Pagtabang sa Kabatan-onan nga Mahimong Gamhanan nga mga Tigkat-on ug mga Magtutudlo
Ang bag-ong kurikulum sa kabatan-onan, Come, Follow Me: Learning Resources for Youth, [Dali, Sunod Kanako: Mga Kapanguhaan sa Pagkat-on alang sa Kabatan-onan], nagpasabut sa upat ka epektibong paagi nga ang mga ginikanan, mga magtutudlo, ug mga lider makatabang sa kabatan-onan nga makabig ngadto sa ebanghelyo.
Sa asoy sa kasulatan mahitungod sa pagkabatan-on ni Jesukristo, atong mahibaloan nga ang 12 anyos nga Manluluwas nakita uban “sa mga doktor diha sa templo naminaw ngadto ni Jesus ug nangutana kaniya og mga pangutana.
“Ug ang tanan nakadungog kaniya nahitingala sa iyang pagpanabut ug sa iyang pagpanubag” (Hubad ni Joseph Smith, Lucas 2:46–47 [sa Lucas 2:46, footnote c]).
Gikan pa sa pagkabatan-on ang Manluluwas miapil sa pagkat-on ug pagtudlo sa ebanghelyo. Didto sa templo, ang Manluluwas mitudlo sa mga baruganan sa ebanghelyo niadtong giisip nga daghan og kahibalo ug mas sinati kay Kaniya. Apan Siya nakasabut nga ang pagkat-on ug pagtudlo sa ebanghelyo kabahin sa “balay sa Iyang Amahan” (Lucas 2:49).
Walay pangutana, si Jesukristo usa ka talagsaong tigkat-on ug magtutudlo sa ebanghelyo, bisan sa batan-on pa; apan nagdako Siya sa Iyang kapasidad sa pagsabut ug pagtudlo sa doktrina. Ang mga kasulatan nagsulti nato nga Siya “nakaangkon og grasya ug dugang pa nga grasya, hangtud nga siya nakadawat sa kahingpitan” (D&P 93:13). Kon ang kabatan-onan karon kanunay nga motumong sa ilang mga kinabuhi sa unsay ilang nahibaloan nga tinuod, sila usab tinud-anay nga makabig ngadto sa Manluluwas ug sa Iyang ebanghelyo ug magdako diha sa kaalam “pagtulun-an human sa usa ka pagtulun-an, lagda human sa usa ka lagda” (2 Nephi 28:30).
Sa giya sa bag-ong mga materyal sa kurikulum sa kabatan-onan, ang Unang Kapangulohan namahayag, “Kamo gitawag sa Ginoo sa pagtabang sa kabatan-onan nga makabig ngadto sa ebanghelyo.”1 Samtang kita magtuon ug magsunod sa pangalagad sa Manluluwas, epektibo kitang makasuporta sa atong kabatan-onan sa ilang panaw sa pagkat-on, pagsunod ug pagtudlo sa ebanghelyo ni Jesukristo. Sama sa Manluluwas, maandam nato ang atong mga kaugalingon sa espirituhanon, motubag sa mga panginahanglan sa atong kabatan-onan, moawhag nila sa pagdiskobre sa mga kamatuoran sa ebanghelyo, ug mohagit nila nga makabig samtang sila magbaton og hugot nga pagtuo.
Pagpangandam sa Espirituhanon nga Paagi
Sa wala pa magsugod ang Iyang mortal nga pangalagad, ang Manluluwas miandam sa Iyang Kaugalingon sa espirituhanong paagi pinaagi sa pagkugi sa pagtuon, pag-ampo, ug pagpuasa. “Gigiyahan sa Espiritu, ngadto sa kamingawan, aron makig-uban sa Dios” ug “nagpuasa sulod sa kap-atan ka adlaw ug kap-atan ka gabii” (Hubad ni Joseph Smith, Mateo 4:1–2 [sa Mateo 4:1, footnote b]). Sa katapusan sa Iyang pagpuasa, nag-atubang ang Manluluwas og mga tintasyon gikan sa kaaway. Ang pagtuon sa kasulatan nakatabang ni Jesus sa pagbatok sa kada tintasyon ginamit ang mga bersikulo gikan sa mga kasulatan (tan-awa sa Mateo 4:3–10). Espirituhanong pagpangandam nakapahimo Niya dili lamang sa pagpakigbatok sa tintasyon sa malampusong paagi sa tibuok Niyang kinabuhi, apan sa gamhanang pagtudlo usab sa ebanghelyo sa Iyang tibuok pangalagad.
