa usa ka elder nga ginganlan og William Brown. Si Elder Snow mitudlo sa mga baruganan sa ebanghelyo nga ingon og milungtad og mga usa ka oras. Dayon si Elder Snow miingon, “Sa ngalan ni Jesukristo ikaw akong gimandoan nga magpabunyag ug kining tawhana [si Elder Brown] … mobunyag kanimo.”1 Mapasalamaton ang akong pamilya nga si Henry Eyring may hugot nga pagtuo ug pagkamapainubsanon nga mabunyagan sa 7:30 sa buntag sa lim-aw nga napuno sa ulan sa St. Louis, Missouri, USA, ni Elder Brown.
Ang tubag sa iyang pag-ampo wala moabut pinaagi sa klarong tingog gikan sa Ginoo. Kini miabut pinaagi sa usa ka panan-awon ug damgo diha sa usa ka gabii, sama sa nahitabo ni Lehi (tan-awa sa 1 Nephi 8:2).
Ang Ginoo nagtudlo usab kanato nga ang mga tubag moabut usab isip mga pagbati. Sa Doktrina ug mga Pakigsaad, Siya mitudlo ni Oliver Cowdery, “Tan-awa, Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabut diha kanimo ug nga mopuyo diha sa imong kasingkasing” (D&P 8:2).
Ug Iyang gidasig si Oliver niining paagiha: “Wala ba Ako magsulti og kalinaw nganha sa imong hunahuna mahitungod niini nga butang? Unsa ka labaw nga kamatuoran ang imong maangkon kay sa gikan sa Dios?” (D&P 6:23).
Ang Doktrina ug mga Pakigsaad, ang kasaysayan sa Simbahan, ug ang kasaysayan nga gihuptan ni Henry Eyring sa iyang misyon human sa iyang bunyag nagtudlo kanako nga ang mga tubag mahimong mabati isip pasidaan ingon man isip kalinaw.
Niadtong Abril 1857, si Elder Parley P. Pratt sa Korum sa Napulog Duha ka mga Apostoles mitambong og komperensya sa dapit nga mao karon ang Oklahoma, USA. Si Henry Eyring mirekord nga ang hunahuna ni Elder Pratt “napuno og makapaguol nga panghunahuna … , dili makakita sa umaabot o sa bisan unsang paagi nga makalingkawas.”2 Si Henry mirekord sa makaguol nga balita sa pagkamartir sa Apostol pagkahuman niini. Si Elder Pratt mipadayon sa iyang panaw bisan sa mga pagbati sa kakuyaw, sama sa gibuhat ni Propeta Joseph sa pag-adto sa Carthage.
Kini akong pagpamatuod nga ang Ginoo kanunay motubag sa mga mapainubsanong pag-ampo nga may hugot nga pagtuo. Ang Doktrina ug mga Pakigsaad ug ang atong personal nga mga kasinatian nagtudlo kanato kon unsaon nato pag-ila niadtong mga tubag ug pagdawat niini nga may hugot nga pagtuo, kini maghatag man og giya, pagkumpirma sa kamatuoran, o usa ka pasidaan. Nag-ampo ko nga kita kanunay maminaw ug moila sa mahigugmaong tingog sa Ginoo.
Pagtudlo Niini nga Mensahe
1. Ikonsiderar nga magdungan og basa sa mga paragraph kabahin sa pag-ampo niini nga mensahe. Samtang magbasa, hangyoa ang mga sakop sa pamilya nga maminaw pag-ayo kon sa unsang paagi ang Dios motubag sa mga pag-ampo. Ikonsiderar sa pagpamatuod sa kaimportante sa pag-ampo.
2. Ang Doktrina ug mga Pakigsaad napuno og mga tubag nga gipangutana sa mga tawo diha sa pag-ampo. Unsa kaha kon ang mga tubag sa ilang mga pangutana (mga pinadayag) wala marekord? Dasiga ang pamilya sa pagkat-on sa pag-ila ug pagsunod sa mga aghat sa Espiritu. Mahimo nilang irekord ang ilang panghunahuna kabahin sa pag-ampo diha sa ilang journal.
Sa wala: Dinhi nga journal, si Henry Eyring (litrato sa wala) mirekord sa mga panghitabo human sa pagkamartir ni Elder Parley P. Pratt (litrato ubos sa litrato ni Henry Eyring). Ang pahina sa journal diha sa wala naghisgot sa pagkamartir. Ubos sa journal mao ang 1890 nge edisyon sa Doktrina ug mga Pakigsaad.
Litrato ni Parley P. Pratt sa maayong kabubut-on sa Church History Library; journal ug litrato ni Henry Eyring sa maayong kabubut-on sa University of Utah Marriott Library Special Collections; litrato sa mga item ni David Stoker