Balaan nga mga Dapit sa Inyong Kinabuhi
Ang tema sa Mutual niining tuiga nag-imbitar ninyo sa paghunong nga mahimong kabahin sa kalibutan ug sa pag-focus ngadto sa gingharian sa Dios. Sama sa gitudlo ni Presidente Boyd K. Packer, Presidente sa Korum sa Napulog Duha ka mga Apostoles, nagpuyo kita sa teritoryo sa kaaway.1 “Barug kamo sa balaan nga mga dapit” importante sa paglahutay.
Kini nga tema nag-imbitar og importante nga mga pangutana: Unsa ang usa ka balaan nga dapit? Asa ang balaan nga dapit? Unsaon nato sa pagbarug sa balaan nga mga dapit? Sa unsa nga paagi nga atong mahimo ang mga dapit nga kanunay natong puy-an nga mas balaan? Samtang mangita kamo sa mga tubag niini nga mga pangutana, ang inyong mga tubag mogiya sa inyong mga asosasyon, sa inyong pagpili sa mga kalihokan, ug sa inyong sinina, mga pulong, ug mga buhat.
Mipasalig kamo sa pagpalig-on sa inyong panimalay ug pamilya. Paningkamuti sa paghimo sa inyong panimalay nga usa ka balaan nga dapit, puno sa Espiritu sa Ginoo. Makasuporta kamo sa pag-ampo sa pamilya ug sa pagtuon sa kasulatan.
Ang inyong kwarto mahimong usa ka balaan nga dapit nga nag-imbitar sa Espiritu. Kon ang propeta motan-aw sa inyong kwarto, motan-aw ba siya niini nga usa ka balaan nga dapit? Kamo ba?
Makabarug kita sa balaan nga mga dapit kon kita moadto sa simbahan. Ang mga kasulatan nagtudlo nga ang mga ward ug mga stake sa Zion balaan nga mga dapit nga “alang sa usa ka panalipod, ug alang sa usa ka dangpanan gikan sa unos” (D&P 115:6)
Ang labing balaan nga dapit sa kalibutan mao ang templo. Si Presidente Thomas S. Monson miingon: “Akong batan-ong mga higala nga mga tin-edyer, itumong kanunay sa inyong panan-aw ang templo. Ayaw pagbuhat og bisan unsa nga makapugong ninyo sa pagsulod ug pag-ambit sa sagrado ug mahangturong mga panalangin didto. Modayeg ko niadtong nakaadto na sa templo kanunay aron sa pagpahigayon og mga bunyag alang sa mga patay.”2 Pagpakatakus kanunay sa pagbaton og magamit nga rekomend sa templo, bisan kon ang templo layo.
Bisan asa kamo nga anaa ang Espiritu mahimong usa ka balaan nga dapit. Si Presidente Harold B. Lee (1899–1973) mitudlo nga ang balaan nga mga dapit mas adunay kalabut sa unsang paagi ang tawo nagpakabuhi kay sa diin siya magpuyo.3 Kon nagpakabuhi kamong takus sa kanunay nga pakig-uban sa Espiritu Santo, nan nagbarug kamo sa balaan nga dapit.
Sa kada templo adunay nakasulat nga “Pagkabalaan ngadto sa Ginoo.” Paningkamot sa pagbarug kanunay sa balaan nga mga dapit. Samtang kamo magsunod sa mga sumbanan, mag-ampo kada adlaw, ug magbasa sa mga kasulatan—ilabi na sa Basahon ni Mormon—inyong mabati ang pagpakig-uban sa Espiritu Santo. Ang Ginoo Mismo misaad kaninyo, “Kay sa pagkatinuod Ako moingon nganha kaninyo, nga ang mga mahinungdanon nga butang nagpaabut kaninyo” (D&P 45:62). Ako uyon ug mopamatuod nga kini tinuod!