Ang pagtudlo sa kabatan-onan nagkinahanglan og dugang pagpangandam kay sa pagtan-aw og dali-dali sa manwal pipila ka minuto sa dili pa magsugod sa pagtudlo. Ang Ginoo misugo, “Ayaw pagtinguha sa pagpahayag sa akong pulong, apan unaha ang pagbaton sa akong pulong” (D&C 11:21). Makaandam kita sa espirituhanong paagi pinaagi sa mainampoong pagtuon sa mga kasulatan ug sa mga pulong sa buhi nga mga propeta sa pagkat-on sa tinuod nga doktrina. Samtang mag-andam kita niining paagiha, ang Espiritu Santo momatuod sa kamatuoran sa doktrina ug moaghat nato sa paghinumdom sa mga kasinatian sa pagpuyo sa doktrina nga atong mapaambit.
Sa pagtudlo sa batan-ong mga babaye mahitungod sa kaimportante sa personal nga pagpadayag, si Estefani Melero nga gikan sa Lima Peru Surco Stake naaghat sa pagpakigbahin sa iyang kasinatian nga nagtinguha og pagpamatuod sa edad nga 14. Nagpamatuod siya ngadto sa batan-ong mga babaye nga samtang siya sinserong nag-ampo aron makahibalo sa kamatuoran sa ebanghelyo, usa ka tingog ingon og naghung-hong sa iyang kasingkasing og mga pulong nga dili gayud niya makalimtan: “Nakahibalo ka kini tinuod, Estefani. Nakahibalo ka kanunay.”
Samtang atong tun-an ug sundon ang doktrina nga atong gitudlo, mahimo kitang mas labaw pa sa mga magtutudlo—mahimo kitang mga saksi sa kamatuoran.
Mga Pangutana nga Palandungon: Unsay lain pang mga kasulatan nga nagpakita giunsa sa Manluluwas pag-andam sa Iyang Kaugalingon sa pagtudlo? Sa unsa nga paagi nga ang inyong pagpaningkamot sa pag-andam sa pagtudlo nakaimpluwensya sa kaepektibo sa inyong mensahe?
I-focus ang mga Panginahanglan
Sa Iyang inter-aksyon sa datu nga batan-ong punoan, ang Manluluwas nagpakita nga Siya nakasabut sa mga panginahanglan niadtong Iyang gitudloan. Ang punoan nagsugod sa usa ka pangutana: “Unsay bay buhaton ko aron makapanunod ako sa kinabuhing dayon?” Human makatudlo ang Manluluwas sa kaimportante sa pagsunod sa mga sugo, ang batan-ong punoan mitubag, “Kanang tanan ako nang ginabantayan sukad pa sa akong pagkabatan-on.” Nahibalo nga ang kasingkasing sa punoan kulang pa og “usa ka butang,” gihagit ni Jesus ang tawo sa pagbaligya sa tanan niyang kabtangan, ihatag kini sa kabus, ug mosunod Kaniya. (Tan-awa sa Lucas 18:18–23.) Kon kita mag-ampo alang sa pagpadayag ug makahibalo sa mga interes, mga paglaum, mga tinguha sa kabatan-onan, kita—sama sa Manluluwas—makahibalo unsaon sa pagtudlo ug paghagit nila sa pagsunod sa ebanghelyo sa makahuluganong paagi.
Si Presidente Boyd K. Packer, Presidente sa Korum sa Napulog Duha ka mga Apostoles, mipahayag nga ang atong “kabatan-onan nagdako diha sa teritoryo sa kaaway.”2 Isip mga ginikanan ug mga magtutudlo, kinahanglang atong masabtan ang mga kalisud nga giatubang sa atong kabatan-onan. Si Kevin Toutai, usa ka magtutudlo sa Sunday School sa kabatan-onan didto sa Columbine Colorado Stake, mipahayag, “Ang mga hagit nga giatubang sa kabatan-onan dili matudlo gikan sa manwal. Mao kana ang personal nga pagpadayag nga atong madawat isip magtutudlo sa pagtabang ug pagpaandam sa atong kabatan-onan sa pagpakigbatok ni Satanas kada adlaw. Ako nakita nga dili lang ka moanha sa Dominggo uban sa manwal ug mohatag sa leksyon.”
Ang pagtabang sa kabatan-onan nga makat-on ug pagsunod sa ebanghelyo naglakip sa hiniusang mga paningkamot sa mga ginikanan, mga lider, mga tigtambag, ug mga magtutudlo. Kon magtinguha kita sa inspirasyon gikan sa Espiritu Santo, epektibo kitang makatudlo sa doktrina nga makapaandam sa kabatan-onan sa mga tintasyon ug mga hagit nga ilang giatubang.
