Pagbarug sa Mas Taas nga Dapit
Ang 2013 nga tema sa Mutual gikuha gikan sa Doktrina ug mga Pakigsaad 87:8: “Busa, barug kamo sa balaan nga mga dapit, ug ayaw pagbalhin, hangtud ang adlaw sa Ginoo moabut.” Ang pangutana nga akong gilauman nga palandungon sa batan-ong lalaki niining umaabut tibuok tuig mao, Nagbarug ba ako sa balaan nga mga dapit?
Samtang akong nahimamat ang halangdong mga batan-ong lalaki sa tibuok kalibutan, ako gayud nga nasaksihan ang liboan ninyo nga naghimo na niini sa daghang mga paagi. Nagbarug kamo sa labing balaan nga mga dapit kada higayon nga kamo mosulod sa templo aron magpahigayon og mga bunyag alang sa mga patay. Moawhag ko ninyo sa pagpahimulos sa kada oportunidad sa pagsulod sa templo ug sa kanunay magpakatakus sa pagbuhat sa ingon. Kada adlaw samtang inyong tumanon ang inyong katungdanan ngadto sa Dios, kamo nagbarug sa balaan nga mga dapit ug anaay kahigayunan sa pagbayaw sa uban. Nagbarug kamo sa balaan nga mga dapit samtang kamo mag-andam, mopanalangin, ug mopaambit sa sakrament kada Dominggo. Nagbarug kamo sa balaan nga mga dapit samtang inyong ipakigbahin ang ebanghelyo ug kon kamo molihok isip kanunay nga ministro—kinsa kanunay nga makahimo, andam, ug takus sa pagserbisyo ug paglig-on sa uban.
Isip tighupot sa Aaronic Priesthood, kamo gihatagan og sugo sa pagpasidaan, pagpatin-aw, pag-awhag, pagtudlo, ug pagdapit sa tanan sa pagduol ngadto kang Kristo (tan-awa sa D&P 20:59). Si Presidente Harold B. Lee (1899–1973) miingon: “Dili mo makabayaw sa laing kalag hangtud nga kamo nagbarug sa mas taas nga dapit kay kaniya. … Dili mo makadagkot og kalayo sa laing kalag gawas kon kini nagsiga na sa inyong kaugalingon kalag.”1 Batan-ong mga lalaki, nagpasabut kini nga kamo kinahanglang maningkamot sa pagpalig-on sa inyong pagpamatuod ug sa kanunay andam nga mopakigbahin niini.
Kamo adunay sagrado nga responsibilidad nga mahimong instrumento sa mga kamot sa Ginoo. Samtang kamo mag-ampo ug magtuon sa mga kasulatan, maningkamot sa pagtuman sa mga sugo, ug maminaw sa mga aghat sa Espiritu, inyong makaplagan ang inyong kaugalingon nga anaa sa mas taas nga dapit. Isip sangputanan, bisan asa kamo kana mahimong usa ka balaan nga dapit. Dayon, kon moabut ang mga sitwasyon, makabaton kamo sa kalig-on, kaisug, ug abilidad sa pagtabang sa pagbayaw sa uban. Makabaton kamo sa gahum ug sa panalipod nga gisaad sa Ginoo niadtong kinsa magbarug sa balaan nga mga dapit.
Ganahan ko sa gisulti ni Presidente Thomas S. Monson mahitungod niini nga mga saad sa dihang iyang gipaniguro nato nga kon kita magpaduol ngadto sa Ginoo, “atong mabatyagan ang Iyang Espiritu sa atong mga kinabuhi, nagahatag nato sa tinguha ug sa kaisug sa pagbarug nga lig-on ug dili matarug sa pagkamatarung—sa ‘pagbarug … sa balaan nga mga dapit, ug ayaw pagbalhin’ (D&P 87:8).
“Samtang nagkausab ang kalibutan libut nato ug ang mga baruganan sa moral sa katilingban nagkahuyang, hinaut atong hinumduman ang bililhong mga saad sa Ginoo niadtong kinsa nagsalig Kaniya: “Ayaw kahadlok; kay ania ako uban kanimo: ayaw pagtalaw; kay ako mao ang imong Dios: Palig-onon ko ikaw; oo buligan ko ikaw’ (Isaias 41:10).”2