Mga Pangutana nga Palandungon: Sa unsa nga paagi nga lahi ang kalibutan karon kay sa dihang kamo ang mga batan-on? Unsa nga mga hagit ang inyong nakita nga giatubang sa kabatan-onan? Unsa nga mga doktrina sa ebanghelyo, kon masabtan, ang makatabang nila nga magmalampuson sa pag-atubang sa mga hagit?
Imbitara ang Kabatan-onan sa Pagdiskobre sa mga Kamatuoran sa Ebanghelyo
Ang Manluluwas mitudlo sa Iyang mga tinun-an sa mga paagi nga makapaawhag nila sa pagdiskobre sa kamatuoran ug makaangkon og personal nga mga pagpamatuod. Sa dihang nagtudlo sa mga Nephite, Siya miingon:
“Ako nakasabut nga kamo mahuyang, nga kamo dili makasabut sa akong tanan nga mga pulong nga gisugo kanako sa Amahan nga isulti nganha kaninyo niini nga higayon.
“Busa pamauli kamo sa inyong mga panimalay ug palandonga kini nga mga pulong nga Ako miingon, ug pangayoa sa Amahan, pinaagi sa akong ngalan, aron kamo makasabut, ug i-andam ang inyong mga huna-huna alang sa ugma, ug Ako moanha kaninyo pag-usab” (3 Nephi 17:2–3).
Ang pagtudlo nga sama kang Kristo naglakip og mas labaw pa sa paghatag og impormasyon. Naglakip kini sa paggiya sa kabatan-onan sa pagsabut sa doktrina alang sa ilang mga kaugalingon. Samtang matintal kita sa pag-lecture nila bahin sa ebanghelyo, mas epektibo kita kon kita motabang nila sa pagpangita sa mga tubag alang sa ilang mga kaugalingon, makahimo nila sa pag-angkon sa ilang kaugalingong mga pagpamatuod, ug pagtudlo nila unsaon as pagpangita og mga tubag kon sila dunay mga pangutana. Sumala sa gipasabut sa bag-ong kurikulum sa kabatan-onan, Come, Follow Me: Learning Resources for Youth [Dali, Sunod Kanako: Mga Kapanguhaan sa Pagkat-on alang sa Kabatan-onan], makaimbitar usab kita nila sa pagpakigbahin sa ilang mga kasinatian sa pagpuyo sa ebanghelyo ug sa pagpamatuod ngadto sa ilang mga kaedad sa mga butang nga ilang nahibaloan nga tinuod.
Si Elder Kim B. Clark, Area Seventy ug presidente sa BYU–Idaho, miistorya karong bag-o mahitungod sa deacons quorum kansang tigtambag naghisgot og pag-ampo uban nila. Sa wala damha, ang presidente sa deacons quorum mipataas sa iyang kamot ug miingon, “Gusto ko nga mangutana sa korum. Kinsa ninyo ang andam nga mopasalig nga mag-ampo buntag ug gabii kada adlaw karong semanaha?” Ang tanang mga sakop sa korum mipataas sa ilang mga kamot gawas sa usa ka batan-ong lalaki, kinsa dili makapasalig nga makasunod sa mao nga hagit. Ang tigtambag naglingkod lang ug nagtan-aw sa mga sakop sa korum nga nagtudlo ug nagpamatuod sa ilang ka edad mahitungod sa pag-ampo, nagtabang niya nga makaangkon og pagsalig sa pagdawat sa hagit.
Mga Pangutana nga Palandungon: Sa unsa nga mga paagi inyong namatikdan ang mga magtutudlo nga nag-awhag sa mga sakop sa klase nga aktibong moapil sa bahin sa pagkat-on? Unsaon ninyo sa pagtabang ang kabatan-onan nga inyong gitudloan nga makapalambo og mga kinaiya sa pagtuon sa ebanghelyo? Gawas sa pagpanaghisgot, unsay laing mga paagi sa pagpaapil sa kabatan-onan sa pagkat-on sa ebanghelyo?
I-awhag ang Konbersyon
Ang konbersyon usa ka tibuok kinabuhi nga proseso nga naglakip sa pakat-on ug pagsunod sa ebanghelyo kada adlaw. Labaw pa kay sa pagkahibalo lang sa ebanghelyo, ang konbersyon “kinahanglang nga kita mobuhat ug mahimo.”3 Human makatudlo sa Iyang mga tinun-an mahitungod sa kapuangod sa maayo nga Samarianhon, ang Manluluwas mihagit kanila, “Lakaw ug buhata ang ingon” (Lucas 10:37). Miawhag Siya nila nga mas labaw kay sa tigpaminaw sa pulong ug sa paglihok pinaagi sa pagtuo sa Iyang mga pagtulun-an.
Kinahanglan nga awhagon nato ang kabatan-onan nga magkugi sa pagsunod sa ebanghelyo tungod kay ang konbersyon dili lang mahitabo sa usa ka higayon sa pagtudlo. Ang konbersyon mahitabo kon ang kabatan-onan makasabut sa tinuod nga doktrina ug makaestablisar og mga sumbanan sa pagtuon sa ebanghelyo ug matarung nga pagpuyo, samtang sila atong awhagon sa paghimo sa Dali, Sunod Kanako.
Si Krista Warnick, presidente sa Young Women sa Arapahoe Colorado Stake, miingon, “Ang kabatan-onan karon nag-atubang og daghang mga hagit nga wala nako madunggi sukad hangtud nga mas mihingkod na ako. Akong napalambo ang akong pagpamatuod sa kasagaran kon ako maglihok sa akong kaugalingon ug makahimo ug makaimplementar sa mga butang nga akong nakat-unan sa mga klase sa Young Women. Ang paghatag sa kabatan-onan og mga hagit ug mga oportunidad sa paggamit sa ilang pagtuo makatabang nila sa pagpalambo sa sukaranan sa ilang mga pagpamatuod sa mas bata pa.”
Ang hagit sa konbersyon dili lamang nga kita makat-on sa ebanghelyo apan usab nga kita mag-usab tungod sa unsay atong nakat-unan. Kinahanglang kitang motabang sa kabatan-onan nga makasabut nga ang ilang “dako nga kausaban” (Alma 5:14) sa kasingkasing dili mahitabo diha-diha dayon, apan kini moabut sa hinay-hinay samtang sila magpalambo og kanunay nga mga kinaiya sa pagtuon, pag-ampo kanunay, ug pagsunod sa mga sugo. Samtang sila magbuhat niining mga butang, ilang mamatikdan nga ang ilang mga tinguha, mga kinaiya, ug mga aksyon mausab sa pagpakita sa kabubut-on sa Amahan.
Mga Pangutana nga Palandungon: Unsay nahimo sa inyong mga paningkamot sa pagkat-on ug pagsunod sa ebanghelyo sa inyong kaugalingong konbersyon? Sa unsa nga paagi kamo nalig-on sa mga ginikanan ug sa mga magtutudlo ug mga lider sa Simbahan?
Pagsuporta sa Atong Kabatan-onan
Dali, Sunod Kanako nagrepresentar lang kabahin sa paningkamot sa pagsuporta sa kabtan-onan. Dugang sa indibidwal nga responsibilidad sa kada batan-on nga mas makabig, “ang mga ginikanan adunay unang responsibilidad sa pagtabang sa ilang mga anak nga makaila sa Langitnong Amahan ug sa Iyang Anak nga si Jesukristo.”4 Kita nga naglihok uban sa kabatan-onan makasuporta sa mga ginikanan ug makasunod sa ehemplo sa Manluluwas kon kita mangandam sa espirituhanong paagi, mo-focus sa mga panginahanglan sa kabatan-onan, moimbitar nila sa pagdiskobre sa mga kamatuoran sa ebanghelyo, ug mohatag nila og mga oportunidad sa paglihok ginamit ang pagtuo ug mahimong makabig. Samtang kita maningkamot sa pagsunod ni Jesukristo, mas mahimo kitang maayong tigkat-on ug mga magtutudlo, ug kita nagtabang sa umaabut nga mga lider sa atong mga komunidad ug sa stong Simbahan nga mahimong gamhanang mga tigkat-on ug mga magtutudlo sa ilang mga kaugalingon.
Espirituhanong pagpangandam—pagtuon, pag-ampo, ug pagpuasa—makatabang sa magtutudlo ug sa tigkat-on nga mobati sa impluwensya sa Espiritu.
Si Kristo sa Emmaus, ni Walter Rane© IRI
Ang kabatan-onan makapalig-on sa usag usa kon sila magpakigbahin sa ilang mga kasinatian sa pagsunod sa ebanghelyo.
PAGHULAGWAY SA LITRATO PINAAGI NI CRAIG DIMOND
Ang mga ginikanan mao ang responsable sa pagtabang sa ilang mga anak sa pagdiskobre sa mga kamatuoran sa ebanghelyo, ug ang kada batan-ong babaye ug batan-ong lalaki adunay indibidwal nga responsibilidad nga mas mahimong hingpit nga nakabig. Ang mga lider ug mga ginikanan sa kabatan-onan nagsuporta niini nga mga paningkamot.
PAGHULAGWAY SA LITRATO PINAAGI NI RICHARD Romney